“Pene 62: Te Mau Pionie i te Haereraa Atu i te Faa i Roto Miti: Tiunu 1846–Tiurai 1847,” Te Mau Aamu no Roto Mai i te Parau Haapiiraa e te Mau Parau Fafau (2002), 224–29
“Pene 62,” Te Mau Aamu no Roto Mai i te Parau Haapiiraa e te Mau Parau Fafau, 224–29
Pene 62
Te Mau Pionie i te Haereraa Atu i te Faa i Roto Miti
(Tiunu 1846–Tiurai 1847)
Te faaea noa ra te mau pionie (Feia Mo‘a) i Council Bluffs. Ua hinaarohia te mau tane puai no te tauturu ia ratou i roto i to ratou mau tere. Ua haere atu hoi te pae rahi o te mau tane apî i roto i te pŭpŭ Faehau Momoni. No reira ua opua ihora te mau pionie ia tiai ia tae i te tau mahanahana no te haere atu i te mau Mou‘a Ofa‘i.
Ua horoa mai te mau Inidia i te tahi mau fenua no te mau Feia Mo‘a i te tahi pae mai o te anavai. I reira ua patu te mau Feia Mo‘a i te hoê oire o tei topahia te i‘oa o Winter Quarters. Ua hamani ratou i te mau purumu e ua patu i te mau fare. Ua hamanihia te tahi mau fare i te mau raau, e te tahi mau fare tei roto ïa i te mau ana i te pae o te mau aivi. Ua tanu te mau pionie i te mau maa.
Ua tatufaa o Birigama Ioune i te oire i roto i te mau paroita. Ua maiti oia i te mau tane ia riro ei mau episekopo. Ua haape‘ape‘a te tahi mau Inidia i te mau Feia Mo‘a. Ua patu te mau Feia Mo‘a i te hoê patu faaati roa i te oire no te paruru ia ratou ia ore te mau Inidia ia haape‘ape‘a mai.
A faaea noa ai te mau pionie i Winter Quarters, Ua farii o Birigama Ioune i te hoê heheuraa. Ua faaite mai te Fatu ia’na nahea te mau taata ia faaineine no te faarue i te reira vahi. Ua parau mai te Fatu eaha ta te mau taata e tia ia rave a ratere ai ratou.
Ua parau mai te Fatu e mea tia ia tatufaahia te mau taata i roto i te tahi mau pŭpŭ na‘ina‘i. E mea tia hoi ia maitihia te hoê taata faatere no te mau pŭpŭ tataitahi. E mea tia i te mau taata ia faaroo i to ratou mau taata faatere. E mea tia ia ratou ia tauturu te tahi i te tahi. E mea tia ia ratou ia tauturu i te mau utuafare aita e metua vahine e aore râ aita e metua tane.
E mea tia ia vai te maa i roto i te mau pereoo tura‘i a te mau pŭpŭ tataitahi. E mea tia hoi ia maitihia te tahi mau taata i roto i te pŭpŭ tataitahi o tei ite nahea ia tata‘i i te mau pereoo tura‘i, ia patu i te fare, ia tanu i te maa, e ia hamani i te mau e‘a turu.
Ua faaite atoa mai te Fatu i te mau Feia Mo‘a i te tahi atu â mau ohipa no te rave. E mea tia ia ratou ia haapao i te mau faaueraa a te Atua. E mea tia ia ratou ia tapea i ta ratou mau parau faaauraa i te tahi e te tahi. E eiaha roa ratou e faaino te tahi i te tahi. E mea tia ia ratou ia vai parau-tia noa. E mea tia ia ratou ia faaho‘i i te mau mea o ta ratou i ani atu i te tahi atu mau taata e aore râ i te mau mea o te itehia e ratou.
Ua hinaaro te Fatu i te mau pionie ia oaoa. Ua parau mai te Fatu ia ratou ia himene amui e ia ori amui ratou. Eiaha ratou e mâta‘u. E tauturu mai oia ia ratou. Ua parau mai te Fatu e haape‘ape‘ahia ratou, area râ na te reira e faariro ia ratou ei mau taata maitai atu. E e haamaitaihia ratou.
Ua rave o Birigama Ioune i te mau ohipa o ta te Fatu i faaue mai ia’na no te rave. Ua tatufaa oia i te mau taata i roto i te mau pŭpŭ na‘ina‘i. I roto i teie mau pŭpŭ tataitahi te vai nei ïa ta ratou mau mea atoa no te patu i te hoê oire i roto i te mau mou‘a.
Ua faatupu te mau Feia Mo‘a i te hoê amuiraa. E i muri iho ua maiti o Birigama Ioune i te hoê pŭpŭ no te haere atu na mua. Te vai ra 143 tane, e torn vahine, e e piti tamarii. Te mahana i muri mai ua faarue atu te pŭpŭ matamua i te Winter Quarters.
Ua faataahia te ohipa na te mau taata tataitahi atoa no te rave i roto i to ratou tere. Ua haapao te mau vahine i te mau tamarï. Ua tunu ratou i te maa. Te vai ra hoi ta te mau tane tataitahi mau pupuhi no te paruru ia ratou e te mau animala.
Ua haere noa ratou i to ratou tere i te mahana taatoa. I te pô ua faaea ratou no te taoto. Ua ana‘i haamenemene ratou i to ratou mau pereoo tura‘i. Ua faaea te mau taata e te mau animala i roto i te haameneneraa. Ua tahu ratou i te auahi e ua tumu i ta ratou mau maa.
Ua ori ratou e ua himene. Te hoê o taua mau himene ra oia ïa “Haere Mai, E te Feia Mo‘a!” Na te reira hoi i faaoaoa i te mau taata.
Ua faata‘i te hoê taata i te pû no te faaiteraa ia ratou e ua tae i te hora no te haere e taoto. Ua faaoti te mau Feia Mo‘a i to ratou mau pure e ua haere atu e taoto.
E tere maoro roa hoi teie no te mau pionie no te haere atu i te tahi pae mai i te mau fenua papu. Ua tere noa ratou no na ava‘e e maha. Ua farerei ratou i te tahi mau taata i roto i to ratou tere. Te tahi o te mau taata e mau taata taparahi animaia oviri ïa no te mea ua hinaaro ratou i te mau huruhuru animaia. Ua parau mai ratou ia Birigama eiaha e haere atu i te pae tooa o te râ i roto i te mau Mou‘a Ofa‘i. Ua parau mai ratou aita e maa e tupu i reira.
Ua parau mai te tahi o te mau taata ia Birigama Ioune ia afai atu i te mau Feia Mo‘a i Kalafonia. Tera râ, ua parau atu o Birigama Ioune e ua faaite mai te Fatu ia’na i te vahi o te tia i te mau Feia Mo‘a ia haere. E e faaroo oia i ta te Fatu parau.
I te hopea ua tae te mau Feia Mo‘a i roto i te mau mou‘a. E mea fifl roa hoi no te tere atu i reira.
Ua pohehia hoi o Birigama Ioune i te ma‘i. Aita i tia ia’na ia tere haavitiviti atu. Ua maiti oia i te tahi mau taata ia haere na mua. Ua parau atu oia ia ratou ia haere atu i roto i te Faa i Roto Miti. E e mea tia ia ratou ia haamata i te tanu i te mau maa.
Ua haere atu te mau tane e to ratou mau pereoo tura‘i na nia i te mau mou‘a. E ua haere atu i raro i roto i te faa. Ua puhapa ratou i pihai iho i te hoê tahereraa pape iti.
Ua pure ratou i te Fatu. Ua ani atu ratou ia haamaitai mai i te mau huero maa o ta ratou e tanu ra. E ua tanu teie mau tane i te mau huero maa.
Te mahana i muri mai ua tapae mai o Birigama ioune e te mau Feia Mo‘a i roto i te Faa. Ua hi‘o atu o Birigama Ioune i roto i te faa na nia mai i to’na ra pereoo tura‘i. Ua ite atura oia e teie te vahi ta te Fatu i hinaaro i te mau Feia Mo‘a ia faaea. Ua parau maira o Birigama Ioune, ‘Teie te vahi. A haere ana‘e.” Ua ratere atura te mau Feia Mo‘a e ta ratou ra mau pereoo tura‘i i raro i roto i te faa. E taua mahana ra o te 24 ïa no Tiurai 1847.