“Pene 35: Te Faarueraa te Feia Mo‘a i te Mataeinaa Iakona, Misouri: Setepa–Ditema 1833,” Te Mau Aamu no Roto Mai i te Parau Haapiiraa e te Mau Parau Fafau (2002), 132–34
“Pene 35,” Te Mau Aamu no Roto Mai i te Parau Haapiiraa e te Mau Parau Fafau, 132–34
Pene 35
Te Faarueraa te Feia Mo‘a i te Mataeinaa Iakona, Misouri
(Setepa–Ditema 1833)
Te faatupu noa nei te mau taata iino i te pe‘ape‘a i te Feia Mo‘a i te Mataeinaa Iakona, Misouri. Ua tamata noa hoi te Feia Mo‘a i te ani i te tautururaa no ǒ mai i te tavana rahi no Misouri. Ua haere atu o Viliamu Phelepe e Oresona Haede e farerei i te tavana rahi. Ua faaite atu raua ia’na no nia i te pŭpŭ taata iino. Ua faaite atu raua i te huru no te vavahiraahia to ratou mau fare.
Aita te tavana rahi i hinaaro ia tauturu ia ratou. Ua parau mai oia ia raua ia ani atu i te mau haava no te tauturu mai. E mau hoa ana‘e hoi teie pŭpŭ taata iino no te mau haava. Aita atoa ratou i hinaaro ia tauturu i te Feia Mo‘a.
Ua tama‘i teie pŭpŭ taata iino i te Feia Mo‘a no na mahana e ono. Ua vavahi te mau pŭpŭ taata iino i te mau fare o te Feia Mo‘a. Ua haamauiui ratou i te mau tane. Ua haere atu ratou i roto i te faretoa, e ua hue i te mau mea atoa i nia i te tahua fare.
Ua haavi te pŭpŭ taata iino i te Feia Mo‘a ia faarue i to ratou mau fare. E tau to‘eto‘e hoi te reira taime. E rave rahi te mau taata tei pohe no te to‘eto‘e. Ua haere atu te Feia Mo‘a i te tahi mau oire ê atu i Misouri no te faataa ê atu ia ratou i te mau pŭpŭ taata iino.
Ua oto hoi te Feia Mo‘a. Ua haamouhia to ratou mau fare, te faaapu, e te mau faretoa. Ua eiâhia ta ratou mau animala. Aita hoi te tavana rahi e te mau haava i tauturu noa a‘e mai i te mau Feia Mo‘a.
Tera râ, te vai noa ra te faaroo o te Feia Mo‘a i te Atua. Ua ite ratou e e Ekalesia mau te Ekalesia a Iesu Mesia. Ua ite ratou e e Peropheta mau o Iosepha Semita na te Atua.
Tei Ketelani, Ohio hoi o Iosepha Semita. Ua horoa mai Iesu i te heheuraa ia’na. Ua faaite mai oia ia Iosepha i te tumu i tupu ai te pe‘ape‘a o te Feia Mo‘a. Aita te tahi pae o ratou i haapao i te mau faaueraa a te Atua.
Buka Fafau 101:2, 6–7
Ua parau mai Iesu aita te Feia Mo‘a e rave tahoê ra i te ohipa. Aita hoi ratou e tauturu ra te tahi i te tahi. Te faaino nei ratou i te tahi e te tahi. Aita ratou i pure i te Atua i te taime a vai oaoa noa ratou. Aita roa ratou i haamauruuru i te Atua. Ua pure ratou i te taime ana‘e ratou i hinaaro ai te tautururaa.
Ua parau mai Iesu e mea tia i te Feia Mo‘a ia faaineine no to’na haere-faahou-raa mai i te fenua nei. Ia haere ana‘e mai oia ra, e tupu ïa te hau i rotopu i te taata nei. E haamaitaihia te Feia Mo‘a o tei mauiui no Iesu. Aita hoi to Satane e mana no te faahema i te Feia Mo‘a. Aita hoi te hoê o tatou e oto. Aita hoi tatou e pohe. Ia haere faahou ana‘e mai Iesu e oaoa ïa tatou paatoa.