“Pene 63: Te Mau Feia Mo‘a i Roto i te Mau Mou‘a Ofa‘i: Tiurai 1847,” Te Mau Aamu no Roto Mai i te Parau Haapiiraa e te Mau Parau Fafau (2002), 230–33
“Pene 63,” Te Mau Aamu no Roto Mai i te Parau Haapiiraa e te Mau Parau Fafau, 230–33
Pene 63
Te Mau Feia Mo‘a i Roto i te Mau Mou‘a Ofa‘i
(Tiurai 1847)
Ua haamata ihora te mau pionie i te patu i te hoê oire i roto i te faa i Roto Miti. Ua topahia te i‘oa o teie oire o Roto Miti. Ua maiti ihora o Birigama Ioune i te vahi no te patu i te hiero.
Ua tatufaa ihora o Birigama Ioune i te oire. Ua horoahia i te utuafare tataitahi te fenua no te faatia i te fare e no te faaapu. Ua patu te mau pionie i te mau fare raau. Ua tanu ratou i te mau maa. Ua rave itoito noa ratou i te ohipa. Ua haapii atu o Birigama Ioune e e mea tia i te mau Feia Mo‘a tataitahi ia rave i te ohipa no te mau mea i hinaaro-roa-hia e ratou.
Ua tatufaa o Birigama Ioune i te oire i roto e pae paroita. Ua haamata ihora te mau taata i te patu i te mau fare pureraa. E ua rahi faahou atu te mau pionie o tei haere mai i roto i te faa. Aita i maoro ua raea‘ehia hoê ahuru ma iva paroita.
Ua haamata te mau pionie i te hoê fare haapiiraa. Hoê â vahi i faaterehia ai te mau piha haapiiraa e te mau pureraa. I muri mai ua haamata-atoa-hia te Haapiiraa Sabati.
Ua hapono atu o Birigama Ioune i te mau misionare i te tahi atu mau fenua na nia i te moana. I te tahi mau vahi aita i rahi te mau taata tei bapetizohia i roto i te Ekalesia.
I te tahi atu mau vahi, ua rahi atu te mau taata tei tiaturi i te mau misionare. Ua bapetizohia ratou i roto i te Ekalesia. E e rave rahi to ratou o tei hinaaro ia faanuu mai i pihai iho i te mau Feia Mo‘a i Roto Miti. Ua tere mai ratou na nia i te mau pahi.
Ua haere atu te tahi mau taata na nia i te mau fenua papu na nia i te mau pereoo tura‘i o tei tapo‘ihia i te ‘ie. Aita ta te tahi mau taata e moni no te hoo mai i te mau pereoo tura‘i. Ua hamani ïa ratou i te mau pereoo tura‘i e piti huira. Ua parauhia taua mau pereoo ra te mau pereoo tura‘i rima. Ua tuu atu te mau pionie i ta ratou mau taihaa paatoa i nia i taua mau pereoo ra. Ua tura‘i e ua huti ratou i teie mau pereoo. E ohipa rahi roa hoi te reira no te tura‘iraa atu i teie mau pereoo. Ua ma‘ihia hoi te tahi pae o te mau taata e ua pohe roa.
E taata faatere aravihi hoi o Birigama Ioune. Ua tono atu oia i te mau tane e to ratou mau utuafare i te tahi atu mau vahi i te pae o te tooa o te râ. Ua patu te tahi pae o ratou i te mau oire i Kalifonia. Ua patu te tahi atu pae o te mau Feia Mo‘a i te mau oire i Aidaho, i Arizona, e i Waiomi. Ua oto te tahi pae i te faarueraa i to ratou mau fare. Area râ ua faaroo ratou i te parau a Birigama Ioune.
Ua rahi te mau fifi o te mau Feia Mo‘a. I te tahi mau taime aita roa ta ratou maa i tupu. Ua î hoi ta ratou mau faaapu i te pape. I te tahi mau taime ua haere mai te mau Inidia no te eiâ i ta ratou mau ohipa e aore râ ua taparahihia ratou.
Ua parau atu o Birigama Ioune i te mau Feia Mo‘a ia hamani maitai atu i i te mau Inidia. Ua horoa atu te mau Feia Mo‘a i te maa na te mau Inidia. E rave rahi to te mau Inidia tei riro ei mau hoa no te mau Feia Mo‘a.
Ua haamata ihora te mau Feia Mo‘a i te patu i te mau hiero i te pae too‘a o te râ. I te matahiti 1853 ua haamata ratou i te patu i te hiero i Roto Miti. Ua rave ratou i te ohipa e maha ahuru matahiti no te faaotiraa i te hiero. Ua patu atu te mau Feia Mo‘a e tom faahou atu â mau hiero na mua a‘e a oti mai ai te hiero i Roto Miti. Ua patu ratou i te Hiero i St George, te Hiero i Logan, e te Hiero i Manti.