“Pene 38: Te Poe Tao‘a Rahi,” Te Mau Aamu no Roto Mai i te Parau Haapiiraa e te Mau Parau Fafau (2002), 145–50
“Pene 38,” Te Mau Aamu no Roto Mai i te Parau Haapiiraa e te Mau Parau Fafau, 145–50
Pene 38
Te Poe Tao‘a Rahi
Te Poe Tao‘a Rahi o te hoê ïa buka. Ua tauturu mai te Atua i te mau peropheta i te papairaa i te Poe Tao‘a Rahi. Te reira hoi te hoê o ta tatou mau papairaa mo‘a. Te vai nei e maha tufaa i roto i te Poe Tao‘a Rahi. Te vai nei te Buka a Mose, te Buka a Aberahama, te mau papairaa a Iosepha Semita, e te Hiroa Faaroo.
Te Buka a Mose
Te tufaa matamua no te Poe Tao‘a Rahi o te hoê ïa heheuraa i horoahia mai ia Iosepha Semita. Ua piihia te reira te Buka a Mose. E peropheta o Mose na te Atua. Ua ora oia e rave rahi mau tau i mairi i muri.
Te faaite mai nei hoi te Buka a Mose i te mau parau ta te Atua i parau atu ia Mose i nia i te mou‘a. Ua ite o Mose i te Atua e ua paraparau atu oia ia’na. Ua parau mai te Atua e ohipa taa ê ta’na na Mose no te rave.
Ua faaite mai te Atua i te ao nei ia Mose. Ua ite Mose i te mau mea atoa o te tupu i roto i te ao nei. Ua ite oia i te mau tamarii atoa a te Atua o te ora i roto i te ao nei.
Ua vaiiho atu te Atua ia Mose. Ua haere maira o Satane. Ua parau mai oia ia Mose ia haamori atu ia’na. Aita o Mose i haamori atu ia Satane. Ua parau atura o Mose, “E tamaiti hoi au na te Atua.” Ua ani atura o Mose i te Atua ia tauturu mai ia’na. E i muri iho ua parau atu o Mose ia Satane ia haere ê atu. Ua riri roa o Satane no te mea aita o Mose i pee ia’na. Ua faarue mai o Satane ia Mose.
Ua î roa o Mose i te Varua Maitai. Ua haere mai te Atua e ua paraparau faahou mai ia Mose. Ua parau mai te Atua, e o Iesu Mesia te Faaora, e o oia te tamaiti a te Atua. Ua parau mai te Atua e te vai nei e rave rahi mau ao. Na Iesu i hamani i te reira. E e hamani oia e rave rahi atu â mau ao. E e vai noa e rave rahi atu â mau ao. E e ora te mau tamarii a te Atua i nia i taua mau ao ra.
Ua haapii mai Mose no nia i te mau ohipa a te Atua. E tauturu hoi te mau ohipa a te Atua i te mau taata ia tia ia ratou ia ora i pihai iho ia’na e a muri noa’tu. E rave oia i te ohipa no te tauturu i te taata ia riro mai ia’na te huru. Te faaite atoa mai nei te Buka a Mose no nia i te peropheta Enoha e te oire o Ziona.
Te Buka a Aberahama
Te tufaa piti no te Poe Tao‘a Rahi ra o te Buka a Aberahama ïa. I te hoê mahana no te ava‘e Tiurai, i te matahiti 1835, ua haere mai te hoê taata i Ketelani e o Chandler to’na ra i‘oa. Te faaiteite ra taua taata ra o Chandler i te tahi mau mami no Aiphiti mai. Ia pohe ana‘e te taata i Aiphiti e rapaauhia e e puohuhia to ratou tino i roto i te ahu. E e piihia te reira mau tino pohe e mau mami.
I roto hoi i teie mau afata mami, te vai ra te tahi mau otaro parau tahito roa. E te vai ra hoi te mau papairaa huru ê roa i nia i taua parau ra. Te imi ra hoi teie taata ra o Chandler i te hoê taata no te tai‘o i teie papairaa. Ua faaroo oia e ua ite o Iosepha i te iriti i te reira papairaa.
Ua hi‘o o Iosepha i te papairaa i nia i taua parau ra. E ua tia ia’na ia tai‘o i te papairaa. Ua faaite atu o Iosepha i te taata ra ia Chandler i te auraa no teie papairaa i nia i te otaro parau. Ua hoo mai te tahi mau Feia Mo‘a i teie mau otaro parau no ŏ mai ia Chandler ra.
Ua iriti o Iosepha i te papairaa i nia i te parau. Ua papai o Olive Kaudere e Viliamu Phelepe i te mau parau o ta Iosepha i iriti.
Na te peropheta rahi hoi o Aberahama teie papairaa. Ua faaea o Aberahama i Aiphiti e rave rahi mau matahiti na mua roa. Ua paraparau atu o Iesu ia Aberahama.
Ua faaite atu o Iesu ia Aberahama no nia i to tatou oraraa na mua a‘e tatou i haere mai ai i nia i te fenua nei. Ua parau atu o Iesu e na’na i hamani i te fenua. Ua hamani atoa oia i te mahana, te ava‘e, e te mau fetia. Ua hamani oia i te mau tumu raau, te mau animala, e te taata.
Ua papai o Aberahama no nia i te evanelia a Iesu Mesia. Te tauturu nei te Buka a Aberahama ia tatou ia maramarama no nia i te mau peropheta e te autahu‘araa.
Aberahama 1:31
Te Mau Papairaa a Iosepha Semita
Ua papaihia te tufaa toru o te Poe Tao‘a Rahi e Iosepha Semita. I roto i te Iosepha Semita — Aamu 2, te faaite ra o Iosepha no nia i ta’na orama matamua e e mea nahea te noaaraa mai ia’na te mau api auro. Ua faaite atoa oia e mea nahea ta te mau melahi no te ra‘i horoaraa mai i te mana no te autahu‘araa ia’na e Olive Kaudere. I roto i te Iosepha Semita — Aamu 1, ua faaafaro o Iosepha i te tahi tufaa o te Bibilia i roto i te Mataio.
Te tufaa maha o te Poe Tao‘a Rahi ra o te Hiroa Faaroo ïa. I te hoê mahana ua haere mai te hoê taata e farerei ia Iosepha Semita. Te papai ra taua taata ra i te hoê buka. Ua hinaaro oia i te tahi mau mea no nia i te Ekalesia no te papai i roto i ta’na buka. Ua ani atu teie taata ia Iosepha Semita e mea nahea to te Ekalesia haamataraa.
Ua papai o Iosepha Semita no nia i te haamataraa o te Ekalesia. Ua faaite oia no nia i te tiaturiraa o te mau taata i roto i te Ekalesia. Ua tauturu mai te Atua ia Iosepha ia ite i te mea e papai. Ua papai o Iosepha Semita hoê ahuru ma toru mau mea faufaa roa. Ua parau oia i te reira, te Hiroa Faaroo.
I te 1 no Mati 1842, ua neneihia te Hiroa Faaroo i roto i te ve‘a a te Ekaiesia. Ua tai‘o te Feia Mo‘a i te Hiroa Faaroo. Ua tiaturi ratou i te mau mea o ta Iosepha i papai.
Te Mau Hiroa Faaroo
Iosepha Semita
Te tiaturi nei matou i te Atua, te Metua Mure Ore, e i Ta’na Tamaiti ia Iesu Mesia, e i te Varua Maitai hoi.
Te tiaturi nei matou e, e faautu‘ahia te taata no ta’na iho mau hara, eiaha râ no ta Adamu ofatiraa i te ture.
Te tiaturi nei matou e, na roto i te Taraehara a te Mesia e tia ai i te taata atoa ia faaorahia, na roto i te haapaoraa i te mau ture e te mau oro‘a o te Evanelia.
Te tiaturi nei matou e, o teie te mau parau tumu matamua e te mau oro‘a matamua o te Evanelia: te matamua ra, o te Faaroo ïa i te Fatu ra ia Iesu Mesia; te piti ra, o te Tatarahaparaa ïa; te toru ra, o te Bapetizo-utuhi-raa ïa ia matara te hara; te maha ra, o te Tuuraa Rima ïa no te horoaraa a te Varua Maitai.
Te tiaturi nei matou e, hou te taata e a‘o ai i te Evanelia e hou oia e faatere ai i te mau oro‘a no te reira, e mea tia ia’na ia maitihia e te Atua na roto i te tohu e te tuuraa rima o te feia i haamanahia.
Te tiaturi nei matou i te tuuraa o te mau toro‘a i roto i te Ekalesia nei, mai tei tuuhia mai i roto i te Ekalesia i mutaa ihora; oia hoi, te mau aposetolo, te mau peropheta, te mau tiai, te mau haapii, te mau haapii evanelia, e te tahi atu â mau toro‘a.
Te tiaturi nei matou i teie mau horoaraa, oia hoi, te parauraa i te mau reo ĕê, te tohu, te heheuraa, te mau orama, te faaoraraa i te ma‘i, te iritiraa i te mau reo ĕê, e te tahi atu â mau horoaraa.
Te tiaturi nei matou e, o te Bibilia ra o te parau ïa a te Atua, ia tia te iritiraahia; e te tiaturi atoa nei matou e, o te Buka a Moromona ra, o te parau ïa a te Atua.
Te tiaturi nei matou i te mau mea atoa i heheuhia mai e te Atua, te mau mea atoa o Ta’na e heheu mai nei i teie nei, e te tiaturi nei hoi matou e, e heheu mai â Oia e rave rahi atu â mau mea maitai e te faufaa rahi no To’na ra basileia.
Te tiaturi nei matou e, e haaputuputuhia Iseraela e e faaho‘ihia mai na opu tino ahuru; e faatiahia Ziona (oia hoi te Ierusalema Apî) i nia i te fenua Marite; e parahi tino mai hoi te Mesia ei arii i nia iho i te fenua nei; e e faaapîhia hoi te fenua nei e e farii oia i to’na hanahana paradaiso.
Te tiaturi nei matou e, e tiaraa to matou ia haamori i te Atua Mana-Hope mai te au i to matou iho hinaaro, e e tiaraa hoi to te mau taata atoa ia haamori noa’tu te huru, te vahi e te mea ta ratou i hinaaro.
Te tiaturi nei matou e, e mea tia ïa ia auraro i te mau arii, te mau peresideni, te mau faatere hau, e te mau haava, e ia haapao, ia faatura, e ia paturu i te mau ture o te fenua.
Te tiaturi nei matou e, e mea tia i te taata ia ora ma te parau-tia, ma te haavare ore, ma te viivii ore, ma te aau maitai, ma te haapao maitai e ma te hamani maitai i te mau taata atoa. Te pee nei hoi matou i te a‘oraa a Paulo: Te tiaturi nei matou e te tiai nei hoi i te mau mea atoa. E rave rahi te mau mea i faaoroma‘ihia e matou, e te hinaaro nei hoi matou ia faaoroma‘i i te mau mea atoa. E mai te mea te vai atura te mau mea maitai, te mau mea faahiahia, te mau mea roo maitai, e te mau mea poupouhia ra, e titau ïa matou i te reira.