“Pene 22: Te Feia Mo‘a i Misouri: Tiurai–Atete 1831,” Te Mau Aamu no Roto Mai i te Parau Haapiiraa e te Mau Parau Fafau (2002), 84–88
“Pene 22,” Te Mau Aamu no Roto Mai i te Parau Haapiiraa e te Mau Parau Fafau 84–88
Pene 22
Te Feia Mo‘a i Misouri
(Tiurai–Atete 1831)
Ua haere atu te Peropheta o Iosepha Semita, Sidene Rigidoni, Eduade Patarite, e te tahi atu mau taata i Misouri. Ua oaoa roa ratou no teie tere. Ua hinaaro ratou ia patu i te oire o Ziona. Ua hinaaro ratou i te Fatu ia faaite mai ia ratou i te vahi tano.
Ua haere atu ratou na nia i te poti i te tahi pae o to ratou tere. E i to ratou taeraa atu i Misouri, ua hinaaro o Iosepha ia haere noa na raro. Ua ite oia e mea mo‘a te fenua o Misouri. Ua hinaaro oia ia mataitai i te reira.
Ua haere o Iosepha e to’na mau hoa na raro noa e 300 maile e tae noa’tu i te Mataeinaa Iakona. E mea ve‘ave‘a roa, tera râ aita ratou i haape‘ape‘a i te reira. Ua hinaaro ratou ia haere atu i reira no te patu ia Ziona.
Ua haere atu te Peropheta e to’na mau hoa i te Mataeinaa Iakona, Misouri. Ua farerei mai te mau misionare no Ketelani mai ia ratou.
I te tahi mau mahana i muri mai, ua haere atoa mai te Feia Mo‘a no Niu Ioka mai i te Mataeinaa Iakona. Ua oaoa roa te mau taata atoa i haere mai i reira.
Ua faaite atu te Peropheta e Eduade Patarite i te mau taata i te ohipa e rave. E mea tia i te tahi mau taata ia hoo mai i te fenua i Misouri. E mea tia ia Olive Kaudere e ia Viriamu W. Phelepe ia haamata i te mau fare haapiiraa. E mea tia ia raua ia papai i te mau buka o te nehenehe i te mau tamarii rii ia tai‘o.
Ua hinaaro o Iosepha ia ite i te vahi no te patu i te oire ra o Ziona. Ua pure oia i to tatou Metua i te Ao, e ua pahonohia mai ta’na pure.
Ua parau mai te Fatu e mea tia ia patu ia Ziona i pihai iho i te oire no Inidipenideni i te Mataeinaa Iakona, Misouri. Ua faaite mai te Fatu ia Iosepha i te vahi no te patu i te hiero. Ua parau mai oia eita o Ziona e patu-oioi-hia. E farii te Feia Mo‘a i te mau fifi rahi na mua. Area râ e tia ia ia ratou ia patu ia Ziona mai te mea e nava‘i to ratou faaroo.
Ua parau mai te Fatu ia Iosepha e mea tia i te Feia Mo‘a ia haapao i te ture i Misouri. E mea tia ia ratou ia haapao i te mau faaueraa a te Atua. E mea tia ia ratou ia rave i te mau mea maitai e rave rahi ma te faaue-ore-hia. E mea tia i te Feia Mo‘a ia tatarahapa i ta ratou mau hara. Eita te Fatu e haamana‘o i ta te taata mau hara mai te mea e tatarahapa ratou.
Ua parau mai te Fatu e mea tia ia Sidene Ridigoni ia haamaitai i te fenua. Ua ani atu Sidene Ridigoni i te Feia Mo‘a mai te mea e ua mauruuru ratou no teie fenua. Ua ani atu oia mai te mea e haapao anei ratou i te mau faaueraa a te Atua. Ua parau mai te Feia Mo‘a “E”. I reira ua pure e ua haamaitai atura o Sidene Rigidoni i te fenua.
I te mahana i muri iho ua faatupu o Iosepha Semita, Olive Kaudere, e Sidene Ridigoni e te tahi atu â mau hoa to ratou i te hoê apooraa. Ua haaputuputu ratou i te hoê vahi taa ê roa i Inidipenideni. Ua tai‘o ratou i te mau papairaa mo‘a. E ua pure ratou. Ua haamaitai atura o Iosepha i te vahi no te paturaa i te hiero.
Ua haere atu te mau Feia Mo‘a paatoa i te amuiraa i Misouri. Ua î hoi ratou i te Varua Maitai. Ua parau atu o Iosepha i te Feia Mo‘a e e haamaitai mai te Atua ia ratou mai te mea e haapao ratou i ta ratou mau fafauraa.
I te tahi mau mahana i muri mai ua horoa faahou mai Iesu i te hoê heheuraa. Ua parau mai oia e mahana taa ê te Sabati. E mea tia ia tatou ia rave i te mau mea no te tauturu ia tatou ia haamana‘o ia Iesu i te mahana Sabati. Eiaha tatou e rave i te ohipa i te mahana Sabati. E mea tia ia tatou ia haere i te pureraa e ia rave i te oro‘a. E mea tia ia tatou ia tatarahapa i ta tatou mau hara. E mea tia ia tatou ia haere e farerei i te feia ma‘i. E mea tia ia tatou ia haamauruuru i te Atua no te mau haamaitairaa atoa ta tatou e farii nei. E mea tia ia tatou ia haapao noa i te mau faaueraa a te Atua.
E farii te Feia Mo‘a i te mau mea atoa o ta ratou e hinaaro mai te mea e haapao ratou i teie mau mea. E farii ratou i te maa, te ahu, te fare e te faaapu. E oaoa hoi ratou. E farii hoi ratou i te hau i roto i teie oraraa. E e roaa te ora mure ore ia ratou.