19–25 nō Mē : « Te mea nō ’ō mai i te Atua ra, e māramarama ïa »

Te Ha’api’ira’a Tumu ʼe te mau Fafaura’a 49–50

Te Fa’aora tō tātou « tīa’i māmoe maita’i » (Te Ha’api’ira’a Tumu ʼe te mau Fafaura’a 50:44). ’Ua ’ite ’oia ē, i te tahi taime, e ātea ’ē te māmoe, ’e e rave rahi te ’ati i roto i te medebara. Nō reira, e arata’i ’oia ma te here ia tātou i te pārurura’a o tāna ha’api’ira’a tumu. Ma te here, e arata’i ’ē atu ’oia ia tātou i te mau ’ati mai te « mau vārua ha’avare, ’o tei pūrara i ni’a i te fenua nei, ma te ha’avare atu i tō te ao nei » (Te Ha’api’ira’a Tumu ʼe te mau Fafaura’a 50:2). Pinepine te aura’a o te pe’era’a iāna, ’o te fa’aru’era’a ïa i te mau mana’o ’aore rā, te mau peu tumu hape. E parau mau te reira nō Leman Copley ’e te tahi atu mau ta’ata i Ohio. ’Ua fa’ari’i rātou i te ’evanelia tei fa’aho’i-fa’ahou-hia mai, terā rā, ’ua tāpe’a noa i te tahi mau ti’aturira’a tano ’ore. I roto i Te Ha’api’ira’a Tumu ʼe te mau Fafaura’a 49, ’ua fa’a’ite te Fatu i te mau parau mau tei fa’atītī’aifaro i te mau ti’aturira’a tahito a Leman nō ni’a i te mau tumu parau mai te fa’aipoipora’a ’e te tae-piti-ra’a mai o te Fa’aora. ’E ’ia « fa’ari’i mai [te feiā fa’afāriuhia nō Ohio] i te mau vārua ’o tei ’ore i ta’a ia [rātou] », ’ua ha’api’i mai ra te Fatu ia rātou nāhea ’ia ’ite i te mau fa’a’itera’a parau mau a te Vārua (Te Ha’api’ira’a Tumu ʼe te mau Fafaura’a 50:15). ’Ua fa’a’oroma’i te tīa’i māmoe maita’i ia tātou, « ’ei tamari’i ri’i », tei tītauhia « ’ia tupu ā i te aroha ’e i te ’ite i te parau mau » (Te Ha’api’ira’a Tumu ʼe te mau Fafaura’a 50:40).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 49 ; 50: 24

Tē hina’aro nei Iesu Mesia ’ia fa’ari’i au i te mau parau mau o tāna ’evanelia.

Hou Leman Copley ’a tomo mai ai i roto i te ’Ēkālesia, tei roto ’oia i te hō’ē pupu fa’aro’o tei parauhia te Sōtaiete Tāhō’ē o te feiā ti’aturi i te pitira’a o te fāra’a o te Mesia, tei parau-ato’a-hia te mau Shakers. I muri a’e i te hō’ē tāu’ara’a parau ’e ’o Leman, ’ua ’imi Iosepha Semita i te ha’apāpūra’a nō ’ō mai i te Fatu ra nō ni’a i te tahi o te mau ha’api’ira’a a te mau Shakers. ’Ua pāhono mai te Fatu nā roto i te heheura’a i roto i te tufa’a 49. Te tahi o te mau ti’aturira’a a te mau Shakers ’ua fa’ahitihia ïa i roto i te upo’o tufa’a.

E aha tā te Fatu i ha’api’i i roto i te tufa’a 49 nō te fa’atītī’aifaro i te mau ti’aturira’a a te mau shakers ? E aha te tāpa’o fa’a’ite tā ’outou e ’ite nei i roto i teie heheura’a nō tōna here ’e tōna māna’ona’ora’a i te mau ta’ata tei ’ore i fa’ari’i i te ’īra’a o tāna parau mau ? Nāhea ’outou e fa’atoro ai i te rima ia rātou ma te here ’e te māna’ona’ora’a ?

E aha te mea tā ’oe i fa’ahiahia i roto i te pāhonora’a a te Fatu i roto i te ’īrava 2 ? E nehenehe ’outou e fa’aau i te reira i te ’ohipa e tupu mai te mea ē, e māta’ita’i noa ’outou i te hō’ē tuha’a o te hō’ē hōho’a, ’ite hō’ē tuha’a o te piriapu, ’aore rā e fa’aro’o hō’ē pae o te tātama’ira’a. E aha te tū’atira’a o te fa’aarara’a a te Fatu ’e tō Te Ha’api’ira’a Tumu ’e te mau Fafaura’a 50:24 ? E feruri na e aha tā ’outou ē rave nei nō te fa’ari’i rahi atu ā i te māramarama nō ’ō mai i te Fatu ra.

Hi’o ato’a « Leman Copley and the Shakers », i roto Revelations in Context, 117–21.

Te Ha’api’ira’a Tumu ’e te mau Fafaura’a 49:15–17

E mea faufa’a te fa’aipoipora’a i rotopū i te tāne ’e te vahine i roto i te fa’anahora’a a te Atua.

I roto i tāna tūtavara’a ’ia vāvāhi i te fa’anahora’a a te Metua i te ao ra, tē ’imi nei Satane i te fa’atupu i te pāpū ’ore nō ni’a i te fa’aipoipora’a. I te tahi atu pae, tē tāmau noa nei te Fatu i te heheu i te parau mau nō ni’a i te fa’aipoipora’a nā roto i tāna mau peropheta. E ’itehia ia ’outou te tahi o teie parau mau i roto i Te Ha’api’ira’a Tumu ’e te mau Fafaura’a 49:15–17 ; Genese 2:20–24 ; 1 Korinetia 11:11 ; ’e « Te ’Utuāfare : E Poro’i i tō te ao nei ». ’A tāpura na i te mau parau mau tei ’itehia ia ’outou. Nō te aha te fa’aipoipora’a i riro ai ’ei mea faufa’a nō te fa’anahora’a a te Metua i te ao ra ?

’Ua ha’api’i Elder Ulisses Soares ē « tē ha’api’i nei te ’evanelia a Iesu Mesia tei fa’aho’i-hia mai i te parau tumu o te ’āpitira’a hope roa i rotopū i te vahine ’e te tāne, i roto i te orara’a tāhuti nei ’e i te orara’a a muri a’e » (« I roto i te ’āpitira’a ’e te Fatu », Liahona, Novema 2022, 42). E nehenehe ’outou e tuatāpapa i tāna parau poro’i, ma te ’imi i te mau parau tumu o « te ha’apa’ari i te ’āpitira’a i rotopū i te tāne ’e te vahine ». Nāhea ’outou e nehenehe ai e fa’a’ohipa i teie mau parau tumu i roto i tō ’outou orara’a ? Mai te mea e ui mai te hō’ē ta’ata, nō te tahi atu fa’aro’o, nō te aha e mea faufa’a te fa’aipoipora’a, nāhea ’outou ’ia pāhono atu ? Nō te aha ’outou e māuruuru ai nō teie ’itera’a ?

Hi’o ato’a Topics and Questions, « Marriage [Fa’aipoipora’a] », « Family [’Utuāfare] », Vaira’a buka ’evanelia ; David A. Bednar, « Le mariage est essentiel au plan éternel du Père », Liahona, Tiunu 2006, 83–84 ; « Renaissance of Marriage [Fa’anaho-fa’ahou-ra’a i te fa’aipoipora’a] » (video), Vaira’a buka ’evanelia.

Renaissance of Marriage

Hear what President Eyring says we all must do to have a renaissance of happy marriages and productive families.

’Ia vai ara noa i te huru orara’a o te ta’ata tāta’itahi. Noa atu e mea ’oa’oa te fa’aipoipora’a ’e te orara’a ’utuāfare i roto i te ’evanelia a Iesu Mesia, ’eita tātou pā’āto’a e ’oa’oa i teie mau ha’amaita’ira’a ’a ora ai tātou i te tahuti nei. I roto i te tāu’a-ra’a-parau nō teie tumu parau, e vai ara i te huru orara’a rau o te ta’ata hō’ē ’e te ’utuāfare, nō te mau ta’ata iho ā rā ’o tē « tīa’i māite i te Fatu » ’ia tupu te mau fafaura’a mure ’ore (hi’o Te Ha’api’ira’a Tumu ’e te mau Fafaura’a 98:1–3).

Te Ha’api’ira’a Tumu ’e te mau Fafaura’a 50

E nehenehe te mau ha’api’ira’a a te Fatu e paruru iā’u i te mau ha’avare a Sātane.

I tīa’i noa na te mau melo ’āpī o te ’Ēkālesia i Ohio ’ia fa’ari’i i te mau fa’a’itera’a pae vārua tei fafauhia i roto i te mau pāpa’ira’a mo’a. Terā rā, ’ua hina’aro Satane e ha’avare ia rātou. Mai te mea e anihia ’outou ’ia tauturu i teie mau melo ’ia hāro’aro’a nāhea ’ia ’ite i te mau fa’a’itera’a mau a te Vārua Maita’i, e aha te mau parau tumu i roto i Te Ha’api’ira’a Tumu ’e te mau Fafaura’a 50 tā ’outou e fa’a’ite atu ? (hi’o ta’a ’ē i te mau ’īrava 22–25, 29–34, 40–46). ’Ua nāhea tō te Fa’aora tauturura’a ia ’outou ’ia ’ite i te ta’a-’ē-ra’a i rotopū i te parau mau ’e te hape ?

Hi’o ato’a 1 Korinetia 14:1–28 ; 2 Timoteo 3:13–17.

Te Ha’api’ira’a Tumu ’e te mau Fafaura’a 50:13–24

Nā te Vārua e ha’amaita’i ’āmui atu i te mau ’orometua ’e te mau pīahi.

E hōro’a mai te orara’a i te ’evanelia a Iesu Mesia e rave rahi rāve’a ’ia riro ’ei ’orometua ha’api’i ’e ’ei pīahi, i te fare ’e i te fare purera’a. Hō’ē rāve’a ’outou e nehenehe ai e tuatāpapa i Te Ha’api’ira’a Tumu ’e te mau Fafaura’a 50:13–24 ’o te pāpa’ira’a ïa i te hō’ē hōho’a o te hō’ē ’orometua ha’api’i ’e te hō’ē pīahi. I pīha’i iho i teie mau ’īrava tāta’itahi, ’a tāpura i te mau ta’o ’e te mau pereota nō roto mai i teie mau ’īrava ’o tē ha’api’i nei ia ’outou i te hō’ē mea nō ni’a i te ’apora’a mai ’e te ha’api’ira’a atu i te ’evanelia. Nō ’āfea a’enei tō ’outou fa’ari’ira’a i te mau ’itera’a tei ha’api’i ia ’outou i te faufa’a o te Vārua i roto i te parau nō te ha’api’ira’a atu ’e te ’apora’a mai ? ’A feruri na i te mau ’ohipa e ti’a ia ’outou ’ia rave nō te ha’amaita’i i tā ’outou mau tauto’ora’a ’ei ta’ata e ’āpo mai, ’e ’ei ta’ata ha’api’i i te ’evanelia.

Te Ha’api’ira’a Tumu ’e te mau Fafaura’a 50:23–25

« Te mea nō ’ō mai i te Atua ra, e māramarama ïa ».

’A feruri ai ’outou i te mau parau a te Fa’aora i roto i Te Ha’api’ira’a Tumu ’e te mau Fafaura’a 50:23–25, ’a feruri nāhea ’outou e fa’ari’i ai i te māramarama o te Atua i roto i tō ’outou orara’a ’e nāhea ’outou e « a’ua’u ’ē atu i te pōiri ». ’Ei hi’ora’a, nāhea teie mau ’īrava i te arata’i i tā ’outou mau mā’itira’a nō te fa’a’ohipa i tō ’outou taime ? E aha te fa’a’ana’anataera’a ’aore rā te mau ha’apūrorora’a e hi’o ? E aha te mau paraparaura’a e fa’aō atu ? E aha te tahi atu mau fa’aotira’a tā teie mau ’īrava e nehenehe e tauturu ia ’outou ? E nehenehe te hō’ē hīmene mai « ’O te Fatu ra tō’u māramarama » (Te mau hīmene, N°41) e fa’auru i te tahi atu mau mana’o.

Hi’o ato’a « Haere nā roto i te māramarama o te Atua », Nō te pūai o te feiā ’āpī : E arata’i nō te rave i te mau mā’itira’a, 16–21.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 49:12–14

E nehenehe au e pe’e ia Iesu Mesia.

• Nō te ha’api’i i tā ’outou mau tamari’i i te mau parau tumu i roto i teie mau ’īrava, e nehenehe ’outou e fa’aineine e maha ta’ahira’a ’āvae pāpie ’e maha hōho’a e fa’ahōho’a rā i te fa’aro’o ia Iesu Mesia, te tātarahapa, te bāpetizora’a ’e te fa’ari’ira’a i te Vārua Maita’i (hi’o i te mau hōho’a i roto i te ’api fa’a’ana’anataera’a nō teie hepetoma). E nehenehe tā ’outou mau tamari’i e tu’u i te mau ta’ahira’a ’āvae i ni’a i te tahua ’e te mau hōho’a i pīha’i iho ia rātou. I muri iho, e nehenehe rātou e haere nā muri i te ta’ahira’a ’āvae ’a tai’o noa ai ’outou i Te Ha’api’ira’a Tumu ’e te mau Fafaura’a 49:12–14. ’A ha’apāpū ia rātou ē, ’ia rave tātou i te mau mea i roto i teie mau hōho’a, tē pe’e ra ïa tātou ia Iesu Mesia.

• E nehenehe ato’a ’outou e ani i tā ’outou mau tamari’i ’ia fa’aau i Te Ha’api’ira’a Tumu ’e te mau Fafaura’a 49:12–14 i te Te ’Ohipa 2:38 ’e te hīro’a fa’aro’o maha. E aha te mau tū’ati’atira’a tā rātou ē ’ite rā ? Nō te aha e mea faufa’a teie mau parau mau ?

Te Ha’api’ira’a Tumu ’e te mau Fafaura’a 49:15–17

E mea faufa’a te fa’aipoipora’a i rotopū i te tāne ’e te vahine i roto i te fa’anahora’a a te Atua.

• ’A fa’ata’a ē, te mau Shakers, e pupu ta’ata ïa tei ti’aturi ē, ’eiaha te ta’ata e fa’aipoipo (hi’o i te upo’o tufa’a o Te Ha’api’ira’a Tumu ’e te mau Fafaura’a 49). ’A ani i te mau tamari’i ’ia ’imi i te mau mea tā te Fatu i ha’api’i nō ni’a i te fa’aipoipora’a i roto i Te Ha’api’ira’a Tumu ’e te mau Fafaura’a 49:15–17. E aha te aura’a « ’ua ha’apa’ohia te fa’aipoipora’a ’e te Atua » ? E nehenehe paha ’outou e tai’o ’āmui i nā paratarāfa mātāmua e toru o « Te ’Utuāfare : E Poro’i i tō te Ao nei ». I muri iho ’a ’āparau nō te aha e mea faufa’a te fa’aipoipora’a ’e te ’utuāfare nā te Metua i te ao ra.

Te Ha’api’ira’a Tumu ’e te mau Fafaura’a 50:23–25

« Te mea nō ’ō mai i te Atua ra, e māramarama ïa ».

• Nō te fa’a’ite i Te Ha’api’ira’a Tumu ’e te mau Fafaura’a 50:23–25, ’a paraparau i tā ’outou mau tamari’i nō ni’a i te ta’a-’ē-ra’a i rotopū i te māramarama ’e te pōiri. Nō te aha tātou e hina’aro ai i te māramarama ? E nehenehe ’outou e tai’o ’āmui i te paratarāfa mātāmua o te « Haere nā roto i te māramarama o te Atua » i roto Nō te pūai o te feiā ’āpī : E arata’i nō te rave i te mau mā’itira’a (’api 17) ē tae noa atu i Te Ha’api’ira’a Tumu ’e te mau Fafaura’a 50:23–25. ’A paraparau nō ni’a i te mau rāve’a e fa’ari’i ai tātou i te māramarama o te Atua ’e te mau rāve’a e ti’a ai ia tātou ’ia a’ua’u atu i te pōiri. ’A hīmene ’āmui i te hō’ē hīmene nō ni’a i tō rātou māramarama pae vārua.

Te Ha’api’ira’a Tumu ’e te mau Fafaura’a 50:40–46

’O Iesu Mesia tō’u tīa’i māmoe maita’i.

• I muri a’e i te tai’ora’a ’āmui i Te Ha’api’ira’a Tumu ʼe te mau Fafaura’a 50:40–46 e nehenehe ’outou e fa’a’ite i te hōho’a o te Fa’aora e vai rā i roto i teie arata’i, ’e e ui i te mau uira’a mai teie te huru : E aha te mana’o o te tia’i māmoe i tāna mau māmoe ? Nō te aha e nehenehe ai e fa’aau i te Fa’aora ’ei tīa’i māmoe nō tātou ?

Nō te tahi atu ā mana’o, ’a hi’o i te ve’a Hoa nō teie ’āva’e.

Gentle Shepherd [Te tīa’i māmoe maita’i], nā Yongsung Kim