Independence, Missouri, 1831, ka Al Rounds

Seetebosigo 2–8: “Go Gakalela go nna mo Seemong se se Molemo”

Dithuto le Dikgolagano 58–59

Fa bagolwane ba Kereke ba bona lefelo la toropo ya Sione lantlha—Independence, Missouri—e ne e se se ba neng ba se solofetse. Bangwe ba ne ba akanya gore ba tlaa fitlhela morafe o o golang ka katlego, o o dirang ka natla o o nang le setlhopa se se maatla sa Baitshepi. Mo boemong, ba ne ba fitlhela lefelo le le nang le baagi ba se bantsi, ba ba se nang tlhabologo e ba neng ba e tlwaetse mme o agilwe ke bathibeledi ba melelwaneng e e makgwakgwa go na le Baitshepi. Go bonala Morena a ne a sa ba kope gore ba tle fela Sione—o ne a batla ba aga Sione.

Fa dikeletso tsa rona di sa tsamaelana le boammaaruri, re ka gakologelwa se Morena a se boleletseng Baitshepi ka 1831: “Ga lo ka ke lwa bona ka matlho a lona a tlholego, ka lobaka lono, togamaano ya Modimo … le kgalalelo e e tla latelang morago ga pitlagano e kgolo” (Dithuto le Dikgolagano 58:3). Ee, botshelo bo tletse ka pitlagano, le boikepo, mme re santse re ka “diragatsa tshiamo e kgolo; gonne thata e mo go [rona]” (ditemana 27–28).

Bona gape Saints, 1:127–33.

Megopolo ya go ithuta kwa Gae le kwa Kerekeng

Dithuto le Dikgolagano 58:1–5; 59:23

“Morago ga pitlagano e kgolo go tla ditshegofatso.”

Baitshepi ba ne ba solofetse gore ka nako ya matshelo a bone, Jackson County e tla nna Sione, lefelo le kwa Baitshepi botlhe ba ka phuthegelang teng. Le fa gontse jalo, nako ya bone mo Jackson County e ne e tletse ka pitlagano. Mo dingwageng di se kae, ba ne ba patelesega go tloga le go “ema lobakanyana ka ga thekololo ya Sione” (Dithuto le Dikgolagano 105:9).

O ithuta eng ka pitlagano kgotsa dikgwetlho go tswa mo mafokong a Morena mo Dithuto le Dikgolagano 58:1–5? Ke eng o kanya gore ditshegofatso dingwe di tla fela morago ga pitlagano? Ke ditshegofatso dife tse o di amogetseng morago ga pitlagano?

O ithuta eng go tswa mo Dithuto le Dikgolagano 59:23 tse di go tlisetsang tsholofelo?

Dithuto le Dikgolagano 58:26–29

Ke ka “diragatsa tshiamo e kgolo” ka “boikgethelo jwa me.”

E le karolo ya ithutuntsho ya gago ya ditemana tsena, o ka dira nankolo ya dingwe tsa dilo tse o ka tsenang ka “matlhagatlhaga” mo go tsone. A tsotlhe ke “dintlha tse [di] molemo”? Tlhatlhanya ka se o ka se dirang go “diragatsa tshiamo e kgolo”—mme o akanye ka go ipeela lenaneo go dira jalo.

O akanya gore ke eng Morena a batla o “dira dilo tse dintsi ka boikgethelo jwa [gago]”? Ditlamorago e ne e ka nna dife fa o ne o “patelediwa mo dilong tsotlhe”? ke eng se 2 Nefi 2:27 e se oketsang mo go tlhaloganyeng ga gago ga molawana ona?

Bona gape Dale G. Renlund, “Choose You This Day,” Liahona, Ngwanatsele. 2018, 104–6.

Dithuto le Dikgolagano 58:42–43

Morena o a intshwarela fa ke ikwatlhaya.

Tsholofetso ya Morena mo Dithuto le Dikgolagano 58:42 ya go itshwarela gotlhelele bao ba ba ikwatlhayang e a kgothatsa, le fa le gone e tsosa dipotso dingwe: Go kaya eng go ikwatlhaya? Ke tla itse jang fa ke ikwatlhaile? Ka lesego, Morena o ne a tswelela pele, “Ka se lo ka itse…” (temana 43).

Fano ke dingwe tsa dipotso tse dingwe tse ka dinako tse dingwe batho ba nnang le tsone ka boikotlhao. Mowa o go ruta eng ga o ntse o ithutuntsha di dirisiwa tse di kailweng tse di neetsweng fa tlase?

Go bolela dibe tsa me go thusa jang go ikwaatlhaya? Bona Pesalema 32:1–5; Diane 28:13; Mosia 27:34–37; Alema 39:12–13.

Ke leka go tlogela dibe tsa me, mme ke nna ke dira diphoso. A boikotlhao jwa me bo santse bo le mo tirisong? Bona Bradley R. Wilcox, “Worthiness Is Not Flawlessness,” Liahona, Ngwanatsela. 2021, 61–67; “Daily Restoration” (setshwantsho sa motshikinyego), Gospel Library.

Daily Restoration

Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.

Ke ka tlhomamisa jang gore Mmoloki o intshwaretse? Bona Tad R. Callister, “The Atonement of Jesus Christ,” Liahona, Motsheganong 2019, 85–87, segolobogolo kgaolo e e nang le setlhogo “2. Sebe.”

O ka bona ditshedimosetso thata mo “Dipotso le Dikarabo” ka boikotlhao mo go Ya Nonofo ya Banana: Kaelo ya go Dira Boitshenkelo (ditsebe 8–9).

Bona gape Ditlhogo le Dipotso, “Boikotlhao,” Motlobo wa Efangele.

Dithuto le Dikgolagano 59

Polly Knight e ne e le mang?

Polly Knight le monna wa gagwe, Joseph Knight Sr., e ne e le ba bangwe ba badumedi ba ntlha mo pitsong ya boporofeti ya ga Joseph Smith. Polly le Joseph ba ne ba naya Moporofeti tshegetso e e botlhokwa mo tirong ya go ranola Buka ya ga Momone. Lelwapa la ga Knight le ne la tloga mo Colesville, New York, go phutegela le Baitshepi mo Ohio mme morago ba laelwa go fudugela kwa Jackson County, Missouri. Fa ba ntse ba tsamaya, botsogo jwa ga Polly jwa simolola go koafala, mme o ne a ikaeletse go bona Sione pele ga a a swa. O ne a le mo Missouri fela malatsinyana fa a tlhokafala (bona Saints, 1:127–28, 132–33). Dithuto le Dikgolagano 59 e ne ya amogelwa mo letsatsing la go tlhokafala ga gagwe, le ditemana 1 le 2 di ka tswa di bua ka tlhamalalo ka ene.

Dithuto le Dikgolagano 59:4–19

Ditaelo ke tshegofatso.

O akanya gore go raya eng go “rwesiwa … ka ditaelo”? (temana 4). Akanya ka fa Morena a go segofatsang ka teng jaaka o leka go obamela nngwe le nngwe ya ditaelo mo go ditemana 5–19.

Abelana se o se ithutang. Mo diemong tse dintsi, ditshedimosetso tsa semowa tse o di amogelang fa o ntse o ithutuntsha dikwalo tse di boitshepo di ka nonotsha tumelo ya lelwapa la gago, ditsala, le maloko a wate. Abelana le bone maitemogelo, maikutlo, le bopaki jwa gago ka ga Jeso Keresete.

Dithuto le Dikgolagano 59:9–19

Sabata ke letsatsi la Morena.

Fa a sena go solofetsa go segofatsa Baitshepi mo Sione “ka ditaelo tse di seng kae,” Morena o ne a gatelela thata taelo ele nngwe e e kgethegileng: taelo ya go tlotla “letsatsi la Gagwe le le boitshepo” (Dithuto le Dikgolagano 59:4, 9). Fa o ntse o ithutuntsha Dithuto le Dikgolagano 59:9–19, tlhatlhanya gore ke eng go tlotla Sabata go ka bo go nnile botlhokwa thata mo Baitsheping ba jaaka ba batla go aga Sione. Ke eng se le botlhokwa mo go wena?

Le gone o ka tlhatlhanya gore a o dirisa letsatsi la Sabata ka tsela e Morena a laotseng. Go itshepisa Sabata go go thusa jang go nna o “sena selabe se se tswang mo lefatsheng”? (verse 9). O ka dira eng “go isetsa Mogodimogodimo ditebogo”? (temana 10).

O ka lemoga gore Morena o dirisitse mafoko a a tshwanang le “boipelo,” “thama,” le “itumela” go ruta ka letsatsi la Sabata. Ke eng se se dirang gore Sabata e go itumedise? O ka tlhalosetsa mongwe jang gore ke eng o itshenkela go tlotla letsatsi la Morena?

O ithuta eng mo sefeleng “Gently Raise the Sacred Strain” (Hymns, no. 146) ka maikaelelo le ditshegofatso tsa Sabata?

Bona gape Genesise 2:2–3; Isaia 58:13–14; Russell M. Nelson, “The Sabbath Is a Delight,” Liahona, Motsheganong 2015, 129–32.

Ka megopolo thata, bona dikgatiso tsa kgwedi ena tsa Liahona le Ya Nonofo ya Banana dimekesine.

Megopolo ya go Ruta Bana

Dithuto le Dikgolagano 58:26–28

Rara wa Legodimo o nneetse maatla go tlhopha.

• Go bala mmogo Dithuto le Dikgolagano 58:26–28 go ka go naya wena le bana ba gago monyetla go bua ka maatla a Rara wa Legodimo a re a neetseng go itshenkela go dira molemo. Lo ka bolellana ka boitshenkelo jo bo farologaneng jo lo bo dirileng le gore go ne ga diragalang ko pheletsong. Gongwe bana ba gago ba ka tshwantsha setshwantsho sa maitemogelo a bone.

• O ka kwala boitshenkelo mo lotlhakoreng le le lengwe la pampitshana le ditlamorago mo lotlhakoreng le lengwe mme wa dirisa pampiri e go supa gore boitshenkelo jwa rona le ditlamorago jwa bone ga di kgaogane. Gongwe bana ba gago ba ka nankola boitshenkelo bo se kae mme ba bua ka ditlamorago tse di tswang mo go jone. Ke gone le ka bala mmogo Dithuto le Dikgolagano 58:27–28 mme le bue ka boitshenkelo jo bo “diragatsang tshiamo e kgolo” kgotsa ditlamorago tse di molemo. Rara wa Legodimo o re “duela” kgotsa segofatsa jang fa re ntse re leka go dira molemo? (temana 28).

Dithuto le Dikgolagano 59:7, 18–21

“Leboga Morena Modimo wa gago mo dilong tsotlhe.”

• Akanya go bala ditemana tsena fa wena le bana ba gago le ntse le itapolola maoto kgotsa go leba ditshwantsho tsa tlholego, le lemoga dilo tseo tse di kgatlhisang leitlho le go … itumedisa pelo” (temana 18). O ka lemoga gape dilo tse di tshwanang mo pineng jaaka “My Heavenly Father Loves Me” (Children’s Songbook, 228–29). Kgotsa o ka laletsa bana ba gago go tshwantsha ditshwantsho tsa dilo tse ba di lebogelang mme o ba letle go go bolelela ka ditshwantsho tsa bone. Re ka supa jang tebogo ya rona ya dilo tsena?

Morena o tlhodile dilo tse dintsi tse dintle go re tlisetsa boitumelo.

Dithuto le Dikgolagano 59:9–12

Sabata ke letsatsi la Morena.

• Re ka dira eng ka Sontaga go obamela Morena le go bona boitumelo? Thusa bana ba gago go bona megopolo mo Dithuto le Dikgolagano 59:9–12 le ya beke e tsebe ya tiro. Gongwe ba ka bona ditshwantsho kgotsa di dirisiwa tse di kayang dilo tse re di dirang ka Sabata (sekai setshwantsho sa tshoboko e ya sakaramente). Dilo tsena di re thusa jang go ikutlwa re atamela gaufi le Rara wa Legodimo le Jeso Keresete?

Ka dikakantsho tse di oketsegileng, bona kgatiso ya kgwedi e ya Friend makasine.

Setshwantsho ka Marti Major