Ntlha go tswa mo Campfire on the Missouri, ka Bryan Mark Taylor

Seetebosigo 9–15: “Ke na le Baikanyegi ka Metlha”

Dithuto le Dikgolagano 60–63

Mo tshimologong ya Phatwe 1831, Joseph Smith le bagolwane ba bangwe ba Kereke ba ne ba ipaakanyetsa go boela kwa Kirtland morago ga loeto le le khutshwane go ya kwa “lefatsheng la Sione” (Dithuto le Dikgolagano 59:3). Morena o ne a batlile gore ba rere efangele ka nako ya loeto lwa bone (bona Dithuto le Dikgolagano 52:10), mme bangwe ba bone ba ne ba dira jalo ka tlhwaafalo. Mme ba bangwe ba ne ba etsaetsega. “Ba fitlha talente e ke ba e neetseng,” Morena o buile, “ka ntlha ya poifo ya motho” (Dithuto le Dikgolagano 60:2). Ba bantsi ba rona ba itse ka fa bagolwane bano ba neng ba ikutlwa ka teng. Le fa ntswa re rata efangele, poifo le pelaelo di ka re itsa go e abelana. Mme Morena o kutlwelobotlhoko. O “itse makoa a motho le ka fa a ka [re] thusang ka teng” (Dithuto le Dikgolagano 62:1). Go phatlalala le ditshenolo tse go baanamisa efangele ba pele go na le ditshepiso tse di ka re thusang go fenya dipoifo tsa rona le ditlhaelo: “ke nonofile go le dira boitshepo.” “Nama yotlhe e mo seatleng sa me.” “Ke na le baikanyegi ka metlha.” Mme “Yo o boikanyego mme a itshoka o tlaa fenya lefatshe.” (Dithuto le Dikgolagano 60:7; 61:6; 62:9; 63:47.)

Megopolo ya go ithuta kwa Gae le kwa Kerekeng

Dithuto le Dikgolagano 60; 62

Ke ka abelana lorato le bopaki jwa ga Jeso Keresete.

Bopaki jwa gago jwa efangele bo tshwana jang le “talente,” kgotsa mahumo go tswa kwa Modimong? Ke ditsela dife tse ka dinako dingwe re “fitlhang talente tsa [rona]”? (Dithuto le Dikgolagano 60:2; bona gape Mathaio 25: 14–30).

Ke melaetsa efe ya thotloetso go tswa go Morena e o e bonang mo ditsetlana 60 le 62? Melaetsa ena e aga tshepo ya gago jang mo go abelaneng efangele? Fa o tlhatlhanya dipotso tsena, akanya go opela kgotsa go bala mafoko mo “I Want to Be a Missionary Now” (Children’s Songbook, 168). O ithuta eng mo pineng ena ya bana ka go abelana efangele?

Bona gape “Go Abelana Efangele” kgobokanyo mo Motlobong wa Efangele.

Ke ka bulega mabapi le go abelana tumelo ya me mo go Keresete.

Dithuto le Dikgolagano 60:2–4; 61:1–2; 20; 36–38; 62:1, 6

Dikwalo tse di boitshepo di ruta ka ga Jeso Keresete.

Jaaka A laetse baanamisa efangele ba Gagwe, Morena o ne a senola boammaaruri jo bo botlhokwa ka Ene. Batla boammaaruri jono mo Dithuto le Dikgolagano 60:2–4; 61:1–2, 20, 36–38; 62:1, 6. Ke dipolelo dife tse di tswang mo dikwalong tse di boitshepo tse di supang tiro le mekgwa ya Mmoloki tse o di boneng? (bona, sekai, Johane 8:1–11: Ethere 2:14–15).

Dithuto le Dikgolagano 62

Ditshwetso tsa me di tshwanetse go lekanya “katlholo le kaelo ya Mowa.”

Morena o neela kaelo mabapi le boammaaruri jwa bosakhutleng le melawana, mme gantsi O re tlogelela go batlisisa dintlha tse di tlhomameng mabapi le ka fa re ka dirang ka teng mo melawaneng ena. O bona molawana o o supilwe jang mo Dithuto le Dikgolagano 62? (bona gape Dithuto le Dikgolagano 60:5; 61:22). O bone molawana o jang mo botshelong jwa gago? Ke ka goreng go le molemo mo go rona go dira ditshwetso dingwe kwantle ga go solofela gore Modimo a re bolelele totatota se re tshwanetseng go se dira?

Bona gape Ethere 2:18–25; Dithuto le Dikgolagano 58:27–28.

Dithuto le Dikgolagano 63:7–12

Matshwao a tla ka tumelo le thato ya Modimo.

Kwa bokhutlong jwa tshoboko ena, go na le tlhaloso ya masaitsiweng a a neng a kgatlha Ezra Booth mo go tseneletseng: seatla sa ga Elsa Johnson se ne sa fodisiwa ka kgakgamatso. Morago ga go bona seo, Ezra o ne a tlhwaafalela go kolobediwa. Mme le fa gontse jalo, mo dikgweding tse di seng kae fela, Ezra o ne a latlhegelwa ke tumelo ya gagwe mme a simolola go kgala Moporofeti. Se se ne se ka nna jang, ga re akanya ka masaitsiweng a a neng a a bone?

Tlhatlhanya ka se fa o ntse o bala Dithuto le Dikgolagano 63:7– 12. Ke boammaaruri bofe jo o bo ithutang ka matshwao le tumelo?

Bona gape Mathaio 16:1–4; Johane 12:37; Momone 9:10–21; Ethere 12:12, 18

Dithuto le Dikgolagano 63:167

Ke ka itsheka mo dikakanyong le ditiro tsa me.

Mo go Dithuto le Dikgologano 63:16, Mmoloki o ne a tlhomamisa gape se A se rutileng mo Kgolaganong e Ntšha—gore molao wa boitsholo jo bo itshekileng o tshwanetse go laola e seng fela ditiro tsa rona mme le gone dikakanyo tsa rona (bona Mathaio 5:27–28). Fa o ntse o bala Dithuto le Dikgolagano 63:16, kwala ditlhagiso tse Mmoloki a di neelang mabapi le dikakanyo tsa keletso ya boaka. Le gone o ka tlhatlhanya ka se se farologanang le tlhagiso nngwe le nngwe. Sekai, ke mafoko mangwe afe kgotsa dipolelwana tse di farologaneng le poifo? Ke ditshegofatso dife tse dingwe tse di tlisiwang ke go nna le dikakanyo le ditiro tse di itshekileng?

Batho ba le bantsi ba akanya gore ditekanyetso tsa Morena tsa boitsholo jo bo itshekileng jwa kakanyo le tiro di siilwe ke nako kgotsa e bile di a gatelela. Go ne go ka dira pharologanyo efe fa bana botlhe ba Modimo ba ne ba leka go tshela ka molao o? O ka batla dikarabo tsa potso e mo molaetseng wa ga Mogolwane David A. Bednar “We Believe in Being Chaste” (Liahona, Motsheganong 2013, 41–44) kgotsa “Your body is sacred” (Ya Nonofo ya Banana: Kaelo ya go Dira Boitshenkelo, 23–26). Ke melaetsa efe ya tsholofelo e o e bonang?

Le fa re itse ditshegofatso tsa go itshekisa dikakanyong le ditiro tsa rona, seo ga se reye gore go motlhofo. O ka tsaya nako go tlhatlhanya ka se se dirang gore go nne thata mo go wena go tshegetsa tekanyetso ya Mmoloki ya boitsholo jo bo itshekileng—le se se dirang gore go nne motlhofo. Ke dintlha dife tse o ka di abelanang le ba bangwe ka se o tshwanetseng go se dira fa o raelwa ke dikakanyo tse di sa tshwanelang.

Tshegetsanang. Nngwe ya ditshegofatso tse dikgolo tsa go kopana mmogo mo dikopanong tsa Kereke le ditlelase ke monyetla wa go bona tshegetso mo Baitsheping ka rona mo maitekong a rona go sala Mmoloki morago. Bontsi jwa rona re lebagana le dikgwetlho tse di tshwanang, mme maitemogelo a rona a a tshwanang a ka nna maatla a magolo. O seka wa tshaba go dumela gore o na le dikgwetlho. Abelanang se se le thusang go tshela ka melao ya Modimo le go fenya teko.

Bona gape Dithuto le Dikgologano 121:45; Ditlhogo le Dipotso, “Virtue,” Gospel Library; “Standards: Sexual Purity and Modesty—True Confidence” (video), Gospel Library; AddressingPornography.ChurchofJesusChrist.org

Standards: Sexual Purity and Modesty - True Confidence

Two young women share their secret for confidence and self-worth: the companionship of the Holy Ghost.

Dithuto le Dikgolagano 63:58–64

Dilo tse di boitshepo di tshwanetse go tshwarwa ka tlotlo.

Melawana mo Dithuto le Dikgolagano 63:58–64 e feta go dirisetsa leina la Morena lefela. Ke dilo dife tse dingwe tse di boitshepo tse di “tswang kwa godimo,” kgotsa go tswa kwa Modimong? Go kaya eng mo go wena go bua ka dilo tsena “ka kelotlhoko”?

Ka megopolo thata, bona dikgatiso tsa kgwedi tsena tsa Liahona le Ya Nonofo ya Banana dimakasine.

Megopolo ya go Ruta Bana

Dithuto le Dikgolagano 60:4; 61:1–2, 36; 62:1

Dikwalo tse di boitshepo di ruta ka ga Jeso Keresete

• Gongwe o ka kwala dingwe tsa dipolelo ka Mmoloki tse di bonwang mo Dithuto le Dikgolagano 60–62 mo pampitshaneng. Go tswa foo bana ba gago ba ka bapisa dipolelo tseno le ditshwantsho tsa ga Jeso go tswa mo tirelong ya Gagwe mo lefatsheng (bona Gospel Art Book, dinomoro. 34–61) tse di supang mekgwa ena. O re ikitsisa jang gompieno?

  

Dintlha go tswa For This Purpose, ka Yongsung Kim

Dithuto le Dikgolagano 60:7; 61:1–2; 62:1

Morena o tlaa intshwarela fa ke ikwaatlhaya.

• Fa o ntse o bala Dithuto le Dikgolagano 60:7; 61:2 le bana ba gago, ba thuse go bona mafoko ao ditemana tsena di tshwanang ka one. Ba gakolole gore ditshenolo tsena di ne di neetswe Joseph Smith le baeteledipele ba bangwe ba Kereke. Morena o ne a batla gore ba itse eng? O ka bua gape ka gore Mmoloki o ikutlwa jang ka rona fa re dira diphoso le gore go raya eng go ikwaatlhaya. Go yeng ka Dithuto le Dikgologano 62:1, Jeso o ka thusa jang fa re raelwa?

Dithuto le Dikgolagano 62:3, 9

Jeso Keresete o batla ke abelana efangele ya Gagwe.

• O ka botsa bana ba gago gore ba tlaa reng fa mongwe a ba botsa se ba se ratang ka Jeso Keresete le Kereke ya Gagwe. Go opela mmogo pina ka go abelana efangele, sekai “I Want to Be a Missionary Now” (Children’s Songbook, 168), e ka ba neela megopolo. Ke gone o ka bala Dithuto le Dikgolagano 62:3 mme o kope bana ba gago go reetsa se se diragalang fa re abelana bopaki jwa rona. Tsholofetso e e mo temana 9 e ka re thusa jang fa re ikutlwa re tshogile?

Dithuto le Dikgolagano 63:64

Ke ka nna le tlhompho.

• Go itsise Dithuto le Dikgolagano 63:64, o ka opela pina ka tlhompho le bana ba gago, jaaka “Reverence Is Love” (Children’s Songbook, no. 31). O bo o ka bua ka ditsela tse di farologaneng tsa go supa tlhompho mo go Rara wa Legodimo le Jeso Keresete.

• O ka thusa bana ba gago go tlhaloganya gore tlhompho ke eng ka go bua le bone ka selo se se botlhokwa mo go bone, jaaka setshamekisi se ba se ratang, buka, kgotsa kobo. Ba botse gore ba tlhokomela jang le go sireletsa dilo tse di botlhokwa mo go bone. Ke gone lo ka bala mmogo Dithuto le Dikgolagano 63: 64. Ke dife dilo tse di botlhokwa—kgotsa boitshepo—mo go Rara wa Legodimo (bona, sekai, temana 61 le ya beke e tsebe ya tiragatso). Re tshwanetse go tshwara dilo tsena jang—ka mafoko a rona le ditiro tsa rona?

Ka megopolo thata, bona kgatiso ya kgwedi e ya Friend makasine.

Healing of Elsa Johnson’s Shoulder, ka Sam Lawlor