Seetebosigo 23–29: ‘’Tshwanetse … Dikhumo tsa Lefatshe ka Bophara

Dithuto le Dikgolagano 67–70

Go tswa ka 1828 go ya go 1831, Moporofeti Joseph Smith o ne a amogela ditshenolo tse di dintsi go tswa kwa go Morena, go akaretsa kgakololo ya selegodimo ya batho ka bongwe, ditaolo tsa go laola Kereke, diponatshegelo tsa malatsi a bofelo, le boammaaruri jo bontsi jo bo kgothatsang jwa bosakhutleng. Mme Baitshepi ba bantsi ba ne ba sa di bala. Ditshenolo di ne di ise di anamisiwe, mme meriti e se kae e e neng e le teng e e kwadilweng ka seatla mo pampiring e ne ya anamisiwa mogare ga maloko le go tsholwa ke baanamisa efangele.

Ke gone, ka Ngwanatsele 1831, Joseph o ne a bitsa lekgotla la baeteledipele ba Kereke go buisana ka kanamiso ya ditshenolo. Morago ga go batla thato ya Morena, baeteledipele ba ba ne ba dira ditogamaano tsa go anamisa Buka ya Ditaelo—ketapele ya Dithuto le Dikgolagano ya gompieno. Ka pela mongwe le mongwe o ne a tlaa kgona go ipalela lefoko la Modimo le le senotsweng ka moporofeti yo o tshelang, bosupi jo bo bonalang sentle jwa gore “dilotlele tsa masaitsiweng a bogosi jwa Mmoloki di neetswe motho gape.” Ka mabaka a le a mangwe a mantsi, Baitshepi ka nako eo le jaanong ba elatlhoko ditshenolo tse go nna “tshwanetse … dikhumo tsa lefatshe ka bophara” (Dithuto le Dikgolagano 70, setlhogo sa karolo).

Bona Saints, 1:140–43.

Megopolo ya go ithuta kwa Gae le kwa Kerekeng

Dithuto le Dikgolagano 67:1–9; 68:3–6

Batlhanka ba Morena ba bua thato ya Gagwe fa ba tlhotlhelediwa ke Mowa o o Boitshepo.

Tshwetso ya go anamisa ditshenolo e e amogetsweng ke Joseph Smith e lebega e le nngwe e e motlhofo, mme baeteledipele bangwe ba pele ba Kereke ba ne ba sa tlhomamise gore ke mogopolo o o molemo. Selo sengwe se se neng se tshwenya se ne se amana le bokoa jwa tsela e Joseph Smith a neng a kwala ditshenolo. Tshenolo e e mo tsetlana 67 e tlile ka karabo ya matshwenyego ao. O ithuta eng ka baporofeti ba Morena le tshenolo mo ditemaneng 1–9? Ke ditshedimosetso dife tse dingwe tse o di bonang mo 68:3–6?

O itsile jang ka bowena gore ditshenolo tse Modimo a di neelang batlhanka ba gagwe di boammaaruri? Gape o ka nna wa tlhatlhanya le gone ka maitemogelo a mogang o ne o utlwa Morena a bua le wena ka mongwe wa batlhanka ba Gagwe (bona Dithuto le Dikgolagano 68:4). O ikutlwile leng o “tlhotlhelediwa ke Mowa o o Boitshepo” (temana 3) go bua sengwe? Morena o ne a “ema gaufi le wena jang”? (temana 6).

Pele ga Lokwalo la Ditaelo e ne e gatisiwa, baeteledipele ba Kereke ba le mmalwa ba ne ba saena bopaki jo bo kwadilweng gore ditshenolo tse di mo lokwalong di boammaaruri. Go bona moriti wa bopaki jwa bone, bona “Testimony, circa 2 November 1831,” Revelation Book 1, 121, josephsmithpapers.org.

Dithuto le Dikgolagano 67:10–14

“Tswelela ka bopelotelele.”

Lefufa, poifo, le boikgogomoso di re thibela go atamela Morena jang? Re ka fenya “motho wa tlholego” kgotsa “tlhaloganyo ya senama” jang gore re ka “bona Ene mme ra itse gore [O] teng”? (temana 12; bona gape Mosia 3:19). O bona eng mo ditemaneng tsena se se go tlhotlheletsang go “tswelela ka bopelotelele go fitlhelela lo itekanediwa”? (temana 13).

Dithuto le Dikgolagano 68:25–31

Ke ka tlhoma legae la me mo go Jeso Keresete.

Lefoko la Morena mo Dithuto le Dikgolagano 68:25–31 le bua thatathata le batsadi, mme le fa o le motsadi kgotsa nnyaa, o ka dirisa kgakololo ya Gagwe go dira karolo ya gago go tlhoma legae la gago mo thutong ya ga Jeso Keresete. Fa tlase go nankotswe mengwe ya melawana e Morena a reng e tshwanetse go rutiwa mo gae. Elatlhoko ka fa o ka dirang nngwe le nngwe ya karolo e ya motheo wa legae le le tlhomilweng mo go Keresete—legae le o nnang mo go lone jaanong kgotsa legae la gago la lobaka lo lo tlang. Di dirisiwa le dipotso tse di neetsweng di ka thusa.

• Boikotlhao: Ithutuntshe Alema 36:17–20, mme o lemoge ka fa Alema a neng a segofadiwa ka teng ka nako ya mathata ka ntlha ya gore Rraagwe o ne a mo rutile ka thomo ya tefetso ya Mmoloki. O ka thusa jang go tlhotlheletsa lelwapa la gago go sokologela kwa go Jeso Keresete le go ikwatlhaya? (bona gape 2 Nefi 25:26).

• Tumelo mo go Keresete: Bala megopolo e e metlhano ya ga Poresidente Russell M. Nelson ya go godisa tumelo mo go “Christ Is Risen; Faith in Him Will Move Mountains” (Liahona, Motsheganong 2021, 103). tlhatlhanya gore megopolo ena e ka dira setso sa tumelo mo lelwapeng la gago jang.

• Kolobetso: Sekaseka kgolagano ya kolobetso jaaka e tlholositswe mo go Mosia 18:8–10, 13. Maiteko a gago a go tshegetsa kgolagano e go ka nonotsha lelwapa la gago jang?

• Neo ya Mowa o o Boitshepo: ithutuntshe ditaletso mo ditsebeng 17–19 tsa Ya Nonofo ya Banana: Kaelo ya go Dira Boitshenkelo. O ikutlwa o tlhotlholediwa go dira eng go laletsa tlhotlheletso ya Mowa o o Boitshepo mo legaeng la gago?

• Thapelo: O ithuta eng ka maatla a thapelo mo gae mo “Love Is Spoken Here”? (Children’s Songbook, 190–91). Ke ditshegofatso dife tse Mmoloki a di solofetsang mo 3 Nefi 18:15–21?

• Melawana e mengwe e o e bona mo Dithuto le Dikgolagano 68:25– 31:

Ke kgakololo efe e o ka e neelang mongwe yo maloko a lelwapa la gagwe a sa mo thuseng mo maitekong a bone a go aga tumelo mo go Keresete?

Bona gape “Lelwapa: Kitsiso mo Lefatsheng,” Motlobo wa Efangele, Ditlhogo le Dipotso “Parenting,” Motlobo wa Efangele; Dieter F. Uchtdorf, “Jesus Christ Is the Strength of Parents,” Liahona, Motsheganong 2023, 55–59.

Dithuto le Dikgolagano 69:1

Ditsala tse di “boammaaruri le boikanyego” ba nthusa go sala Jeso Keresete morago.

Ke eng o akanya gore e ne e le “botlhale mo [Moreneng]” gore mongwe yo o “boammaaruri le boikanyego” a pate Oliver Cowdery mo tirong e a e neetsweng e e tlhalositsweng mo temaneng e? Melawana e e go ama jang?

Thusa baithuti go tsholetsana. Motho mongwe le mongwe mo tlelaseng ya gago kgotsa lelwapa ke motswedi wa bopaki jo bo nonofileng, ditshedimosetso, le maitemogelo a go tshela efangele. Ba laletse gore ba abelane le go tsholetsana.

Dithuto le Dikgolagano 70:1–4

Ke na le maikarabelo mo ditshenolong tse Morena a di neileng.

Morena o neetse bagolwane bangwe boikarabelo go okamela kanamiso ya ditshenolo. Le fa gone o sena boikarabelo joo jo bo kgethegileng, ke eng se e leng bolebedi jwa gago kgotsa boikarabelo mo “ditshenolong le ditaelo”? (temana 3).

Ka megopolo thata, bona dikgatiso tsa kgwedi tsena tsa Liahona le Ya Nonofo ya Banana dimakasine.

Megopolo ya go Ruta Bana

Dithuto le Dikgolagano 67

Dithuto le Dikgolagano di nthuta ka Jeso Keresete.

• Bolelela bana ba gago ka fa ditshenolo tsa ga Joseph Smith di tlileng go gatisiwa mo bukeng (bona “Kgaolo 23: Dithuto le Dikgolagano,” mo Dipolelo tsa Dithuto le Dikgolagano, 90–92, kgotsa ditshwantsho tsa motshikinyego tse di tsamaelanang le tsone mo Motlobong wa Efangele). Ba thuse go gakologelwa dingwe tsa dilo tse o di ithutileng ka ga Jeso Keresete mo Dithuto le Dikgolagano go fitlha jaana ngwaga ono. Gape lo ka nna la abelana dingwe tsa ditemana tse lo di ratang go tswa mo Dithuto le Dikgolagano.

  Chapter 23: The Doctrine and Covenants: August–November 1831

• Gape o ka supetsa bana ba gago Baebele, Buka ya ga Momone, Dithuto le Dikgolagano, le Perela e e Tlhwatlhwa e Kgolo mme wa bua le bone gore di farologane jang le gore di tshwana jang (bona ditlhaloso tsa dikwalo tsena mo Kaelo ya Dikwalo tse di Boitshepo). Re ka itse jang gore dikwalo tse di boitshepo di boammaaruri? Re ithuta eng mo go Dithuto le Dikgolagano 67:4, 9 ka ditshenolo tse Morena a di neileng Joseph Smith?

Dithuto le Dikgolagano 68:25–31

Ke ka kolobediwa ga ke le dingwaga tse di boferabobedi.

• Mo Dithuto le Dikgolagano 68:27, Morena o ne a bolela gore motho o tshwanetse go nna dingwaga di le kae gore a kolobediwe. Thusa bana ba gago go lemoga se a se buileng. Ke eng Jeso a batla gore re kolobediwe? Pina e e tshwanang le “Baptism” (Children’s Songbook, 100–101) e ka thusa. O dirisa ditshwantsho kgotsa ditemana 25–31 (kgotsa ka bobedi), thusa bana ba gago go lemoga dilo tse Morena a batlang bana ba di ithuta.

• Bala le bana ba gago ka tiro e Morena a neng a e neela Oliver Cowdery mo setlhogong sa kgaolo ya Dithuto le Dikgolagano 69. Morena o neetse kgakololo efe mo temana 1? Ke ka ntlha ya eng go le botlhokwa go nna le batho “ba ba tla nnang boammaaruri le boikanyego”? Gongwe bana ba gago ba ka bolela ka mongwe o ba mo itseng yo o “boammaaruri le boikanyego.” Opelang mmogo pina e e kgothatsang bana go nna boammaaruri le boikanyego go tshwana le Mmoloki, sekai “I’m Trying to Be like Jesus” (Children’s Songbook, 78–79). Re tlhomamisa jang gore re boammaaruri le boikanyego mo Moreneng? O ka re dirisa jang go segofatsa ba bangwe fa re le boammaaruri le boikanyego?

Ka megopolo thata, bona kgatiso ya kgwedi e ya Friend makasine.

Buka ya Ditaelo, ketapele ya Dithuto le Dikgolagano, e ne ya gatisiwa mo motšhineng o o tshwanang le o.