Detalye manipud iti Campfire iti Missouri, ni Bryan Mark Taylor

Hunio 9–15:“Kanayon nga Addaak kadagiti Napudno”

Doktrina ken Katulagan 60–63

Idi rugrugi ti Agosto 1831, agsagsagana ni Joseph Smith ken dagiti dadduma pay nga elder ti Simbaan nga agsubli idiay Kirtland kalpasan ti ababa a panagbisitada iti “daga ti Zion” (Doktrina ken Katulagan 59:3). Kayat idi ti Apo nga ikasabada ti ebanghelio bayat ti panagbiaheda (kitaen iti Doktrina ken Katulagan 52:10), ket sumagmamano kadakuada ti nangaramid iti kasta a sipapasnek. Ngem nagkedked dagiti dadduma. “Ilemmengda ti talento nga intedko kadakuada,” kinuna ti Apo, “gapu iti butengda iti tao” (Doktrina ken Katulagan 60:2). Ammo ti adu kadatayo no ania ti rikna dagitoy nga elder. Uray no ipategtayo ti ebanghelio, mabalin a lapdannatayo ti buteng ken panagduadua a mangibinglay iti daytoy. Ngem manangngaasi ti Apo. “Ammona ti pagkapsutan ti tao ken no kasano a matulonganna[tayo]” (Doktrina ken Katulagan 62:1). Naiwaras iti intero kadagitoy a paltiing kadagiti nagkauna a misionario ket dagiti pammatalged a makatulong kadatayo a mangparmek kadagiti butengtayo ken pagkurangan: “Kabaelak nga aramidenkayo a nasantuan.” “Adda iti imak ti amin a lasag.” “Kanayon nga addaak kadagiti napudno.” Ken “Isu a napudno ken makaibtur maparmeknanto ti lubong.” (Doktrina ken Katulagan 60:7; 61:6; 62:9; 63:47.)

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 60; 62

Maibinglayko ti ayat ken pammaneknekko maipapan ken ni Jesucristo.

Kasano a kasla maysa a “talento,” wenno maysa a gameng manipud iti Dios ti pammaneknekyo iti ebanghelio? Iti ania a wagas a no dadduma “ilemmeng[tayo] ti talentotayo”? (Doktrina ken Katulagan 60:2; kitaen met iti Mateo 25:14–30).

Ania dagiti makaparegta a mensahe manipud iti Apo a masarakanyo kadagiti benneg 60 ken 62? Kasano a papigsaen dagitoy a mensahe ti panagtalekmo iti panangibinglay iti ebanghelio? Bayat panangutobyo kadagitoy a saludsod, ibilangyo ti panangkanta wenno panangbasa kadagiti balikas iti “I Want to Be a Missionary Now” (Children’s Songbook, 168). Ania ti masursuroyo manipud iti daytoy a kanta dagiti ubbing maipanggep iti panangibinglay iti ebanghelio?

Kitaen met iti “Sharing the Gospel” collection iti Gospel Library.

Maibinglayko iti pammatik ken ni Cristo.

Doktrina ken Katulagan 60:2–4; 61:1–2, 20, 36–38; 62:1, 6

Isuro dagiti nasantuan a kasuratan ni Jesucristo.

Bayat ti panangbilinna kadagiti misionariona, impalgak ti Apo dagiti napateg a kinapudno maipapan iti Bagina. Sapulen dagitoy a kinapudno iti Doktrina ken Katulagan 60:2–4; 61:1–2, 20, 36–38; 62:1, 6. Ania dagiti pakaammuan manipud kadagiti nasantuan a kasuratan a mangiladawan kadagiti akem ken kababalin ti Mangisalakan a nasarakanyo? (kitaen, kas pagarigan, iti Juan 8:1–11; Ether 2:14–15).

Doktrina ken Katulagan 62

Nasken a matimbeng dagiti pangngeddengko ti “panangukom ken ti panangiturong ti Espiritu.”

Mangted ti Apo iti panangiturong maipapan kadagiti agnanayon a kinapudno ken pagbatayan, ngem masansan a bay-annatayo a mangikeddeng kadagiti espesipiko a detalye maipapan iti no kasano ti agtignay a mayannurot kadagitoy a pagbatayan. Kasano ti panagkitam iti daytoy a pagbatayan a nailadawan iti Doktrina ken Katulagan 62? (kitaen met iti Doktrina ken Katulagan 60:5; 61:22). Kasano a nakitayon daytoy a pagbatayan iti biagyo? Apay a nasayaat para kadatayo ti agaramid iti sumagmamano a pangngeddeng a ditayo namnamaen nga ibaga ti Dios kadatayo nga eksakto no ania ti aramidentayo?

Kitaen met iti Ether 2:18–25; Doktrina ken Katulagan 58:27–28.

Doktrina ken Katulagan 63:7–12

Umay dagiti tanda babaen ti pammati ken ti pagayatan ti Dios.

Iti ungto daytoy a balabala, adda ilustrasion ti maysa a milagro a nakaawisan unay ti rikna ni Ezra Booth: Namilagruan a naimbagan ti takiag ni Elsa Johnson. Kalpasan a nakitana dayta, sigagagar a nabuniagan ni Ezra. Nupay kasta, iti uneg ti sumagmamano laeng a bulan, napukaw ti pammati ni Ezra ket nagbalin a managdillaw iti Propeta. Kasano a napasamak daytoy, iti laksid ti pannakasaksina iti milagro?

Utobenyo daytoy bayat ti panangbasayo iti Doktrina ken Katulagan 63:7–12. Ania dagiti kinapudno a masursuroyo maipapan kadagiti tanda ken pammati?

Kitaen met iti Mateo 16:1–4; Juan 12:37; Mormon 9:10–21; Ether 12:12, 18.

Doktrina ken Katulagan 63:16

Makapagbalinak a nadalus kadagiti pampanunot ken aramidko.

Iti Doktrina ken Katulagan 63:16, pinatalgedan manen ti Mangisalakan ti insurona iti Baro a Tulag—a ti linteg ti kinadalus ti dayaw ti nasken a mangituray saan laeng a kadagiti aramidtayo no di pay ket kadagiti pampanunottayo (kitaen iti Mateo 5:27–28). Bayat ti panangbasayo iti Doktrina ken Katulagan 63:16, isuratyo dagiti ballaag nga ited ti Mangisalakan maipapan kadagiti nagartem a pampanunot. Mabalinyo pay nga utoben dagiti kasungani ti tunggal ballaag. Kas pagarigan, ania dagiti sumagmamano a balikas wenno ragup ti balikas a kasungani ti buteng? Ania pay dagiti bendision nga agtaud iti kaadda ti nadalus a pampanunot ken aramid?

Adu a tattao ti mangipagarup a dagiti pagrukodan ti Apo iti kinadalus ti panunot ken aramid ket daanen wenno panangirurumen pay. Ania ngata ti pagdumaanna no amin nga annak ti Dios ket agkagkagumaan nga agbiag iti daytoy a linteg? Mabalinyo a sapulen dagiti sungbat iti daytoy a saludsod iti mensahe ni Elder David A. Bednar “We Believe in Being Chaste” (Liahona, Mayo 2013, 41–44) wenno “Sagrado ti bagiyo” (Para iti Pigsa dagiti Agtutubo: Maysa a Pangiwanwan iti Panagpili, 23–26). Ania dagiti mensahe ti namnama a masarakanyo?

Uray no ammotayo dagiti bendision ti panagbalin a nadalus iti panunot ken aramidtayo, di kayat a sawen a nalaka dayta. Mabalin a maaddaan iti sumagmamano a kanito a mangutob no ania ti mangparigat kadakayo a mangtungpal iti pagrukodan ti Mangisalakan iti kinadalus ti dayaw—ken no ania ti mangpalaka iti daytoy. Ania dagiti tip a mabalinyo nga ibinglay kadagiti dadduma maipapan iti no ania ti aramidenyo no masulisogkayo kadagiti saan a maikari a pampanunot.

Agsisinnuportakayo. Maysa kadagiti naindaklan a bendision ti panagtataripnong a sangkamaysa kadagiti miting ken klase ti Simbaan ket ti gundaway a makagun-od iti suporta manipud kadagiti pada a Santo kadagiti panangkagumaantayo a mangsurot iti Mangisalakan. Adu kadatayo ti maipasango kadagiti umasping a karit, ken dagiti gagangay a padastayo ket mabalin a dakkel a pigsa. Saankayo nga agamak a mangaklon nga adda dagiti karityo. Ibinglayyo iti tunggal maysa no ania ti makatulong kadakayo nga agbiag kadagiti linteg ti Dios ken mangparmek iti sulisog.

Kitaen met iti Doktrina ken Katulagan 121:45; Topics and Questions, “Virtue,” Gospel Library; “Standards: Sexual Purity and Modesty—True Confidence” (video), Gospel Library; AddressingPornography.ChurchofJesusChrist.org.

Standards: Sexual Purity and Modesty - True Confidence

Two young women share their secret for confidence and self-worth: the companionship of the Holy Ghost.

Doktrina ken Katulagan 63:58–64

Nasken a matrato iti panagraem dagiti sagrado a banag.

Dagiti pagbatayan iti Doktrina ken Katulagan 63:58–64 ket saan laeng a ti panangusar iti nagan ti Apo iti barengbareng. Ania dagiti dadduma pay a sagrado a banag a sumangbay a “naggapu iti ngato,” wenno naggapu iti Dios? Ania ti kayat a sawen ti mangisao kadagitoy a banag “a naannad”?

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 60:4; 61:1–2, 36; 62:1

Isuro dagiti nasantuan a kasuratan maipapan ken ni Jesucristo.

• Nalabit a mabalinyo nga isurat ti sumagmamano kadagiti palawag maipapan iti Mangisalakan a masarakan iti Doktrina ken Katulagan 60–62 iti babassit a papel. Kalpasanna mabalin dagiti annakyo a mangiparis kadagitoy a palawag kadagiti ladawan ni Jesus manipud iti naindagaan a panangministrona (kitaen iti Libro ti Arte ti Ebanghelio, dagiti num. 34–61) a mangipakita kadagitoy a kababalin. Kasano nga ipakaammona ti Bagina kadatayo iti agdama?

  

Detalye manipud iti Para iti Daytoy a Panggep, ni Yongsung Kim

Doktrina ken Katulagan 60:7; 61:1–2; 62:1

Pakawanennakto ti Apo no agbabawiak.

• Bayat ti panangbasayo iti Doktrina ken Katulagan 60:7; 61:2 a kaduayo dagiti annakyo, tulonganyo ida a mangsarak kadagiti balikas a pagpapadaan dagitoy a bersikulo. Ipalagip kadakuada a naited dagitoy a paltiing ken ni Joseph Smith ken iti dadduma pay a lider ti Simbaan. Ania ti kayat ti Apo nga ammuenda? Mabalinyo pay nga isarita no kasano ti rikna ti Mangisalakan kadatayo no agbidduttayo ken no ania ti kaipapanan ti agbabawi. Segun iti Doktrina ken Katulagan 62:1, kasano a makatulong ni Jesus no masulisogtayo?

Doktrina ken Katulagan 62:3, 9

Kayat ni Jesucristo nga ibinglayko ti ebangheliona.

• Mabalinyo a saludsoden kadagiti annakyo no ania koma ti isaoda no adda maysa a tao nga agdamag kadakuada no ania ti magustuanda maipapan ken ni Jesucristo ken ti Simbaanna. Ti aggigiddan a panagkansion iti maysa a kanta maipapan iti panangibinglay iti ebanghelio, kas iti “I Want to Be a Missionary Now” (Children’s Songbook, 168), ket makaited kadakuadua kadagiti kapanunotan. Kalpasanna mabalinyo ti mangbasa iti Doktrina ken Katulagan 62:3 ket idawatyo kadagiti annakyo a dumngeg no ania ti mapasamak no ibinglaytayo dagiti pammaneknektayo. Kasano a matulongannatayo ti kari iti bersikulo 9 no mariknatayo ti panagnerbios?

Doktrina ken Katulagan 63:64

Makapagbalinak a managraem.

• Tapno mayam-ammo ti Doktrina ken Katulagan 63:64, mabalinyo ti agkansion iti kanta maipapan iti panagraem a kaduam dagiti annakmo, kas iti “Reverence Is Love” (Children’s Songbook, no. 31). Kalpasanna mabalinyo a pagsasaritaan maipapan iti nadumaduma a wagas a mangipakita iti panagraem iti Nailangitan nga Ama ken ni Jesucristo.

• Matulonganyo dagiti annakyo a makaawat no ania kaipapanan ti panagraem babaen ti pannakisaritayo kadakuada maipapan iti maysa a banag a naisangsangayan kadakuada, kas iti paborito nga ay-ayam, libro, wenno ules. Saludsodem kadakuada no kasano ti panangaywan ken panangsalaknibda kadagiti banag a naisangsangayan kadakuada. Kalpasanna aggigiddankayo a mangbasa iti Doktrina ken Katulagan 63:64. Ania dagiti banag a naisangsangayan—wenno sagrado —iti Nailangitan nga Ama? (kitaen, kas pagarigan, iti bersikulo 61 ken iti panid ti aktibidaditi daytoy a lawas). Kasano ti nasken a panangtratotayo kadagitoy a banag —babaen kadagiti balikas ken aramidtayo?

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Panangagas iti Abaga ni Elsa Johnson, ni Sam Lawlor