Hunio 23–29: “Napateg … dagiti Kinabaknang ti Sibubukel a Daga”

Doktrina ken Katulagan 67–70

Manipud idi 1828 agingga iti 1831, immawat ni Propeta Joseph Smith iti adu a paltiing manipud iti Apo, agraman iti nadiosan a balakad para kadagiti indibidual, dagiti pangiturong maipapan iti pannakaituray ti Simbaan, dagiti parmata kadagiti ud-udina nga aldaw, ken adu a makaparegta a kinapudno ti kinaagnanayon. Ngem adu kadagiti Santo ti saan a nakabasa kadagitoy. Saan pay a naipablaak dagiti paltiing, ket naisurat iti ima ti sumagmamano nga adda a magun-od a kopia kadagiti papel a naiwaras kadagiti miembro ken insursor dagiti misionario.

Kalpasanna, idi Nobiembre 1831, nagtawag ni Joseph iti maysa a konseho dagiti lider ti Simbaan tapno paglilinnawagan ti pannakaipablaak dagiti paltiing. Kalpasan ti panagkalikagum a manggun-od iti pagayatan ti Apo, nagplano dagitoy a lider a mangipablaak iti Libro dagiti Bilin—ti pakauna iti agdama a Doktrina ken Katulagan. Iti kabiitan a panawen mabalinton a basaen ti tunggal maysa para iti bagbagida ti balikas ti Dios a naipalgak babaen iti maysa a sibibiag a propeta, a nalawag a pakakitaan a “dagiti tulbek ti kinadatdatlag ti pagarian ti Mangisalakan naitalek manen iti tao.” Ta dagitoy ken adu pay a dadduma a gapu, dagiti Santo idi ken ita ibilangda dagitoy a paltiing nga agbalin a “napateg … dagiti kinabaknang ti sibubukel a Daga” (Doktrina ken Katulagan 70, paulo ti benneg).

Kitaen iti Saints, 1:140–43.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 67:1–9; 68:3–6

Saritaen dagiti katulongan ti Apo ti pagayatanna no tignayen ti Espiritu Santo.

Kasla maysa a nalag-an a pangngeddeng nga ipablaak dagiti paltiing a naawat ni Joseph Smith, ngem sumagmamano kadagiti nagkauna a lider ti Simbaan ti saan a sigurado no maysa daytoy a nasayaat nga ideya. Maysa a pakaseknan ti adda pakainaiganna kadagiti pagkurangan iti wagas a panangisurat ni Joseph Smith kadagiti paltiing. Dimteng ti paltiing iti benneg 67 kas sungbat iti dayta a pakaseknan. Ania ti masursuroyo maipapan kadagiti propeta ti Apo ken paltiing manipud kadagiti bersikulo 1–9? Ania dagiti nayon a nalawag a pannakaammo ken pannakaawat a magun-odyo manipud iti 68:3–6?

Kasano a naammuanyo para iti bagiyo a pudno dagiti paltiing nga ited ti Dios kadagiti katulonganna? Mabalinyo pay nga utoben dagiti padas idi nariknayo a makisarsarita ti Apo kadakayo babaen ti maysa kadagiti katulonganna (kitaen iti Doktrina ken Katulagan 68:4). Kaano a nariknayo a “natignay[nakayo] ti Espiritu Santo,” (bersikulo 3) a mangisao iti maysa a banag. Kasano a ti Apo “nagtakder iti abayyo”? (bersikulo 6).

Sakbay a naimprenta ti Libro dagiti Bilin, nagpirma ti sumagmamano a lider ti Simbaan iti maysa a naisurat a pammaneknek a pudno dagiti paltiing iti libro. Tapno makita ti maysa a kopia ti pammaneknekda, kitaen iti “Testimony, circa 2 November 1831,” Revelation Book 1, 121, josephsmithpapers.org.

Doktrina ken Katulagan 67:10–14

“Ituloy a siaanus.”

Kasano a lapdannatayo iti panangdur-as nga umas-asideg iti Apo ti apal, buteng, ken pasindayag? Kasano a parmekentayo ti “nailubongan a tao” wenno “nailubongan a panunot” tapno kabaelantayo ti “kumita [Kenkuana] ken maammuantayo nga [Isu]”? (bersikulo 12; kitaen met iti Mosiah 3:19). Ania ti masarakantayo kadagitoy a bersikulo a mangparegta kadatayo nga “ituloy[tayo] a siaanus agingga nga agbalin[tayo] a naan-anay”? (bersikulo 13).

Doktrina ken Katulagan 68:25–31

Matulongak a mangisentro iti pagtaengak ken ni Jesucristo.

Dagiti balikas ti Apo iti Doktrina ken Katulagan 68:25–31 ket naipangpangruna a maibasar kadagiti nagannak, ngem nagannakkayo man wenno saan, mabalinyo nga usaren ti balakadna a mangaramid iti pasetyo a mangisentro iti pagtaenganyo iti doktrina ni Jesucristo. Nailista iti baba ti sumagmamano kadagiti pagbatayan a kuna ti Apo a nasken a maisuro iti pagtaengan. Ibilangyo no kasano a pagbalinenyo ti tunggal maysa kadagitoy a paset ti pundasion ti pagtaengan a naisentro ken ni Cristo—ti pagtaengan a pagnanaedanyo ita wenno ti masakbayan a pagtaenganyo. Makatulong dagiti naipaay a resources ken saludsod.

• Panagbabawi: Adalenyo ti Alma 36:17–20, ket paliiwenyo no kasano a nabendisionan ni Alma iti napateg a panawen gapu ta insuro kenkuana ti amana maipapan iti panangsubbot a mision ti Mangisalakan. Kasano a makatulongkayo a mangparegta iti pamiliayo nga agsubli ken ni Jesucristo ken agbabawi? (kitaen met iti 2 Nephi 25:26).

• Pammati ken ni Cristo: Basaen ti lima a singasing ni Presidente Russell M. Nelson iti panangpadur-as iti pammati iti “Christ Is Risen; Faith in Him Will Move Mountains” (Liahona, Mayo 2021, 103). Utobenyo no kasano a dagitoy a singasing ket makapataud iti kultura ti pammati iti pamiliayo.

• Panagbuniag: Irebyu ti katulagan ti panagbuniag kas nailadawan iti Mosiah 18:8–10, 13. Kasano a mangpapigsa iti pamiliayo dagiti panagkagumaanyo a mangtungpal iti daytoy a katulagan?

• Sagut ti Espiritu Santo: Adalenyo dagiti awis kadagiti panid 17–19 ti para iti Pigsa dagiti Agtutubo: Maysa a Pangiwanwan iti Panagpili. Ania ti mariknayo a makaparegta nga aramiden tapno maawis ti Espiritu Santo iti pagtaenganyo?

• Panagkararag: Ania ti masursuroyo maipapan iti bileg ti kararag iti pagtaengan iti “Love Is Spoken Here”? (Children’s Songbook, 190–190). Ania dagiti bendision nga ikari ti Mangisalakan iti 3 Nephi 18:15–21?

• Dadduma pay a pagbatayan a masarakanyo iti Doktrina ken Katulagan 68:25–31:

Ania ti balakad nga itedmo iti maysa a tao a saan a suportaran dagiti miembro ti pamiliana dagiti panagkagumaanda a mangpapigsa iti pammati ken ni Cristo?

Kitaen met iti “Ti Pamilia: Maysa a Waragawag iti Lubong,” Gospel Library; Topics and Questions, “Parenting,” Gospel Library; Dieter F. Uchtdorf, “Jesus Christ Is the Strength of Parents,” Liahona, Mayo 2023, 55–59.

Doktrina ken Katulagan 69:1

Tulongandak a mangsurot ken ni Jesucristo dagiti “pudno ken napudno a gagayyem.

Apay iti panagkunayo a “nainsiriban iti [Apo]” para iti maysa a tao a “pudno ken napudno” tapno kumuyog ken ni Oliver Cowdery iti naidutok nga aramiden a nailadawan iti daytoy a bersikulo? Kasano a mayaplikar daytoy a pagbatayan kadakayo?

Tulonganyo dagiti agad-adal nga agpipinnaregta. Tunggal indibidual iti klase wenno pamiliayo ket nabaknang a paggapuan ti pammaneknek, nalawag a pannakaammo ken pannakaawat, ken padpadas iti panagbiag iti ebanghelio. Awisenyo ida nga agbibinninglay ken agpipinnaregta.

Doktrina ken Katulagan 70:1–4

Adda sungsungbatak kadagiti paltiing nga inted ti Apo.

Inted ti Apo kadagiti masinunuo nga elder ti pagrebbengan a mangimaton iti pannakaipablaak dagiti paltiing. Nupay awan kadakayo dayta a masinunuo a pagrebbengan, ania ti panagaywan wenno pagrebbenganyo “kadagiti paltiing ken bilin”? (bersikulo 3).

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 67

Isuronak ti Doktrina ken Katulagan maipapan ken ni Jesucristo.

• Isaritayo kadagiti annakyo ti maipapan iti no kasano a naimaldit dagiti paltiiing ni Joseph Smith iti maysa a libro (kitaen iti “Kapitulo 23: Ti Doktrina ken Katulagan,” iti Dagiti Estoria iti Doktrina ken Katulagan, 90–92, wenno ti katupagna a video iti Gospel Library). Tulonganyo ida a manglagip iti sumagmamano kadagiti banag a nasursuroyo maipapan ken ni Jesucristo manipud iti Doktrina ken Katulagan agingga ita a tawen. Mabalinyo pay nga ibinglay iti tunggal maysa ti sumagmamano a paboritoyo nga estoria manipud iti Doktrina ken Katulagan.

  Chapter 23: The Doctrine and Covenants: August–November 1831

• Mabalinyo pay nga ipakita kadagiti annakyo ti Biblia, Libro ni Mormon, Doktrina ken Katulagan, ken Perlas a Kapatgan ket isaritayo kadakuada no kasano a naiduma dagitoy ken no kasano nga agpapadada (kitaen dagiti panangiladawan kadagitoy a libro iti Pangiwanwan iti Nasantuan a Kasuratan). Kasano a maammuantayo a pudno dagiti nasantuan a kasuratan? Ania ti masursurotayo manipud iti Doktrina ken Katulagan 67:4, 9 maipanggep kadagiti paltiing nga inted ti Apo ken ni Joseph Smith?

Doktrina ken Katulagan 68:25–31

Mabuniagannakto inton walo ti tawenko.

• Iti Doktrina ken Katulagan 68:27, inkeddeng ti Apo no mano ti tawen ti maysa a tao tapno mabuniagan. Tulonganyo dagiti annakyo a mangtakuat no ania ti kinunana. Apay a kayat ni Jesus nga agpabuniagtayo? Makatulong ti maysa a kanta kas iti “Baptism” (Children’s Songbook,100–101). Babaen ti panangusar kadagiti ladawan wenno dagiti bersikulo 25–31 (wenno agpada), tulonganyo dagiti annakyo a mangtakuat kadagiti banag a kayat ti Apo a masursuro dagiti ubbing.

• Basaenyo a kadua dagiti annakyo ti maipapan iti naidutok nga aramiden nga inted ti Apo ken ni Oliver Cowdery iti benneg a paulo para iti Doktrina ken Katulagan 69. Ania a balakad ti inted ti Apo iti bersikulo 1? Apay a napateg a makikadua kadagiti tao “a pudno ken napudno”? Nalabit a mabalin nga ibaga dagiti annakyo ti maipapan iti maysa nga am-ammoda a “pudno ken napudno.” Aggigiddan nga agkansion iti maysa a kanta a mangyallukoy kadagiti ubbing nga agbalinda a pudno ken napudno kas iti Mangisalakan, kas iti “I’m Trying to Be like Jesus” (Children’s Songbook, 78–79). Kasano a masiguradotayo a pudno ken napudnotayo iti Apo? Kasano nga usarennatayo a mangbendision kadagiti dadduma no pudno ken napudnotayo?

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ti Libro dagiti Bilin, pakauna iti Doktrina ken Katulagan, ket naimaldit iti pagimalditan a kas itoy.