Umuna a Muriski, ni James Taylor Harwood

Mayo 26–Hunio 1: “Napudno, Nalinteg, ken Masirib a Mangaywan”

Doktrina ken Katulagan 51–57

Para kadagiti miembro ti Simbaan kadagiti tawen ti 1830, ti panangummong kadagiti Santo ken panangipasdek iti siudad ti Zion ket aramid a naespirituan kasta met a naindagaan, nga aduan kadagiti maaramat a pakseknan a banag a risuten: Maysa a tao ti nagkasapulan a gumatang iti daga a mabalin a pagnaedan dagiti Santo. Maysa a tao ti nagkasapulan nga agimaldit kadagiti libro ken dadduma pay a pablaak. Ken maysa a tao ti nagkasapulan a mangpalakad iti pagtagilakuan tapno maipaay dagiti tagilako a kasapulan dagiti tao iti Zion. Kadagiti paltiing a naisurat iti Doktrina ken Katulagan 51–57, tinudingan ken binilin ti Apo dagiti tao a mangasikaso kadagitoy nga aramiden.

Ngem idinto a kasapulan dagiti paglaingan iti kakasta a banag iti Zion, isuro pay dagitoy a paltiing a tarigagayan ti Apo nga agbalin dagiti Santo a naespirituan a maikari a maawagan iti tattao ti Zion—dagiti taona. Awaganna ti tunggal maysa kadatayo nga agbalin a “napudno, nalinteg, ken masirib a mangaywan,” addaan iti sibababawi nga espiritu, “[pan]agtalinaed a natibker” kadagiti pagrebbengan a naidutok kadatayo (kitaen iti Doktrina ken Katulagan 51:19; 52:15; 54:2). No mabalintayo nga aramiden dayta —ania man dagiti temporal a paglaingantayo—mausarnatayo ti Apo a mangbangon iti Zion.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 51

Kayat ti Apo nga agbalinak a napudno, nalinteg, ken masirib a mangaywan.

No maysaka a miembro ti Simbaan idi 1831, nalabit a naawiska nga agbiag iti linteg ti panagkonsagrar babaen iti panangtedmo iti sanikuam iti Simbaan babaen iti bishop. Kalpasanna isublina kenka, iti kaaduan a kasasaad, no ania ti indonarmo, no dadduma adda sobrana. Ngem saan laengen a ti sanikuam—daytoy ti panangaywanmo.

Iti agdama sabalin dagiti annuroten, ngem dagiti pagbatayan ket napateg pay laeng iti aramid ti Apo. Bayat ti panagbasayo iti benneg 51, panunoten maipapan ti no ania ti intalek ti Dios kadakayo. Ania ti kaipapanan dagiti balikas a “mangaywan” (bersikulo 19) ken “naikonsagrar” (bersikulo 5) ken no ania ti iparangarangda maipapan kadagiti namnamaen ti Dios kadakayo?

Inlawlawag ni Presidente Spencer W. Kimball: “Iti Simbaan ti panagaywan ket sagrado a naespirituan wenno naindagaan a panagtalek a pakaaddaan iti sungsungbatan. Gapu ta kukua ti Apo ti amin a banag, datayo ti agaywan kadagiti bagi, panunot, pamilia, ken sanikuatayo. (Kitaen iti Doktrina Ken Katulagan 104:11–15.) Ti maysa a napudno nga agay-aywan ket maysa a mangaramat iti nalinteg a panangituray, mangtaripato iti bukodna, ket kitaenna dagiti nakurapay ken agkasapulan” (“Welfare Services: The Gospel in Action,” Ensign, Nob. 1977, 78).

Kitaen met iti “The Law of Consecration” (video), Gospel Library.

The Law of Consecration

Historians Kate Holbrook and Steven C. Harper discuss what the Law of Consecration is, the three core doctrines pertaining to it, and how we can live it today.

Doktrina ken Katulagan 52:9–11, 22–27

Maawisko dagiti dadduma nga umasideg ken ni Cristo sadino man ti papanak.

Idi nangibaon ti Apo ti sumagmamano a lider iti Simbaan iti Missouri, imbagana kadakuada a mangusar iti oras a nabubos iti panagdaliasat ket “mangasaba iti dalan” (dagiti bersikulo 25–27). Kasano a maibinglayyo ti ebanghelio “iti dalan,” wenno bayat dagiti gagangay a pasamak iti biagyo?

Doktrina ken Katulagan 52:14–19

Tulongannak ti Apo a mangliklik iti panangallilaw.

Gapu ta adu a tattao ti mangibagbaga nga aw-awatenda dagiti naespirituan a parangarang, maseknan dagiti nagkauna a Santo maipapan iti pannakaallilaw. Ania ti ballaag nga inted ti Apo kadakuada iti Doktrina ken Katulagan 52:14? Ania ti pangrisutna? (kitaen kadagiti bersikulo, 14-19).

Ti pagtuladan ket maysa a banag a maulit-ulit iti regular, maipadto a wagas. Mairaman kadagiti pagarigan ti panagbilang babaen kadagiti agpapada a numero wenno ti isisingising ken ilelennek ti init iti tunggal aldaw. Ania dagiti dadduma pay a pagarigan a mapanunotyo? Bayat ti panangsukisok iti Doktrina ken Katulagan 52:14–19, lasinen ti pagtuladan ti Apo iti panangliklik iti panangallilaw. Mabalin a makatulong a kitaen a ti “panagbabawi” ipasimudaagna ti rikna ti kinapakumbaba ken panagbabawi; ti “naemma” ipasimudaagna ti kinaalumamay ken panagteppel; ken ti “mangpabileg” kaipapananna ti panangisuro, panangpasayaat, wenno panangbangon. Apay a mariknayo a ti pagtuladan ti Apo ket iramanna dagitoy a kababalin, kasta met ti panagtulnog? Kasano a mayaplikaryo daytoy a pagtuladan tapno maliklikan ti panangallilaw?I

Ilawlawag ti kaipapanan dagiti narigat a balikas. Iti Gospel Library app, mabalinyo nga i-tap ken i-hold ti maysa a balikas sa kalpasanna pilienyo ti “Define.” Kalpasanna, maipankayo iti depinision dayta a balikas. Padasen daytoy no makasarakkayo kadagiti di pamiliar a balikas—wenno dagiti balikas a kasla pamiliar a kayatyo a maawatan a nasaysayaat.

Ania dagiti sumagmamano a pagarigan ti panangallilaw iti aldawtayo? Kasano a maammuantayo no maal-allilawtayo?

Kas pagarigan, mabalinyo nga ibilang ti panangtingiting kadagiti piliyo maipapan kadagiti pelikula, musika, ken social media maibatay kadagiti pagrukodan iti “Magna iti silaw iti Dios” iti Para iti Pigsa dagiti Agtutubo: Maysa a Pangiwanwan iti Panagpili, 16–21.

Kitaen met iti Gary E. Stevenson, “Deceive Me Not,” Liahona, Nob. 2019, 93–96; “Guide Me to Thee,” Hymns, no. 101; Topics and Questions, “Seeking Truth and Avoiding Deception,” Gospel Library.

Doktrina ken Katulagan 54

Makaasidegak iti Apo no masaktannak gapu kadagiti pili dagiti dadduma.

Nagsagabakayo kadin iti pannakapaay idi saan a tinungpal ti karina ti maysa a tao a nagpannurayanyo? Daytoy ti napasamak kadagiti Santo iti Colesville, Nueva York, a nangnamnama nga agindeg iti daga ni Leman Copley iti Ohio. Tapno masursuruan manipud iti daytoy a padas, ibilang ti panangrebyu iti paulo iti benneg 54 (kitaen met iti Saints, 1:125–28; “A Bishop unto the Church,” iti Revelations in Context, 78–79). No adda gayyemyo kadagiti Santo ti Colesville, ania a balakad ti masarakanyo iti benneg 54 tapno ibinglay kadakuada?

bangkag ni Leman Copley

Doktrina ken Katulagan 56:14–20

Nagasat dagiti natarnaw iti pusoda.

Kadagitoy a bersikulo, kinasao ti Apo nga agpadpada dagiti nabaknang ken dagiti nakurapay; mabalin a makaay-ayo nga idilig ti balakadna kadagitoy dua a grupo. Ania kadagitoy a bersikulo ti mariknayo nga adda personal a pakainaiganna kadakayo?

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 51:9

Makapagbalinak a napudno.

• Tapno matulongan dagiti annakyo a mangammo no ania ti kaipapanan ti panagbalin a napudno, mabalinyo nga aggigiddan a basaen ti Doktrina ken Katulagan 51:9 ken mangibinglay kadagiti estoria dagiti ubbing a maipasango kadagiti pangngeddeng maipapan iti panagbalin a napudno. Mabalinyo nga usaren dagiti ladawan, sock puppets, wenno papel a munieka tapno maaramid a makaay-ayo dagiti estoria. Kasano a bendisionannatayo ti Apo no ikagumaantayo ti agbalin a napudno?

• Ibilang ti pannakipagay-ayam kadagiti annakyo. Kalpasanna, pagsasaritaan no kasano a naiduma ti ay-ayam no adda nangkusit. Apay a napateg ti “napudno iti pannakilangen” iti maysa ken maysa?

Doktrina ken Katulagan 52:10; 53:3; 55:1

Inawatko ti sagut ti Espiritu Santo babaen ti panangipatay kadagiti dakulap.

• Nadakamat iti sumagmamano a daras ti panangawat iti Espiritu Santo babaen iti panangipatay kadagiti ima iti Doktrina ken Katulagan 51–57 Mabalin a nasayaat a gundaway daytoy tapno maisuro kadagiti annakyo ti maipapan iti daytoy nga ordinansa. Kas pagarigan, mabalinda ti kumita iti maysa a ladawan ti maysa nga ubing a makumkumpirmaan ken mangiladawan no ania ti mapaspasamak iti ladawan. Kiddawenyo kadakuada nga agpalakpakda no mangngegda ti “panangipatay iti dakulap” wenno “pannakaipatay dagiti dakulap” bayat iti panangbasayo iti: Doktrina ken Katulagan 52:10; 53:3; 55:1.

• Mabalinyo a kansionen ti “The Holy Ghost” (Children’s Songbook, 105) wenno maysa nga umasping a kanta. Tulonganyo dagiti annakyo a mangsapul kadagiti balikas ken ragup dagiti balikas iti kanta a mangisuro maipapan iti sagut ti Espiritu Santo.

  

Doktrina ken Katulagan 52:14–19

Adda pagtuladan ti Dios tapno mangtulong kaniak a saan a maallilaw.

• Tapno maisuro maipapan iti pagtuladan ti Apo para iti panangliklik iti panangallilaw, mabalinyo a rugian babaen ti panangtulong kadagiti ubbing a mangsapul kadagiti pagarigan dagiti pagtuladan—iti nakaparsuaan, kadagiti namaris a kubrekama wenno kawes, wenno iti inaldaw a panagbiag. Tulongam ida a mangsapul kadagiti pagtuladan nga inted ti Apo iti Doktrina ken Katulagan 52:14–15. Penkem a maawatanda dagiti ania man a saan a pamiliar a balikas kadagitoy a bersikulo. Kasano a mausartayo daytoy a pagtuladan a mangbigbig iti kinapudno?

Doktrina ken Katulagan 54:4–6

Nasken a kanayon a tungpalek dagiti katulagak.

• Iti bukodyo a balikas, ibinglayyo kadagiti annakyo no ania ti napasamak kadagiti Santo nga immay nagindeg iti daga ni Leman Copley (kitaen iti paulo iti benneg 54). Mabalin dagiti annakyo ti agpammarang a miembro ti Simbaan a simmangpet iti Ohio. Ania ngata ti riknada kalpasan a sinalungasing ni Leman ti katulaganna? Ania ti isuro kadatayo daytoy nga estoria maipapan iti panangtungpal kadagiti katulagan wenno karitayo? Aggigiddan a basaen ti Doktrina ken Katulagan 54:6 tapno matakuatan dagiti bendision para kadagiti tao a mangtungpal kadagiti katulaganda.

Doktrina ken Katulagan 55:1–4

Mabalinko nga usaren dagiti bendision nga inted kaniak ti Dios a mangbendision kadagiti dadduma.

• Tapno mayam-ammo ti benneg 55, mabalin a kayatyo nga ilawlawag a maysa nga agipabpablaak iti pagiwarnak ni William W. Phelps a nakasursuro maipapan iti ebanghelio ken nakikappeng iti Simbaan. Makipagbasa kadagiti annakyo iti Doktrina ken Katulagan 55:1–4, ken tulonganyo ida a mangtakuat no ania ti kayat ti Dios nga aramiden ni William. Kasano a plinanona nga usaren dagiti talento ni William? Mabalin a maiturong daytoy iti panaglilinnawag maipapan no kasano a mabalin nga awisennatayo ti Dios a mangusar kadagiti talentotayo a mangbendision kadagiti annakna.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Umawat ni Bishop Partridge iti Pannakakonsagrar, ni Albin Veselka