Mayo 19–25: “Silaw Dayta Nagtaud iti Dios”

Doktrina ken Katulagan 49–50

Ti Mangisalakan ti “nasayaat a pastor[tayo]” (Doktrina ken Katulagan 50:44). Ammona a no dadduma mayaw-awan dagiti karnero ken aduan ti langalang kadagiti peggad. Isu a siaayat nga iturongnatayo iti kinatalged ti doktrinana. Ngarud siaayat Isuna a mangyadayo kadatayo manipud kadagiti peggad a kas iti “sinsinan nga espiritu, a nagwaras iti daga, a mangal-allilaw iti lubong” (Doktrina ken Katulagan 50:2). Ti panangsurot Kenkuana masansan a kayatna a sawen ti saanen a panamati kadagiti palso a kapanunotan wenno kannawidan. Pudno daytoy para ken ni Leman Copley ken ti dadduma pay iti Ohio. Inawatda ti naisubli nga ebanghelio ngem nagtultuloyda latta a namati iti sumagmamano a pammati a saan nga umno. Iti Doktrina ken Katulagan 49, impakdaar ti Apo dagiti kinapudno a nangatur kadagiti immun-una a pammati ni Leman maipapan kadagiti topiko a kas iti panagasawa ken ti Maikadua a Yaay ti Mangisalakan. Ket idin a dagiti napasurot iti Ohio “inawat[da] … dagiti espiritu a di[da] maawatan,” insuro ti Apo ida no kasano ti panangilasin kadagiti pudno a parangarang ti Espiritu (Doktrina ken Katulagan 50:15). Naanus kadatayo ti Naimbag a Pastor, dagiti “babassit nga annakna,” a “nasken a dumakkel iti parabur ken iti pannakaammo iti kinapudno” (Doktrina ken Katulagan 50: 40).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 49; 50:24

Kayat ni Jesucristo nga awatek dagiti kinapudno ti ebangheliona.

Sakbay ti panagkamengna iti Simbaan, miembro ni Leman Copley iti maysa a grupo ti relihion a maaw-awagan ti Nagkaykaysa a Timpuyog dagiti Mamatpati iti Maikadua a Panagparang ni Cristo, nga isu ti maaw-awagan pay a dagiti Shaker. Kalpasan ti maysa a pannakisarsarita ken ni Leman, pinanggep ni Joseph Smith ti pannakailawlawag manipud iti Apo maipapan iti sumagmamano a pannursuro dagiti Shaker. Simmungbat ti Apo babaen ti paltiing iti benneg 49. Sumagmamano kadagiti patpatien dagiti Shakers ti nadakamat iti paulo ti benneg.

Ania ti insuro ti Apo iti benneg 49 tapno mangatur kadagiti patpatien dagiti Shaker? Ania ti pakakitaan a makitayo iti daytoy a paltiing maipapan iti ayat ken pannakaseknanna kadagiti tao nga awanan iti pakabuklan ti kinapudnona? Kasano a matulonganyo ida nga addaan iti ayat ken pannakaseknan?

Ania ti makaawis riknayo maipapan iti pammaliiw ti Apo iti bersikulo 2? Mabalinyo nga idilig daytoy iti no ania ti mapasamak no buyaenyo laeng ti paset ti pelikula, makitayo iti maysa a pedaso ti puzzle, wenno mangngeganyo ti maysa a dasig ti panagsusupiat. Kasano a mainaig ti ballaag ti Apo iti Doktrina ken Katulagan 50–24? Ibilangyo no ania ti ar-aramidenyo tapno makaawatkayo iti ad-adu pay a lawag manipud iti Apo.

Kitaen met iti “Leman Copley and the Shakers,” iti Revelations in Context, 117–21.

Doktrina ken Katulagan 49:15–17

Napateg ti kallaysa ti lalaki ken babai iti agnanayon a plano ti Dios.

Iti panangikagumaanna a mangdadael ti plano ti Nailangitan nga Ama, aggagar ni Satanas a mangparnuay iti pannakatikaw maipapan iti kallaysa. Iti sabali a bangir, agtultuloy nga ipalgak ti Apo ti kinapudno maipapan iti kallaysa babaen kadagiti propetana. Masarakanyo ti sumagmamano iti daytoy a kinapudno iti Doktrina ken Katulagan 49:15–17; Genesis 2:20–24; 1 Taga Corinto 11:11; ken “Ti Kaamaan: Maysa a Waragawag iti Lubong.” Ilistayo no ania dagiti kinapudno a maammuanyo. Apay a napateg ti kallaysa iti plano ti Dios?

Insuro ni Elder Ulisses Soares nga “ipakaammo ti naisubli nga ebanghelio ni Jesucristo ti pagbatayan a napnuan iti panagkadua ti babai ken lalaki, iti man mortal a panagbiag ken kadagiti kinaagnanayon” (“In Partnership with the Lord,” Liahona, Nob . 2022, 42). Mabalinyo nga adalen ti mensahena, nga agsapsapul kadagiti pagbatayan “a mangpabileg iti panagkadua ti lalaki ken babai.” Kasano a mausaryo dagitoy met laeng a pagbatayan iti biagyo? No adda maysa a tao a sabali ti pammatina nga agsaludsod kadakayo no apay a napateg ti kallaysa, kasano ti sungbatyo? Apay a pagyamyamananyo daytoy a pannakaawat?

Kitaen met iti Topics and Questions, “Marriage,” “Family,” Gospel Library; David A. Bednar, “Marriage Is Essential to His Eternal Plan,” Ensign, Hunio 2006, 83–84; “Renaissance of Marriage” (video), Gospel Library.

Renaissance of Marriage

Hear what President Eyring says we all must do to have a renaissance of happy marriages and productive families.

Agbalinkayo a sensitibo kadagiti kasasaad ti tunggal tao. Idinto a ti naragsak a panagasawa ken panagbiag ti pamilia ket makaay-ayo iti ebanghelio ni Jesucristo, ditayo amin agragsak kadagitoy a bendision bayat ti kaaddatayo iti mortalidad. Iti panangilawlawag iti daytoy a topiko, agbalinkayo a sensitibo iti nadumaduma a kasasaad ti indibidual ken pamilia, nangruna kadagiti tao nga “agan-anus nga agur-uray iti Apo” tapno maipatungpal dagiti agnanayon a kari (kitaen iti Doktrina Ken Katulagan 98:1–3).

Doktrina ken Katulagan 50

Masalaknibannak dagiti pannursuro ti Apo manipud kadagiti panangallilaw ni Satanas.

Naggagar dagiti baro a miembro ti Simbaan iti Ohio nga umawat kadagiti naespirituan a parangarang a naikari kadagiti nasantuan a kasuratan. Nupay kasta, naggagar met ni Satanas a mangallilaw kadakuada. No nakiddaw kadakayo a tulongan dagitoy a miembro a makaawat no kasano a bigbigen dagiti pudno a pannakaiparangarang ti Espiritu Santo, ania dagiti pagbatayan iti Doktrina ken Katulagan 50 nga ibinglaymo koma? (kitaen nangnangruna kadagiti bersikulo 22–25, 29–34, 40–46). Kaano a natulongannakayo ti Mangisalakan a naammuanyo ti pagdumaan ti kinapudno ken biddut?

Kitaen met iti 1 Taga-Corinto 14:1–28; 2 Timoteo 3:13–17.

Doktrina ken Katulagan 50:13–24

Maintandudo a sangkamaysa dagiti mannursuro ken agsursuro babaen ti Espiritu.

Ti panagbiag iti ebanghelio ni Jesucristo ket mangipaay iti adu a gundaway nga agbalin a mannursuro ken agad-adal, agpadpada iti pagtaengan ken iti Simbaan. Maysa a pamay-an a mabalin nga agadalkayo iti Doktrina ken Katulagan 50:13–24 ket ti panangidrowing iti ladawan ti maysa a mannursuro ken maysa nga agad-adal. Iti abay ti tunggal maysa, mangaramidkayo iti listaan dagiti ragup ti balikas manipud kadagitoy a bersikulo a mangisuro kadakayo iti maysa a banag maipapan iti panagsursuro ken panangisuro iti ebanghelio. Kaano a naaddaankayo kadagiti padas a nangisuro kadakayo iti kinapateg ti Espiritu iti panangisuro ken panagsursuro? Ibilang no ania ti mabalinmo nga aramiden a mangpadur-as kadagiti panagkagumaanmo kas maysa nga agad-adal ken mannursuro iti ebanghelio?

Doktrina ken Katulagan 50:23–25

“Silaw dayta nagtaud iti Dios.”

Bayat ti panangutobyo kadagiti balikas ti Mangisalakan iti Doktrina ken Katulagan 50:23–25, panunotenyo no kasano nga awatenyo ti silaw ti Dios iti biagyo ken no kasano a “mapaksiatyo ti kinasipnget.” Kas pagarigan, kasano nga iwanwan dagitoy a bersikulo dagiti piliyo no kasano ti panangbubosyo iti panawenyo? ania a paglinglingayan wenno media ti sapulenyo? ania dagiti pagsasaritaan a pakairamananyo? Ania pay dagiti pangngeddeng a matulongannakayo dagitoy a bersikulo? Ti maysa a himno kas iti “The Lord Is My Light” (Hymns, no. 89) ket mabalin a mangparegta kadagiti nayon a kapanunotan.

Kitaen met iti “Magna iti lawag ti Dios,” Para iti Pigsa dagiti Agtutubo: Maysa a Pangiwanwan iti Panagpili, 16–21.

Dagiti Kapanunotan para iti Panangisuro kadagiti Ubbing

Doktrina ken Katulagan 49:12–14

Masurotko ni Jesucristo.

• Tapno maisuro kadagiti annakyo dagiti pagbatayan kadagitoy a bersikulo, mabalinyo ti mangisagana iti uppat a papel a tugot ti saka ken uppat a ladawan a mangibagi iti pammati ken ni Jesucristo, panagbabawi, panagbuniag, ken panangawat iti Espiritu Santo (kitaen dagiti ladawan iti daytoy a lawas panid ti aktibidad). Mabalin nga ikabil dagiti annakyo dagiti tugot ti saka iti suelo nga adda dagiti ladawan iti abayda. Kalpasanna mabalinda ti agsisinnublat a magna kadagiti tugot ti saka bayat ti panagbasayo iti Doktrina ken Katulagan 49:12–14. Tulonganyo ida a makaawat a no aramidentayo dagiti banag kadagitoy a ladawan, sursurotentayo ni Jesucristo.

• Mabalinyo pay nga awisen dagiti annakyo a mangidasig ti Doktrina ken Katulagan 49:12–14 iti Dagiti Aramid 2:38 ken iti maikapat a pagannurotan ti pammati. Ania dagiti pagpapadaan ti masarakanda? Apay a napateg dagitoy a kinapudno?

Doktrina ken Katulagan 49:15–17

Napateg ti kallaysa ti lalaki ken babai iti plano ti Dios.

• Tapno mayam-ammo dagitoy a bersikulo, mabalinyo nga ilawlawag a dagiti Shaker ket maysa a grupo ti relihion a mamati a nasken a saan nga agasawa dagiti tao (kitaen iti paulo a benneg iti Doktrina ken Katulagan 49). Awisenyo dagiti annakyo a mangsapul kadagiti banag nga insuro ti Apo maipapan iti panagasawa iti Doktrina ken Katulagan 49:15–17. Ania ti kaipapanan ti “inordenan ti Dios ti panagasawa”? Nalabit a mabalin nga aggigiddan a basaenyo ti umuna a tallo a parapo ti (“Ti Kaamaan: Maysa a Waragawag iti Lubong”). Kalpasanna, pagsaritaan no apay a napateg ti panagasawa ken pamilia iti Nailangitan nga Ama.

Doktrina ken Katulagan 50:23–25

“Silaw dayta nagtaud iti Dios.”

• Tapno mayam-ammo ti Doktrina ken Katulagan 50:23–25, kasaritayo kadagiti annakyo maipapan iti pagdumaan ti lawag ken sipnget. Apay a kasapulantayo ti silaw? Mabalinyo nga agiggidan a basaen ti umuna a parapo ti “Magna iti lawag ti Dios” iti Para iti Pigsa dagiti Agtutubo: Maysa a Pangiwanwan iti Panagpili (panid 17) kasta met iti Doktrina ken Katulagan 50:23–25. Pagsaritaan dagiti wagas a pangawatantayo iti lawag ti Dios ken dagiti wagas a mabalintayo a paksiaten ti sipnget. Kalpasanna mabalinyo ti aggigiddan a mangkansion iti maysa a kanta maipapan iti naespirituan a silawda, kas iti “Shine On” (Children’s Songbook, 144).

Doktrina ken Katulagan 50:40–46

Ni Jesucristo ti Naimbag a Pastorko.

• Kalpasan ti panagbasa iti Doktrina ken Katulagan 50:40–46 nga aggigiddan, mabalinyo nga ipakita ti ladawan ti Mangisalakan iti ungto daytoy a balabala ket agsaludsod a kas kadagitoy: Kasano ti rikna ti maysa a pastor maipapan kadagiti karnerona? Kasano a kas maysa a pastor kadatayo ti Mangisalakan?

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Nadungngo a Pastor, ni Yongsung Kim