Ti Miting iti Kampo, ni Worthington Whittredge

Doktrina ken Katulagan 12–18: “Sapulenyo a Sipapasnek dagiti Kasayaatan a Sagut”

Doktrina ken Katulagan 46–48

Iti ipapanaw da Parley P. Pratt, Oliver Cowdery, Ziba Peterson, ken Peter Whitmer Jr. iti Kirtland ken immakarda tapno agtuloy iti panangikasaba iti ebanghelio, imbatida ti nasurok a 100 a baro a miembro ti Simbaan a napnuan iti kinaregta ngem kurangda iti padas wenno direksion. Awan dagiti handbook-da iti panangiturong, awan dagiti miting iti panagsanay a mangidaulo, awan dagiti waragawag iti sapasap a komperensia—kinapudnona, awananda pay unay ti adu a kopia ti Libro ni Mormon a maibunong. Adu kadagitoy baro a mamatpati ti naggusto iti naisubli nga ebanghelio babaen ti kari dagiti datdatlag a parangarang ti Espiritu, nangnangruna kadagiti nailadawan iti Baro a Tulag (kitaen. kas pagarigan, iti 1 Taga Corinto 12:1–11). Adu ti narigatan a nangilasin no ania kadagiti pudno a parangarang iti Espiritu. Idi nakitana ti pannakariribukda, nagkararag ni Joseph Smith para iti tulong. Napateg ita ti sungbat ti Apo, no masansan a pagkedkedan wenno saan nga ikankano dagiti tao dagiti banag a mainaig iti Espiritu. Impasingkedna manen a pudno dagiti naespirituan a parangarang. Inlawlawagna no ania dagitoy: dagiti sagut manipud iti managayat a Nailangitan nga Ama, “naited a para iti pagimbagan dagiti agayat [Kenkuana] ken agtungpal iti amin a bilin[na] ken isu a mangsapul a mangaramid” (Doktrina ken Katulagan 46:9).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 46:1–7

Pasangbayaen ti Mangisalakan ti amin nga agtarigagay nga agdaydayaw iti Simbaanna.

Mariknayo kadi ti rikna dagiti gagayyemyo ken tattao iti sangakarrubaanyo ti pannakapasangbayda kadagiti serbisio ti panagdaydayaw iti wardyo? Ania ti ar-aramidenyo tapno mapagbalinyo dagiti lugar a pagmimitingan ti Simbaan a tarigagayan a pagsublian dagiti tao? Utobenyo no kasano a mayaplikaryo ti balakad ti Apo iti Doktrina ken Katulagan 46:1–7 (kitaen met iti 2 Nephi 26:24–28; 3 Nephi 18:22–23).

Mabalinyo pay a panunoten ti maysa a panawen a timmabunokayo kadagiti serbisio ti Simbaan—wenno miting ti sabali a grupo—iti umuna a gundaway. Ania ti inaramid dagiti tao a nangtulong kadakayo a makarikna ti pannakapasangbay?

Kitaen met iti Moroni 6:5–9; “’Tis Sweet to Sing the Matchless Love,” Hymns, no. 177; “Welcome” (video), Gospel Library.

Naragsak nga Isasangbay iti ComeUntoChrist.org

Naragsak nga isasangbay iti komunidad a pagpadasan ti amin nga agtungpal iti insuro ni Jesus. Umay ket kitaenyo no ania ti patienmi ComeUntoChrist.org.

Doktrina ken Katulagan 46:7–33

Mangted kaniak ti Nailangitan nga Ama kadagiti naespirituan a sagut a mangbendision kadagiti dadduma.

Namati dagiti nagkauna a Santo kadagiti naespirituan a sagut ngem kinasapulanda ti sumagmamano a tulong a panangbigbig kadakuada ken pannakaawat iti panggepda. Bayat ti panagadalyo maipapan kadagiti sagut ti Espiritu iti Doktrina ken Katulagan 46:7–33, utobenyo ti panggep “ti gapu ti nakaitedanda” (bersikulo 8). Ania ti masursuroyo maipapan iti Dios—ti mangmangted kadagitoy a sagut?

Mapanunotyo kadi dagiti pagarigan a nakitayon kadagiti tattao nga agus-usar kadagitoy wenno dadduma pay a naespirituan a sagut? Kasanoda a “pagimbagan … dagiti annak ti Dios”? (bersikulo 26). Mabalinyo pay a kitaen no mailasinyo dagiti pagarigan ti nagduduma a naespirituan a sagut kadagiti nasantuan a kasuratan a kas kadagitoy: 1 Ar-ari 3:5–15; Daniel 2:26–30; Dagiti Aramid 3:1–8; Helaman 5:17–19; Mormon 1:1–5; Ether 3:1–15; Doktrina ken Katulagan 6:10–12; Moises 7:13.

Ti panagadalyo kadagiti naespirituan a sagut ket mabalin a mangiturong kadakayo a mangpanunot no ania dagiti sagut nga inted kadakayo ti Dios. Kasano a mausaryo dagitoy a sagut a mangbendision kadagiti annakna? No addaankayo iti maysa a bendision ti patriarka, nalabit a madakamat ditoy dagiti sagut a naited kadakayo. Ti panangbasa iti mensahe ni Elder John C. Pingree Jr. “I Have a Work for Thee” ket mabalin a manglukat iti panunotyo kadagiti sagut a diyo pay napanunot (Liahona, Nob. 2017, 32–35).

No kayatyo a maammuan no kasano ti mangpadur-as kadagiti naespirituan a sagut, makatulong ti analohia iti rugi ti mensahe ni Elder Juan Pablo Villar “Exercising Our Spiritual Muscles” (Liahona, Mayo 2019, 95). Ania dagiti “ehersisio” a makatulong kadakayo a mangpadur-as kadagiti naespirituan a sagutyo?

Kitaen met iti Topics and Questions, “Holy Ghost,” Gospel Library.

Doktrina ken Katulagan 47

Kayat ti Apo a mangisurat ti Simbaanna iti maysa a pakasaritaan.

Ti takem ni John Whitmer a mangisurat iti pakasaritaan ti Simbaan ket nagtultuloy a napaut a kannawidan dagiti agsursurat iti pakasaritaan kadagiti tao ti Dios. Apay nga iti panagkunayo a napateg unay iti Apo ti panagsurat iti pakasaritaan? Utobenyo daytoy bayat ti panangbasayo iti benneg 47 kasta met dagiti umasping a pangiturong iti 2 Nephi 29:11–12; Moises 6:5; Abraham 1:28, 31. Ania ti mariknayo a kayat ti Apo nga isuratyo maipapan iti biagyo?

Iti FamilySearch, mabalinyo nga isurat dagiti lagip ken padas manipud iti biagyo—ken ti biag dagiti kapuonanyo (kitaen iti FamilySearch.org).

Kitaen iti Henry B. Eyring, “O Remember, Remember,” Liahona, Nob. 2007, 66–69.

John Whitmer

Doktrina ken Katulagan 47

Maiturongnak ti Espiritu Santo bayat ti panangipatungpalko iti calling-ko.

Nalabit a mabalinyo ti manginaig iti no ania ti narikna ni John Whitmer idi tinarigagayanna ti pammatalged a naggapu iti Dios ti calling-na. Ania ti kinuna ti Apo iti Doktrina ken Katulagan 47 ken ni John Whitmer—ken kadakayo—tapno mangparegta iti panagtalek iti panangtungpal kadagiti calling nga itedna?

Ti akem ti maysa a mannursuro. Ti panangisuro ket ad-adda pay ngem iti panangidatag iti maysa nga impormasion. Iramanna ti panangparnuay iti maysa nga aglawlaw a pakasursuruan ken pakatakuatan dagiti miembro ti klase kadagiti kinapudno para iti bagbagida ken pangibinglayanda no ania ti nasursuroda iti tunggal maysa (kitaen iti Panangisuro iti Wagas ti Mangisalakan, 26).

Dagiti Kapanunotan para iti Panangisuro kadagiti Ubbing

Doktrina ken Katulagan 46:2–6

Matulongak dagiti dadduma a makarikna a mapasangbayda iti simbaan.

• Kalpasan ti panangbasayo iti Doktrina ken Katulagan 46:5 a kadua dagiti annakyo, pagsaritaan no kasano ti tarigagayan ti Mangisalakan a marikna dagiti tao no umayda iti Simbaanna. Awisenyo dagiti annakyo a mangipapan a nakitada ti maysa a tao iti simbaan iti umuna a gundaway. Tulongan ida nga agpanunot kadagiti wagas a makatulong iti daytoy a tao a makarikna iti pannakapasangbay.

Doktrina ken Katulagan 46:7–26

Mangted kaniak ti Nailangitan nga Ama kadagiti naespirituan a sagut a mangbendision kadagiti dadduma.

• Tapno matulongan dagiti annakyo a makasursuro maipapan kadagiti naespirituan a sagut a nailadawan iti Doktrina ken Katulagan 46:13–26, ibilang daytoy a kapanunotan. Mabalinyo nga isurat dagiti sagut kadagiti pedaso ti papel ket ilemmengyo dagitoy iti lawlaw ti siled. Bayat ti panagsapul dagiti annakyo ti tunggal papel, tulongan ida a mangsapul no sadino ti nakadakamatan dayta a sagut iti benneg 46. Para iti tunggal sagut, isarita kadakuada no kasano a mausar daytoy a mangbendision kadagiti dadduma (makatulong dagiti panangiladawan iti “Kapitulo 20: Dagiti Sagut ti Espiritu,” iti Dagiti Estoria iti Doktrina ken Katulagan, 77–80).

  Chapter 20: Gifts of the Spirit: 8•March 1831

• Ibagayo kadagiti annakyo ti maipapan kadagiti sagut a mariknayo nga inted ti Nailangitan nga Ama kadakuada, ket bay-an ida nga agsarita maipapan kadagiti sagut a makitada iti tunggal maysa. Segun iti Doktrina ken Katulagan 46:8-9, 26, apay nga ikkannatayo ti Nailangitan nga Ama kadagiti naespirituan a sagut? Kasano a mausartayo dagiti saguttayo a mangtulong kadagiti dadduma?

Doktrina ken Katulagan 47:1, 3

Maisuratko ti pakasaritaak.

• Bay-anyo dagiti annakyo a mangtakuat no ania ti tarigagayan ti Apo nga aramiden ni John Whitmer iti Doktrina ken Katulagan 47:1, 3. Mabalinyo pay nga ibinglay iti tunggal maysa dagiti paborito nga estoria manipud iti nasantuan a kasuratan. Ilawlawag nga ammotayo ti maipapan kadagitoy nga estoria gapu ta adda maysa a tao a nangisurat kadagitoy.

• Ibilang no kasano a maparegtayo dagiti annakyo a mangisurat kadagiti bukodda a pakasaritaan. Mabalinyo nga ibinglay ti sumagmamano a naisuratyo [entry] manipud iti bukodyo a journal wenno mangibinglay iti maysa nga estoria maipanggep iti maysa a kapuonan (kitaen iti FamilySearch.org wenno iti Memories app). Mabalinyo ti mangipaay iti sumagmamano a journal prompt, kas iti “Ania ti napasamak iti daytoy a lawas a kayatyo a maammuan dagiti appokoyo?” wenno “Kasano a nakitayo ti ima ti Apo ti biagyo itoy a lawas?” Mabalin nga agdrowing dagiti babassit nga ubbing kadagiti ladawan iti padpadasda, wenno mabalinyo nga isurat dagitoy nga isarsaritada dagiti estoriada. Ania dagiti bendision a sumangbay iti panangisurat iti maysa a “gagangay a pakasaritaan”? Doktrina ken Katulagan 47:1).

Doktrina ken Katulagan 48:2–3

Makatulongak kadagiti dadduma babaen iti panangibinglayko no ania ti naited kaniak.

• Bayat ti panangbasayo iti Doktrina ken Katulagan 48:2–3 kadagiti annakyo, mabalin a kasapulan nga ilawlawagyo nga umay dagiti tao idiay Ohio manipud iti Daya, ken awan ti lugar a pagnaedanda. Ania ti indawat ti Apo nga aramiden dagiti Santo a tumulong? Tulonganyo dagiti annakyo a mangpanunot kadagiti banag nga inted ti Apo kadakuada a mabalinda nga ibinglay kadagiti dadduma. Mabalinyo pay ti makipagkansion kadakuada iti maysa a kanta kas iti “‘Give,’ Said the Little Stream” (Children’s Songbook, 236).

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Amin nga agtarigagay nga agdaydayaw iti Mangisalakan ket mapasangbayda kadagiti miting dagiti Santona.