Mayo 5–11: “Matungpalton … dagiti Kari”

Doktrina ken Katulagan 45

Ti paltiing iti benneg 45 ket naawat, segun iti paulo ti benneg, “iti rag-o dagiti Santo.” Ken adu pay ti pagragsakan maipapan iti daytoy a paltiing. Iti daytoy ited ti Mangisalakan ti nadungngo a karina nga agpakaasi para kadatayo iti sango ti Ama (kitaen kadagiti bersikulo 3–5). Isaritana maipapan iti agnanayon a katulaganna nga agsaksaknap iti intero a lubong, kas “maysa a mensahero … a mangisagana iti dalan sakbay [Kenkuana]” (bersikulo 9). Ket ipadtona ti nadayag a Maikadua a Yaayna. Aramiden amin dagitoy ti Mangisalakan idinto a bigbigbigenna pay a makariribuk dagitoy a panawen (kitaen iti bersikulo 34), iti maysa a paset gapu kadagiti peggad a mapasamak sakbay ti yaayna. Ngem dayta a peggad, dayta a sipnget ket saan a napigsa a mangiddep iti lawag ti namnama. “Ta pudno kunak kadakayo,” impakdaar ti Apo, “a siak … ti silaw nga agrimat iti kasipngetan” (bersikulo 7). Dayta laeng ti rason tapno umawat iti daytoy a paltiing —iti ania man a balakad ken pakdaar ken kinapudno a kayatna nga ited —nga addaan iti rag-o.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 45:1–5

Ni Jesucristo ti Mangibabaet kaniak iti Ama.

No mariknatayo a saantayo nga umdas wenno saan a maikari iti sanguanan ti Dios, makasaraktayo iti pammatalged manipud kadagiti balikas ti Mangisalakan iti Doktrina ken Katulagan 45:1–5. Bayat ti panangsukisokyo kadagitoy a bersikulo, ibilang dagiti saludsod kas kadagitoy:

• Ania dagiti balikas wenno ragup ti balikas kadagitoy a bersikulo a nangnangruna a mangted iti kaipapanan kadakayo?

• Ti mangibabaet ket maysa a tao a mangsuporta wenno mangisingasing iti publiko iti maysa a tao wenno gapu. Segun kadagitoy a bersikulo, kasano nga aramiden ni Jesucristo daytoy para kadakayo? Ania ti mangpaikari Kenkuana a mangaramid iti daytoy?

• Ania ti pakaawisan ti riknayo maipanggep kadagiti balikas ti Mangisalakan iti Ama? (dagiti bersikulo 4–5).

Mabalinyo pay nga adalen no ania ti insuro ni Elder Dale G. Renlund maipapan ken ni Jesucristo, ti Mangibabaettayo, iti “Choose You This Day” (Liahona, Nob. 2018, 104–5). Segun ken ni Elder Renlund, kasano a maidilig ti panggep ti Mangisalakan iti panggep ni Lucifer?

Mabalin a mangnayon dagiti sumaganad a binatog iti pannakaawatyo iti akem ti Mangisalakan kas Mangibabaet. Bayat ti panangadalyo kadagitoy, ibilangyo ti panangisurat kadagiti ragup ti balikas wenno kinapudno a mabalinyo nga ibilang kadagiti dadduma: 2 Nephi 2:8–9; Mosiah 15:7–9; Moroni 7:27–28; Doktrina ken Katulagan 29:5; 62:1. Apay a napnuan kaipapanan kadakayo dagitoy a ragup ti balikas?

Kitaen met iti “I Stand All Amazed,” Hymns, no. 193; Topics and Questions, “Atonement of Jesus Christ,” Gospel Library; “The Mediator” (video), Gospel Library.

The Mediator

A portrayal of the analogy Elder Boyd K. Packer used in his April 1977 general conference address. A young man who fails to pay a debt is saved from the grasp of justice through the mediation of a friend.

Doktrina ken Katulagan 45:9–10

Ti ebanghelio ket maysa a pagrukodan kadagiti pagilian.

Idi un-unana, ti pagrukodan ket maysa a bandera a maawit a maipan iti paggugubatan a mausar a mangtipon ken mamagkaykaysa kadagiti tropa. Ti maysa a pagrukodan ket maysa pay a pagwadan wenno pagannurotan a mabalin a pakarukodan ti dadduma pay a bambanag. Bayat ti panangbasayo iti Doktrina ken Katulagan 45:9–10, utobenyo no kasano a nagbalin a pagrukodan kadakayo dagiti katulaganyo iti Apo.

Doktrina ken Katulagan 45:11–75

Agsublinto ni Jesucristo iti dayag.

Nailadawan ti Maikadua a Yaay ti Apo nga agpada a “naindaklan” ken “nakabutbuteng” (Malakias 4:5). Iti Doktrina ken Katulagan 45, kasla maibagay ti agpada a panangiladawan. Iraman daytoy a paltiing ti agpadpada dagiti nasimbeng a pakdaar ken manamnama a kari maipapan iti yaay ti Apo. Bayat ti panangadalyo kadagiti bersikulo 11–75, utobenyo no kasano a makapagsaganakayo para iti Maikadua a Yaay nga addaan iti pammati ken Cristo imbes nga agbuteng. Isuratyo no ania ti masarakanyo iti table a kas iti daytoy:

Padto wenno kari	Ania ti maaramidko
Padto wenno kari Dumtengto ti lawag (ti ebanghelio) kadagiti agtugaw iti sipnget (bersikulo 28)	Ania ti maaramidko Awatenyo ti lawag—ket ibinglayyo daytoy (bersikulo 29)
Padto wenno kari	Ania ti maaramidko
Padto wenno kari	Ania ti maaramidko
Padto wenno kari	Ania ti maaramidko

Iti video “Men’s Hearts Shall Fail Them” (Gospel Library), ania a balakad ti inted ni President Russell M. Nelson a mangtulong kadatayo a mangsango kadagiti makapabuteng a situasion nga addaan iti namnama?

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Doktrina ken Katulagan 45:31–32, 56–57

Mabalinko ti “agtakderto kadagiti nasantuan a lugar” ket saan a matignay.

Ania ti masursuroyo manipud iti Doktrina ken Katulagan 45:31–32, 56–57 maipanggep iti panagsagana para iti yaay ti Apo? Ania dagiti “nasantuan a lugaryo”? Ania ti kayat a sawen ti “saan a matignay”? Kasano a mapagbalinyo a nasansantuan ti lugaryo?

Kitaen nga imbasar ti Apo ti pangngarig dagiti sangapulo a babbalasang, a mangyar-arig iti lana iti pangngarig iti kinapudno ken Espiritu Santo. Ibilangyo ti panangbasa iti pangngarig iti Mateo 25:1–13 a pampanunotenyo dayta. Ania dagiti dadduma pay nalawag a pannakaammo ken pannakaawat a magun-odyo?

Kitaen met iti David A. Bednar, “If Ye Had Known Me,” Liahona, Nob. 2016, 102–5.

Pangngarig dagiti Sangapulo a Babbalasang, ni Dan Burr

Doktrina ken Katulagan 45:11–15, 66–71

Ti Zion ket maysa a lugar a natalged para kadagiti Santo ti Dios.

Dagiti Santo iti panawen ni Joseph Smith ket naggagar a mangbangon iti Zion, ti Baro a Jerusalem (kitaen iti Ether 13:2–9; Moises 7:62–64). Ania ti masursuroyo maipapan iti Zion—agpada ti nagkauna a siudad iti aldaw ni Enoc ken ti ud-udina nga aldaw a siudad—manipud iti Doktrina ken Katulagan 45:11–15, 66–71? Ita ti bilin a mangipasdek iti Zion ket maibasar iti panangipasdek iti pagarian ti Dios sadino man ti pagnanaedantayo. Ania ti maaramidyo a makatulong a mangipasdek iti Zion sadino man ti pagnaedanyo?

Dagiti Kapanunotan para iti Panangisuro kadagiti Ubbing

Doktrina ken Katulagan 45:3–5

Ni Jesucristo ti Mangibabaetko iti Ama.

• Mabalin a kayatyo a tulongan dagiti annakyo a makaawat a ti maysa a mangibabaet ket maysa a tao a mangsuporta iti sabali a tao. Kalpasanna mabalinyo ti agsarita maipapan kadagiti pagarigan ti panagbalin a mangibabaet a mabalin a pamiliar kadakuada (kas iti panagtakder para iti maysa a gayyem). Bayat ti panangbasayo iti Doktrina ken Katulagan 45:3-5 nga aggigiddan, tulonganyo dagiti annakyo a mangtakuat no asino ti Mangibabaettayo ken no kasano a tulongannatayo.

Doktrina ken Katulagan 45:32

Kabaelak ti “agtakder kadagiti nasantuan a lugar.”

• Mabalin a makaay-ayo ti mangikabil kadagiti ladawan ti maysa a pagtaengan, maysa a pasdek ti Simbaan, ken maysa a templo iti aglawlaw ti siled. Kalpasanna, mabalinyo ti mangted kadagiti annakyo kadagiti pamugtuan a mangiladladawan kadagitoy a lugar ken awisenyo ida nga agtakder iti asideg ti ladawan nga iladladawanyo. Kiddawenyo kadakuada nga agtakderda bayat ti panangbasayo iti umuna a linia manipud iti Doktrina ken Katulagan 45:32. Ania dagiti sumagmamano a nasantuan a lugar nga ited ti Dios kadatayo? Tulonganyo dagiti annakyo a makaawat a ti “agtakder kadagiti nasantuan a lugar, ken … saan a matignay” kaipapananna ti panangpili iti rumbeng iti amin a kanito, ania man a mapaspasamak. Kasano a maaramidtayo ti pagtaengantayo a maysa a nasansantuan a lugar?

Doktrina ken Katulagan 45:9

Ti ebanghelio ni Jesucristo ti pagrukodan iti lubong.

• Mabalinyo nga ilawlawag kadagiti annakyo nga idi un-unana, ti pagrukodan ket maysa a wagayway wenno maysa a bandera a naawit a naipan iti paggugubatan. Nakatulong daytoy kadagiti soldado a mangammo no sadino ti paguummongan ken no ania ti aramiden. Aggigiddan a basaen ti Doktrina ken Katulagan 45:9, ket pagsasaritaan dagiti wagas no kasano a maipada ti ebanghelio iti maysa a pagrukodan. Mabalin a magustuan dagiti annakyo nga agaramid iti bukodda a pagrukodan wenno bandera, agraman dagiti ladawan wenno balikas a mangyebkas iti riknada maipapan iti Mangisalakan.

Maipada ti ebanghelio iti maysa a pagrukodan, wenno maysa a wagayway wenno bandera.

Doktrina ken Katulagan 45:44–45

Umayto manen ni Jesucristo.

• Ti pannakadadael a mapasamakto sakbay ti Maikadua a Yaay ket mabalin a mamagbuteng kadagiti ubbing. Ti panangitudo kadakuada ken ni Jesucristo ket makatulong kadakuada a mangpaspasungad nga addaan iti pammati! Ibilang ti panangawis kadakuada a mangpanunot no ania ti riknada no adda espesial a tao nga umay sumarungkar, kas iti maysa a lelong wenno lelang wenno gayyem. Kasano nga agsaganada para iti isasarungkar? Kalpasanna mabalinyo nga ipakita ti ladawan ti Mangisalakan ken basaenyo ti Doktrina ken Katulagan 50:41–42. Ibinglayyo iti tunggal maysa no ania ti riknayo maipapan iti yaay ti Mangisalakan.

• Tapno matulonganyo dagiti annakyo a makarikna iti gagar maipapan iti Maikadua a Yaay ti Mangisalakan, mabalinyo nga isurat kadagiti papel ti sumagmamano kadagiti manamnama a kari manipud iti benneg 45 (kitaen, kas pagarigan, kadagiti bersikulo 44–45, 51–52, 55, 58–59, 66–71). Itedyo dagiti papel kadagiti annakyo ket kiddawen kadakuada nga itag-ayda ti imada no madakamat ti kari nga iggemda bayat ti panangbasayo kadagiti bersikulo. Paglilinnawagan no ania ti kayat a sawen dagitoy a kari. Mabalinyo pay ti makipagkansion kadagiti annakyo iti maysa a kanta maipapan iti Maikadua a Yaay, kas iti “When He Comes Again” (Children’s Songbook, 82–83).

Tulongam dagiti ubbing a mangbigbig iti Espiritu. Bayat ti panangisuroyo kadagiti annakyo, ibaga kadakuada no kaano a mariknayo ti Espiritu Santo. Isarita maipapan no kasano a mailasinyo ti impluensiana. Kas pagarigan, nalabit a mariknayo ti talna wenno rag-o kabayatan iti panagkansionyo ti maysa a kanta maipapan iti Mangisalakan.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ti Maikadua a Yaay, ni Harry Anderson