“Abril 28–Mayo 4: ‘Ti Lintegko a Mangituray iti Simbaanko’: Doktrina ken Katulagan 41–44,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2025 (2025)
“Doktrina ken Katulagan 41–41,” Umaykayo, Sumurot Kaniak—Para iti Pagtaengan ken Simbaan: 2025
Doktrina ken Katulagan 4: “Ti Lintegko a Mangituray iti Simbaanko”
Doktrina ken Katulagan 41–44
Napartak ti panagdur-as ti Simbaan idi 1830 ken 1831, nangruna iti panagdarasudos dagiti baro a miembro idiay Kirtland, Ohio. Makaparagsak ken makaparegta daytoy a panagdur-as kadagiti Santo, ngem nangidatag met iti sumagmamano a karit. Kasano a mapagkaykaysam ti napardas ti panagdakkelna a grupo dagiti mamatpati? Kangrunaanna, ania ti aramidem no isangbayda ti doktrina ken kannawidan manipud kadagiti sigud a pammatida? Kas pagarigan, idi dimteng ni Joseph Smith iti Kirtland iti nasapa a Pebrero ti 1831, nakitana dagiti kabarbaro a miembro nga agbibinninglayda iti maymaysa a sanikua iti napudno a gandat a mangtulad kadagidi Kristiano iti Baro a Tulag (kitaen iti Dagiti Aramid 4:32–37). Nangaramid ti Apo iti sumagmamano a napateg a panagatur ken pananglawlawag maipapan iti daytoy ken dadduma pay a topiko. Kangrunaan nga inaramidna daytoy babaen ti maysa a paltiing a naisurat iti Doktrina ken Katulagan 42 nga Inawaganna iti “paglintegak a mangiwanwan iti simbaanko” (bersikulo 59). Iti daytoy, masursurotayo dagiti kinapudno a napapateg iti panangipasdek iti Simbaan ti Apo kadagiti ud-udina nga aldaw. Ken maammuantayo nga adu pay ti masursurotayo: “No agdawatkayo,” inkari ti Apo, “umawatkayo iti paltiing iti kada paltiing, pagsiriban iti kada pagsiriban” (Doktrina ken Katulagan 42:61).
Kitaen met iti Saints, 1:114–19.
Dagiti Kapanunotan iti Panagsursuro iti Pagtaengan ken iti Simbaan
“Isu a mangawat iti paglintegak ken mangaramid, isu ti disipulok.”
Idi rugrugi ti 1831, mangrugin nga agguummong dagiti Santo iti Ohio. Aggagarda nga umawat iti linteg nga inkari ti Dios nga ipalgakna sadiay (kitaen iti Doktrina ken Katulagan 38:32). Ngem immuna, insurona no kasano a rumbeng nga agsagana dagiti disipulona nga umawat iti paglinteganna. Ania dagiti pagbatayan a masarakam iti Doktrina ken Katulagan 41:1–6 a nakatulong koma kadagiti Santo nga umawat iti paglintegan ti Dios? Kasano a makatulong kenka dagitoy a bersikulo nga umawat iti pangiturong manipud Kenkuana?
Kitaen met iti “A Bishop unto the Church,” iti Revelations in Context, 77–83.
Ikkannak ti Apo kadagiti bilin gapu ta ay-ayatennak.
Imbilang dagiti Santo ti paltiing a masarakan iti Doktrina ken Katulagan 42:1–72 a maysa kadagiti kakapatgan a naawat ti Propeta. Maysa daytoy kadagiti immuna a paltiing a naipablaak. Iti adu a tawen, inawagan dayta laeng dagiti Santo iti “linteg.” Nupay saan a karaman ti benneg ti amin a bilin wenno linteg ti Apo, maikari nga utoben no apay a napateg dagitoy a pagbatayan para iti kabarbaro a naisubli a Simbaan. Apay a napateg daytoy kadatayo ita?
Gapu ta medio atiddog ti benneg 42 mabalin nga ibilangmo ti panagadal iti daytoy iti babbabassit a paset, kas kadagiti sumaganad. Ilasinmo dagiti pagbatayan a naisuro iti tunggal maysa, ken ibilangmo no kasano a dagitoy a linteg ket maysa a pagilasinan ti panagayat ti Apo kadagiti taona.
Apay a mangted kadatayo ti Dios kadagiti paglintegan ken bilin? Iti ania a wagwagas a naparaburankayo iti panangammo ken panangsurot kadagiti bilin?
Doktrina ken Katulagan 42:30–42
“Laglagipenyo dagiti nakurapay.”
Kas paset ti paglintegan a naipalgak iti benneg 42, insuro ti Apo dagiti Santona no kasano, a kas kadagiti pasurot ni Cristo idi un-unana, nga “agpapadada iti amin a banag” (Dagiti Aramid 2:44; 4 Nephi 1:3), nga “awan ti nakurapay kadakuada” (Moises 7:18). Ania ti masursurom manipud iti Doktrina ken Katulagan 42:30–42 maipanggep no kasano a nagbiag dagiti Santo iti paglintegan ti panagkonsagrar? (Ti mangikonsagrar kaipapananna ti mangilatang iti maysa a banag para iti sagrado a panggep.)
Nupay saantayo nga “agpapada iti amin a banag” ita, kadagiti templo dagiti Santo iti Ud-udina nga Aldaw makitulagda nga agbiag iti linteg ti panagkonsagrar. Kasano a maikonsagrarmo ti inted kenka ti Dios a mangbendision kadagiti tao nga agkasapulan? Nalabit a ti panangkanta iti maysa a himno kas iti “Because I Have Been Given Much” (Hymns, no. 219) ket makaipaay kenka kadagiti kapanunotan.
Kitaen met iti Sharon Eubank, “I Pray He’ll Use Us,” Liahona, Nob. 2021, 53–56; “The Law,” iti Revelations in Context, 93–95.
Ni Cristo ken ti Nabaknang nga Agtutubo nga Agturay, ni Heinrich Hofmann
Doktrina ken Katulagan 42:61, 65–68; 43:1–16
Mangted ti Dios iti paltiing a mangiwanwan iti Simbaanna—ken mangiwanwan kaniak.
Ipapanmo a makisarsaritaka iti maysa a kabarbaro a miembro ti Simbaan a magagaran a mangammo a ti Simbaan ket maiwanwan babaen iti paltiing. Kasano a maaramatmo ti Doktrina ken Katulagan 43:1–16 a mangtulong kenkuana a mangsursuro iti pagtuladan ti Apo iti panangiwanwan iti Simbaanna ket babaen iti propetana? Kasano a maaramatmo ti Doktrina ken Katulagan 42:61, 65–68 a mangisuro maipapan iti panangawat iti bukod a paltiing?
Ania dagiti sumagmamano kadagiti “natalna a banag” ken naragsak a banag a naawatmo manipud iti Apo babaen ti Espirituna?
Tapno maammuam maipapan no kasano a nangngeg dagiti lider ti Simbaan ti timek ti Apo, mabalinmo a buyaen ti maysa kadagiti video iti “Hear Him” a koleksion iti Gospel Library. Ibilangmo ti mangparnuay iti bukodmo a video, nga ilawlawag no kasano a makisarita ti Apo kenka.
Kitaen met iti Russell M. Nelson, “Revelation for the Church, Revelation for Our Lives,” Liahona, Mayo 2018, 93–96; “All Things Must Be Done in Order,” iti Revelations in Context, 50–53.
Agaramat kadagiti adalen a banag [object lesson]. Makatulong dagiti adalen a banag wenno visual aid kadagiti tao a sursuruam tapno ad-adda a maawatanda dagiti kinapudno ti ebanghelio ken napapaut a laglagipenda dagitoy. Kas pagarigan, mabalinmo ti agusar iti puzzle, a nabukel iti kada pedaso, tapno mangisuro maipapan iti panangawat, “iti paltiing iti kada paltiing, pagsiriban iti kada pagsiriban” (Doktrina ken Katulagan 42:61).
Dagiti Kapanunotan para iti Panangisuro kadagiti Ubbing
Ti disipulo ket maysa a tao nga umawat iti linteg ti Dios ken tungpalenna daytoy.
-
Tapno matulongam dagiti annakmo a mangammo no ania ti kaipapanan ti agbalin a disipulo ni Jesucristo, mabalinmo nga isurat ti Doktrina ken Katulagan 41:5 iti maysa a papel, a mangibati kadagiti blangko a pangisuratan iti balikas a disipulo koma. Kalpasanna mabalinda a sapulen iti bersikulo 5 ti awan a balikas. Segun iti daytoy a bersikulo, ania ti kaipapanan ti agbalin a disipulo ni Jesucristo? Kasano a padpadasentayo ti agbalin a nasaysayaat a disipulo ni Cristo?
Naragsakak no tungpalek dagiti bilin ti Dios.
-
Mabalin a magustuan dagiti annakyo ti agay-ayam iti ay-ayam a kasapulan a dumngegda a naimbag ken surotenda dagiti pammilin. Mabalinmo nga usaren daytoy nga ay-ayam a pagsaritaan no ania ti kaipapanan ti “imdengan ken denggen ken tungpalen” ti Apo (Doktrina ken Katulagan 42:2). Ania dagiti pammilin nga intednan kadatayo? Kasano a mabendisionantayo no agtungpaltayo kadagiti linteg ken bilinna?
-
Mabalinyo a leppasen ti panid ti aktibidad iti daytoy a lawas a kaduam dagiti annakmo. Mabalinyo pay ti agkansion iti maysa a kanta maipapan iti panagtungpal kadagiti linteg ti Dios, kas iti “I Want to Live the Gospel” (Children’s Songbook, 148). Ibilangyo ti panangibinglay iti tunggal maysa no kasano a nangyeg kadakayo iti ragsak ti panagtulnog kadagiti linteg ti Dios.
Agserserbiak ken ni Jesucristo no agserbiak kadagiti dadduma.
-
Kalpasan ti aggigiddan a panagbasa iti Doktrina ken Katulagan 42:38, tulongam dagiti ubbing a mangpanunot kadagiti wagas a makapagserbida ken ni Jesus babaen iti panagserbi kadagiti dadduma. Mabalinda ti agsapul iti sumagmamano a kapanunotan manipud iti video “Pass It On” (ChurchofJesusChrist.org). Mabalinda pay a kitaen dagiti ladawan ti Mangisalakan a mangtultulong kadagiti dadduma, mangag-agas iti masakit, wenno panagbalin a naasi kadagiti ubbing (kitaen iti Libro ti Arte ti Ebanghelio, dagiti num. 42, 47).
2:3Pass It On
Children around the world have taken President Thomas S. Monson's counsel to find a way to serve others.
-
Mabalinmo nga ipakita kadagiti annakmo ti slip ti Apagkapullo ken Dadduma Pay a Daton ken pagsaritaan no kasano nga usaren daytoy a mangted iti adda kadatayo a mangbendision kadagiti dadduma (kitaen met iti “Tithing and Donations Online”).
Ti propeta laeng ti mabalin nga umawat iti paltiing para iti intero a Simbaan.
-
Awisem dagiti ubbing a mangipapan a nagtakder ti maysa a tao iti maysa a miting ti panagpaneknek ket ibagana iti ward a nakaawat isuna iti paltiing para iti intero a Simbaan (kas pagarigan, nasken a saantayon a mangan iti carrots wenno nasken a bugguantayo dagiti imatayo iti gatas imbes a danum). Kunana a nasken a dumngegtayo iti isaona imbes a ti propeta. Ania koma ti biddut iti dayta? Kalpasanna mabalinyo nga adalen nga aggigiddan ti Doktrina ken Katulagan 43:1–7 tapno ammuen no kasano a mangted ti Apo kadagiti bilin iti Simbaanna.
-
Mabalinmo pay nga ipakita ti ladawan ti maysa a sibibiag a propeta ken awisem dagiti annakmo a mangbinglay iti maysa a banag nga insurona itay nabiit pay. No kasapulanda ti tulong, mangipabuya iti maysa a video clip wenno binatog manipud iti maysa a mensahe iti kallabes a sapasap a komperensia. Apay a maysa a bendision ti maaddaan iti sibibiag a propeta ita?
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ni Joseph Smith a Mangaskasaba, ni Sam Lawlor