“Dagiti Timek ti Pannakaisubli: Panagguummong iti Ohio,” Umaykayo, Sumurot Kaniak—Para iti Pagtaengan ken Simbaan: Doktrina ken Katulagan 2025 (2025)
“Panagguummong iti Ohio,” Umaykayo, Sumurot Kaniak—Para iti Pagtaengan ken Simbaan: 2025
Dagiti Timek ti Pannakaisubli
Panagguummong iti Ohio
Ti Purok ti Kirtland, ni Al Rounds
Phebe Carter
Maibilang ni Phebe Carter a maysa kadagiti adu a Santo a nagguummong iti Ohio idi 1830. Kimmappeng iti Simbaan iti amianan a daya ti Estados Unidos iti katengngaan ti tawenna a duapulo, nupay saan a kimmappeng dagiti nagannakna. Insuratna idi agangay ti pangngeddengna nga umakar a mapan iti Ohio tapno makitipon kadagiti Santo:
“Nasdaaw dagiti gagayyemko iti desisionko, a kas met kaniak, ngem adda maysa a banag iti unegko a nagparikna kaniak. Ti panagladingit ti inak iti ipapanawko iti pagtaenganmi ket dumani diak naibturan; ket no di laeng ti espiritu nga adda kaniak napukawak koma ket saanak a nagtuloy. Imbaga kaniak ni nanangko a kaykayatnak a makita a naikali ngem ti mapan nga agmaymaysa iti awan pusona a lubong.
Sidadayaw, a kinunana, “‘[Phebe],’ agsublikanto kadi kaniak no makitam a palso ti Mormonismo?’
“Insungbatko, ‘wen, nanang; aramidekto.’ … Nangpalag-an ti sungbatko iti danagna; ngem nakaited kadakami iti napalalo a leddaang ti panagsinami. Idi dimteng ti oras ti ipapanawko saanak a nagtalek iti bagik nga agpakada; isu a nagsuratak kadagiti pammakadak iti tunggal maysa, ket imbatik dagitoy iti lamisaanko, nagtarayak a nagpababa ket tinappuakko ti karuahe. Ngarud, pinanawak ti ipatpategko a pagtaengan ti kinaubingko tapno makikaduaak kadagiti santo ti Dios.”
Iti maysa kadagiti mensahe a pagpakadana, insurat ni Phebe:
“Ay-ayatek a Nagannak—Pumanawak pay laeng iti pagtaengan ti nagannakko iti apagapaman … Diak ammo no kasano ti kapautna—ngem saan nga awanan iti kinamanagyaman a rikna iti kinasayaat a naawatko manipud idi tagibi-ak agingga iti agdama—ngem ti Mannarabay isun ti mangurnos itan a kas idi. Ikumittayo koma amin dagitoy a bambanag kadagiti ima ti Mannarabay ket managyamantayo gapu ta naipalubos kadatayo ti nagbiag a sangkamaysa iti nabayag iti nasayaat a kasasaad nga adda kadatayo, a mamati nga amin a bambanag ket para iti pagsayaatantayo no ayatentayo ti Dios a nasayaat. Mautobtayo koma a makapagkararagtayo iti maysa a Dios a dumngeg kadagiti napudno a kararag dagiti amin a pinarsuana ket itedna ti no ania ti kasayaatan a para kadatayo. …
“Nanang, mamatiak a daytoy ti pagayatan ti Dios para kaniak a mapan iti laud ket naallukoyak a daytoy ket para iti maysa a naunday a panawen. Itan ta mabalinkon ti mapan… ; mamatiak a ti espiritu ti Apo ti namagbalin a daytoy ket umdas para kadagiti amin a banag. O dikayo koma madanagan iti anakyo; liwliwaennakto ti Apo. Mamatiak nga aywanannakto ti Apo ket itedna kaniak no ania ti para iti kasasayaatan. … Innak gapu iti awag ti Maestrok—inaramidnan a nalawag ti pagrebbengak.”