Abril 7–13: “Ipigsayo ti Timekyo … a Mangipakdaar iti Ebangheliok”

Doktrina ken Katulagan 30–36

Miembro idin ti Simbaan iti agarup maysa a bulan ni Parley P. Pratt idi naawagan a “mapan iti langalang” tapno ikasabana ti ebanghelio (Doktrina ken Katulagan 32:2). Miembro idin ni Thomas B. Marsh iti basbassit a tiempo ngem dayta idi naibaga kenkuana, “Dimtengen ti oras ti misionmo” (Doktrina ken Katulagan 31:3). Nabiit pay a nabuniagan da Orson Pratt, Edward Partridge, ken adu a dadduma pay idi simmangpet dagiti awagda nga agmision. Nalabit nga adda pay maysa a leksion iti daytoy a pagtuladan para kadatayo ita: no umdas ti pannakaammom nga umawat iti naisubli nga ebanghelio babaen ti panagbuniag, umdasen ti ammom a mangibinglay iti daytoy kadagiti dadduma. Siempre kayattayo a kanayon a padur-asen ti pannakaammotayo iti ebanghelio, ngem saan a nagkedked ti Dios a mangawag kadagiti “saan a nakaadal” a mangikasaba iti ebangheliona (Doktrina ken Katulagan 35:13). Kinaagpaysona, awisennatayo amin, “Ungapem ti ngiwatmo a mangipakdaar iti ebangheliok” (Doktrina ken Katulagan 30:5). Ket aramidentayo dayta a kasayaatan saan a babaen ti bukodtayo a sirib ken padas ngem “babaen ti bileg [ti] Espiritu” (Doktrina ken Katulagan 35:13).

Kitaen met iti “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” iti Revelations in Context, 54–69.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 30–36

Naawaganak a mangikasaba ti ebanghelio ni Jesucristo.

Adda man pormal a pannakaawagmo wenno awan kas maysa a misionario, makapagbalinka a saksi ni Jesucristo “iti amin a panawen, ken iti amin a banag, ken iti amin a lugar” (Mosiah 18:9). Bayat ti panagadalmo iti Doktrina ken Katulagan 30–36, isuratmo no ania ti masursurom maipapan kadagiti gundaway a mangibinglay iti ebanghelio. Mabalinmo ti agaramid iti listaan dagiti banag nga idawat ti Apo kenka ken sabali pay a listaan dagiti kari nga aramiden ti Apo bayat ti panangibinglaymo iti ebanghelio (kas pagarigan, kitaen iti Doktrina ken Katulagan 30:8; 31:3–5; 32:1, 5; 35:13–15, 24). Mabalinmo pay a sapulen dagiti pagbatayan a makatulong kenka a mangibinglay iti ebanghelio. Ania ti masarakam a mangparegta kenka nga “ipakdaar ti naimbag a damag ti naindaklan a rag-o”? (Doktrina ken Katulagan 31:3).

Insuro ni Elder Gary E. Stevenson a ti panangiwaragawag iti ebanghelio “ket mabalin a maipatungpal babaen kadagiti simple, nalaka a maawatan a prinsipio a naisuro iti tunggal maysa kadatayo manipud kinaubing: ayat, ibinglay, ken awisen” . (“Love, Share, Invite,” Liahona, Mayo 2022, 85). Ibilangmo ti panangadal iti mensahena bayat ti panangpampanunotmo maipapan kadagiti am-ammom, gagayyem, ken pamiliam. Ania dagiti kapanunotan nga umay kenka maipapan iti no kasano a maibinglaymo kadakuada “no ania ti pagay-ayat[mo] maipapan iti ebanghelio ni Jesucristo”? Iti ania a wagas a mabalinmo nga awisen ida nga “umay ken mangkita,” “umay ken agserbi,” ken umay ken agkameng”? Bayat ti panangkantayo ken panangdengngeg iti “I’ll Go Where You Want Me to Go” (Hymns, no. 270) wenno maysa a mainaig a himno, mabalinmo nga isaludsod iti bagim, “Ania ti kayat ti Apo a sawek ken pagbalinak tapno maibinglayko ti ebangheliona?”

Kitaen met iti Marcos A. Aidukaitis, “Lift Up Your Heart and Rejoice,” Liahona, Mayo 2022, 40–43; Topics and Questions, “Inviting All to Receive the Gospel of Jesus Christ,” “Ministering as the Savior Does,” Gospel Library; “Inviting All to Come unto Christ: Sharing the Gospel” (video), Gospel Library.

Inviting All to Come unto Christ: Sharing the Gospel

When Junior, a young man in a small Florida branch, decided he didn’t want to be alone in his belief in Christ, he invited a friend. One friend joined, then another, and another . . .

Doktrina ken Katulagan 31:1–2, 5-6, 9, 13

Matulongannak ti Apo kadagiti relasionko iti pamiliak.

Nagkarigatan dagiti pamilia idi 1830 iti adu a maipada nga isyu a sangsanguen dagiti pamilia ita. Ania a panangiwanwan ken kari ti inted ti Apo ken ni Thomas B. Marsh maipapan iti pamiliana iti Doktrina ken Katulagan 31? (kitaen nangnangruna kadagiti bersikulo 1–2, 5–6, 9, 13). Kasano a matulongannaka dagiti balikasna kadagiti relasionmo iti pamiliam?

Para iti ad-adu pay nga impormasion maipapan ken ni Thomas B. Marsh, kitaen iti Saints, 1:79–80, 119–20.

Doktrina ken Katulagan 32–33; 35

Isagananak ti Apo para iti aramid a kayatna nga aramidentayo.

Ti panagadal iti biag dagiti tao a nadakamat iti Doktrina ken Katulagan 32–33; 35 ket makatulong kenka a mangbigbig no kasano nga isagsagananaka ti Apo para iti trabahona. Kas pagarigan, mabalinmo a basaen ti maipapan iti relasion da Parley P. Pratt ken Sidney Rigdon iti “Voices of the Restoration: Early Converts.” Kasano a binendisionan daytoy a relasion dagiti annak ti Dios? (kitaen iti Doktrina ken Katulagan 35).

Adtoy ti sabali pay a pagarigan: Insurat ni Ezra Thayer a naminsan sakbay a nabuniagan, naaddaan iti parmata nga “immasideg kaniak ti maysa a lalaki a nangyeg kaniak iti nalukot a papel ket inyawatna kaniak, ken maysa pay a trumpeta ket imbagana kaniak a [patokarek] daytoy. Imbagak kenkuana a diak pay pulos [nangpatokar] iti ania man iti biagko. Kinunana a kabaelam a [patokaren] daytoy, padasem. … Daytoy ti kapintasan nga ayug a nangngegak” (“Revelation, October 1830–B, Revelation Book 1,” historical introduction, josephsmithpapers.org). Idi agangay nga inawat ni Joseph Smith ti maysa a paltiing para kada Ezra Thayer ken Northrop Sweet, a nakarekord itan kas Doktrina ken Katulagan 33, inyulog ni Ezra ti paltiing kas nalukot a papel iti parmatana. Kasano nga isagsagana ti Apo ni Ezra para iti mision nga intedna kenkuana iti Doktrina ken Katulagan 33:1–13?

Ania dagiti pakakitaan a makitayo nga adda ti ima ti Dios iti biag dagitoy nagkauna a miembro ti Simbaan? Siasino ti inkabil ti Apo iti biagmo a tumulong kenka nga umay ken Cristo? Kasano nga isagsagananaka a mangbendision kadagiti dadduma babaen ti kinapudnom, panagayatmo, wenno awismo?

Kitaen met iti “A Mission to the Lamanites,” in Revelations in Context, 45–49.

Doktrina ken Katulagan 33:12–18

No bangonek ti biagko iti ebanghelio ti Mangisalakan, saanakto a matnag.

Maiturong tiDoktrina ken Katulagan 33 kada Northrop Sweet ken Ezra Thayer, dua a kabumbuniag a miembro ti Simbaan. Pimmanaw ni Northrop iti Simbaan iti nabiit kalpasan a naited daytoy a paltiing. Nagserbi ni Ezra a sipupudno iti sumagmamano a panawen, ngem kimmayakay met iti kamaudiananna. Ti panangbasam maipapan kadakuada iti daytoy a benneg ket mabalin a tignayennaka a mangusig no kasano ti kinatibker ti pannakabangonmo “[iti] bato” (bersikulo 13) ti ebanghelio. Ania dagiti kinapudno a masarakam kadagitoy a bersikulo a makatulong kenka nga agtalinaed a napudno iti Mangisalakan?

Kitaen met iti Helaman 5:12

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 30:1–2

Nasken nga ad-adda nga ipokusko dagiti banag ti Dios imbes a dagiti banag ti daga.

• Mabalin a makaparagsak a padasen nga aramiden dagiti annakyo ti dua nga aramid iti maminsan, kas iti panangisao kadagiti balikas ti paboritoda a kanta bayat ti panangisuratda iti nagnagan ti amin a miembro ti pamiliada. Apay a narigat nga aramiden ti dua a banag iti maminsan? Kalpasanna mabalinyo a basaen ti Doktrina ken Katulagan 30:1–2 a sangkamaysa. Ania dagiti sumagmamano a “banag iti daga” a makasinga kadatayo iti panangpanunot ken ni Jesucristo ken ti ebangheliona? Kasano a makapagtalinaedtayo a nakapokus Kenkuana?

Doktrina ken Katulagan 33:2–3, 6–10

Maibinglayko ti ebanghelio ni Jesucristo.

• Tapno matulongan a maawatan dagiti ubbing ti Doktrina ken Katulagan 33:8–10, mabalinmo nga awisen ida a mangpadas a mangisao iti maysa a ragup ti balikas a nakaserra ti ngiwatda bayat ti panangpugtom wenno ti dadduma nga annakmo no ania ti ibagbagada. Basaem dagiti bersikulo 33:8–10 ket kiddawem kadakuada nga ungapenda dagiti ngiwatda tunggal kanito a mangngegda ti ragup ti balikas nga “ungapenyo dagiti ngiwatyo.” Apay a kayat ti Nailangatan nga Ama nga ungapentayo dagiti ngiwattayo ket ibinglay ti ebanghelio kadagiti dadduma? Ania ti maibagatayo iti pamilia ken gagayyemtayo maipapan iti Mangisalakan wenno ti ebangheliona? Mabalinyo met ti agkansion iti kanta maipapan iti panangibinglay iti ebanghelio, kas iti “We’ll Bring the World His Truth” (Children’s Songbook, 172–73).

• Ibilangmo ti panangibinglay kadagiti padasmo a nainaig kadagiti pagbatayan wenno kari iti Doktrina ken Katulagan 30–34. Ania ti nasursurom wenno nariknam maipapan iti Mangisalakan ken iti aramidna bayat ti panagserbim Kenkuana?

Adu dagiti wagas a pangibinglayam iti ebanghelio.

Paneknekam maipapan kadagiti naikari a bendision. No awisem dagiti ubbing nga agbiag iti maysa a pagbatayan ti ebanghelio, mabalinmo nga ibinglay dagiti kari nga inaramid ti Dios kadagiti tao nga agbibiag iti dayta a pagbatayan. Kas pagarigan, mabalin a paneknekam maipapan kadagiti bendision nga itedna kadatayo no ungapentayo dagiti ngiwattayo ken ibinglaytayo ti ebanghelio.

Doktrina ken Katulagan 33:12–13

Mabangonko ti biagko iti ebanghelio ni Jesucristo.

• Mabalinmo nga iruar dagiti annakmo tapno kitaenda ti pundasion ti pagtaenganda wenno pasdek ti Simbaan ket kiddawem kadakuada a mangiladawan iti daytoy? Apay a kasapulan ti maysa a pasdek ti napigsa, solido a pundasion? Basaen kadakuada ti Doktrina ken Katulagan 33:12–13, ken ibinglayyo iti tunggal maysa ti riknayo no apay a kayat ti Apo a bangonentayo ti biagtayo iti ebangheliona. Apay a nasayaat a balikas ti “bato” a mangiladawan iti ebanghelio? Kasano a maibangontayo ti biagtayo iti bato ti ebanghelio? Mateo 7:24–29).

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Mapan iti Langalang, ni Robert T. Barrett