Abril 14–20: “Siak ti Nagbiag, Siak ti Napapatay”

Paskua ti Panagungar

Abril 3, 1836, ti aldaw ti Domingo ti Paskua ti Panagungar. Kalpasan ti panangtulong a mangannong iti sakramento kadagiti Santo iti kabarbaro a naidaton a Templo iti Kirtland, nakasapul da Joseph Smith ken Oliver Cowdery iti maysa a naulimek a lugar iti likudan ti belo ket nagtamedda iti naulimek a panagkararag. Kalpasanna, iti daytoy nasagraduan nga aldaw idi lagipen dagiti Kristiano iti amin a lugar ti Panagungar ni Jesucristo, nagpakita ti nagungar a Mangisalakan Mismo iti templona, a mangipakpakdaar iti, “Siak ti nagbiag, Siak ti napapatay” (Doktrina ken Katulagan 110:4).

Ania ti kaipapananna no sawen a ni Jesucristo ket “isu ti nagbiag”? Saanna laeng a kayat a sawen nga Isu ket nagungar manipud iti tanem ket nagparang kadagiti disipulona idiay Galilea. Kayatna a sawen a sibibiag Isuna iti agdama. Agsao babaen dagiti propetana iti agdama. Idauluanna ti Simbaanna iti agdama. Agasanna dagiti nasugatan a kararua ken malmalday a puspuso iti agdama. Isu a mabalintayo nga uliten nga isao dagiti balikas ti nabileg a pammaneknek ni Joseph Smith: “Kalpasan ti adu a pammaneknek a naipaay kenkuana, daytoy ti pammaneknek, … nga ipaaymi kenkuana: A sibibiag Isuna!” (Doktrina ken Katulagan 76:22). Mangngegtayo ti timekna kadagitoy a paltiing, masaksiantayo ti imana iti biagtayo, ken mariknatayo “ti rag-o nga ited daytoy a binatog: ‘Ammok a sibibiag ti Mannubbotko!’” (Hymns, no. 136).

Dagiti Kapanunotan iti Panagsursuro iti Pagtaengan ken iti Simbaan

Sibibiag ni Jesucristo.

Kaaduan kadatayo ti saan a nakakita ken ni Jesucristo a kas iti inaramid ni Propeta Joseph Smith. Ngem mabalintayo nga ammuen, kas iti inaramidna, nga agbiag ti Mangisalakan, nga ammona dagiti balligi ken panagkarigatantayo, ken tulongannatayto kadagiti panawen ti panagkasapulan. Ibilangmo ti bukodmo a pammaneknek maipapan iti sibibiag a Cristo bayat ti panangutobmo kadagiti saludsod iti baba ken panangadalmo kadagiti naikadua a resources.

• Asino ni Apo a Jesucristo? Apay nga agdaydayawtayo Kenkuana? (kitaen iti “Ti Sibibiag a Cristo: Ti Pammaneknek dagiti Apostol”).

• Ania ti isuro kaniak ti Espiritu maipapan kadagiti padas ni Joseph Smith ken dadduma pay a nakakita iti Mangisalakan? Kasano a pabilgen dagiti pammaneknekda ti pammaneknekko? (kitaen iti Doktrina ken Katulagan 76:11–14, 20–24; 110:1–10; Joseph Smith—Pakasaritaan:17).

• Ania ti masursurotayo maipapan iti mision ken kinadiosan ti Mangisalakan manipud kadagiti bukodna a balikas? (kitaen iti Doktrina ken Katulagan 29:5; 38:7).

• Kasano a matulongannak ti Mangisalakan iti agdama? (kitaen iti Isaias 53:3–5; Hebreo 2:17–18; Mosiah 3:7; Alma 7:11–13; 36:3; Ether 12:27; Moises 5:10–12).

Agtaud ti bileg iti panagiyulo. Inlawlawag ni Elder Richard G. Scott: “Mabalin nga agtaud ti dakkel a bileg manipud iti panangyulo kadagiti nasantuan a kasuratan. “Ti mangyulo iti nasantuan a kasuratan ket mangipasdek iti baro a pannakigayyem. Maipada daytoy iti panangtakuat iti maysa a baro nga indibidual a makatulong iti oras a panagkasapulan, mangted iti inspirasion ken liwliwa, ken agbalin a maysa a pagtaudan ti motibasion para iti kasapulan a panagbalbaliw” (”The Power of Scripture,” Ensign, Nob. 2011, 6). No makasarakka iti nasantuan a kasuratan maipapan iti Mangisalakan a nangnangruna a napateg kenka—nalabit maysa a makaited kenka iti liwliwa iti panawen ti panagkasapulan—ibilangmo ti panangyulo iti daytoy.

Iti video “My Spiritual Goal,” inkeddeng ti maysa a balasitang ti mangyulo “Ti Sibibiag a Cristo” (Gospel Library). Ania ti makaawis iti riknam maipapan iti padasna? Ania ti mariknam a makaparegta nga aramidem tapno maawat dagiti kinapudno iti “Ti Sibiag a Cristo” iti pusom ken panunotmo?

Let Your Goals Be Guided by the Spirit

Ashley’s spiritual goal was to grow closer to Christ. So she made a plan, wrote it down, and set a completion date. Setting goals has increased Ashley’s ability to accomplish things she feels inspired to do.

Tapno masursurom ti ad-adu pay maipapan iti no kasano a bendisionannatayo ti Mangisalakan ita, mabalinmo ti agadal, dumngeg, wenno agkanta iti “I Know That My Redeemer Lives” (Hymns, no. 136). Mabalin a makaparegta ti agsapul kadagiti kinapudno iti daytoy a himno a maisuro met iti Doctrina ken Katulagan 6:34; 84:77; 98:18; 138:23.

Kitaen met iti Topics and Questions, “Jesus Christ,” Gospel Library.

Gapu ken ni Jesucristo, agungarakto.

Ammo ni Joseph Smith ti rikna ti agladingit iti ipapatay dagiti ipatpateg, agraman ti amana ken ti dua a kakabsatna a lallaki. Intabon da Joseph ken Emma ti innem kadagiti annakda, ub-ubing iti dua a tawen ti tunggal maysa. Manipud kadagiti paltiing nga inted ti Dios, nagun-od da Joseph ken Emma ti agnanayon a pannirigan.

Sapulenyo dagiti kinapudno maipapan iti ipapatay ken ti agnanayon a plano ti Dios iti Doktrina ken Katulagan 29:26–27; 42:45–46; 63:49; 88:14–17, 27–31; 93:33–34. Kasano nga apektuan dagitoy a kinapudno ti wagas a panangkitam iti ipapatay? Kasano nga apektuanda ti wagas a panagbiagmo?

Kitaen met iti 1 Taga Corinto 15; Teachings of Presidents of the Church: Joseph Smith (2007), 174–76; Easter.ChurchofJesusChrist.org.

Naipatungpal ni Jesucristo ti “naan-anay a pannubbot” para kaniak.

Maysa a wagas a mangipokus iti Mangisalakan iti oras ti Paskua ti Panagungar ket ti panagadal kadagiti paltiing iti Doktrina ken Katulagan a mangisuro maipapan iti pangsubbot a sakripisiona. Masarakan ti sumagmamano kadagitoy iti Doktrina ken Katulagan 18:10–13; 19:16–19; 45:3–5; 76:69–70. Ibilang ti panangilista kadagiti kinapudno a masarakam kadagitoy a bersikulo. Tapno naun-uneg ti panagadalmo, mabalinmo ti mangnayon iti listaam babaen ti panagsukisokmo iti Lucas 22:39–44; 1 Juan 1:7; 2 Nephi 2:6–9; Mosiah 3:5–13, 17–18; Moroni 10:32–33.

Dagitoy ti sumagmamano a saludsod a mabalin a mangiwanwan iti panagadalyo:

• Ania ti Pannubbot ni Jesucristo?

• Apay a pinili ni Jesucristo ti agsagaba ken matay para kadatayo?

• Ania ti rumbeng nga aramidek tapno maawatko dagiti bendision ti sakripisiona?

• Kasano ti panagriknak maipapan ken ni Jesucristo kalpasan a basaek dagitoy a bersikulo?

Kitaen met iti Pangiwanwan iti Nasantuan a Kasuratan, “Pannubbot,” Gospel Library; “The Savior Suffers in Gethsemane” (video), Gospel Library.

The Savior Suffers in Gethsemane

Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Gapu ken ni Jesucristo, agungarakto.

• Tapno maisuro dagiti annakmo maipapan iti panagungar, mabalinmo a rugian babaen ti panangipakita kadakuada kadagiti ladawan ti ipapatay ken Panagungar ti Mangisalakan. Paibinglay kadagiti annakmo no ania ti ammoda maipapan kadagitoy a pasamak. Mabalinyo pay a kantaen ti “Did Jesus Really Live Again?” (Children’s Songbook, 64).

• Ibilang ti maysa a banag nga adalen [object lesson] a makatulong kadagiti annakmo a makaawat no ania ti mapasamak no mataytayo (agsina dagiti espiritu ken bagitayo) ket no agungartayo (agtipon dagiti espiritu ken bagitayo, ken perpekto ken imortal dagiti bagitayo). Kas pagarigan, ania ti mapasamak no ikkatentayo ti bateria manipud iti maysa a flashlight wenno ti pagyanan ti tinta manipud iti pluma? Ania ti mapasamak no agtiponda manen? (Kitaen iti Alma 11:38–45.)

• Adda kadi am-ammo dagiti annakmo a maysa a tao a pimmusayen? Paibinglaymo kadakuada ti bassit maipapan kadagitoy nga indibidual, ket kalpasanna aggigiddan a basaenda ti Doktrina ken Katulagan 138:17. Pagsasaritaan no kasano ti rikna ti panangammo a dagiti ay-ayatentayo ket agungar ken maaddaandanto manen iti bagi.

• No adda dagiti natataengan nga annakyo, mabalinyo nga awisen ida a mangsapul kadagiti ragup ti balikas a mangiladawan iti mensahe ti Paskua ti Panagungar kadagiti sumaganad a binatog: Doktrina ken Katulagan 63:49; 88:14–17, 27; 138:11, 14–17. Mabalinda nga aramiden ti kasta met laeng iti video “Because He Lives” (Gospel Library). Kasano a maibinglaytayo daytoy a mensahe kadagiti dadduma?

Nakita ni Propeta Joseph Smith ni Jesucristo.

• Mabalin nga interesadoka ken dagiti annakmo a mangbasa maipapan iti tallo a nagduduma a panawen a nagparang ni Jesucristo ken ni Joseph Smith ken iti dadduma pay, kas nairekord iti Joseph Smith—Pakasaritaan 1:14–17; Doktrina ken Katulagan 76:11–24; 110:1–10. Mabalin pay a kitaen dagiti annakmo dagiti ladawan dagitoy a pasamak iti panid ti aktibidaditi daytoy a lawas. Ania ti masursurotayo maipapan ken ni Jesucristo manipud iti tunggal maysa kadagitoy a padas? Apay a maysa a bendision a maammuan a nakita ni Joseph Smith ken ti dadduma pay ti nagungaren a Mangisalakan?

Babaen ken ni Jesucristo, mapakawannak kadagiti basbasolko.

• Dagiti kinapudno a nasursuro ni Joseph Smith maipapan iti pammakawan babaen ken ni Cristo ket makaited kadagiti annakmo iti namnama a mapakawanda kadagiti biddut ken basolda. Ibilangmo ti panangawis kadagiti annakmo a mangaramid iti table nga addaan kadagiti paulo a kas kadagitoy: Ania ti inaramid ti Mangisalakan para kaniak ken Ania ti nasken nga aramidek tapno umawat iti pammakawan. Tulongam dagiti annakmo a mangsukisok kadagiti sumaganad a binatog tapno mangsapul kadagiti banag nga adda kadagitoy a paulo: Doktrina ken Katulagan 18:10–13; 19:16–19; 45:3–5; 58:42–43. Ibinglay iti tunggal maysa ti rag-o ken panagyamanmo iti inaramid ti Mangisalakan para kadatayo.

• Mabalinmo pay a buyaen ti video “The Shiny Bicycle” a kaduam dagiti annakmo (Gospel Library) ken ibinglaymo dagiti padas idi nariknam ti pammakawan ti Mangisalakan bayat ti panagbabawim.

The Shiny Bicycle

Everybody makes mistakes, and even though it's not easy, with the help of Heavenly Father and Jesus Christ we can receive forgiveness for our sins.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ni Cristo ken ni Maria iti Tanem, ni Joseph Brickey