Detalye manipud iti Umakar dagiti Santo iti Kirtland, ni Sam Lawlor

April 21–27: “No Saankayo nga Agkaykaysa Saankayo a Kukua”

Doktrina ken Katulagan 37–40

Para kadagiti immuna a Santo, ti Simbaan ket ad-adda pay ngem maysa a lugar a pakangngegan iti sumagmamano a panagikasaba iti Domingo. Nagusar dagiti paltiing kadagiti balikas a kas iti gapu, pagarian, Zion, ken, masansan, aramid. Mabalin a paset dayta ti no ania ti nangallukoy iti tattao iti naisubli a Simbaan. Uray no napalaus ti panangipategda iti doktrina, adu met ti nagtarigagay iti maysa a nasantuan a banag a mabalinda a pangidatonan iti biagda. Uray pay no kasta, ti bilin ti Apo idi 1830 nga agummong sadiay Ohio ket saan a nalaka. Para iti adu, kaipapananna ti mangpanaw kadagiti nanam-ay a pagtaengan para iti di masinunuo a panungpalan (kitaen iti “Voices of the Restoration: Gathering to Ohio”). Ita nalawag a makitatayo no ania ti makita dagiti Santo iti mata laeng ti pammati: adda dagiti naindaklan a bendision ti Apo nga agur-uray kadakuada sadiay Ohio.

Ti panagkasapulan nga agummong iti Ohio ket nabayagen a napasamak, ngem dagiti Santo ita ket agkaykaysa pay laeng iti isu met laeng a gapu: a “mangyeg iti Zion” (Doktrina ken Katulagan 39:13). Kas kadagiti nagkauna a Santo, maawistayo a mangtallikud “ti panagessem iti lubong” (Doktrina ken Katulagan 40:2) ken agtalektayo iti kari ti Apo: “Maawatmonto … ti bendision a naindaklan a dimo pay pulos naam-ammuan” (Doktrina ken Katulagan 39:10).

Kitaen met iti Saints, 1:109–11.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 37–38

Ummongennatayo ti Dios tapno bendisionannatayo.

Masapul nga agsakripisio dagiti miembro ti Simbaan idiay Fayette, New York, tapno umakarda idiay Ohio (nasurok a 250 a milia ti kaadayona) iti kalam-ek ti 1831. Bayat ti panangbasayo maipapan iti bilin ti Apo’ iti Doktrina ken Katulagan 37:3–4, mabalin a panunotenyo maipapan kadagiti sakripisio a kiniddaw ti Apo kadakayo. Kalpasanna, bayat ti panagadalyo iti Doktrina ken Katulagan 38:1–33, sapulenyo dagiti kinapudno maipapan iti Mangisalakan a mangted kadakayo iti pammati a mangsurot iti balakadna. Ania ti masursuroyo manipud kadagiti bersikulo 11–33 maipapan kadagiti bendision ti panaguummong kas pasurot ni Jesucristo?

Doktrina ken Katulagan 38:22

“Denggenyo ti timekko ket surotendak.”

Kasano a maaramidyo ni Jesucristo nga “agit-ited iti lintegyo”? Kasano nga aramidennakayo a “nawaya a tattao” ti panangsurot kadagiti lintegna?

Kitaen met ti 2 Nephi 2:26–27.

Doktrina ken Katulagan 38:30

No nakasaganaak, saanak a nasken nga agbuteng.

Kaano a napadasanyo ti pagbatayan nga impalgak ti Apo iti Doktrina ken Katulagan 38:30: “No nakasaganakayo saankayo nga agbuteng”? Bayat ti panagadalyo iti benneg 38, kitaen no kasano nga isagsagana ti Apo dagiti Santona tapno sanguenda ti masakbayan nga addaan ti tured. Kasano ti kayatna a panagsaganayo para kadagiti karit tapno saanyo a nasken ti agbuteng?

Kitaen met iti David A. Bednar, “We Will Prove Them Herewith,” Liahona, Nob. 2020, 8–11.

Doktrina ken Katulagan 38:24–27

Kayat ti Dios nga “agkaykaysatayo.”

Naggapu dagiti Santo a naguummong idiay Ohio manipud iti nadumaduma a kasasaad. Kasta met laeng kadagiti tao iti wardyo. Bilinen ti Apo dagiti taona nga “agkaykaysada” (bersikulo 27). Kasano a maipatungpaltayo daytoy a kita ti panagkaykaysa? Ania dagiti ideya a mapanunotmo bayat ti panangbasam iti Doktrina ken Katulagan 38:24–27? Apay a kasapulantayo ti agkaykaysa tapno agbalin a tattao ti Dios?

Ti panangbasa kadagitoy a bersikulo ket mabalin pay a mangparegta kadakayo a mangpanunot maipapan kadagiti relasionyo—kas pagarigan, kadagiti miembro ti pamilia, miembro ti ward, ken miembro ti korum wenno klase. Ania ti mabalin a manglaplapped kadakayo a makikaykaysa ken ni Cristo? Kasano a matulongannakayo ti Mangisalakan nga “agkaykaysa”? Dagiti video “A Friend to All” wenno “Love in Our Hearts” (Gospel Library) ket mabalin a makatulong kadakayo a mangsungbat kadagitoy a saludsod. Mabalin a masarakanyo pay dagiti ideya iti mensahe ni Dale G. Renlund “The Peace of Christ Abolishes Enmity,” Liahona, Nob. 2021, 83–85.

A Friend to All

Elder Ulisses Soares talks of the need for kindness and acceptance.

Love in Our Hearts

Sister Christina B. Franco discusses the importance of inclusion and respect.

Kasano a matulonganyo dagitoy a grupo nga agbalinda nga ad-adda a nagkaykaysa? Kas pagarigan, ibilang ti panangipatulod wenno panangiteks iti naayat a note kadagiti miembro ti korum, klase, wenno pamiliayo. Asino ti mariknayo a mangparegta kadakayo tapno kasarita wenno tulonganyo?

Ania ti mangparegta kadakayo maipapan iti pagwadan ti Mangisalakan iti Taga Efeso 2:14, 18–22; 2 Nephi 26:24–28?

Kitaen met iti Quentin L. Cook, “Hearts Knit in Righteousness and Unity,” Liahona, Nob. 2020, 18–21; “Love One Another,” Hymns, no. 308; Topics and Questions, “Belonging in the Church of Jesus Christ,” Gospel Library.

Doktrina ken Katulagan 38:39; 39–40

Tarigagayan ti Nailangitan nga Ama nga ited kaniak dagiti kinabaknang ti kinaagnanayon.

Iti panagkunayo, ania ti pagdumaan ti “kinabaknang ti daga” ken “ti kinabaknang ti agnanayon”? (Doktrina ken Katulagan 38:39). Ania dagiti padas a nangisuro kadakayo iti kinapateg dagiti kinabaknang ti kinaagnanayon?

Laglagipenyo daytoy bayat ti panangbasayo maipapan ken ni James Covel kadagiti benneg 39–40 (agraman ti nagtaudan ti pakasaritaan kadagiti paulo ti benneg). Ibilangyo no kasano a mayaplikar ti padasna kadakayo. Kas pagarigan, panunotenyo dagiti panawen idi “napudno [iti Dios] … ti puso[yo]” (Doktrina ken Katulagan 40:1). Kasano a nabendisionankayo gapu iti kinapudnoyo? Kasta met a panunotenyo no ania dagiti “pagesseman iti lubong” a pakaipasanguanyo. Kasano a mabalinda a manglapped kadakayo iti panangawat iti balikas ti Dios “a siraragsak”? (Doktrina ken Katulagan 39:9; 40:2). Ania ti masarakanyo kadagitoy a benneg a mangparegta kadakayo nga agbalin nga ad-adda pay a kanayon a managtungpal iti Dios?

Kitaen met iti Mateo 13:3–23

Panangaramat kadagiti nasantuan a kasuratan iti biagyo. “Maysa a wagas a pakatulongam kadagiti agad-adal a mangkita iti pakainaigan dagiti [nasantuan a kasuratan] ket babaen ti panagdamag kadagiti saludsod kas iti “Kasano a makatulong daytoy kenka iti maysa a banag a pagpaspasaram ita?” ‘Apay a nasken a maammuam daytoy?’ ‘Ania ti pagdumaan a maaramid daytoy iti biagmo?’ Panangisuro iti Wagas ti Mangisalakan, 23). Dagiti saludsod iti daytoy nga aktibidad maipapan iti Doktrina ken Katulagan 39–40 ket dadduma pay a pagarigan dagiti saludsod a makatulong kadatayo a mangyaplikar kadagitoy a paltiing iti biagtayo.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 37; 38:31–33

Ummongennatayo ti Dios tapno bendisionannatayo.

• Ti mapa ken ti panid ti aktibidad iti ungto daytoy a balabala ket makatulong kadagiti annakyo a makaawat no ania ti imbilin ti Dios iti Doktrina ken Katulagan 37:3. Mabalin a matulonganyo ida a mangsapul kadagiti lugar a nadakamat kadagitoy a paltiing. Mabalinyo pay a tulongan ida a mangsapul iti ragup ti balikas manipud iti Doktrina ken Katulagan 38:31–33 a mangiladawan no apay a kayat ti Apo nga aguummong dagiti taona.

Doktrina ken Katulagan 38:24–27

Kayat ti Dios nga “agkaykaysatayo.”

• Bayat ti panangbasayo iti Doktrina ken Katulagan 38: 24–25 a kaduayo dagiti annakyo, pagsasaritaan no ania ti kaipapanan ti ipategmo ti kabsatmo a lalaki wenno babai kas iti bagim (kitaen met iti Mateo 7:12). Tulongan ida a mangulit iti nasantuan a kasuratan, a mangsukat iti “kabsatna a lallaki” iti nagan ti tunggal maysa.

• Tapno isuro dagiti annakyo no ania ti kayat a sawen ti ‘agkaykaysa” (Doktrina ken Katulagan 38:27), mabalinmo a tulongan ida a mangidrowing iti dakkel a numero 1 ken arkosan daytoy kadagiti nagan ken drowing wenno ladawan ti tunggal tao iti pamilia wenno klaseyo. Sumaruno iti numero 1, mabalinyo ti agsurat kadagiti banag nga aramidenyonto tapno ad-adda nga agkaykaysakayo.

• Ibilang ti panangibinglay iti maysa nga adalen a banag a mangiladawan no kasano a mapagtitipon wenno mapagkaykaysa dagiti banag, kas kadagiti pedaso ti lupot a makaaramid iti maysa a kobrekama wenno dagiti ingridiente a makaaramid iti maysa a tinapay. Ania ti isuro kadatayo dagitoy pagarigan maipapan iti panagkaykaysa a kas tattao ti Dios?

Doktrina ken Katulagan 38:30

No nakasaganaak, saanak a nasken nga agbuteng.

• Bayat ti aggigiddan a panangbasayo iti Doktrina ken Katulagan 38:30, mabalinyo ken dagiti annakyo a pagsasaritaan maipapan kadagiti .kallabes a padas a nagkasapulan iti panagsagana. Kalpasanna, mabalinyo a saludsoden kadagiti annakyo maipapan kadagiti banag a kayat ti Nailangitan nga Ama nga isaganaantayo. Ibinglayyo kadagiti annakyo ti maysa a padas a nakatulong kadakayo ti panagsagana a saankayo nga agbuteng. Mabalinyo pay a buyaen ti video “Men’s Hearts Shall Fail Them” (Gospel Library).

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Doktrina ken Katulagan 39:6, 23

Awatek ti sagut ti Espiritu Santo no makumpirmaannak.

• Ibilang ti panangipakita iti maysa a ladawan ti maysa a tao a mabumbuniagan. Awisenyo dagiti annakyo a mangilawlawag no ania ti mapaspasamak iti ladawan. Mabalinyo pay nga awisen ida a mangitudo iti ladawan tunggal mangngeganda dagiti balikas nga Espiritu Santo iti Doktrina ken Katulagan 39:6, 23 (wenno iti maysa a kanta kas iti “The Holy Ghost,” Children’s Songbook, 105). Ibinglay iti tunggal maysa no kasano a binendisionannakayo ti sagut ti Espiritu Santo.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.