“Ayɛwohomumu 9-15: ‘Meka Anokwafoɔ ho Berɛ Biara’: Nkyerɛkyerɛ ne Apam 60-63,” Bra, Di M’akyi—De ma Efie ne Asɔre: Nkyerɛkyerɛ ne Apam 2025 (2025)
“Nkyerɛkyerɛ ne Apam 60-63,” Bra, Di M’akyi—De ma Efie ne Asɔre: 2025
Nkyerɛkyerɛmu firi Ogyafunuma wɔ Missouri so, ɛfiri Bryan Mark Taylor hɔ
Ayɛwohomumu 9-15: “Meka Anokwafoɔ ho Berɛ Biara”
Nkyerɛkyerɛ ne Apam 60–63
Wɔ Ɔsannaa 1831 mfitiaseɛ no, na Joseph Smith ne Asɔre no elderfoɔ afoforɔ resiesie wɔn ho asan akɔ Kirtland wɔ berɛ tiawa bi akyi a wɔkɔsraa “Sion asase no” (Nkyerɛkyerɛ ne Apam 59:3). Na Awurade pɛ sɛ wɔka asɛmpa no wɔ wɔn akwantuo no mu (hwɛ Nkyerɛkyerɛ ne Apam 52:10), na wɔn mu binom de nsiyɛ yɛɛ saa. Nanso afoforɔ twetwee wɔn nan ase. “Wɔde adomakyɛdeɛ a mede ama wɔn sie,” Awurade kaae, “esiane onipa ho suro nti” (Nkyerɛkyerɛ ne Apam 60:2). Yɛn mu bebree nim atenka a saa elderfoɔ yeinom nyaeɛ. Ɛwom sɛ yɛdɔ asɛmpa no, nanso ehu ne annye annie bɛtumi atwe yɛn afiri ne kyɛ ho. Nanso Awurade yɛ mmɔborɔhunufoɔ. Ɔno “nim onipa mmerɛyɛ ne sɛdeɛ ɔbɛboa [yɛn]” (Nkyerɛkyerɛ ne Apam 62:1). Ahotosoɔ a ɛbɛtumi aboa ma yɛadi yɛn suro ne sintɔ so apete wɔ saa adiyinsɛm ma kane asɛmpatrɛfoɔ no mu nyinaa: “Mɛtumi ama woayɛ kronkron.” “Honam nyinaa wɔ me nsam.” “Meka anokwafoɔ ho berɛ biara.” Na “Nea ɔyɛ ɔnokwafoɔ na ɔgyina kɔduru no bɛdi wiase so.” (Nkyerɛkyerɛ ne Apam 60:7; 61:6; 62:9; 63:47.)
Nsusuiɛ ma Adesua wɔ Efie ne Asɔre
Mɛtumi akyɛ me dɔ ne adansedie wɔ Yesu Kristo ho.
Sɛn na w’adansedie wɔ asɛmpa no ho te sɛ “adomakyɛdeɛ,” anaasɛ ademudeɛ a ɛfiri Onyankopɔn? Akwan bɛn so na ɛtɔ da a “yɛde [yɛn] adomakyɛdeɛ sie”? (Nkyerɛkyerɛ ne Apam 60:2; san hwɛ Mateo 25:14–30).
Nkuranhyɛ nkransɛm a ɛfiri Awurade bɛn na wohunu wɔ afa 60 ne 62? Sɛn na saa nkransɛm yi ma wo akokoɔduro wɔ asɛmpa no kyɛ mu? Berɛ a wodwene saa nsɛmmisa yi ho no, dwene ho sɛ wobɛto anaasɛ wobɛkenkan nsɛm a ɛwɔ “Mepɛ sɛ Meyɛ Ɔsɛmpakani Seesei” (Nkwadaa Nnwomnwoma, 168). Deɛn na wosua firi saa nkwadaa dwom yi mu fa asɛmpa no kyɛ ho?
San hwɛ “Rekyɛ Asɛmpa no” mmoano wɔ Asɛmpa nwoma Akoraeɛ.
Mɛtumi de nokorɛdie akyɛ me gyidie wɔ Kristo mu .
Nkyerɛkyerɛ ne Apam 60:2–4; 61:1–2, 20, 36–38; 62:1, 6
Twerɛnsɛm no kyerɛkyerɛ fa Yesu Kristo ho.
Sɛdeɛ ɔkyerɛkyerɛɛ N’asɛmpatrɛfoɔ no, Awurade daa nokorɛ a ɛho hia fa Ɔna ankasa ho adi. Hwehwɛ saa nokorɛ yeinom wɔ Nkyerɛkyerɛ ne Apam 60:2–4; 61:1–2, 20, 36–38; 62:1, 6. Amanebɔ bɛn na ɛfiri twerɛnsɛm no mu na ɛkyerɛ Agyenkwa no adwuma ne ne su a wohunuiɛ? (hwɛ, sɛ nhwɛsoɔ, Yohane 8:1–11; Ether 2:14–15).
Ɛwɔ sɛ me gyinaeɛsie kari “nhunumu ne Honhom no akwankyerɛ.”
Awurade ma akwankyerɛ fa daapem nokorɛ ne nnyinasoɔ ho, nanso Ɔtaa gya ma yɛn sɛ yɛmma nkyerɛmu pɔtee wɔ sɛdeɛ yɛde saa nnyinasosɛm yeinom bɛyɛ adwuma. Sɛn na wohunu nnyinasosɛm a wɔakyerɛ no wɔ Nkyerɛkyerɛ ne Apam 62? (san hwɛ Nkyerɛkyerɛ ne Apam 60:5; 61:22). Sɛn na woahunu saa nnyinasosɛm yi wɔ w’abrabɔ mu? Adɛn nti na ɛyɛ papa sɛ yɛsi gyinaeɛ binom berɛ a yɛnhwehwɛ sɛ Onyankopɔn bɛkyerɛ yɛn adeɛ pɔtee a yɛnyɛ?
San hwɛ Ether 2:18–25; Nkyerɛkyerɛ ne Apam 58:27–28.
Nsɛnkyerɛnneɛ nam gyidie ne Onyankopɔn pɛ so na ɛba.
Anwanwadeɛ mfatoho bi wɔ saa nhyehyɛeɛ yi akyi, a Ezra Booth ani gyee ho yie: wɔsaa Elsa Johnson abasa yareɛ anwanwasoɔ mu. Ezra hunuiɛ no, ɔde ahokeka bɔɔ asu. Nanso, abosome kakra bi ntam, Ezra yeraa ne gyedie na ɔkasa tiaa Nkɔmhyɛni no. Ɛbɛyɛ dɛn na yei asi, sɛ wodwene anwanwadeɛ a ɔhunuiɛ ho a?
Dwene yei ho ber awokenkan Nkyerɛkyerɛ ne Apam 63:7–12. Nokorɛ bɛn na wosua fa nsɛnkyerɛnneɛ ne gyedie ho?
San hwɛ Mateo 16:1–4; Yohane 12:37; Mormon 9:10–21; Ether 12:12, 18.
Mɛtumi ahyɛ me ho so wɔ m’adwene ne nneyɛɛ mu.
Wɔ Nkyerɛkyerɛ ne Apam 63:16, Agyenkwa no sii deɛ Ɔkyerɛkyerɛɛ no Apam Foforɔ mu no so dua—sɛ ɛwɔ sɛ ahohyɛsoɔ mmara di yɛn nneyɛɛ ne yɛn adwene nyinaa so (hwɛ Mateo 5:27–28). Berɛ a wokenkan Nkyerɛkyerɛ ne Apam 63:16, twerɛ kɔkɔbɔ a Agyenkwa no de ma fa akɔnnɔ bɔne ho. Wobɛtumi nso adwene kɔkɔbɔ biara abirabɔ ho. Nhwɛsoɔ, nsɛmfua anaa kasasin bɛn na ɛne ehu bɔ abira? Nhyira afoforɔ bɛn na worenya ahohyɛsoɔ adwene ne nneyɛɛ de ba?
Nnipa bebree dwene sɛ Awurade susudua wɔ ahohyɛsoɔ adwene ne nneyɛɛ ho no atwam anaasɛ mpo ɛyɛ nhyɛsoɔ. Sɛ Onyankopɔn mma nyinaa pere sɛ wɔbɛdi saa mmara yi so a, nsakraeɛ bɛn na ɛbɛba? Wobɛtumi ahwehwɛ saa asɛmmisa yi ho mmuaeɛ wɔ Elder David A. Bednar nkrasɛm “We Believe in Being Chaste” (Liahona, Kɔtɔnimma 2013, 41–44) anaasɛ “Your body is sacred” (De ma Mmabunu Ahoɔden: Woreyi Ɔpɛ ho Akwankyerɛ, 23–26). Anidasoɔ nkransɛm bɛn na wohunu?
Mpo sɛ yɛnim nhyira a ɛwɔ adwene ne nneyɛɛ mu ahohyɛsoɔ ho a, ɛno nkyerɛ sɛ ɛnyɛ den. Wobɛtumi de berɛ kakra adwene deɛ ɛma no yɛ wo den sɛ wobɛdi Agyenkwa no ahohyɛsoɔ susudua so ho—ne deɛ ɛmma no nyɛ den. Nsɛm bɛn na wobɛtumi ne afoforɔ akyɛ fa deɛ ɛwɔ sɛ woyɛ ho berɛ a adwene a ɛmfata sɔ wo hwɛ?
Mommoaboa mo ho. Nhyira kɛseɛ baako a ɛwɔ yɛrehyia abɔ mu wɔ Asɔre nhyiamu ahodoɔ ne adesua dan mu ho yɛ akwanya a yɛde bɛnya mmoa afiri Ahotefoɔ afoforɔ hɔ wɔ yɛn mmɔdemmɔ mu sɛ yɛbɛdi Agyenkwa no akyi. Yɛn mu bebree hyia ɔhaw a ɛtete saa, na yɛn suahunu a ɛsesɛ bɛtumi ayɛ ahoɔden kɛseɛ. Mɛnsuro sɛ wobɛgye ato mu sɛ wowɔ ɔhaw. Mo ne mo ho nkyekyɛ deɛ ɛboa ma modi Onyankopɔn mmara ne nsɔhwɛ so.
San hwɛ Nkyerɛkyerɛ ne Apam 121:45; Tinsɛm ne Nsɛmmisa, “Virtue,” Asɛmpa nwoma Akoraeɛ; “Susudua: Nna mu Ahoteɛ ne Ahobrɛaseɛ—Akokoɔduro Kann” (sini), Asɛmpa nwoma Akoraeɛ; AddressingPornography.ChurchofJesusChrist.org.
Standards: Sexual Purity and Modesty - True Confidence
Two young women share their secret for confidence and self-worth: the companionship of the Holy Ghost.
Ɛwɔ sɛ yɛde nidie ma nneɛma a ɛyɛ kronkron.
Nnyinasosɛm a ɛwɔ Nkyerɛkyerɛ ne Apam 63:58–64 mu tra Awurade din a yɛbobɔ no kwa. Nneɛma kronkron afoforɔ bɛn na ɛba “firi soro,” anaasɛ ɛfiri Onyankopɔn? Asekyerɛ ne sɛn, sɛ wobɛka afa saa nneɛma yi ho wɔ “ahwɛyie mu”?
Sɛ wopɛ nsusuiɛ bebree a, hwɛ saa bosome yi Liahona ne De ma Mmabunu Ahoɔden nsɛmma nwoma mu.
Nsusuiɛ ma Nkwadaa Adekyerɛ
Nkyerɛkyerɛ ne Apam 60:4; 61:1–2, 36; 62:1
Twerɛnsɛm no kyerɛkyerɛ fa Yesu Kristo ho
-
Ebia wobɛtumi atwerɛ nsɛm a ɛfa Agyenkwa no ho wɔ Nkyerɛkyerɛ ne Apam 60–62 no mu bi wɔ krataa nketewa so. Afei wo nkwadaa bɛtumi de saa nsɛm yi atoto Yesu asase so som adwuma ho mfonin ho (hwɛ Asɛmpa Adwinnie Nwoma, nɔma 34–61) a ɛkyerɛ saa su ahodoɔ yeinom. Sɛn na Ɔma yɛhunu No ɛnnɛ?
Nkyerɛmu a ɛfiri De ma Botaeɛ Yei, ɛfiri Yongsung Kim hɔ
Nkyerɛkyerɛ ne Apam 60:7; 61:1–2; 62:1
Sɛ mesakyera a Awurade de bɛkyɛ me.
-
Berɛ a wo ne wo nkwadaa kenkan Nkyerɛkyerɛ ne Apam 60:7; 61:2 no, boa ma wɔnhwehwɛ nsɛm a ɛne nkyekyɛmu yeinom sesɛ. Kae wɔn sɛ wɔde saa adiyisɛm yi maa Joseph Smith ne Asɔre akannifoɔ afoforɔ. Deɛn na na Awurade pɛ sɛ wɔhunu? Wobɛtumi nso akasa afa atenka a Agyenkwa no nya wɔ yɛn ho berɛ a yɛyɛ mfomsoɔ ɛne deɛ adwensakyera aseɛ kyerɛ. Wɔ NKyerɛkyerɛ ne Apam 62:1, sɛn na Yesu bɛtumi aboa berɛ a wɔsɔ yɛn hwɛ?
Yesu Kristo pɛ sɛ mekyɛ N’asɛmpa no.
-
Wobɛtumi abisa wo nkwadaa deɛ wɔbɛka sɛ obi bisa wɔn deɛ wɔdɔ wɔ Yesu Kristo ne N’Asɔre ho a. Morebɔ mu ato dwom a ɛfa asɛmpa no kyɛ ho, te sɛ “I Want to Be a Missionary Now” (Nkwadaa Nnwomnwoma, 168), bɛtumi ama wɔn adwene. Afei mobɛtumi akenkan Nkyerɛkyerɛ ne Apam 62:3 na woama wo nkwadaa atie deɛ ɛsi berɛ a yɛkyɛ yɛn adanseɛ. Sɛn na bɔhyɛ a ɛwɔ nkyekyɛmu 9 bɛtumi aboa berɛ a ehu ka yɛn?
Mɛtumi de nidie ama.
-
Sɛ worekyerɛ Nkyerɛkyerɛ ne Apam 63:64, wo ne wo nkwadaa bɛtumi ato dwom a ɛfa nidie ho, te sɛ “Reverence Is Love” (Nkwadaa Nnwomnwoma, ɛtɔ so 31). Afei mobɛtumi akasa afa akwan ahodoɔ a mobɛtumi de akyerɛ nidie ama Ɔsoro Agya ne Yesu Kristo.
-
Wobɛtumi aboa wo nkwadaa ma wɔate nidie ase berɛ a wo ne wɔn kasa fa adeɛ bi a ɛyɛ titire ma wɔn ho, te sɛ abaduaba, nwoma, anaasɛ kuntu a wɔn ani gye ho pa ara. Ma wɔnkyerɛ sɛdeɛ wɔhwɛ na wɔbɔ nneɛma a ɛyɛ titire ma wɔn ho ban. Afei mobɛtumi abɔ mu akenkan Nkyerɛkyerɛ ne Apam 63:64. Nneɛma bɛn na ɛyɛ titirɛ—anaasɛ kronkron—ma Ɔsoro Agya? (hwɛ, sɛ nhwɛsoɔ, nkyekyɛmu 61 ne saa nnawɔtwe yi dwumadie krataafa). Sɛn na ɛwɔ sɛ yɛyɛ saa nneɛma yi—wɔ yɛn nsɛm ne yɛn nneyɛɛ mu?
Sɛ wopɛ nsusuiɛ bebree a, hwɛ bosome yi Adamfoɔ nsɛmma nwoma mu.
Elsa Johnson Batiri Ayaresa, ɛfiri Sam Lawlor hɔ