Ayɛwohomumu 23–29: “Ahodeɛ Asase so Nyinaa Ahonyadeɛ”

Nkyerɛkyerɛ ne Apam 67–70

Ɛfiri 1828 kɔsi 1831, Nkɔmhyɛni Joseph Smith gyee adiyisɛm bebree firii Awurade hɔ, a deɛ ɛwɔ mu bi ne ɔsoro afotuo ma ankorankoro, nkyerɛkyerɛ fa Asɔre no so die ho, nna a ɛdi akyire anisoadehunu, ne daapem ho nokorɛ bebree a ɛhyɛ nkuran. Nanso na Ahotefoɔ no bebree nkenkanee. Na wɔntintimm adiyisɛm no, ɛna na nsɛsoɔ kakra bi a na ɛwɔ hɔ no yɛ nsaano ntwerɛeɛ a ɛwɔ nkrataa baako baako a wɔnka mmɔɔ mu so a na asɛmpatrɛfoɔ de kyinkyini mema asɔremma.

Afei, wɔ Obubuo 1831 mu, Joseph frɛɛ Asɔre akannifoɔ agyinatufoɔ sɛ wɔbɛsusu adiyisɛm no ntintim ho. Wɔbisaa Awurade pɛ akyire no, saa akannifoɔ yi yɛɛ nhyehyɛeɛ a wɔde bɛtintim Mmaransɛm Nwoma—deɛ ɛdii ɛnnɛ Nkyerɛkyerɛ ne Apam no anim. Ɛrenkyɛre obiara bɛtumi akenkan Onyankopɔn asɛm a ɔnam nkɔmhyɛni a ɔte ase so ada no adi no ama ne ho, adanseɛ turodoo sɛ “wɔde yɛn Agyenkwa no aheman no ho ahintasɛm nsafoa asan ama onipa.” Ɛnam yeinom ne botaeɛ afoforɔ bebree nti, Ahotefoɔ a na wɔwɔ hɔ ne seesei hunu adiyisɛm no sɛ “ahodeɛ Asase so nyinaa ahonyadeɛ” (Nkyerɛkyerɛ ne Apam 70, ɔfa atifiasɛm).

Hwɛ Ahotefoɔ, 1:140–43.

Nsusuiɛ de ma Adesua wɔ Efie ne Asɔre

Nkyerɛkyerɛ ne Apam 67:1–9; 68:3–6

Awurade asomfoɔ ka Ne pɛ berɛ a Sunsum Kronkron no aba wɔn so.

Ayɛ sɛ gyinaeɛsie sɛ wɔbɛtintim adiyisɛm a Joseph Smith gyeeɛ no nyɛ den, nanso na Asɔre akannifoɔ a wɔdii kan no mu bi nnye nni sɛ ɛyɛ nsusuiɛ pa. Na ɔhaw baako yɛ sintɔ a ɛwɔ sɛdeɛ Joseph Smith ɔtwerɛɛ adiyisɛm no ho. Adiyisɛm a ɛwɔ ɔfa 67 no baa sɛ mmuaeɛ ma saa ɔhaw no. Deɛn na wosua fa Awurade nkɔmhyɛfoɔ ne adiyisɛm ho wɔ nkyekyɛmu 1–9? Nhunumu foforɔ bɛn na wonya firi 68:3–6?

Sɛn na woabɛhunu ama wo ho sɛ adiyisɛm a Onyankopɔn de ma N’asomfoɔ no yɛ nokorɛ? Wobɛtumi nso adwene suahunu a wonyaa atenka sɛ Awurade nam N’asomfoɔ no baako so rekasa kyerɛ wo ho (hwɛ Nkyerɛkyerɛ ne Apam 68:4). Berɛ bɛn na woanya atenka sɛ “Sunsum Kronkron no aba wo so” (nkyekyɛmu 3) sɛ ɛrebɛka biribi? Sɛn na Awurade “gyinaa w’akyi”? (nkyekyɛmu 6).

Ansa na wɔretintim Mmaransɛm Nwoma no, Asɔre akannifoɔ pii de wɔn nsa hyɛɛ adansedie ntwerɛeɛ ase sɛ adiyisɛm a ɛwɔ nwoma no mu yɛ nokorɛ. Sɛ wopɛ sɛ wohunu wɔn adansedie no nsɛsoɔ a, hwɛ “Adansedie, bɛyɛ Obubuo 2, 1831,” Adiyisɛm Nwoma 1, 121, josephsmithpapers.org.

Nkyerɛkyerɛ ne Apam 67:10–14

“Toa so wɔ aboterɛ mu.”

Sɛn ahoɔyaa, ehu, ne ahantan mma yɛmmɛn Awurade yie? Sɛn na yɛdi “honhom mu onipa” anaasɛ “honam adwene” so sɛdeɛ yɛbɛtumi “ahunu [No] na yɛahunu sɛ [Ɔne ne]”? (nkyekyɛmu 12; san hwɛ Mosiah 3:19). Deɛn na mohunu wɔ saa nkyekyɛmu yeinom mu a ɛhyɛ mo nkuran sɛ “montoa so wɔ aboterɛ mu nkɔsi sɛ mobɛwie pɛyɛ”? (nkyekyɛmu 13).

Nkyerɛkyerɛ ne Apam 68:25–31

Mɛtumi aboa ma me fie agyina Yesu Kristo so.

Awurade nsɛm a ɛwɔ Nkyerɛkyerɛ ne Apam 68:25–31 no fa awofoɔ ho pɔtee, nanso sɛ woyɛ anaasɛ wonyɛ ɔwofoɔ, wobɛtumi de N’afotuo no ayɛ wo fa mu deɛ de wo fie agyina Yesu Kristo nkyerɛkyerɛ no so. Deɛ wɔakeka wɔ aseɛ yi yɛ nnyinasosɛm a Awurade sɛ yɛnkyerɛkyerɛ wɔ efie no binom. Dwene sɛdeɛ wobɛtumi ama yeinom mu baako biara ayɛ fa bi wɔ fapem ma Kristo-nnyinasoɔ fie—efie a wote mu seesei anaasɛ wo daakye fie no. Aboadeɛ ne nsɛmmisa a wɔde ama no bɛtumi aboa.

• Adwensakyera: Sua Alma 36:17–20, na hyɛ no nso sɛdeɛ wɔhyiraa Alma wɔ berɛ a ɛhia mu ɛnam sɛ na n’agya akyerɛkyerɛ no Agyenkwa no mpata botaeɛ no nti. Sɛn na wobɛtumi aboa akanyan w’abusua ma wɔadane wɔn ho akɔ Yesu Kristo nkyɛn na wɔasakyera? (hwɛ 2 Nephi 25:26).

• Kristo mu Gyedie: Kenkan Titenani Russell M. Nelson nsusuiɛ num fa sɛdeɛ gyedie nyini ho wɔ “Christ Is Risen; Faith in Him Will Move Mountains” (Liahona, Kɔtɔnimma 2021, 103). Dwene sɛdeɛ saa nsusuiɛ yi bɛtumi ama gyedie abrabɔ aba w’abusua mu.

• Asubɔ: San hwɛ asubɔ apam no wɔ sɛdeɛ wɔakyerɛkyerɛ wɔ Mosiah 18:8–10, 13. Sɛn na mmɔdemmɔ a wode bɛdi saa apam yi so bɛtumi ahyɛ w’abusua den?

• Sunsum Kronkron no Akyɛdeɛ: Sua ɔfrɛ a ɛwɔ nkrataafa 17–19 wɔ De ma Mmabunu Ahoɔden: Woreyi Ɔpɛ ho Akwankyerɛ. Deɛn na wote nka sɛ yɛ woyɛ a ɛde Sunsum Kronkron no nkɛntɛnsoɔ bɛba wo fie?

• Mpaebɔ: Deɛn na wosua fa mpaebɔ tumi ho wɔ efie “Love Is Spoken Here”? (Nkwadaa Nnwomnwoma, 190–91). Deɛn nhyira na Agyenkwa no hyɛ ho bɔ wɔ 3 Nephi 18:15–21?

• Nnyinasonsɛm foforɔ a wohunu wɔ Nkyerɛkyerɛ ne Apam 68:25–31:

Deɛn afotuo na wode bɛma obi a n’abusuafoɔ mmoa wɔn mmɔdemmɔ sɛ wɔbɛnya gyedie wɔ Kristo mu ho?

San hwɛ “Abusua: Daurubɔ ma Wiase,” Asɛmpa nwoma Akoraeɛ; Tinsɛm ne Nsɛmmisa, “Abaatanyɛ,” Asɛmpa nwoma Akoraeɛ; Dieter F. Uchtdorf, “Yesu Kristo ne Awofoɔ Ahoɔden,” Liahona, Kɔtɔnimma 2023, 55–59.

Nkyerɛkyerɛ ne Apam 69:1

“Nokorɛ ne anokwafoɔ” ayɔnkofoɔ boa ma medi Yesu Kristo akyi.

Adɛn nti na wodwene sɛ na ɛyɛ “nyansa wɔ [Awurade mu]” sɛ obi a ɔyɛ “nokorɛ ne nokwafoɔ” bɛka Oliver Cowdery ho wɔ dwumadie a wɔaka ho asɛm wɔ nkyekyɛmu no mu? Sɛn na saa nnyinasosɛm yi fa wo ho?

Boa asuafoɔ ma wɔmpagya wɔn ho wɔn ho. Ankorankoro biara a ɔwɔ w’adesua dan anaasɛ w’abusua mu yɛ adansedie, nhunumu, ne suahunu wɔ asɛmpa no abrabɔ mu aboadeɛ kɛseɛ. Ma wɔnkyɛ na wɔmpagya wɔn ho wɔn ho.

Nkyerɛkyerɛ ne Apam 70:1–4

Mewɔ asodie wɔ adiyisɛm a Awurade de ama no ho.

Awurade maa elderfoɔ pɔtee bi asodie sɛ wɔnhwɛ adiyisɛm no tintim so. Ɛwom sɛ wonni saa asodie pɔtee no deɛ, nanso deɛn na wohwɛso anaasɛ ɛyɛ w’asodie “wɔ adiyisɛm ne mmaransɛm no so”? (nkyekyɛmu 3).

Sɛ wopɛ nsusuiɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.

Nsusuiɛ de ma Nkwadaa Adekyerɛ

Nkyerɛkyerɛ ne Apam 67

Nkyerɛkyerɛ ne Apam ne kyerɛkyerɛ me fa Yesu Kristo ho.

• Ka sɛdeɛ Joseph Smith adiyisɛm no baeɛ maa wɔtintimm no wɔ nwoma mu kyerɛ wo nkwadaa (hwɛ “Ti 23: Nkyerɛkyerɛ ne Apam no,” wɔ Nkyerɛkyerɛ ne Apam Abasɛm, 90–92, anaasɛ sini a ɛne no sɛ wɔ Asɛmpa nwoma Akoraeɛ). Boa wɔn ma wɔnkaakae nneɛma a moasua fa Yesu Kristo ho firi Nkyerɛkyerɛ ne Apam mu de bɛsi seesei wɔ afe yi mu no binom. Mobɛtumi nso ne mo ho mo ho akyɛ nkyekyɛmu a mo ani gye ho firi Nkyerɛkyerɛ ne Apam mu no bi.

  Chapter 23: The Doctrine and Covenants: August–November 1831

• Wobɛtumi nso de Twerɛ Kronkron, Mormon Nwoma, Nkyerɛkyerɛ ne Apam, ne Ɔbohene a Ɛsom boɔ akyerɛ wo nkwadaa na wo ne wɔn akasa afa sɛdeɛ wɔyɛ nsonoeɛ ne sɛdeɛ wɔsesɛ ho (hwɛ saa nwoma yeinom ho nkyerɛkyerɛmu wɔ Twerɛnsɛm no mu Akwankyerɛ). Yɛbɛyɛ dɛn ahunu sɛ twerɛnsɛm no yɛ nokorɛ? Deɛn na yɛsua firi Nkyerɛkyerɛ ne Apam 67:4, 9 adiyisɛm a Awurade de maa Joseph Smith no ho?

Nkyerɛkyerɛ ne Apam 68:25–31

Mɛtumi abɔ asu berɛ a madi mfeɛ nwɔtwe.

• Wɔ Nkyerɛkyerɛ ne Apam 68:27, Awurade kyerɛɛ mfeɛ dodoɔ a ɛsɛ sɛ onipa di ansa na wabɔ asu. Boa wo nkwadaa ma wɔnhunu deɛ Ɔkaae. Adɛn nti na Yesu pɛ sɛ yɛbɔ asu? Dwom te sɛ “Asubɔ” (Nkwadaa Nnwomnwoma, 100–101) bɛtumi aboa. Wode mfonin anaasɛ nkyekyɛmu 25–31 (anaasɛ ne mmienu), boa wo nkwadaa ma wɔhunu nneɛma a Awurade pɛ sɛ nkwadaa sua.

• Wo ne wo nkwadaa nkenkan dwumadie a Awurade de maa Oliver Cowdery wɔ ɔfa atifiasɛm ma Nkyerɛkyerɛ ne Apam 69. Deɛn afotuo na Awurade de maae wɔ nkyekyɛmu 1? Adɛn nti na ɛhia sɛ wobɛn nkorɔfoɔ “a wɔbɛdi nokorɛ ayɛ anokwafoɔ”? Ebia wo nkwadaa bɛtumi akasa afa obi a wɔnim no a ɔyɛ “nokorɛ ne nokwafoɔ.” Mommɔ mu nto dwom a ɛhyɛ nkwadaa no nkuran ma wɔayɛ nokorɛ ne anokwafoɔ te sɛ Agyenkwa no, te sɛ “I’m Trying to Be like Jesus” (Nkwadaa Nnwomnwoma, 78–79). Sɛn na yɛbɛtumi ahwɛ sɛ yɛyɛ nokorɛ ne anokwafoɔ ma Awurade? Sɛn na Ɔbɛtumi de yɛn bɛhyira afoforɔ berɛ a yɛyɛ nokorɛ ne anokwafoɔ?

Sɛ wopɛ nsusuiɛ bebree a, hwɛ bosome yi Adamfoɔ nsɛmma nwoma mu.

Mmaransɛm Nwoma, deɛ ɛdii Nkyerɛkyerɛ ne Apam anim ni, wɔtintimm no wɔ afidie te sɛ yei so.