“Ayɛwohomumu 30–Kutawonsa 6: ‘Akodeɛ Biara a Wɔbɔ tia Wo Renyɛ Yie’: Nkyerɛkyerɛ ne Apam 71–75,” Bra, Di M’akyi—De ma Efie ne Asɔre: Nkyerɛkyerɛ ne Apam 2025 (2025)
“Nkyerɛkyerɛ ne Apam 71–75,” Bra, Di M’akyi—De ma Efie ne Asɔre: 2025
Mɛkae Apam no, ɛfiri Enrique Manuel Garcia hɔ
Ayɛwohomumu 30–Kutawonsa 6: “Akodeɛ Biara a Wɔbɔ tia Wo Renyɛ Yie”
Nkyerɛkyerɛ ne Apam 71–75
Ɛfiri berɛ a na ɔyɛ abarimaa, Joseph Smith hyiaa kasatiafoɔ—mpo atamfoɔ—berɛ a ɔbɔɔ mmɔden sɛ ɔbɛyɛ Onyankopɔn adwuma. Nanso na ɛbɛyɛ den ankasa wɔ 1831 rekɔ awieeɛ, berɛ a Esra Booth hyɛɛ aseɛ kasa tiaa Asɔre no wɔ badwam, ɛfiri sɛ yei deɛ na kasatiafoɔ no yɛ obi a kane no na ɔka asɔre no ho. Na Esra ahunu sɛ Joseph de Onyankopɔn tumi asa ɔbaa bi yadeɛ. Na wɔama no aka Joseph ho berɛ a ɛdi kan a wɔkɔhwɛɛ Sion asase no wɔ Missouri. Nanso na ne gyedie ayera firi saa berɛ no, na na ɔpɛ sɛ ɔka nsɛmmɔne fa Nkɔmhyɛni no ho nti, ɔtintimm nkrataa toatoaa so wɔ Ohio koowaa-krataa bi mu Na ɛyɛɛ te sɛ na ne mmɔdemmɔ no reyɛ adwuma, ɛfiri sɛ “na ɔtan ahyɛ aseɛ atia Asɔre no” wɔ mpɔtam hɔ (Nkyerɛkyerɛ ne Apam 71, ɔfa atifiasɛm). Deɛn na ɛwɔ sɛ agyedifoɔ yɛ wɔ tebea a ɛte sei mu? Berɛ a yɛnni mmuaeɛ papa baako de ma tebea biara no, ayɛ sɛ mpɛn pii—a asɛm a ɛsii wɔ 1831 yi ka ho no—Awurade mmuaeɛ no fa bi ne sɛ yɛbɛpae mu aka nokorɛ no na yɛatenetene atorɔsɛm berɛ a “yɛrebɔ asɛmpa [no] dawuro” (nkyekyɛmu 1). Aane, Awurade adwuma bɛnya kasatiafoɔ berɛ biara, nanso awieeɛ no, “akodeɛ biara a wɔbɔ tia [no] renyɛ yie” (nkyekyɛmu 9).
Hwɛ “Ezra Booth ne Isaac Morley,” wɔ Adiyisɛm Nteaseɛ mu, 134.
Nsusuiɛ de ma Adesua wɔ Efie ne Asɔre
Honhom no bɛkyerɛ me kwan berɛ a mebɔ Agyenkwa no asɛmpa no dawuro.
Sɛ nkorɔfoɔ kasatia anaa di fɛw wɔ wo gyedie wɔ Agyenkwa no mu, N’asɛmpa, anaasɛ N’Asɔre ho a ɛbɛtumi ayɛ ɔhaw. Sɛ ɛba saa a, deɛn na woyɛ? Biribi a ɛte saa sii wɔ Ohio wɔ 1831 (hwɛ Nkyerɛkyerɛ ne Apam 71). Deɛn na Awurade ka kyerɛɛ Joseph Smith ne Sidney Rigdon sɛ wɔnyɛ mfa ho wɔ Nkyerɛkyerɛ ne Apam 71? Ebia wobɛtumi atwerɛ nkyerɛkyerɛ a Awurade de maa wɔn ne nhyira a Ɔhyɛɛ bɔ ato hɔ.
Berɛ a woresua ɔfa 71, wobɛtumi nso ahwehwɛ sɛdeɛ Agyenkwa no buaa wɔn a wɔkasa tiaa No wɔ N’asase so som adwuma mu. Nwɛsoɔ binom nie: Mateo 22:15–22; 26:59–64; Yohane 10:37–38. Deɛn na wosua firi Ne hɔ? Deɛn nhunumu foforɔ na wonya firi Mateo 18:15; Efesofoɔ 4:31–32; 2 Timoteo 3:12; Yakobo 1:19?
Sɛn na N’afotuo no bɛtumi ayɛ adwuma wɔ tebea a wohyia no ɛnnɛ mu? Wobɛtumi adwene akwan a wode wo ara wo nsɛm bɛtenetene atorɔsɛm wɔ asomdwoeɛ mu. Nhwɛsoɔ, wobɛtumi ahyɛ aseɛ berɛ a wokyerɛ obuo ma onipa foforɔ no adwenkyerɛ, na afei wɔ ahobrɛaseɛ ne ayamyɛ kwan so wokyɛ deɛ wogye die fa Yesu Kristo ne Ne nkyerɛkyerɛ ho. Sɛ wobɛsiesie wo ho ama saa tebea yi no, ebia wobɛtumi de ayɔnkofoɔ anaasɛ abusuafoɔ asua saa kwan yi.
San hwɛ, “Woreboa Afoforɔ a wɔwɔ Nsɛmmisa,” Asɛmpa nwoma Akoraeɛ; Dallin H. Oaks, “Loving Others and Living with Differences,” Liahona, Obubuo 2014, 25–28; Jörg Klebingat, “Valiant Discipleship in the Latter Days,” Liahona, May 2022, 107–10.
Awurade nam akannifoɔ te sɛ ahwɛfoɔ som adwuma so hyira me.
Berɛ a wɔfrɛɛ Newel K. Whitney sɛ ɔnsom sɛ ɔhwɛfoɔ no, na n’asɛdeɛ yɛ sononko kakra firi ɛnnɛ ahwɛfoɔ deɛ ho. Nhwɛsoɔ, Ɔhwɛfoɔ Whitney hwɛɛ agyapadeɛ nhyirasoɔ ne akwanya sɛ wɔkɔtena Sion asase so wɔ Missouri so. Nanso sɛ wokenkan fa ne frɛ ho wɔ Nkyerɛkyerɛ ne Apam 72, wobɛtumu ahunu abusuabɔ bi wɔ deɛ ahwɛfoɔ yɛ no ɛnnɛ mu—anyɛ hwee koraa wɔ honhom mu, sɛ ɛnyɛ nkyerɛmu pɔtee, fa wɔn asɛdeɛ ho a.
Nhwɛsoɔ, akwan bɛn so na “wobu akonta” kyerɛ wo hwɛfoɔ? (nkyekyɛmu 5). Ɛnnɛ yi, “Awurade adekoradan,” bɛtumi ayɛ ntoboa, ɔsom, ne wɔɔdo asafomma adomakyɛdeɛ (hwɛ nkyekyɛmu 10, 12). Sɛn na wobɛtumi aboa saa adekoradan no?
Sɛn na Awurade nam ɔhwɛfoɔ bi som so ahyira wo ne w’abusua?
San hwɛ Quentin L. Cook, “Ahwɛfoɔ—Nnwanhwɛfoɔ wɔ Awurade Nnwankuo so,” Liahona, Kɔtɔnimma 2021, 56–60.
Mewɔ akwanya bebree a mede bɛkyɛ Agyenkwa no asɛmpa no.
Berɛ a Joseph Smith ne Sidney Rigdon firii wɔn asɛmpatrɛ dwumadie mu baae no (hwɛ Nkyerɛkyerɛ ne Apam 71), Awurade ka kyerɛɛ wɔn sɛ wɔntoa wɔn Twerɛ Kronkron nkyerɛaseɛ no so (hwɛ Twerɛnsɛm mu Akwankyerɛ, “Joseph Smith Nkyerɛaseɛ (JST),” Asɛmpa nwoma Akoraeɛ). Nanso na ɛno nkyerɛ sɛ na Ɔpɛ sɛ wɔgyae asɛmpa no kyɛ. Nokorɛ ne sɛ, ɛka osuani abrabɔ ho.
Berɛ a wokenkan Nkyerɛkyerɛ ne Apam 73, dwene sɛdeɛ wobɛtumi ama asɛmpa no kyɛ ayɛ adeɛ a ɛgu so, “ɛyɛ adwuma” (nkyekyɛmu 4)—anaasɛ ɛyɛ nokorɛ—wɔ w’abrabɔ ka w’asɛdeɛ afoforɔ ho.
Yesu Kristo asɛmpa no kyɛ bɛtumi ayɛ daa daa adeɛ a ɛwɔ hɔ.
“Fa w’ahoɔden yɛ adwuma … rebɔ nokorɛ no dawuro.”
Adiyisɛm a ɛwɔ ɔfa 75 no wɔka kyerɛɛ nkorɔfoɔ a na “wɔde [wɔn] din ama sɛ wɔbɛkɔ akɔbɔ dawuro wɔ [Agyenkwa no] asɛmpa ho” (nkyekyɛmu 2). Ɛkwan baako a yɛde bɛsua saa adiyisɛm yi ne sɛ yɛbɛyɛ mmoano mmienu: (1) sɛdeɛ yɛbɛkyɛ asɛmpa no yie ne (2) sɛdeɛ Awurade hyira na ɔboa yɛn berɛ a yɛyɛ.
Wogye di sɛ sɛn na “twentwɛn” anaasɛ “yɛ akwadorɔ” aseɛ kyerɛ wɔ asɛmpa no kyɛ mu? Sɛn na ɛteɛ, sɛ “wode w’ahoɔden yɛ adwuma”? (nkyekyɛmu 3).
San hwɛ “I’ll Go Where You Want Me to Go,” Nnwom, ɛtɔ so 270.
Sɛ wopɛ nsusuiɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.
Nsusuiɛ de ma Nkwadaa Adekyerɛ
Mɛtumi abɔ nokorɛ no ho ban berɛ a mekyɛ m’adanseɛ.
-
Wobɛtumi de ɔfa atifiasɛm ma Nkyerɛkyerɛ ne Apam 71 anaasɛ “Ti 25: Joseph Smith ne Sidney Rigdon Kɔyɛ Asɛmpatrɛ Adwuma” (wɔ Nkyerɛkyerɛ ne Apam Abasɛm, 96, anaasɛ sini a ɛne sɛ wɔ Asɛmpa nwoma Akoraeɛ) akyerɛkyerɛ wo nkwadaa afa tebea a ɛyɛɛ nkuranhyɛ maa ɔfa 71. Afei boa wɔn ma wɔnhunu wɔ nkyekyɛmu 1 deɛ na Awurade pɛ sɛ Joseph ne Sidney yɛ wɔ “nsɛmmɔne ka” fa Asɔre no ho. Sɛn na Ɔkaa sɛ Ɔbɛboa wɔn? Yɛbɛyɛ dɛn ayɛ te sɛ Joseph ne Sidney?
0:45Chapter 25: Joseph Smith and Sidney Rigdon Go on a Mission: December 1831–January 1832
-
Mobɛtumi nso ato dwom a ɛhyɛ wo nkwadaa nkuran ma wɔdi nokorɛ ma Agyenkwa no, te sɛ “Stand for the Right” (Nkwadaa Nnwomnwoma, 159). Boa wo nkwadaa ma wɔnsua sɛdeɛ wɔbɛkyɛ deɛ wɔnim fa Yesu Kristo ho.
Awurade afrɛ ɔhwɛfoɔ sɛ ɔmmoa me.
-
Morebɔ mu akenkan Nkyerɛkyerɛ ne Apam 72:2 bɛtumi ayɛ akwanya a mode bɛsusu deɛ nti a Awurade frɛ ahwɛfoɔ ho (san hwɛ “Ti 17: Asɔre no Ahwɛfoɔ a wɔdi Kan,” wɔ Nkyerɛkyerɛ ne Apam Abasɛm, 64–66, anaasɛ sini a ɛne no sɛ wɔ Asɛmpa nwoma Akoraeɛ). Wo ne wo nkwadaa bɛtumi ahwehwɛ mfonin anaasɛ nneɛma a ɛbɛgyina hɔ ama ɔhwɛfoɔ asɛdeɛ. Mfonin ne dwumadie krataafa a ɛwɔ saa nhyehyɛeɛ yi awieeɛ ma nsusuiɛ binom. Afei mobɛtumi abɔ mu akasa afa ahwɛfoɔ a monim wɔn ho ne sɛdeɛ Awurade nam wɔn som so ahyira mo abusua.
1:45Chapter 17: The First Bishops of the Church: February and December 1831
Berɛbiara kyerɛkyerɛ fa Yesu Kristo ho. “Ɛmfa ho ne deɛ worekyerɛkyerɛ biara, kae sɛ worekyerɛkyerɛ ankasa fa Yesu Kristo ho ne sɛdeɛ yɛbɛtumi abɛyɛ te sɛ Ɔno” (Rekyerɛkyerɛ wɔ Agyenkwa no Kwan so, 6). Nhwɛsoɔ, sɛ wokyerɛkyerɛ wo nkwadaa fa ahwɛfoɔ ho a, si so dua sɛ wɔyɛ Yesu Kristo ananmusifoɔ, a Ɔno na wafrɛ wɔn sɛ wɔnyɛ N’adwuma (hwɛ 1 Petro 2:25).
Awurade ma ahwɛfoɔ hwɛ nkorɔfoɔ a wɔhia mmoa.
Mɛtumi de me mmɔdemmɔ a ɛwɔ anim pa ara ama Awurade
-
Sɛ wobɛkasa afa “woreyɛ akwadworɔ” ne “wode[wo] ahoɔden [re] reyɛ adwuma,” ebia wobɛtumi ayiyi ɔsom nneyɛɛ anaasɛ efie nnwumayɛ binom na woama wo nkwadaa ayɛ no akwadworɔ mu na afei wɔde wɔn ahoɔden nyinaa ayɛ akyerɛ. Sɛ mokenkan “monnyɛ akwadorɔ” wɔ Nkyerɛkyerɛ ne Apam 75:3, wo nkwadaa bɛtumi akyerɛ sɛdeɛ wɔbɛyɛ nneɛma akwadworɔ mu. Sɛ mokenkan “na mmom momfa mo ahoɔden nyɛ adwuma,” wɔbɛtumi akyerɛ sɛdeɛ wɔyɛ adwuma ahoɔden mu. Adɛn nti na ɛhia sɛ yɛbɔ mmɔden pa ara berɛ a yɛresom Awurade?
-
Wɔ ne nkrasɛm “Two Principles for Any Economy” (Liahona, Obubuo 2009, 55–58), Titenani Dieter F. Uchtdorf kaa ayɛsɛm mmienu faa adwuma ho. Ebia wobɛtumi ne wo nkwadaa akyɛ na moakasa afa atenka a yɛnya berɛ a yɛnim sɛ yɛayɛ adwumaden na yɛabɔ yɛn ho mmɔden pa ara ho.
Sɛ wopɛ nsusuiɛ bebree a, hwɛ bosome yi Adamfoɔ nsɛmma nwoma mu.
Worehunu Mmɔborɔhunu wɔ W’abrabɔ mu, ɛfiri Keith Larson hɔ