Refuge, ka Shaelynn Abel

Phukwi 7–13: “Tuelo ya Bone e Tlaa nna Kgolo e Kgalalelo ya Bone e Tlaa nna ya Bosakhutleng”

Dithuto le Dikgolagano 76

“Ke tla diragalelwa ke eng fa Ke sena go swa?” Go batlile e le mongwe le mongwe yo o botsang potso ena ka sebopego sengwe kgotsa se sengwe. Ka dingwaga tse di makgolokgolo, dingwao tse dintsi tsa Bakeresete, ba ba ikaegileng ka dithuto tsa baebele, di ne di ruta ka legodimo le molete, ka parateise ya basiami le tlhokofatso ya baikepi. A mme tota lelwapa lotlhe la batho le ka kgaogangwa ka tsela e e gagametseng jalo? Ka Tlhakole 1832, Joseph Smith le Sidney Rigdon ba ne ba ipotsa gore a go na le mo gontsi mo ba tshwanetseng go go itse mabapi le thuto ena (bona Dithuto le Dikgolagano 76, setlhogo sa karolo).

Ka boammaaruri go ne go le teng. Fa Joseph le Sidney ba tlhatlhanya ka dilo tse, Morena a “kgoma matlho a go tlhaloganya ga [bone] mme a bulega” (temana 19). Ba ne ba amogela tshenolo e e neng e makatsa, e e atolositsweng, e e phatsimang thata mo e leng gore Baitshepi ba neng ba e bitsa “Ponatshegelo.” E ne ya bula dikgoro tsa legodimo mme ya neela bana ba Modimo pono e e atolosang tlhaloganyo ya bosakhutleng. Ponatshegelo e ne ya senola gore legodimo le legolo ebile le atlhame mme le na le batho botlhe go feta jaaka batho ba bantsi ba neng ba gopola ka teng pele. Modimo o kutlwelobotlhoko le tshiamo go feta ka fa re ka tlhaloganyang ka teng. Mme bana ba Modimo ba na le bowelo jwa bosakhutleng jo bo galalelang thata go feta jaaka re ka akanya ka teng.

Bona Saints, 1:147–50; “The Vision,” mo go Revelations in Context, 148–54.

megopolo ya go ithuta kwa Gae le kwa Kerekeng

Dithuto le Dikgolagano 76

Poloko e tla ka Jeso Keresete, Morwa Modimo.

tsetlana 76 e senola boammaaruri jwa botlhokwa mabapi le bowelo jwa rona jwa bosakhutleng, mme go tlaa bo go sa felela go re tshenolo ena e mabapi le magosi a mararo a kgalalelo kgotsa le fela ka togamaano ya poloko. Go bua ka tlhomamo, tsetlana 76 ke ka ga Jeso Keresete, yo o dirang gore togamaano ya Modimo ya poloko ya rona le kgalalelo ya bosakhutleng di kgonagale. Fa o ntse o bala, o ka leba mafoko kgotsa dipolelwana tse di tlhalosang kamano fa gare ga Jeso Keresete le batho ba ba ruang magosi a kgalalelo a a farologaneng. Gongwe nankolo e e tshwanang le e e latelang e ka go thusa go kwala se o se bonang.

Bogosi jwa kgalalelo	Kamano le Jeso Keresete	Ditshegofatso tsa bosakhutleng
Bogosi jwa kgalalelo Selesetiale (ditemana 50–70, 92–96)	Kamano le Jeso Keresete Amogetse bopaki jwa ga Jeso Dira le go tshegetsa dikgolagano le Ene	Ditshegofatso tsa bosakhutleng Go ntlafadiwa mo sebeng Fenya ka tumelo
Bogosi jwa kgalalelo Theresetiale (ditemana 71–79, 97)	Kamano le Jeso Keresete	Ditshegofatso tsa bosakhutleng
Bogosi jwa kgalalelo Thelesetiale (ditemana 81–90, 98–106, 109–12)	Kamano le Jeso Keresete	Ditshegofatso tsa bosakhutleng

O ikutlwa o tlhotlholediwa go dira eng go nonotsha kamano ya gago le Mmoloki?

Fa Wilford Woodruff a bala ponatshegelo e, o ne a re, “Ke ne ka ikutlwa ke rata Morena go feta jaaka ke kile pele mo botshelong jwa me” (bona “Voices of the Restoration: Testimonies of ‘the Vision’”). O ithuta eng ka Jeso Keresete go tswa mo ditemaneng 1–5, 20–24, 39–43, 107–8 se se go dirang gore o Mo rate go feta?

Bona gape 1 Petere 3:18–19; 4:6; Dallin H. Oaks, “What Has Our Savior Done for Us?,” Liahona, Motsheganong 2021, 75–77; “I Stand All Amazed,” Hymns, no. 193.

Tsepamisa maikutlo mo go Rara wa Legodimo, Jeso Keresete, le thuto ya Bone. Mo go tsotlhe tse re ka di ithutang mo dikwalong tse di boitshepo, boammaaruri jo bo botlhokwa thata bo re thusa go aga tumelo mo go Rara wa Legodimo le Jeso Keresete, go ikwaatlhaya, go dira le go tshegetsa dikgolagano le Bone, le go amogela Mowa o o Boitshepo. Le ntswa go ka tswa go kgatlha go tshwantshanya kgotsa go sekaseka mokgwa kgotsa boitshwaro jwa batho ba ba tla amogelang magosi a a farologaneng a kgalalelo, go botlhokwa thata go tsepamisa maikutlo mo go Rara wa Legodimo le Mmoloki. Sengwe le sengwe se Ba se dirang go re baakanyetsa kgalalelo eo se tla re sokololela kwa go Bone.

Mo ntlwaneng e, Joseph Smith o bone ponatshegelo e e kwadilweng mo Dithuto le Dikgolagano 76.

Dithuto le Dikgolagano 76:5–10, 114–18

Ke ka tlhaloganya thato ya Modimo “ka thata ya Mowa o o Boitshepo.”

E ne e se maloko otlhe a Kereke a a neng a amogela motlhofo tshenolo mo tsetlana 76, gonne e ne e ruta gore go batlile e le mongwe le mongwe yo o tlaa bolokwang le go amogela selekanyo sengwe sa kgalalelo. Sekai, Brigham Young o rile: “Ngwao ya me e ne e ntse jaana, gore fa Ponatshegelo e tla pele kwa go nna, e ne ka tlhamalalo e le kgatlhanong ebile e ganetsana le thuto ya me ya pele. Ka re, Ema go le gonnye. Ke ne ka seka ka e gana, mme ke ne ke sa e tlhaloganye.” O ne a tlhalosa gore o ne a tshwanela go “akanya le go rapela, go bala le go akanya, go fitlhelela ke e itse le go e tlhaloganya ka botlalo” (mo “The Vision,” mo Revelations in Context, 150). O ithuta eng mo maitemogelong a gagwe se se ka go thusang fa Modimo a senola dilo tse di farologaneng le se o se tlhaloganya gone jaanong? O ithuta eng ka Modimo mo Dithuto le Dikgolagano 76:5–10, 114–18? Ditemana tse di re ruta eng mabapi le ka fa re ka tlhaloganyang “keletso ya go rata ga [Modimo]”? (temana 7).

Dithuto le Dikgolagano 76:39–44, 50–70

Kgalalelo ya bosakhutleng ke mokgwa o o kwa godimo wa poloko.

Dithuto le Dikgolagano 76:39–44 e tlhalosa poloko ka kakaretso. Ditemana 50–70 di tlhalosa kgalalelo ya bosakhutleng, mofuta wa tlhomamo wa poloko. O ka tlhalosa jang pharologanyo fa gare ga poloko le kgalalelo ya bosakhutleng? Seabe sa Mmoloki ke sefe mo go tseno ka bobedi? Ke eng se o se bonang mo ditemaneng tsena se se go tlhotlheletsang go batla kgalalelo ya bosakhutleng?

Bona gape Johane 3:16–17; Dithuto le Dikgolagano 132:20–25.

Dithuto le Dikgolagano 76:50–70, 92–95

Rara wa Legodimo o batla ke amogela botshelo jwa bosakhutleng mo bogosing jwa selesetiale.

A o kile wa ipotsa—kgotsa wa tshwenyega—ka gore o ka nna mofuta wa motho o o tla amogelang kgalalelo ya selesetiale, jaaka go tlhalositswe mo Dithuto le Dikgolagano 76:50–70, 92–95? Fa go ntse go le botlhokwa go itse se Modimo a se solofelang mo go rona, akanya le gone go leba mo ditemaneng tsena se Modimo a se re diretseng—le se a se dirang—go re thusa go tshwana le Ene. Ke eng o ikutlwa gore maiteko a gago a botlhokwa mo go Ene?

Ponatshegelo ena ya kgalalelo ya selesetiale e ama tsela e o batlang go tshela botshelo jwa gago jwa letsatsi le letsatsi jang?

Bona gape Moshe 1:39; J. Devn Cornish, “Am I Good Enough? Will I Make It?,” Liahona, Ngwanatsele. 2016, 32–34.

Ka megopolo thata, bona dikgatiso tsa kgwedi ena tsa Liahona le Ya Nonofo ya Banana dimakasine.

Megopolo ya go Ruta Bana

Dithuto le Dikgolagano 76:24

Rotlhe re bana ba Modimo.

• Go thusa bana ba gago go tlhaloganya bokgoni jwa bone jwa selegodimo, o ka ba supetsa setshwantsho sa bana le batsadi ba bone. O bo o ka bala Dithuto le Dikgologano 76:24 mme le abelelane gore ke eng lo itumeletse go itse gore rotlhe re “barwa le barwadie Modimo.”

• Le gone le ka opela mmogo “I Am a Child of God” (Children’s Songbook, 2–3) mme o laletse bana ba gago gore ba itshupe fa ba opela “Ke.” Ke gone opelang pina gape, le emisetsa “Ke nna” ka “o” fa o ntse o supa yo mongwe.

Dithuto le Dikgolagano 76:5, 41–42, 69

Jeso Keresete ke Mmoloki wa me.

• Akanya ka go tshameka le bana ba gago seemo se mo go sone mongwe a botsang, “Jeso Keresete o ntiretse eng?” Wena le bana ba gago le ka leba dikarabo tse di kgonegang mo ditemaneng 5, 41–42, kgotsa 69 mo tsetlana 76. Gape o ka opela “He Sent His Son,” Children’s Songbook, 34–35. Re ka supa tebogo ya rona jang ka se Mmoloki a re diretseng sone?

Ntlha mo Suffer the Children, ka J. Kirk Richards

Dithuto le Dikgolagano 76:62

Rara wa Legodimo o batla gore ke boele go ya go tshela le Ene ka bosenang bokhutlo.

• Wena le bana ba gago le ka bala kgotsa la lebelela karolo kgotsa kgaolo yotlhe ya “Kgaolo 26: Magosi a Mararo a Legodimo” (mo go Dipolelo tsa Dithuto le Dikgolagano, 97–103, kgotsa ditshwantsho tsa motshikinyego tse di tsamaelanang le tsone mo Motlobong wa Efangele) mme abelelana se le se ratang ka ponatshegelo e Joseph Smith a nnileng le yone. A bana ba gago ba abelane dikakanyo tsa bone le maikutlo ka gore go tla nna jang go tshela le Rara wa Legodimo mo bogosing jwa selestiale.

  Chapter 26: The Three Kingdoms of Heaven: 16•February 1832

• Gape o ka bala Dithuto le Dikgolagano 76:62 mme o laletse bana ba gago go tshwantsha ditshwantsho tsa bone ba na le Rara wa Legodimo le Jeso Keresete mo bogosing jwa selestiale (bona ya beke e tsebe ya tiragatso).

Dithuto le Dikgolagano 76:12. 15–19, 114–16

Go ithutuntsha dikwalo tse di boitshepo go ka nthusa go tlhaloganya dilo tsa Modimo.

• O ka laletsa bana ba gago go bala ditemana 15–19 go bona se Joseph Smith le Sidney Rigdon ba neng ba se dira fa ba bona ponatshegelo mo go Dithuto le Dikgolagano 76. Bolelela bana ba gago ka nako ya fa o ne o amogela tlhotlholetso fa o bala dikwalo tse di boitshepo, mme o botse bana ba gago fa ba kile ba nna le maitemogelo a a tshwanang.

Ka megopolo thata, bona kgatiso ya kgwedi e ya Friend makasine.

Glory in Degrees, ka Annie Henrie Nader