Mingongo ya Bozongisi: Matatoli ya “Limoni”

Wilford Woodruff

Wilford Woodruff akotaki na Eklezia na Sanza ya zomi na mibale 1833, pene ya mibu mibale nsima ya Joseph Smith mpe Sidney Rigdon kozwa limoni oyo ekomami na Malongi mpe Mayokani 76. Azalaki kofanda na New York na ntango wana mpe ayekolaki oyo etali “Limoni” uta na bamisionele oyo bazalaki kosalela Nzambe na etuka yango. Nsima ya mibu, alobaki oyo etali makanisi na ye ya limonisi oyo:

“Nateyamaki uta bomwana na ngai ete ezalaki na Lola moko mpe Lifelo moko, mpe nateyamaki ete bato ya mabe nyonso bazalaki na etumbu se moko mpe boyengebene na nkembo moko. …

“… Ntango natangaki limoni yango … , efungolaki makanisi na ngai mpe epesaki ngai esengo monene, emonisamaki epayi na ngai ete Nzambe oyo amonisaki libongisi wana epayi ya moto azalaki bwanya, moyengebene mpe solo, azalaki na bizaleli malamu mpenza mpe eyokeli malamu mpe boyebi, nayokaki Azali na sikisiki na nyonso mibale bolingo, mawa, boyengebene mpe makanisi, mpe namiyokaki kolinga Nkolo koleka kutu liboso na bomoi na ngai.”

“Limoni’ [ezali] emoniseli oyo epesaka pole mingi koleka, bosolo mingi koleka mpe libongisi mingi koleka emoniseli kani oyo ezalaki kati na buku nyonso oyo totanga naino te. Elakisaka polele na bososoli na biso lolenge na biso ya lelo, esika biso towutaki, mpo na nini tozali awa, mpe esika nini tozali kokende. Moto nyonso akoki koyeba na nzela ya emoniseli oyo eteni mpe lolenge na ye ekozala nini.”

“Yambo namona Joseph nalobaki ete namitungisaki te azalaki na mibu boni, to lolenge nini azalaki elenge; namitungisaki te azalaki ndenge nini—soki suki na ye ezalaki milai to mikuse; moto oyo abandaki emoniseli [limoni ekomami na eteni 76] azalaki profeta ya Nzambe. Nayebaki yango mpo na ngai moko.”

Phebe Crosby Peck

Ntango Phebe Peck ayokaki liteya ya Joseph mpe Sidney ya “Limoni,” azalaki kofanda na Missouri mpe azalaki kobokola bana mitano lokola mama monzemba. Limoni ekamwisaki mpenza mpe efulaki ye ete akomaki oyo elandi mpo na kokabola maye ayekolaka na libota na ye mobimba:

“Nkolo azali komonisa mibombamo ya Bokonzi ya lola epayi ya Bana na ye. … Joseph Smith mpe Sidney Rigdon basengaki biso tokende kotala na eleko ya milona oyo eleki, mpe tosalaki mayangani mingi ya esengo ntango bazalaki awa, mpe mibombamo mingi efungwamaki na miso na biso, oyo epesaki ngai libondi monene. Tokoki komona bonkonde ya Nzambe na bolengeli bandako ya kimia mpo na bana na Ye. Mpe oyo nyonso akozwa litondi ya nsango malamu te mpe kotelema lokola mapinga ya bilombe mpo na ntina Klisto te akoki te kofanda liboso ya Tata mpe Mwana. Kasi ezali na esika elengelamaki mpo na banso oyo bazwi te, kasi ezali esika ya nkembo moke koleka kofanda na Bokonzi ya Selesitiale. Nakotika te komeka koloba mingi oyo etali makambo oyo etiami sikawa na nkasa mpe ekokende na mokili mobimba. Mpe ntango mosusu okozala na libaku ya kotanga mpo na yo moko, mpe soki osali yango, nalikii okotanga na motema moko ya bokebi mpe ya losambo, mpo ete makambo oyo ebongi kolobelama. Mpe nazali na mposa ete okoka koluka kati na yango, mpo ete ezali yango nde epesaka bosepeli na biso na mokili oyo mpe na mokili oyo ezali koya.”

Matangi

1. “Makebisi,” Deseret News,, Sanza ya mitano 27, 1857, 91.

2. Deseret News, Sanza ya misato 3, 1881, 481; tala lisusu Teachings of Presidents of the Church: Wilford Woodruff [Mateya ya Bakambi ya Eklezia : Wilford Woodruff] (2004), 120–21.

3. “Makebisi,” Deseret Weekly,, Sanza ya libwa 5, 1891, 322.

4. Mokanda ya Phebe Crosby Peck epayi ya Anna Jones Pratt, Sanza ya mwambe 10, 1832, Ebombelo ya Mambi ya Kala ya Eklezia, Salt Lake City; ndimbola mpe botangi ebongisama na ekomeli ya sika.