Kozonga Ndako, na Yongsung Kim

Sanza ya Nsambo 14–20: “Nakokamba Bino na Nzela Bokokende”

Malongi mpe Mayokani 77–80

Mibu mibale elekaki te nsima ya kozongisama ya Eklezia ya Yesu Klisto, ekomaki na bandimi koleka 2000 mpe ezalaki kopanzana mbangu. Na sanza ya misato 1832 Joseph Smith akutanaki na bakambi basusu ya Eklezia “mpo na kosolola oyo etali misala ya Eklezia”: bosenga ya kobimisa bimoniseli kati na buku, ya kosomba mabele mpo na kosangana kuna, mpe ya kobatela babola (tala Malongi mpe Mayokani 78, moto ya mokapo). Mpo na kokokisa bosenga oyo, Nkolo abiangaki mwa motango ya bakambi ya Eklezia basala Kompani ya Bomoko, lisanga oyo esengelaki kosangisa makasi na bango mpo na “komema liboso ntina” ya Nkolo (molongo 4) na kati na bituka oyo. Kasi ata na makambo lokola boye matali misala ya bilo, Nkolo abetaki nsete na makambo ya boseko. Na nsuka, ntina ya kotiya makomi na nkasa to ya kotonga ebombelo—lokola eloko nyonso mosusu na bokonzi ya Nzambe—ezali mpo na kolengela bana na Ye bazwa “esika na mokili ya selesitiale” mpe “bomengo ya seko” (milongo 7, 18). Mpe soki mapamboli wana ezali mpasi mpo na kososola sikawa mpenza, katikati na misala ya bomoi na biso mikolo na mikolo, Ye, apesi biso elikya, “Boyika mpiko, mpo nakokamba nzela bokokende” (molongo 18).

Makanisi mpo na koteya na Ndako mpe na Eklezia

Malongi mpe Mayokani 77

Nzambe apesaka mayele na bato oyo balukaka yango.

Ntango Joseph Smith mpe Sidney Rigdon basalaki na bobongoli efulama ya Biblia, bazalaki na mituna etali buku ya Emoniseli, lokola bato ebele bazalaka na yango. Mpe lokola Joseph ayebaki yango malamu, ntango azangaki bwanya, akokaki kosenga epayi ya Nzambe. Babomoni oyo azwaki ezali kati na Malongi mpe Mayokani 77. Ntango ozali kotanga eteni oyo, banza kokomaka babomoni na yo na mikapo ya buku ya Emoniseli. Oyekoli nini uta na boyekoli na yo moko oyo etali emoniseli?

Bobongoli ya Biblia, na Liz Lemon Swindle

Malongi mpe Mayokani 78

Lingomba ya Bomoko ezalaki nini?

Lingomba ya Bomoko etiamaki mpo na koyangela makambo ya bobimisi mpe misala ya Eklezia na Ohio mpe Missouri. Esangisaki Joseph Smith, Newel K. Whitney, mpe bakambi misusu ya Eklezia oyo basangisaki makoki na bango mpo na kokokisa bamposa ya ntango ya Eklezia oyo ezalaki kokola. Libaku mabe, Kompani ya Bomoko ekotaki nyongo mpe epanzanaki na 1834 ntango banyongo ekomaki mpasi mpo na kofuta.

Tala lisusu “Newel K. Whitney and the United Firm [Newel K. Whitney mpe Kompani ya Bomoko],” kati na Revelations in Context, 142–47; Church History Topics, “United Firm (‘United Order’) [Kopani ya Bomoko (‘Molongo Moko’),” Gospel Library.

Malongi mpe Mayokani 78:1–7

Nakoki kosalisa “komema ntina” ya Klisto mpe Eklezia na Ye liboso.

Nkolo ayebisaki Joseph Smith mpe bakambi basusu ya Eklezia ete koyangelaka ndako ya ebombelo mpe masini ya kotia nkoma na nkasa ya kobimisa buku ekosalisa “kotambwisa ntina, oyo bondimaki” (Malongi mpe Mayokani 78:4 Mpo na yo “ntina” ya Eklezia ya Mobikisi ezali nini? Manyola oyo ntango ozali kotanga Malongi mpe Mayokani 78:1–7 Ndenge nini okoki kosalisa kosala mpo na komema liboso ntina oyo—kobakisaka na libota na yo?

Tala lisusu Buku Monene, 1.2.

Malongi mpe Mayokani 78:17–18

Nkolo akokamba ngai na nzela nakokende.

Mpo na nini okanisi Nkolo mbala mosusu abengaka bayekoli na Ye “bana mike”? (Malongi mpe Mayokani 78:17). Ntango omiyokaki lokola mwana moke, ntango mosusu mpo na eloko songolo oyo “naino ososola te” to oyo “okoki komema te”? (milongo 17–18). Nini ozwi kati na milongo oyo ekoki kosalisa yo “ozala na bosepeli malamu” (molongo 18) na bantango ya boye? Banza kozwa elilingi na yo moko ntango ozalaki mwana moke, mpe manyola lolenge nini okoli na molimo kino sikawa? To banza na ntina ya eloko moko oyo ezalaki mpasi mpo na yo ntango ozalaki elenge kasi ekoma pete sikawa. Na ndenge nini Tata na Lola akobi kolinga yo ozala lokola mwana moke? (tala Mosiya 3:19). Lolenge nini Ye azali “[kokamba] yo na nzela”?

Malongi mpe Mayokani 78:19

Nakoki kozwa biloko nyonso na botondi.

Komilengela mpo na koyekola Malongi mpe Mayokani 78:19, okoki kokoma makambo ya malamu oyo ekomelaki yo lelo. Nsima koma makambo oyo emonisami mpenza te lokola mapamboli mpo na yo. Manyola makambo oyo okomi ntango ozali kotanga Malongi mpe Mayokani 78:19. Bokeseni nini yango esali kati na bomoi na yo soki ozwi “biloko nyonso” na botondi—atako biloko oyo emonisami te kozala lokola mapamboli?

Mpo na koyekola mingi koleka oyo etali lolenge nini botondi epayi ya Nzambe ekoki kopesa nguya na bomoi na yo, tala makomi oyo mpe koma babosolo ozwi: Nzembo 107:8–9; Luka 17:11–19; Bafilipi 4:6–7; Mosiya 2:19–24; Alma 34:38; 37:37; Malongi mpe Mayokani 46:32; 59:7, 15–21.

Banza kolukaka nsango ya Mokambi Dieter F. Uchtdorf “Grateful in Any Circumstances [Botondi na Mabaku Nyonso]” (Liahona, Sanza ya mitano 2014, 70–77) mpo na toli etali lolenge nini ya kozala na botondi. Okoki koluka toli mosusu kati na video “Mokambi Russell M. Nelson na the Healing Power of Gratitude” (video). Lolenge nini botondi emonisamaka na bozalani na yo na Yesu Klisto?

President Russell M. Nelson on the Healing Power of Gratitude​

Luka mpe kabola. Soki opesami mokumba ya koteya, luka ndenge ya kosalisa bato baluka makomi to maloba ya baprofeta—na bango moko to na mangomba mike—mpe kabola maye bayekoli. Ndakisa, na molulu oyo okoki kopesa moto moko na moko to liboke ya eteni ya nsango ya Mokambi Uchtdorf mpe tuna bango bakabola liloba to maloba ekomami oyo bayoki elimboli na bokuse maye ateyaki.

Tala lisusu “Count Your Blessings [Tanga Mapamboli na Yo],” Hymns, no. 241; Topics and Questions, “Gratitude ontondi],” Gospel Library.

Malongi mpe Mayokani 79–80

Libiangi ya kosalela Nzambe ezali motuya koleka esika nazali kosalela.

Na kotalaka Malongi mpe Mayokani 80, Mpaka David A. Bednar ateyaki, “Ntango mosusu moko ya mateya oyo Mobikisi ateyaka biso na kati na emoniseli oyo ezali ete mokumba ya kosala na esika songolo ezali ntina mpe motuya kasi ezali na esika ya mibale to nsima na libiangi ya kokende kosala mosala” (“Called to the Work [Obiangami na Mosala],” Liahona, Sanza ya Mitano 2017, 68). Mayele nini ya mosala esalisi yo koyekola ete maloba ya Mpaka Bednar ezali solo? Mateya nini mosusu okoki kozwa kati na Malongi mpe Mayokani 79–80 oyo ekoki kosalisa moto moko oyo awuti kozwa libiangi ya sika?

Mpo na makanisi mingi koleka, tala nsango ya sanza oyo na bamagazini ya Liahona mpe Mpo na Bokasi ya Bilenge .

Makanisi mpo na Koteya Bana

Malongi mpe Mayokani 77:2

Nzambe akelaki bikelamu nyonso na mabele.

• Ntango bino mpe bana na bino bozali kotanga Malongi mpe Mayokani 77:2 elongo, bokoki kotala elongo bililingi ya banyama, lisusu banyama ya mikemike mpe bandeke. Bana na bino bakoki kolakisa bililingi ntango bazali kotanga maloba “banyama,” “biloko oyo engulumaka,” mpe “bandeke ya likolo.” Bokabola moko na mosusu lolenge nini bikelamu ya Nzambe esalisaka bino boyoka bolingo na Ye.

Nzambe akelaki bikelamu nyonso na mabele.

Malongi mpe Mayokanis 78:4

Nakoki kosalisa “komema ntina” ya Yesu Klisto liboso.

• Mpo na kosalisa bana na bino bakanisa oyo etali mikumba na bango ya mosala ya Nkolo, bobanza kotangaka elongo na bango Malongi mpe Mayokani 78:4 mpo na komona “ntina” biso “tobalaki” (tondimaki to toponaki kosunga) ntango tobatisamaki. Bosalisa bango baluka kati na milongo lokola oyo mpo na biyano malamu: Mosiya 18:8–10; Malongi mpe Mayokani 20:37; Mose 1:39. Bana na binoo bakoki kosepela kosala lisano ya lolenge nini bakoki kosalisa na mosala ya Nkolo. Ndakisa, yango ekokokana na nini na “komema mikumba ya moko na moko” to “komema likolo na [biso moko] nkombo ya Yesu Klisto”? Lolenge nini yango “komema ntina” ya Klisto liboso?

Malongi mpe Mayokani 78:6

Nakoki kokabola oyo nazali na yango elongo na basusu.

• Mpo na koteya bana na bino oyo elakisi kozala “ya kokokana na biloko ya mabele” (molongo 6), bokoki kopesa bana na bino bililingi ya bato oyo bazali na bosenga (nzala, makama, to malili) mpe biloko oyo esalisaka (lokola bilei, bandaje, to bulangeti). Nsima bana na bino bakoki kokokanisa bililingi na biloko. Nini tokoki kokabola mpo na kosalisa bato oyo bazali na bosenga?

• Mpo na kozwa ndimbola mosusu mpo na eteni 78, botanga elongo na bana na bino maloba ekomami na nse ya bililingi mibale ya “Mokapo 28: Profeta Joseph Akei na Missouri Lisusu” (kati na Masolo ya Malongi mpe Mayokani, 108, to video oyo ekokani kati na Gospel Library). Nsima bana na bino bakoki kolakisa bazali kosalisa moto moko atonga ndako, kokabolaka bilei, to kosalisaka na lolenge mosusu.

  Chapter 28: The Prophet Joseph Goes to Missouri Again: March–May 1832

Malongi mpe Mayokani 78:18

Yesu Klisto akokamba ngai na nzela nakokende.

• Ekoki kozala esengo mpo ete bana na bino basolola oyo etali maye elimboli kozala mokambi mpe nsima kokamba molulu. Nsima ya kotanga elongo Malongi mpe Mayokani 78:18, bokoki kosolola bangonga ntango tozalaka na mposa Yesu akamba biso. Bobanza koyemba loyembo lokola “I Will Walk with Jesus [Nakotambola Elongo na Yesu]” (Gospel Library).

Malongi mpe Mayokani 78:19

Nakoki kozwa “biloko nyonso na botondi.”

• Botanga elongo na bana na bino Malongi mpe Mayokani 78:19 mpo na komona maye Nkolo alaki bato oyo bazali na botondi. Bosalisa bana na bino basosola “mbala nkama” elingi koloba nini, ntango mosusu na kolakisaka bango eloko moko ya moke nsima kolakisa biloko yango nkama. Ntango mosusu bakoki koyema bililingi ya biloko bazwaki uta na Nzambe “na botondi.”

Mpo na makanisi mingi koleka, tala nsango ya sanza oyo na magazini ya Moninga .

Elanga ya Nzambe, na Sam Lawlor