Na Nodra Koronivuli na Parofita a vakayacori ena rumu oqo.

11–17 ni Okosita: “Dou Tauyavutaka … me Vale ni Kalou”

Vunau kei na Veiyalayalati 88

Sa dau vakawasoma, e solia vei keda na Turaga e dua na kena irairai lailai sara ni Nona “lagilagi kei na kaukauwa” tawa yalani (Vunau kei na veiyalayalati 88:47) mai na ivakatakila veivakurabuitaki eso. Vunau kei na Veiyalayalati 88. sa ikoya e dua na ivakatakila vaka oya—e dua me baleta na rarama kei na lagilagi kei na veimatanitu ka rawa ni vakatawayagataka na noda ogaoga vakavuravura ni vakatauvatani kaya. Kevaka mada ga eda sega ni kila taucoko, e rawa ga ni da vakila ni ra levu cake sara na veika tawamudu mai na kena eda qai bau kila vakadua. E dina sara, ni sega ni dau wasea na Turaga na veika dina cecere oqo me vakarerei keda se me da yalolailai kina. Na ka dina, a yalataka o Koya, “Ena yaco na siga dou na kila kina na Kalou” (tikina e 49; vakabibitaki). De rairai ki na inaki cecere oya a vakaroti ira kina na Nona Yalododonu e Kirtland na Turaga me ra tauyavutaka na Koronivuli ni Parofita. “Dou cokonaki kemudou,” a kaya o Koya. “Dou vakarautaka na veika sa yaga vei kemudou; dou tauyavutaka … [na] vale ni Kalou” (tikina e 119). Sa ikoya ena loma ni vale tabu ni Kalou—kei na noda itikotiko—sa rawata kina o Koya, vakalevu cake mai na dua na vanua tani tale, me laveta na noda rai ka sivita yani na vuravura vakayago, “cereka na ilati ni matana vei [keda],” ka vakarautaki keda me da “tiko rawa ena lagilagi vakasilesitieli” (tikina e 68, 22).

Raica na Yalododonu,, 1:164–66.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 88

Sa solia tu vei keda o Jisu Karisito na vakacegu.

Ena vica ga na siga ni oti na ivakasala “ni na yaco na veivaluvaluti ena veimatanitu kecega” (Vunau kei na Veiyalayalati 87:2), a solia na Turaga e dua na ivakatakila ka vakatoka o Josefa Simici me “drau ni olive,” ka sa ivakatakarakara tudei tu ni veivakacegui (Vunau kei na Veiyalayalati88, ulutaga ni iwase; raica talega Nai Vakatekivu 8:11). Ena nomu vulica taucoko na wase 88 ena macawa oqo, vakaraica na itukutuku ni veivakacegui ni Turaga vei iko.

Vunau kei na Veiyalayalati 88:6–67

Na rarama kei na lawa e lako mai vei Jisu Karisito.

Na vosa na rarama kei na lawa e rau tokaruataki vakavica ena wase 88. Makataka se vola na tikina eso o kunea kina na veivosa oqo ena tikina e 6–67, ka vola na veika o vulica me baleta na rarama kei na lawa—kei Jisu Karisito. Na cava o vakauqeti kina mo cakava mo ciqoma na rarama ka bulataka na “lawa i Karisito”? (tikina e 21).

Raica talega na Aisea 60:19; Joni 1:1–9; 3 Nifai 15:9; Timothy J. Dyches, “Light Cleaveth unto Light,” Liaona, Me 2021, 112–15; Sharon Eubank, “Karisito: Na Rarama sa Cilava na Butobuto,” Liaona, Me 2019, 73–76.

Na ivolanikalou sa tu kina na lawa i Karisito.

Vunau kei na Veiyalayalati 88:62–64

“Dou toro voleka mai vei au.”

Na veika sotavi cava soti sa vakaraitaka vei iko ni dina na yalayala ena veitikina oqo? Na cava na nomu ikalawa ka tarava mo “toro voleka yani vei” Karisito? Navuca mo cakava na serenilotu “Au Toro Yani Tu” (Sere ni Lotu, naba 53) me tiki ni nomu vuli kei na sokalou.

Vunau kei na Veiyalayalati 88:67–76

Au rawa ni vakasavasavataki ena vuku ni Veisorovaki i Jisu Karisito.

E basika vakarua na ivakaro ni Turaga me da “vakatabui ke[da]” ena wase 88 (tikina e 68, 74). Na cava beka o nanuma e kena ibalebale oqo? Sa rawa mo railesuva eso na malanivosa ena ruku ni “Sanctification se Vakatabui” ena iDusidusi ki na iVolanikalou (Valenivola Vakosipeli). Eda na vakatabui beka vakacava? Biuta me dusimaka na taro oqo na nomu vulica na Vunau kei na Veiyalayalati 88:67–76, ka vola na raititobu vakayalo eso o rawata.

Vunau kei na Veiyalayalati 88:77–80, 118–26

“Dou vakasaqara na kila ka, io ena vuli kei na vakabauta.”

A tukuna na Turaga vei ira na Yalododonu me ra tauyavutaka e dua na “nodra koronivuli na parofita” e Kirtland (Vunau kei na Veiyalayalati 88:137). E vuqa na idusidusi ena wase 88 a vakavulica vei ira na sala me ra cakava kina. Na idusidusi oqo e rawa talega ni vukei iko mo “tauyavutaka … [e dua na] vale ni vuli” (tikina e 119) ena nomu bula vakai iko. Na ka dina, e rawa ni o raica na tikina e 77–80 kei na 118–26 me ituvatuva matata mo “vakatura vou nomu itikotiko [se nomu bula] me vale ni vuli kosipeli” ka “vanua tabu ni vakabauta” (Russell M. Nelson, “Meda iVakaraitaki Uasivi ni Yalododonu Edaidai,” Liaona, Nove. 2018, 113). E rawa ni ka taleitaki me droinitaki na kemu irairai ni “vakatura vou” vakai iko, oka kina na malanivosa eso mai na veitikina oqo o nanuma ni gadrevi mo vakayagataka.

Ena veivuke talega me vakadikevi na veitaro oqo: Na cava na vuna e bibi kina vua na Turaga na vuli‑ka kei na vuli? Na cava e vinakata o Koya vei au me’u vulica? Na sala cava e vinakata o Koya vei au me’u vuli kina? Vakaraica na isau ni veitaro oqo ena veitikina e 77–80 vakakina ena “Ena sereki iko na dina” (Me iSakisaki ni iTabagone: E Dua na iDusidusi ni Digidigi, 30–33).

Na cava beka na kena ibalebale mo vulica “ena vuli kei na vakabauta”? (tikina e 118). Na veivakararamataki cava o rawata mai na itukutuku nei Elder Mathias Held “Vakasaqarai ni Kila-ka ena Yalotabu”? (Liaona, Me 2019, 31–33).

Raica talega na Topics and Questions, “Seeking Truth and Avoiding Deception,” Gospel Library; “A School and an Endowment,” ena Revelations in Context, 174–82.

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 88:33

Sa dau solia mai na Tamada Vakalomalagi na isolisoli vinaka.

• Ena rawa mo tekivuna e dua na veivosaki me baleta na Vunau kei na Veiyalayalati 88:33 ena nomu tarogi ira na luvemu me ra tukuna me baleta na isolisoli ka sa soli vei ira—na kena ruarua era a ciqoma ena marau, kei na kena tale eso a sega ni vakakina. E rawa beka ni ra matanataka na nodra ciqoma e dua na isolisoli ena reki. Oti mo qai veivosakitaka na isolisoli e solia vei keda na Tamada Vakalomalagi (me vaka na isolisoli ni Yalo Tabu). Eda na ciqoma beka vakacava na isolisoli eso oqo ena reki?

Vunau kei na Veiyalayalati 88:63

Kevaka au vakasaqara na iVakabula, au na kunei Koya.

• Na Vunau kei na Veiyalayalati 88:63 e tiko kina na vosa ni cakacaka e rawa ni vakauqeta eso na itaviqaravi lasa me vakauqeti ira na luvemu me ra vakasaqara na iserau ni Turaga ena nodra bula. Me vaka beka oqo, e rawa beka ni o vakasamataka kei ira na luvemu e dua na qito me veivosakitaki kina na malanivosa “dou vakasaqarai au vagumatua dou na qai kunei au” (vakamatatataki) se “tukituki, ka na dolavi”?

Era gadreva na gone na veimataqali ka duidui “E levu na gone e vinaka duadua nodra vuli ni vakayagataki e vica na wakilakila. Vakasaqara na sala me ra vukei kina na gone me ra vakayagataka nodra wakilakila ni rai, rorogo, kei na tara se vakila ni ra vuli. Ena so na gauna, ena rawa sara ni o kunea na sala me vakayagataki kina nodra wakilakila ni vaboboi kei na ikanakana!” (Veivakavulici ena iVakarau ni iVakabula, 32).

• Me vakamatatataki na veisureti ni iVakabula me da “toro voleka mai vei au,” sa rawa mo kerea e dua na gone me taura tu e dua na iyaloyalo kei Jisu (me vaka na iyaloyalo ena mua ni ituvatuva oqo) ena dua na yasa ni rumu ni ra tucake tu na vo ni gone ena yasana kadua. Ni ra vakasamataka na luvemu na veika e rawa ni ra cakava me ra toro voleka kina vua na iVakabula, e rawa ni ra taura e dua na ikalawa yani ki na iyaloyalo, ka rawa vua na gone e taura tu na iyaloyalo me kalawa yani vei ira na vo ni gone. Veitalanoataka vata kei ira na sala o toro voleka kina vua na iVakabula kei na sala e toro voleka mai kina vei iko o Koya. E rawa talega ni o lagata vata kei ira e dua na sere me baleta na ulutaga oqo, me vaka na “Au Vakilai Koya” (iVolanisere ni Gonelalai, 42).

Vunau kei na Veiyalayalati 88:77–80, 118

E vinakata na Tamada Vakalomalagi me’u vuli.

• Kerei ira na luvemu me ra tukuna vei iko na veika era sa vulica tiko e koronivuli se ena Lalai. O na rawa talega ni wasea eso na ka o sa vulica tiko. Sa rawa ni o qai vakaraitaka vei ira na luvemu na vosa na cava, na vuna, kei na sala cava. Vukei ira me ra vakasaqaqara ena Vunau kei na Veiyalayalati 88:77–79 me ra kunea kina na veika e vinakata na Turaga me da vulica. Qai vakaraica vata ena tikina e 80 mo kunea kina na vuna e vinakata kina o Koya me da vuli kei na tikina e 118 mo kunea kina na sala me da vuli kina.

“Dou vakasaqara na kila ka … ena vuli kei na vakabauta.”

Vunau kei na Veiyalayalati 88:119

Na noda itikotiko e rawa ni vanua tabu me vaka na valetabu.

• Ni o wilika na Vunau kei na Veiyalayalati 88:119 vei ira na luvemu, e rawa ni ra cakava e dua na dudukilagi ni valetabu ena ligadra ena veigauna era rogoca kina na vosa “vale.” Vakamacalataka ni a vinakata na Tamada Vakalomalagi me tara o Josefa Simici kei ira na Yalododonu e dua na valetabu, se na “vale ni Kalou.”

• Sa rawa mo kerei ira na luvemu me ra digitaka e vitu na vosa e vakamacalataka na nodra itikotiko. Qai vukei ira me ra vakaraica ena Vunau kei na Veiyalayalati 88:119, na vosa e vitu e vakayagataka na Turaga me vakamacalataka kina na Nona vale. Eda na cakava vakacava me dua na “vale ni Kalou” na noda itikotiko?

Me baleta na vakasama tale eso, raica na ilavelave ni mekasini na iTokani ni vula oqo.

Mo Kakua ni Rere, mai vei Michael Malm