Matailalai mai na Au Raica na Luve ni Tamata, mai vei Walter Rane

25–31 ni Okosita: “Rawata na Nona Veivakataucokotaki”

Vunau kei na Veiyalayalati 93

“Ni o kabata e dua na ikabakaba,” a vakavulica o Josefa Simici, “o na tekivu mai ra, ka qai kabata me yadudua na ikabakaba ena dua na gauna, me yacova ni ko sa yaco ki cake; sa vakakina ena ivakavuvuli ni kosipeli—mo na tekivu ena kena imatai, ka qai lako tiko me yacova ni ko sa vulica kece na ivakavuvuli ni bula vakacerecerei” (Nodra iVakavuvuli na Peresitedi ni Lotu: Josefa Simici [2007], 268).

Ena so na gauna e vaka me dredre sara na ikabakaba ni bula vakacerecerei oya, ia eda a sucu mai me da kaba ki cake ena veivuke tudei ni iVakabula. Se cava ga na iyalayala eso eda raici keda kina, na Tamada Vakalomalagi kei na Luvena sa raica tu e dua na ka lagilagi ni tiko vei keda, e dua na ka vakalou. Me vaka ga ni o Jisu Karisito “a tiko vata kei [na Tamana] mai na ivakatekivu,” sa vakakina ni “dou a bula vata talega” (Vunau kei na Veiyalayalati 93:21, 23). Me vaka ga ni o Koya a “tubucake tikoga mai na iloloma soli wale ki na iloloma soli wale, me yacova ni sa rawata ena kena taucoko,” sa vakatalega kina ni o “na rawata kina mai na iloloma soli wale ki na iloloma soli wale” (tikina e 13, 20). Na kosipeli vakalesui mai e vakavulica me baleta na ituvaki dina ni Kalou, ka vakavulica talega me baleta na kemu ituvaki dina kei na nomu icavacava. O iko e dua dina na luve ni Kalou ka o rawa ni “rawata na nona veivakataucokotaki ena kena gauna” (tikina e 19).

Vakasama eso ni Vuli ena iTikotiko vakakina ena Lotu

Vunau kei na Veiyalayalati 93

Me vakataki Jisu Karisito, au rawa ni vakalagilagi ka ciqoma na “veivakataucokotaki” ni Kalou.

A vakavulica na Parofita o Josefa Simici, “Kevaka eda sega ni kila rawa na itovo ni Kalou, eda na sega talega ni kilai keda” (iVakavuvuli: Josefa Simici,, 40). Ni o vulica me baleta na iVakabula ena Vunau kei na Veiyalayalati 93, vakaraica na veika talega o vulica me baleti iko. Me vakataka, na cava o sa vulica me baleti Koya mai na tikina e 3, 12–13, 21, kei na 26? Na dina cava o kunea me baleti iko ena tikina e 20, 23, kei na 28–29? (raica talega na 1 Joni 3:2; 3 Nifai 27:27). Na taro eso oqo ena rawa ni vukei iko mo kila vinaka ka bulataka na dina eso ena iwase oqo:

• Na cava o vakila ni kena ibalebale mo ciqoma na “iloloma soli wale ena iloloma soli wale” ka tomana “mai na iloloma soli wale ki na iloloma soli wale”? (tikina e 12–13). Kevaka ena veivuke, sa rawa mo wilika na “Loloma Soli Wale” ena iDusidusi ki na iVolanikalou (Valenivola Vakosipeli).

• Na cava o kunea ena ivakatakila oqo me baleta na sala e vukei iko kina na Kalou mo tubu ka vuli? E veisautaka vakacava na sala o qaravi ira kina na tani—kei iko vakai iko na kilai ni ka oqo?

• Na cava o vulica me baleta na “ivakarau mo … qaravi koya kina, ka kilai koya [ko] sa qarava”? (tikina e 19; raica talega na iDusidusi ki na iVolanikalou, “Sokalou, Qarava,” Valenivola Vakosipeli).

Vunau kei na Veiyalayalati 93:1–39

Na lagilagi ni Kalou sa ikoya na rarama kei na dina.

O na raica beka ni veivosa me vaka na lagilagi, rarama, kei na dina e basika vakawasoma ena ivakatakila oqo. Ni o vulica vakatabakidua na tikina e 20–39 vola na dina eso o sa vulica me baleta na vei vakasama oqo. Na caka ni dua na teveli vakaoqo ena rawa ni veivuke:

Tikina	Na cava au a vulica	Taro me vakasamataki vakatitobu
Tikina 24	Na cava au a vulica	Taro me vakasamataki vakatitobu E vuqa tu na ka veivakaisini e vuravura. Au na kila vakacava na dina? (raica talega na Jekope 4:13).
Tikina 28	Na cava au a vulica	Taro me vakasamataki vakatitobu
Tikina 36	Na cava au a vulica Na Kalou e sa vu ni rarama kei na dina.	Taro me vakasamataki vakatitobu
Tikina 37	Na cava au a vulica	Taro me vakasamataki vakatitobu O cei au kila ni vaka me rawa ni vorata na veivakayarayarataki ca eso? Na cava era rawa ni cakava kina oqori?
Tikina	Na cava au a vulica	Taro me vakasamataki vakatitobu
Tikina	Na cava au a vulica	Taro me vakasamataki vakatitobu
Tikina Raica talega na: Vunau kei na Veiyalayalati 50:24	Na cava au a vulica	Taro me vakasamataki vakatitobu

Na cava o raica ena veitikina oqo e vakauqeti iko mo vakasaqara na rarama kei na dina cecere cake? Na cava e rau yaca vakatokai vinaka kina na rarama kei na dina me baleti Jisu Karisito? (raica na Joni 8:12; 14:6). E sa veisautaka vakacava na nomu bula na veika dina oqo?

Sa rawa talega mo vola na yalayala eso me baleta na nomu icavacava tawamudu ena tikina e 20, 22, 28, 33–35. Na cava na kedrau isema na yalayala oqo kei na kena rawati na rarama?

Navuca mo vakasaqara na “Lako tiko ena rarama ni Kalou” (Me iSakisaki ni iTabagone: iDusidusi ni Vakayaco Digidigi, 18–21) mo raica na veika o rawa ni cakava mo rawata kina na rarama kei na sala e yalataka kina na Turaga me vakalougatataki iko. Na vidio “Light and Truth, Part 1” kei na “Part 2” (Gospel Library) e rawa ni vakarautaka na ikuri ni vakasama eso.

Raica talega na “Tuberi Au E Nona Loloma,” Sere ni Lotu, naba 183; Topics and Questions, “Holy Ghost,” Gospel Library.

Light and Truth, Part 1

(D&C 88:6-13) This video examines God's attributes of light and truth as explained in section 88 of the Doctrine and Covenants.

Light and Truth, Part 2

(D&C 93:28,36-40) This video examines God's attributes of light and truth as explained in section 88 of the Doctrine and Covenants.

“Sa lagilagi ni Kalou … na rarama kei na dina.”

Vunau kei na Veiyalayalati 93:40–50

“Vakavulici ira vinaka na lewe ni nomu matavuvale.”

Na ivakaro mo “vakavulici ira vinaka na lewe ni nomu matavuvale” (tikina e 43) e sega ni baleta na tuvai ni kovate, kei na loqi ia e baleta na veivakatavulici—kei na vulici ni—“rarama kei na dina” (tikina e 42). Vakasamataka na sala o saga tiko kina mo muria na ivakasala oqo. Na bolebole cava soti o sotava tiko? Na dina cava so ena Vunau kei na Veiyalayalati 93 e rawa ni veivuke?

Na veivakararamataki cava o rawata mai na ivakavuvuli oqo mai vei Elder David A. Bednar?

“E tiko ena noqu valenivolavola e dua na droini totoka ni dua na were ni witi. Na droini oqo e dua na ivakasokumuni ni veimataqali barasi iboro yadudua—ke me ra a tu vakayadudua tu e na sega ni taleitaki se veivakauqeti sara. E dina, kevaka o tu volekata na droini, na ka ga o na rawa ni raica sa ikoya na umaroka dromodromo, wainikoula kei na masikuvui sega ni veiwekanitaki rawa ka sabalia na kena irairai. Ia, ni o toso vakamalua tani mai kina, sa tekivu me ra cokovata kece na vei barasi iboro yadudua ka basika e dua na vanua vakasakiti ni were ni witi totoka. Era cakacaka vata e vuqa na vei barasi iboro yadudua oqori me basika kina e dua na droini totoka ka veivakadrukai.

“Na masu vakamatavuvale yadudua, na gauna yadudua ni wili ivolanikalou vakamatavuvale, na lotu vakamatavuvale yadudua era sa barasi iboro yadudua ena laca ni yaloda. E sega ni dua vei ira me na veivakauqeti sara se me na daunanumi tu ga. Ia me vaka ga ni ratou mai veicurumaki vinaka yani na iboro dromodromo na koula kei na roka ni qele ka mai buli rawa kina e dua na cakacaka vakasakiti,sa vaka talega kina ni da vakayacora tudei e so na veika lalai e sa rawa ni veimuataki ki na dua na bula vakayalo levu sara. ‘O koya mo dou kakua kina ni oca ena cakacaka vinaka, ni dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere’ [Vunau kei na Veiyalayalati 64:33]. Na vakaivakarau sa dua na ivakavuvuli bibi ni da vakadavora na yavu ni dua na cakacaka cecere ena noda dui bula yadua kei na noda gugumatua ka veinanumi ena noda dui vuvale” (“More Diligent and Concerned at Home,” Liaona, Nove. 2009, 19 – 20).

Raica talega na Henry B. Eyring, “Na iTikotiko e Vakaicili Kina na Yalo ni Turaga,” Liaona, Me 2019, 22–25.

E vakaroti ira na itubutubu na Turaga me ra “vakavulici ira na [luvedra] ena rarama kei na dina.”

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 93:2–21

Sai Jisu Karisito na Rarama kei na Vu-ni-bula kei Vuravura.

• Vakasamataka mo vakaraitaka e dua na iyaloyalo ni iVakabula ka tarogi ira na luvemu na cava e bibi kina me da vulica ka muri Jisu Karisito. Mo ni qai wilika vata na Vunau kei na Veiyalayalati 93:19 mo ni kunea kina e dua na vuna bibi.

• Sa rawa mo digitaka e vica na dina me baleti Karisito ena wase 93 e veivakauqeti vei iko ka vukei ira na luvemu me ra kunea ka kilai ira vakavinaka (raica talega na “Wase 33: Na iVakatakila me Baleti Jisu Karisito,” ena iTukuni mai na Vunau kei na Veiyalayalati, 126–27, se na kena vidio ena Gospel Library). Me baleta na dina yadua o digitaka, e rawa ni o solia vei ira na luvemu e dua na vosa se malanivosa me ra vakarogoca ni o ni wilika vata na tikina oya. Me ivakaraitaki, o Jisu Karisito:

  • A vakaraitaka na cakacaka nei Tamana (tikina e 5).

  • Na Rarama kei Vuravura (tikina e 9).

  • Na Dauniveibuli kei vuravura (tikina e 10).

  • Sa tu vua na kaukauwa kecega mai lomalagi kei vuravura (tikina e 17).

  • A tiko vata kei na Kalou mai na ivakatekivu (tikina e 21).

  Chapter 33: A Revelation about Jesus Christ: May 1833

Kena matailalai mai na Rarama kei Vuravura, mai vei Howard Lyon

Vunau kei na Veiyalayalati 93:23, 29, 38

Au a bula vata kei na Tamada Vakalomalagi ni se bera ni’u lako mai ki vuravura.

• A vakamatatataka vakatolu na iVakabula ena wase 93 ni da a bula tu vata kei na Kalou “mai na ivakatekivu” (tikina 23, 29, 38). Me vukei ira na luvemu me ra raica oqo, sa rawa mo sureti ira me ra wilika na Vunau kei na Veiyalayalati 93:23, 29, 38 ka vakaraica e dua na dina me baleti ira ka tokaruataki tiko ena veitikina oqo. Cava e vinakata kina na Tamada Vakalomalagi me da kila na dina oqo? Sa rawa talega mo tarogi ira na luvemu se cava era kila me baleta na noda bula vata kei na Tamada Vakalomalagi ni bera ni da sucu mai. Me vukei ira me ra vulica eso tale na ka, wilika vata kei ira e dua se sivia na malanivosa ni ivolanikalou eso oqo: Jeremaia 1:5; Vunau kei na Veiyalayalati 138:53–56; Mosese 3:5; Eparaama 3:22–26.

• Sa rawa talega mo ni lagata vata na “Au Luve ni Kalou” se “Mai Lomalagi Daru a Daubula Kina” (iVolanisere ni Gonelalai, 2- 3, 4) ka veivosakitaka na dina eda vulica mai na sere oqo me baleta na inaki ni noda lako mai ki vuravura.

Vunau kei na Veiyalayalati 93:24–39

Au ciqoma na rarama kei na dina ni’u talairawarawa vua na Kalou.

• Me vukei ira na gone me ra bulataka na dina me baleta na talairawarawa e tiko ena Vunau kei na Veiyalayalati 93, navuca mo vola e vica na tiki ni ivolanikalou mai na iwase oqo ena tikitiki ni pepa eso. Ena so tale na tiki ni pepa, vola kina na dina eso era vakavulica na veitikina yadua oqo. Sa rawa me ra cakacaka vata na luvemu me ra wilika na veitikina ka vakasotara vata kei na dina eso era tiko kina. Na ivakaraitaki eso e rawa ni oka kina na:

  • Tikina e 24: Na dina sa ikoya na kena kilai na veika dina ena gauna sa oti, gauna oqo, kei na veisiga ni mataka.

  • Tikina e 28: Au rawa ni ciqoma na rarama kei na dina ni’u muria na ivakaro.

  • Tikina e 37: Ni sa tu vei au na rarama kei na dina, sa rawa kina me’u vorata na ca.

  • Tikina e 39: Au na vakayalia na rarama kei na dina ni’u sa talaidredre.

  O na vinakata beka mo wasea na ivakaraitaki ni dina eso o sa mai kila ni ko sa maroroya tiko na ivakaro ni Turaga.

Moica me ganita na nodra yabaki ni bula na luvemu. Ko sa kila tiko na nodra gagadre kei na gugumatua na luvemu; yalogalala mo moica na vakasama eso ni itaviqaravi me sotava na nodra gagadre. Me vakataka, ena itaviqaravi oqo, kevaka o vakavulici ira tiko na gonelalai sobu, ena vinaka cake beka mo vakanamata ki na dua ga na dina rawarawa mai na wase 93.

Me baleta na vakasama tale eso, raica na ilavelave ni mekasini na iTokani ni vula oqo.

Rarama kei na Dina, mai vei Simon Dewey