Valetabu e Kirtland, mai vei Al Rounds

1–7 ni Sepiteba: “Me Vakabulai Saioni”

Vunau kei na Veiyalayalati 94–97

Ena gauna makawa, a vakaroti Mosese na Turaga me tara e dua na valecavu “me tautauvata kei na kena ivakatakarakara ka vakatakilai vei [koya] ena ulunivanua” (Iperiu 8:5; raica talega na Lako Yani 25:8–9). Na valecavu me sa itikotiko liu ni keba ni Isireli ena lekutu (raica Na Tiko Mai Na Lekutu 2:1–2).

Ena 1833, a vakaroti Josefa Simici na Turaga me tara na valetabu “sega ni vaka na kena itaratara e kila ko vuravura” ia me “tara kina ena kena ivalavala au na vakaraitaka” (Vunau kei na Veiyalayalati 95:13–14; raica talega na 97:10). Me vaka ga na valecavu ena lekutu, na inaki ni valetabu me ivakatakilakila laurai levu e Kirtland (raica na Vunau kei na Veiyalayalati 94:1

Nikua, era sa kune na valetabu e veiyasai vuravura. Kevaka mada ga era sega ni tu ena lomadonu ni noda veikoro lelevu, era dusimaki keda vei Karisito, o koya e dodonu me tiko ena lomadonu ni noda bula. E dina ga ni duidui tu na irairai ni veivaletabu yadua, ia e loma eda sa vulica kina e dua vata ga na ivakarau vakalou—na ituvatuva vakalomalagi me kauti keda lesu ki na iserau ni Kalou. Na cakacaka vakalotu kei na veiyalayalati tabu eso era semati keda vei Karisito ka vaqaqacotaka na noda matavuvale “sega ni vaka na kena itaratara e kila ko vuravura” ia e vaka na ivakarau sa vakaraitaka vei keda na Kalou.

Raica na Yalododonu, 1:169–70; “A House for Our God,” ena Revelations in Context,, 165–73.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 94; 97:10–17

Au sa rawa ni “vakatabui vakatabakidua vua na Turaga.”

Ena Vunau kei na Veiyalayalati 94, e solia na Turaga na idusidusi me baleta na tarai cake ni vale ni veiliutaki e Kirtland—e dua na valenivolavola kei na vale ni tabaivola. Na cava e vakauqeti iko me baleta na veika e tukuna na Turaga me baleta na veivale oqo ena Vunau kei na Veiyalayalati 94:2–12? E vakatauvatani vakacava kei na veika e tukuna me baleta na valetabu ena 97:10–17?

Na cava na kena ibalebale vei iko mo “vakatabui vakatabakidua vua na Turaga”?

Vunau kei na Veiyalayalati 95

Na Turaga sa dau vunauci ira e lomana o Koya.

Ena gauna a ciqomi kina na ivakatakila ena wase 95 ni sa oti e lima na vula mai na gauna a vakarota kina na Turaga vei ira na Yalododonu me ra tara e dua na vale ni Kalou (raica na Vunau kei na Veiyalayalati 88:117–19)—ka ra a se bera ga ni tekivu. Raica na sala a vakadodonutaki ira kina na Turaga ena ivakatakila oqo. E rawa sara mada ga ni o cakava e dua na lisi ni ivakavuvuli o kunea me baleta na soli ni veivakadodonutaki veivakauqeti. Na cava o vulica me baleta na Turaga mai na sala a vakadodonutaki ira kina na Nona Yalododonu?

Raica talega na Vunau kei na Veiyalayalati 121:43–44; D. Todd Christofferson, “O Ira Kecega Kau sa Lomana, Kau sa Vunauca ka Cudruva,” Liaona, Me 2011, 97–100.

God Loves His Children

Elder Wakolo testifies of God’s love and describes how He shows that love to His children.

Vunau kei na Veiyalayalati 95:8, 11–17; 97:10–17

Na valetabu e sa vale ni Turaga.

Ni oti nodra cudruvi ni ra a sega ni tara e dua na vale ni Turaga e Kirtland, era a qai digitaka na iliuliu ni Lotu e dua na vanua ena dua na were ni witi me ra tara kina. A cici kusarawa o Hyrum Smith, na tuakana na parofita, me kauta mai e dua na isele me tekivu samaka na were. “Keimami sa vakarau tara e dua na vale vua na Turaga,” a kaya o koya, “ka’u sa nakita me’u kena imatai ni tara na cakacaka” (ena Nodra iVakavuvuli na Peresitedi ni Lotu: Josefa Simici [2007], 271, 273). Na cava o nanuma e sa rui maqusa kina o Hyrum me tara na valetabu? Vakasamataka vakatitobu oqo ni o wilika na Vunau kei na Veiyalayalati 95:8, 11–17; 97:10–17.

Ena noda gauna, na Turaga “sa vakatotolotaka tiko … na noda tara valetabu” (Russell M. Nelson, “Vakanamata ki na Valetabu,” Liaona, Nove. 2022, 121). Kevaka e dua e tarogi iko se cava e tara tiko kina na Lotu i Jisu Karisito e vuqa na valetabu, na cava o na kaya? Vakaraica na isaunitaro e rawa ni ganita ena:

• Na itukutuku nei Peresitedi Russell M. Nelson ni kacivaka tiko na veivaletabu vovou (me vaka na “Oqo na Kena Gauna,” Liaona, Me 2022, 126).

• “Why Latter-day Saints Build Temples” (temples.ChurchofJesusChrist.org).

• Na vidio “Temples” (Gospel Library).

What Is a Temple?

The difference between chapels, where Latter-day Saints meet for regular Sunday worship, and temples is also explained.

E rawa beka ni o vakatauvatana na nodra sasaga na Yalododonu me ra tara na Valetabu e Kirtland ki na nomu sasaga mo vakavakarau ki na veika vakaibalebale eso vata kei na Turaga ena valetabu. O na vakaraitaka vakacava na yalo ni vakusakusa vata ga a vakila o Hyrum Smith me baleta na vale tabu ni Turaga? Me ivakaraitaki, na cava o rawa ni cakava me vaka na samaki ni were, me vaka a cakava o Hyrum? Na solibula cava soti o vakila ni vinakata na Turaga mo cakava? (raica na Vunau kei na Veiyalayalati 97:12).

Raica talega na “Holy Temples on Mount Zion,” Hymns, naba 289; Topics and Questions, “Temples,” Gospel Library.

Samaka tiko na vanua o Hyrum Smith me baleta na Valetabu e Kirtland.

Vunau kei na Veiyalayalati 97:8–9

“Au na vakadonui ira.”

Vakasamataka mada e dua na gauna o a vakadonui kina—se sega ni vakadonui—ki na dua na ilawalawa se timi. E tautauvata se duidui vakacava oya mai na ka e vakavulica na Vunau kei na Veiyalayalati 97:8–9 me baleta na ibalebale ni noda ciqomi mai vua na Turaga? Na cava o nanuma ni tovolea tiko na Turaga me vakavulici iko kina ena ivakatautauvata ena tikina e 9?

Raica talega na Erich W. Kopischke, “Ciqomi Tu mai Vua na Turaga,” Liaona, Me 2013, 104–6.

Tauyavutaka e dua na ituvaki vakayalo ni vuli kei na veivakavulici. “Na Yalo Tabu,” a yalataka o Jisu, “ena vakavulici kemudou ena ka kecega” (Joni 14:26). Okoya gona ke o vuli tiko vakai iko se kei ira na tani, dau vakaliuca mo sureta na Yalotabu. Na sereivakatagi tabu, masu, kei na yalo ni veilomani e rawa kece ni veivuke me tauyavutaka e dua na ituvaki veivakacegui, ka vakayalo me rawa ni vakavulica kina vei iko na Yalo Tabu na dina.

Vunau kei na Veiyalayalati 97:18–28

O Saioni sai “ira sa savasava na lomadra.”

Kivei ira na Yalododonu ena 1830 vakacaca, o Saioni e a dua na vanua. Ena ivakatakila ena wase 97, a vakarabailevutaka kina na Turaga na kena ibalebale me vakamacalataka e dua na matatamata—“o ira sa savasava na lomadra” (tikina e 21). Ni o wilika na tikina e 18–28, sa rawa mo sosomitaka na ivakamacala oqo ni o wilika na vosa Saioni. Na cava na kena ibalebale vei iko me savasava na lomamu?

Raica tale ga na Mosese 7:18.

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 95:8; 97:10–17

Na valetabu e vale ni Turaga

• Me baleta eso na itukutuku ena wase 95 kei na 97, e rawa ni o wasea vei ira na luvemu “Sa Vakatabui na Valetabu e Kirtland” ena iTukuni mai na Vunau kei na Veiyalayalati (Valenivola Vakosipeli; raica talega na Yalododonu, 1:210). Era na marautaka beka na luvemu me ra vakatotomuria ni ra sa vukea tiko me ra tara na Valetabu e Kirtland (musu kau, tuki ivako, boro lalaga, kei na so tale). E rawa talega ni o vakaraitaka vei ira e dua na iyaloyalo ni Valetabu e Kirtland, me vakataki ira ena ituvatuva oqo, ni o wilika na Vunau kei na Veiyalayalati 95:8 mo vakavulica vei ira na vuna e vinakata kina na Turaga me da dau tara valetabu.

The Kirtland Temple

• Ni wiliki vata oti na Vunau kei na Veiyalayalati 97:15–16, sa rawa ni o veiwaseitaka kei ira na vuna e bibi kina na valetabu. E rawa talega ni o lagata vata e dua na sere me vukei ira na luvemu me ra vakarokorokotaka na vale ni Turaga, me vaka na “Raica na Valetabu” (iVolanisere na Gonelalai, 99). Na cava e rokovi kina na valetabu?

Vunau kei na Veiyalayalati 97:1–2, 8–9, 21

O Saioni sai “ira sa savasava na lomadra.”

• Me vukei ira na luvemu me ra kila na ibalebale ni vosa na savasava ena Vunau kei na Veiyalayalati 97:21, e rawa ni o ni raica vata e dua na bilo wai savasava ka biuta kina e dua na ka me vakadukadukalitaka (me vaka na duka se isaluwaki ni kakana). Na cava e bibi kina me savasava na wai? Me ra qai wilika na luvemu na tikina e 21 ka biuta na nodra iqaqalo ena vosa savasava. Na cava na kena ibalebale me savasava na lomada? Na tikina e 1–2 kei na 8–9 e rawa ni solia eso na vakasama. Ena veivuke vakacava na iVakabula me vakasavasavataka na lomada?

E vinakata na Tamada Vakalomalagi me’u savasava e lomaqu.

Vunau kei na Veiyalayalati 97:8–9

Na Turaga e dau vakalougatataki ira na tamata era maroroya na veiyalayalati kei Koya.

• Era kila beka na luvemu na veiyalayalati cava eda cakava vua na Turaga ni da papitaiso se ena valetabu? Vakasamataka mo railesuva vata kei ira na veiyalayalati eso oqori ena wiliki ni Mosaia 18:9–10, 13 se iVoladusidusi Raraba, 27.2. Veiwaseitaka na sala o saga tiko kina mo “muria na [nomu] veiyalayalati ena [nomu] solibula” (Vunau kei na Veiyalayalati 97:8).

• Sa rawa mo sureti ira na luvemu me ra droinitaka na iyaloyalo ni veika e vakamacalataka na Vunau kei na Veiyalayalati 97:9 . Ni ra wasea na nodra iyaloyalo, veivosakitaka na sala sa vakalougatataki iko kina na Turaga ena nomu rokova na nomu veiyalayalati. Era sa yaco vakacava na veivakalougatataki oqori me vaka e dua na “vunikau vuavuai vinaka ka sa tei … e yasa ni dua na uciwai savasava”?

Me baleta na vakasama tale eso, raica na ilavelave ni mekasini na iTokani ni vula oqo.

Tara Tiko na Valetabu e Kirtland, mai vei Walter Rane