22–28 ni Sepiteba: “Na iVakarau ni Luve ni Kalou”

Vunau kei na Veiyalayalati 106–108

Ena imatai ni kena raici, na Vunau kei na Veiyalayalati 107 e vaka me baleta walega na kena tuvanaki na itutu ni matabete ki na dua na ituvatuva ni veiliutaki me baleta na Lotu ni Turaga. Ena gauna a qai tabaki kina na ivakatakila oqo, sa tubusivita sara na lewe ni Lotu na nodra veiqaravi e vica wale na iliuliu sa tiko rawa. Ka sa gadrevi vakalevu na veivuke ni kena tuvai ni nodra itavi kei na ilesilesi na Mataveiliutaki Taumada, na Kuoramu ni Apositolo Le Tinikarua, na Vitusagavulu, bisopi, kei na mataveiliutaki ni kuoramu. Ia e tiko e levu cake sara na ka ki na veidusimaki vakalou ena wase 107 mai na ivakarau walega me tauyavutaki kina na veiliutaki ni Lotu. Eke, e vakatavulici keda na Turaga me baleta na Nona kaukauwa kei na lewa ni “Matabete Tabu me vaka na iVakarau ni Luve ni Kalou” (tikina e 3). Na inaki ni matabete me dolavi kina na “veivakalougatataki kece sara vakayalo ni lotu” me rawa kina vei ira kece na luve ni Kalou me “tadolavi vei ira na lomalagi” ka “marautaka na nodra veimaliwai ka tiko ena iserau ni Kalou ko Tamada, kei Jisu na dauveivakaduavatataki ni veiyalayalati vou” (tikina e 18–19). Ni vakavulici keda me baleta na Nona matabete, sa vakavulici keda tiko na iVakabula me baleti Koya kei na sala eda rawa ni lako mai kina Vua.

Raica na “Restoring the Ancient Order,” ena Revelations in Context,, 208–12.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 106; 108

E tokoni au na Turaga ena Nona kacivi au me’u veiqaravi.

Ena Vunau kei na Veiyalayalati 106 kei na 108, a solia kina na Turaga na ivakasala kei na yalayala vei rau e rua na lewenilotu rau a kacivi me rau veiqaravi ena Lotu. Ni o vulica na Nona ivakasala, o na vakasamataka beka na nomu madigi mo qarava na Turaga—e rairai dua beka na ilesilesi ni veiqaravi, dua na veikacivi ena Lotu, itavi ena nomu matavuvale, se veivakauqeti vakayalo mo caka vinaka.

Na cava o vakila baleta na itukutuku ni iVakabula vei iko e tiko ena ivakatakila oqo? Na malanivosa cava so e vaka me vakaibalebale vakalevu vei iko? Oqo e vica mo vakasamataka:

• Na gauna cava sa solia kina vei iko na Turaga na “loloma soli wale [se veivuke vakalou] … [kei na] [vei]vakataudeitaki” mo rawa ni qaravi Koya? (Vunau kei na Veiyalayalati 106:8).

• Na cava o nanuma ni kena ibalebale mo vaqaqacotaki ira na tani “[ena] nomu ivalavala kecega”? (Vunau kei na Veiyalayalati 108:7).

Ni a ciqoma o Elder Carl B. Cook e dua na ilesilesi dredre ena Lotu, a rawata o koya na kaukauwa mai vua e dua na tubuna. Wilika ena nona itukutuku “Veiqaravi” (Liaona, Nove. 2016, 110–12). Vakasamataka mo vola e dua na ivola mo vakayaloqaqataki ira kina na nomu kawa—se na nomu veisiga ni mataka vakai iko—mo ciqoma na madigi mo qarava na Turaga. Okata ena nomu ivola na dina eso o vulica mai na itukutuku nei Elder Cook, na Vunau kei na Veiyalayalati 106 kei na 108, kei na veika o sa sotava.

Raica talega na Henry B. Eyring, “Lako Vata kei Au,” Liaona, Me 2017, 82–85; Topics and Questions, “Serving in Church Callings,” Gospel Library; “Warren Cowdery” kei na “‘Wrought Upon’ to Seek a Revelation,” ena Revelations in Context, 219–23, 224–28.

Vunau kei na Veiyalayalati 107:1–4, 18–20

Na matabete e sa “vaka na iVakarau ni Luve ni Kalou.”

E tekivuna na Turaga na Nona “ivakatakila me baleta na matabete” (Vunau kei na Veiyalayalati 107, ulutaga ni iwase) ena nona vakavulica vei keda na yaca taumada ni Matabete i Melikiseteki (raica na tikina e 1–4). Na cava o nanuma ni bibi kina me kilai oqori? E vakayarayarataka vakacava na yaca oqo na sala o vakasamataka kina na matabete?

Vakasamataka tiko oqo ni o wilika na veika me baleta na matabete, vakabibi ena tikina e 18–20. Na cava na kena ibalebale me “tadolavi vei ira ko lomalagi”? Na cava na kena ibalebale me “marautaka na nodra veimaliwai ka tiko ena iserau ni Kalou na Tamada, kei Jisu”? E vakarautaka vakacava vei iko na kaukauwa kei na lewa ni matabete ni iVakabula na veika kece oqo?

Raica talega na Alama 13:2, 16; Vunau kei na Veiyalayalati 84:19–27.

Vakanamata vei Jisu Karisito. “E vuqa tu na ka me vakavulici ena kosipeli vakalesui mai i Jisu Karisito—na ivakavuvuli, ivakaro, parofisai, kei na italanoa ni ivolanikalou. Ia na veika kece oqo sa taba ni vunikau vata ga, ni sa duabau ga na nodra inaki: me vukei ira na tamata kecega me ra lako mai vei Karisito ka vakataucokotaki Vua (raica na Jeromi 1:11; Moronai 10:32). Se cava ga na ka o vakavulica, nanuma tiko ni o sa vakavulica dina tiko na veika baleti Jisu Karisito kei na sala mo vakataki Koya kina” (Veivakavulici ena iVakarau ni iVakabula, 6). Me ivakaraitaki, ni o veivakavulici—ka vulica—me baleta na matabete ena Vunau kei na Veiyalayalati 107, dau taroga wasoma, “Na cava eda sa vulica tiko me baleta na iVakabula?”

Vunau kei na Veiyalayalati 107:22

O ira na italai ni Turaga era “tokoni ena nodra veivakabauti, nodra yalodina, kei na nodra masumasu na lewenilotu.”

Na cava o nanuma e kena ibalebale mo tokoni ira na italai ni Turaga ena nomu veivakabauti? ena nomu yalodina? ena nomu masumasu?

Raica talega na “Turaga Me Kalougata Noda Parofita,” Sere ni Lotu, naba 11.

Vunau kei na Veiyalayalati 107:23–24, 33–35, 38, 91–92

Era vakadinadinataki Jisu Karisito na Parofita kei na iApositolo.

A wasea o Josefa Simici na wase 107 ena 1835 vata kei na Kuoramu ni iApositolo Le Tinikarua se qai kacivi vou (raica na ulutaga ni iwase). Na cava a vakavulica vei ira na Turaga me baleta na nodra veikacivi ena tikina e 23–24, 33–35, 38? Sa vaqaqacotaki vakacava na nomu vakadinadinataki Jisu Karisito mai na nodra veivakavulici kei na veiqaravi na Nona iApositolo bula?

Ena tikina e 91–92, e vakavulica kina na Turaga me baleta na Nona iApositolo dede duadua, na Peresitedi ni Lotu. E “vakataki Mosese” vakacava o koya? (raica na iDusidusi ki na iVolanikalou, “Mosese,” Valenivola Vakosipeli).

Raica talega na David A. Bednar, “Kacivi me ra Tukuna Yani na Yacaqu,” Liaona, Nove. 2015, 128–31.

Vunau kei na Veiyalayalati 107:27–31, 85–89

E dau vakayacora na Turaga na Nona cakacaka ena veimatabose.

Raica na veika a vakavulica na Turaga me baleta na matabose ena Vunau kei na Veiyalayalati 107:27–31, 85–89. Na cava e dau mana kina na matabose? O na vakayagataka vakacava na ivakavuvuli oqo ena nomu veikacivi ena Lotu, nomu vuvale, se na nomu itavi tale eso?

Raica talega na M. Russell Ballard, “Matabose ni Matavuvale,” Liaona, Me 2016, 63–65; iVoladusidusi Raraba, 4.3–4.4, Valenivola Vakosipeli.

E sureta na Turaga na matavuvale me dau veivakasalataki vata.

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 107:18–20

E dau vakalougatataki au o Jisu Karisito ena Nona kaukauwa ni matabete.

• Ni o wilika vata kei ira na luvemu na Vunau kei na Veiyalayalati 107:18–19, vakabibitaka na malanivosa “veivakalougatataki kece sara vakayalo.” Sa rawa vei iko kei ira na luvemu mo ni lisitaka na veivakalougatataki eso e lako mai na matabete. E rawa beka ni o cakava vaka dua na qito—raica o cei e rawa ni cakava na lisi balavu duadua. E rawa talega ni ra droinitaka se vakaraica mai na gone na iyaloyalo eso e matataka na veivakalougatataki eso oqo (raica na tabana ni itaviqaraviena macawa oqo). Sa rawa ni o qai veivosakitaka na sala e vukei keda kina na cakacaka vakalotu ni matabete (me vaka na papitaiso se na sakaramede) me da ciqoma kina na veivakalougatataki ni Kalou.

Vunau kei na Veiyalayalati 107:21–26, 33–35, 91–92

Era liutaka na Nona Lotu na italai digitaki ni Turaga.

• Na ilavelave yadua ni koniferedi ena Liaona e dau tiko kina e dua na draunipepa ni kedra iyaloyalo na Vakaitutu Raraba. Navuca mo vakaraica na iyaloyalo oqo kei ira na luvemu ni o wilika na nodra itavi ena Vunau kei na Veiyalayalati 107:21–26, 33–35, 91–92. O iko kei ira na luvemu e rawa ni o ni veivosakitaka na vuna o vakavinavinakataka kina ni sa solia vei ira na Turaga na itavi eso oqo.

• E rawa ni ra vulica vakalevu cake na luvemu me baleti ira na italai ni Turaga ena “General Church Leadership” ena ChurchofJesusChrist.org. De dua e rawa ni ra vulica yadua na luvemu na veika me baleta e dua vei ira na iliuliu oqo ka veivakavulici vakai ira me baleti koya. Veiwasei vakai kemuni ena sala o ni kila kina ni ra sa italai dina i Jisu Karisito o ira na iliuliu oqo.

• Ni wiliki oti vata na Vunau kei na Veiyalayalati 107:22 sa rawa mo ni veivukevuke ni taura cake tu e dua na iyaloyalo ni Mataveiliutaki Taumada ka wasea na sala eso o rawa ni tokoni ira kina vaka italai ni Turaga.

Na Mataveiliutaki Taumada

Vunau kei na Veiyalayalati 108:3

Au rawa ni qaqarauni ena bulataki ni noqu veiyalayalati.

• Me tekivu kina e dua na veitalanoa me baleta na tikina oqo, sa rawa mo sureti ira na luvemu me ra cakava e dua na ka e gadrevi kina na qaqarauni, me vaka na vakatawani ni dua na bilo me kua ni tasova. Na cava e yaco ni da sega ni qaqarauni? Mo qai wilika na Vunau kei na Veiyalayalati 108:3 mo kila kina na veika e vinakata na Turaga me da cakava vakavinaka. Na “yalayala” cava (veiyalayalati) eda cakava vata kei na Kalou? Eda na qarauna vakalevu cake beka vakacava ena kena maroroi tiko? E rawa ni o wasea eso na tiki ni itukutuku nei Sisita Becky Craven “Na Qaqarauni kei na Vakawelewele” (Liaona, Me 2019, 9–11) o nanuma ni rawa ni na vakauqeti ira na luvemu me ra maroroya na nodra veiyalayalati. E rawa talega ni o lagata e dua na sere me baleta na maroroi ni veiyalayalati, me vaka na “Meu Dina Tu” (iVolanisere ni Gonelalai, 85).

Na sovaraki vakamatau ni wai e rawa ni vakatauvatani ki na maroroi vakamatau ni noda veiyalayalati.

Me baleta na vakasama tale eso, raica na ilavelave ni mekasini na iTokani ni vula oqo.

Vakalougatataki Eparaama o Melikiseteki, mai vei Walter Rane.