18–24 ni Okosita: “iVakavuvuli ka Sala Vata kei na Kena Yalayala”

Vunau kei na Veiyalayalati 89–92

A vakavulici ira na italatala qase i Isireli na Parofita o Josefa Simici ena Koronivuli ni Parofita, me baleta na tarai cake ni matanitu ni Kalou e vuravura. Era a veivosakitaka na veika dina vakayalo, masu vata, lolo, ka vakavakarau me ra vunautaka na kosipeli. Ia e a dua na ka me baleta na ituvaki ka na rairai duatani beka vei keda nikua, ka a sega ni vaka me donu talega vei Ema Simici. Ena gauna ni soqoni, era a dau vakatavako ka mama tavako na tagane, ka sega ni vaka me duatani ena gauna oya, ia a dau vakaloaloataka na fuloa kau ka biuta tu mai e dua na iboi kaukauwa sara e macawa. A wasea vei Josefa na nona kauwai o Ema, ka a taroga na Turaga o Josefa. Na kena isau mai oya a dua na ivakatakila ka lako sivita sara na vakuvukuvu kei na duka ni tavako. A solia kina vei ira na Yalododonu, me baleta na veitabatamata sa bera mai e dua na “ivakavuvuli ka sala vata kei na kena yalayala”—na yalayala ni bulabula ni yago, “vakavukui,” kei na “kila ka vakalevu” (Vunau kei na Veiyalayalati 89:3, 19).

Raica talega na Yalododonu, 1:166–68.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 89

A solia vei au na Turaga na Vosa ni Vuku me vukei au me’u bulabula vinaka ena yago kei na yalo.

Ni ra rogoca taumada na italatala qase ena Koronivuli ni Parofita ni wilika o Josefa Simici na Vosa ni Vuku, era a kusarawa ka “viritaka yani nodra paipo kei na iyaya ni mama tavako ki na bukawaqa” (Yalododonu, 1:168). Era a vinakata me ra vakaraitaka na nodra lomasoli me ra talairawarawa vua na Turaga. E rairai beka o sa “viritaka yani” mai na nomu bula na veika e vakasalataki keda kina na Vosa ni Vuku me da biuta laivi, ia na cava tale o rawa ni vulica mai na ivakatakila oqo? Nanuma mo taurivaka na vakasama eso oqo:

• Vakasamataka na ivakatakila me “dua na ivakavuvuli ka salavata kei na kena yalayala” (tikina e 3)—na dina tudei e dusimaka na vakatulewa. Na ivakavuvuli cava o raica ni rawa ni dusimaka na nomu vakatulewa? Na veivakalougatataki cava e yalataka na Turaga? (raica na tikina e 18–21). E sa vakayacora vakacava o Koya na yalayala eso oqori ki na nomu bula?

• Na ivakaraitaki cava soti ni “ca kei na ilawaki … e yalodra na tamata inaki ca” o sa bau raica e semati ki na Vosa ni Vuku? (tikina e 4). Me ikuri ni ivakatakila oqo, na cava sa solia na Turaga me vukei iko mo levea se vorata rawa na veika ca oqo?

• Na cava e vakavulica vei iko na ivakatakila oqo me baleta na Turaga? E veisemati vakacava na Vosa ni Vuku ki na Vunau kei na Veiyalayalati 29:34–35?

• Na cava o sa vakauqeti mo cakava mo qarauna vakavinaka cake kina na yagomu?

E a rairai so na nomu madigi mo vakamacalataka vei ira tani na vuna o bulataka kina na Vosa ni Vuku—ka na levu cake beka na nomu madigi ena veisiga ni mataka. Vakasamataka na sala mo vakayagataka kina na veimadigi oqo mo vakadinadinataka kina na iVakabula, na bibi ni yagoda, kei na veidina vakayalo tale eso. Me baleta na vakasama eso, raica na “Sa ka tabu na yagomu,” Me iSakisaki ni iTabagone: iDusidusi ni Vakayaco Digidigi, 22–29.

Raica talega na 1 Korinica 6:19–20; Thomas S. Monson, “iVakavuvuli kei na Yalayala,” Liaona, Nove. 2016, 78–79; Topics and Questions, “Word of Wisdom,” Gospel Library; “The Word of Wisdom,” ena Revelations in Context, 183–91; “Addiction,” “Physical Health,” Veivuke ni Bula, Valenivola Vakosipeli.

Principles and Promises

President Monson testifies of the blessings that come as we obey the Word of Wisdom.

Vuli ka veivakavulici ena ivakavuvuli. Ni da sega ni bulia na lisi ni veika me caka ka sega ni caka, e rawa ni da bulataka na ivakavuvuli me da vakayagataka kina na noda galala ni digidigi kei na vakabauti Karisito. Me ivakaraitaki, vakasamataka mada na veitaro yavutaki ena ivakavuvuli vakaoqo me baleta na Vosa ni Vuku: Na ivakavuvuli cava e rawa ni solia na veivakayaloqaqataki vua e dua e sasaga dredre tiko me muria na Vosa ni Vuku? Na ivakavuvuli cava so ena rawa ni vakacegui au ni’u sotava na leqa ni tauvimate dina ga ni’u bulataka tiko na Vosa ni Vuku?

E vinakata na Tamada Vakalomalagi me da qarauna na yagoda.

Vunau kei na Veiyalayalati 90:1–17

Na Mataveiliutaki Taumada e taura tu na “idola ni matanitu.”

Ena wase 90, a solia kina na Turaga na idusidusi me baleta na “cakacaka ni kaulotu kei na mataveiliutaki” (tikina e 12) vei Josefa Simici, Sidney Rigdon, kei Frederick G. Williams—ratou lewe ni ka eda sa vakatoka tu oqo me Mataveiliutaki Taumada. Na cava o vulica me baleta na Mataveiliutaki Taumada mai na tikina e 1–17? Vakasamataka mo railesuva na veitukutuku wale tikoga oqo mai vei iratou na lewe ni Mataveiliutaki Taumada. Eratou cakava vakacava me “lewa vakavinaka na cakacaka ni lotu kei na matanitu”? (tikina e 16). Mo na vakaraitaka vakacava ni o na sega ni “raica vakamamada” na veika oqori? (tikina e 5).

Navuca mo lagata se wilika na qaqa ni “Mai Rogoca Na Domo Ni Parofita” (Sere ni Lotu,, naba 12) se dua tale na sere me baleti ira na parofita ka semati ki na ivakavuvuli e tiko ena veitikina oqo. Sa vukei iko vakacava na veiqaravi ni Mataveiliutaki Taumada mo kilai Tamada Vakalomalagi kei Jisu Karisito?

Vunau kei na Veiyalayalati 90:24

“Na yaco me vinaka vei [au] na veika kece.

Vakasamataka mada na veika o sa sotava e vakadinadinataka na yalayala ni Turaga ena Vunau kei na Veiyalayalati 90:24. Okata mo volaitukutukutaka na veika o sa sotava, ka wasea vata kei dua na lewe ni matavuvale se daulomani—e dua beka e gadreva na veivakadeitaki se na veivakauqeti. Kevaka o se waraka tiko na veivakalougatataki eso, vakananuma vakatitobu na ka o rawa ni cakava mo yalodina tikoga ni o wawa toka mo raica ni “na yaco me vinaka vei [iko] na veika kece.”

Vunau kei na Veiyalayalati 90:28–31

O cei beka o Vienna Jacques?

A sucu o Vienna Jacques ena ika 10 ni Jiune, 1787, e Massachusetts. O Vienna, e dua na marama vakabauta ka tu vinaka sara vakailavo, a sotavi rau taumada na daukaulotu ena 1831. Ni oti nona rawata e dua na ivakadinadina vakayalo ni sa dina na nodrau itukutuku, a lako yani me rau sota kei na parofita e Kirtland, Ohio, na vanua a papitaiso kina okoya.

A talairawarawa o Vienna ki na ivakasala ni Turaga vei koya ena Vunau kei na Veiyalayalati 90:28–31. Na nona vakatatabu vua na Turaga, ka oka kina na nona cau a solia oti mai Kirtland, a lako mai ena dua na gauna bibi sara me baleta na Lotu, ni ra a tovolea tiko na iliuliu me ra volia na vanua me na tara kina na valetabu e Kirtland. O Vienna e a “yalodina tikoga, ka … [sega] ni vakawelewele” ena nona bula taucoko, ka qai yaco emuri me rawa ni “tiko … ena vakacegu” (tikina e 31) ena buca o Salt Lake, na vanua a qai mate kina ni sa yabaki 96.

Vunau kei na Veiyalayalati 91

“Na vakatakila na ka dina na Yalo.”

Eda sotava kece na itukutuku eso e tiko kina “e vuqa na ka … era ka dina” kei na “vuqa na ka … e sega ni dina” (Vunau kei na Veiyalayalati 91:1–2). Na ivakasala cava o kunea ena wase 91 e rawa ni vukei iko mo kila na dina ena itukutuku o sotava? E sa vukei iko vakacava na Yalo mo kila na dina mai na cala?

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 89

Sa dau vukei au na Vosa ni Vuku me’u bulabula tu vakayago ka vakayalo.

• Me vakatakilaitaki na wase 89, o iko beka kei ira na luvemu e rawa ni raica e dua na iyaloyalo ni dua na valetabu se lagata e dua na sere me baleta na bulabula ni yago, me vaka na “Ko ni Solia Mai vei Au Nomuni Vale” (iVolanisere ni Gonelalai, 73), mo vakavulica ni yagoda sa vaka na valetabu ni yaloda. Vukei ira na luvemu me ra matanataka na sala eso e rawa ni ra qarauna kina na yagodra.

• Mo vulica me baleta na ivakaro ni Turaga ena Vunau kei na Veiyalayalati 89:10–17, o iko kei ira na luvemu e rawa ni droinitaka se raica na iyaloyalo ni veika vinaka eda rawa ni kania se cakava me bulabula tiko kina na yagoda (raica na iyaloyalo kei na tabana ni itaviqaravi ena mua ni ituvatuva oqo). Na cava sa vakarota na Turaga me da kakua ni vakayagataka? Na cava e vinakata kina o Koya me da qarauna na yagoda?

• A vakasalataki ira na itabagone o Elder Gary E. Stevenson me ra tuvanaka taumada na ka era na cakava ni yaco na veitemaki ni alakaolo se waigaga. A vakavulica o koya, “O na raica ni na lailai na veirawai ni veitemaki vei iko. O sa na vakatulewataka oti tu na sala mo na vakavakarau kina kei na ka o na cakava. O na sega ni gadreva mo vakatulewa ena veigauna kece” (“Nomu iVolaniqito ni Matabete,” Liaona, Me 2019, 48). Ni wiliki vata oti na Vunau kei na Veiyalayalati 89:4 kei na itukutuku nei Elder Stevenson, veivakasalataki vata kei ira na luvemu me baleta na sala e rawa ni ra vakatulewa kina ena gauna oqo—me baleta na vo ni nodra bula—me ra bulataka na Vosa ni Vuku. E rawa sara ga me ra dramataka na gone na cava era na cakava kevaka edua, ke itokani sara mada ga, e solia vei ira e dua na ka e veivorati kei na Vosa ni Vuku. E vakalougatataki keda vakacava na Turaga ni da talairawarawa ki na Vosa ni Vuku? (raica na tikina e 18–21).

Na yagoda era sa isolisoli mai vua na Kalou.

Vunau kei na Veiyalayalati 90:5

E soli ira mai na parofita vei au na Kalou me ra tuberi ka taqomaki au.

• Sa rawa mo raica na kedra iyaloyalo na parofita makawa se lagata e dua na sere me vaka na “Vakamuria na Parofita” (iVolanisere na Gonelalai, 58). Sa vakalougatataki ira vakacava na Luvena na Kalou mai vei ira na Nona parofita? Na cava me da vakarorogo kina vei ira na parofita ni Kalou? (raica na Vunau kei na Veiyalayalati 90:5). Mo ni qai raica vata kei ira na luvemu e dua na iyaloyalo ni parofita bula ka wasea eso na ka sa vakavulica se vakaroti keda kina na Turaga mai vei koya. Eda na muria beka vakacava na parofita?

Vunau kei na Veiyalayalati 91

Sa rawa ni vukei au na Yalo me’u kila na ka dina.

• E rawa ni o vakalekalekataka na ulutaga ni wase ni Vunau kei na Veiyalayalati 91 me vukei ira na luvemu me ra kila na vuna a soli kina na ivakatakila oqo. Me ra qai vakasamataka na vanua eso, me vaka na vakau itukutuku, eda dau raica kina e “vuqa na ka … era ka dina” kei na “vuqa na ka … e sega ni dina” (tikina e 1–2). Na cava e vakavulica vei keda na tikina e 4–6 me baleta na Yalo Tabu? Ena vukei keda vakacava na Yalo Tabu me da kila na ka e dodonu?

Me baleta na vakasama tale eso, raica na ilavelave ni mekasini na iTokani ni vula oqo.

“Ia na veimataqali sila kecega sa yaga me kedra kakana na tamata; a sa vakatale ga kina na vua ni vaini.”