C.C.A. Christensen (1831–1912), Saints Driven from Jackson County Missouri [Mga Santos nga Ginapangtabog halin sa Jackson County Missouri], c. 1878, tempera sa muslin, 77¼ x 113 ka pulgada. Brigham Young University Museum of Art, regalo sang mga apo ni C.C.A. Christensen, 1970.

Septyembre 8–14: “Magpahimuyong kag Kilalaha nga Ako ang Dios”

Doktrina kag mga Kasugtanan 98–101

Para sa mga Santos sang tinuig 1830, ang Independence, Missouri, amo ang literal nga ginpangako nga duta. Amo ini ang “sentro nga lugar” sang Sion (Doktrina kag mga Kasugtanan 57:3)—ang siyudad sang Dios sa duta—kag ang pagtipon sang mga Santos didto isa ka malipayon nga umpisa sang Ikaduhang Pagkari. Pero ang ila mga kasilingan sa lugar lain ang panan-aw sa nagakatabo. Ginkontra nila ang pahayag nga ginhatag sang Dios sa mga Santos ang duta, kag indi sila komportable sa konsikwensya sa politika, ekonomiya, kag sosyedad sang madamo nga indi pamilyar nga mga tawo nga madasig nga nagasinaylo. Ang pagka-indi komportable nahimo nga pagpamigos kag pagpanakit. Sang 1833, ang imprintahan sang Simbahan ginguba, kag ginpwersa ang mga Santos nga bayaan ang ila mga balay.

Si Joseph Smith masobra 800 ka milya ang kalayuon sa Kirtland, kag sinemana antes naglab-ot sa iya ining balita. Pero nakahibalo ang Ginuo sang nagakalatabo, kag Iya ginpahayag sa Iya Propeta ang mga prinsipyo sang paghidaet kag pagpaisog nga magapaumpaw sa mga Santos—mga prinsipyo nga makabulig man sa aton kon nagapangatubang kita sang pagpamigos, kon ang aton matarong nga mga handum wala nagakatuman, ukon kon kinahanglan naton sang pahanumdom nga ang aton adlaw-adlaw nga mga kasakit sa ulihi, bisan paano, “magaresulta sa [aton] kaayohan” (Doktrina kag mga Kasugtanan 98:3).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 98:1–3, 11–14, 22; 101:1–16, 22–31, 36

Ang akon mga pagtilaw sarang magresulta sa akon kaayohan.

Ang iban naton nga mga kasakit sa kabuhi gintuga sang aton kaugalingon nga mga pagpili. Ang iban gintuga sang mga pagpili sang iban. Kag kon kaisa nagakatabo lang gid ang mga butang tungod bahin ang mga ini sang kabuhi diri sa duta. Bisan ano pa ang ginhalinan, ang kabudlayan makabulig tuman sang diosnon nga mga katuyuan kon magdangop kita sa Dios.

Nangin matuod ini para sa mga Santos sa Missouri sang 1833, kag matuod man ini para sa aton sa karon. Samtang ginabasa mo ang ginsiling sang Ginuo sa mga Santos sa Doktrina kag mga Kasugtanan 98 kag 101, binagbinaga kon paano magamit ang Iya mensahe sa lainlain mo nga mga pagtilaw ukon kabudlayan. Ari ang pila ka mga pamangkot kag balasahon nga makabulig sa imo.

Kon ang pagtilaw resulta sang:

• Personal nga mga pagpili: Ano nga laygay—kag mga promisa—ang imo nakita sa Doktrina kag mga Kasugtanan 98:11–12; 101:1–9? Ano ang imo natun-an sa sining mga bersikulo parte sa Amay nga Langitnon kag kay Jesucristo? Ano sa pamatyag mo ang ipaobra sang Dios sa imo?

• Ang mga pagpili sang iban: Ano nga kaumpawan ang imo nakita sa Doktrina kag mga Kasugtanan 98:1–3, 22; 101:10–16, 22? Paano ang gusto sang Dios nga sabat naton sa pagpang-abuso, pagpang-bully, ukon sa pagpanakit? Ano ang ginatudlo sining mga bersikulo parte sa kon paano mo ibutang ang imo pagsalig sa Ginuo?

• Ang mga kabudlayan sang mortalidad: Ano nga perkspektibo ang imo naagom sa Doktrina kag mga Kasugtanan 98:1–3; 101:22–31, 36? Ano ang imo nagakatun-an sa imo mga pagtilaw? Ano ang imo ginahimo para agdahon ang bulig sang Dios? Paano ka Niya ginabuligan?

Para tun-an pa gid kon paano ginahimo sang Dios nga ang “tanan nga butang nga gin-antos ninyo magaresulta sa inyo kaayohan” (Doktrina kag mga Kasugtanan 98:3), pamensara nga tun-an ang mensahe ni Elder Anthony D. Perkins “Remember Thy Suffering Saints, O Our God” (Liahona, Nob. 2021, 103–5). Pwede ka man magpangita sang dinalan sa iya mensahe nga nagabulig sa imo nga maintiendihan kon paano hambal sang Manluluwas nga kabigon mo ang imo mga kabudlayan. Sa ano nga mga paagi nagresulta ang imo mga pagtilaw sa imo kaayohan ukon nagtuman sang mga katuyuan sang Dios?

Tan-awa man sa Mga Taga-Roma 8:28; 2 Nefi 2:2; Doktrina kag mga Kasugtanan 90:24.ChurchofJesusChrist.org.

Trial of Adversity

Katie, who was paralyzed in an auto accident, shares how she exercises her faith to embrace her new life.

Feeling the Lord's Love and Goodness in Trials

When Darlyn learned of her illness, she feared she would not see her children grow up. But through her trial, she felt the Lord’s love and immense goodness. How does He comfort you in times of trial?

The Refiner's Fire

The refiner’s fire is not a comfortable place to be. It involves intense heat and repeated hammering. But it is in the refiner’s fire we are purified and prepared to meet God.

Doktrina kag mga Kasugtanan 98:23–48

Gusto sang Ginuo nga pangitaon ko ang paghidaet sa Iya paagi.

Gintudlo ni Pangulong Russell M. Nelson: Ang mga sumulunod ni Jesucristo dapat nga magpahamtang sang ehemplo nga sulundon sang tanan nga kalibutan. Nagapangabay ako sa inyo nga himoa ang tanan ninyo nga masarangan para untaton na ang personal nga mga kagamo nga nagadabadaba sa inyo mga tagipusuon kag sa inyo mga kabuhi” (“Ang Gahum sang Espirituhanon nga Buylo,” Liahona, Mayo 2022, 97).

Bisan indi tanan nga ara sa Doktrina kag mga Kasugtanan 98:23–48 magamit sa imo personal nga mga inter-aksyon sa iban, ano nga mga prinsipyo ang imo nakita nga makabulig sa imo kon ginahimoan ka sang iban sang malain? Makakita ka sang dugang nga mga kamatuoran sa kanta parte sa paghidaet ukon kapatawaran.

Detalye halin sa Christ and the Rich Young Ruler [Si Cristo kag ang Manggaranon nga Lamharon nga Manugdumala], ni Heinrich Hofmann

Doktrina kag mga Kasugtanan 99–100

Ginaatipan sang Ginuo ang mga tawo nga nagaserbisyo sa Iya.

Ang mga rebelasyon sa seksyon 99 kag 100 ginhatag para sa mga tawo nga may importante nga mga responsibilidad sa Simbahan pero nagakabalaka man para sa ila mga pamilya. Ano ang imo nakita sa sining mga rebelasyon nga nakabulig kuntani sa ila? Ano ang mensahe sang Ginuo para sa imo sa sining mga rebelasyon?

Doktrina kag mga Kasugtanan 101:43–65

Ang pagsunod sa laygay sang Dios nagabulig sa akon nga mangin hilway sa katalagman.

Ang paanggid sa Doktrina kag mga Kasugtanan 101:43–62 nagapaathag kon ngaa gintugtan sang Ginuo nga tabugon ang mga Santos pa-gwa sa Sion. Samtang ginabasa mo ining mga bersikulo, may nakita ka bala nga pagpalareho sa imo kaugalingon kag sa mga alagad sa paanggid? Paano mo ipakita sa Dios nga “handa [ka] nga magiyahan sa husto kag nagakaigo nga pamaagi para sa [imo] kaluwasan”? (tan-awa sa mga bersikulo 63–65).

Idrama-drama ang mga istorya ukon paanggid. Kon kaisa mas mahapos magtuon ukon maintiendihan ang mga istorya kag paanggid sa balaan nga mga kasulatan kon ibutang naton ang aton mga kaugalingon sa lugar sang mga tawo nga ginalaragway diri. Kon nagatudlo ka sang Doktrina kag mga Kasugtanan 101:43–62, pwede mo hagaron ang mga estudyante nga idrama-drama ang paanggid nga may isa nga nagabasa sini sing matunog. Ano nga mga ideya ang imo nakuha sa pagbutang sang aksyon sa mga tinaga?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 98:1–3

Mahimo ni Jesucristo nga bayluhan ang akon mga pagtilaw sang mga bugay.

• Pwede mo sugdan ang diskusyon paagi sa pagpamangkot sa imo kabataan parte sa mga kabudlayan nga ginaatubang sang mga kabataan sa ila edad. Dayon pwede ninyo basahon sing ululupod ang Doktrina kag mga Kasugtanan 98:1–3 kag hambalan kon paano mabayluhan ni Jesucristo ang mga pagtilaw sang mga bugay. Pwede mo iistorya sa imo kabataan ang mga halimbawa kon paano Niya ginbayluhan ang imo mga pagtilaw sang mga bugay.

Doktrina kag mga Kasugtanan 98:39–40

Ginabuligan ako sang Manluluwas nga magpatawad.

Tanda: Samtang ginatudloan mo ang imo kabataan sang importansya sang pagpatawad, siguroha nga naintiendihan man nila nga kon may magsakit sa ila, dapat gid nila ini isugid sa masaligan nga hamtong.

• Pwede ninyo istoryahan sang imo kabataan kon ano ayhan ang nabatyagan sining mga Santos. Dayon pwede ninyo basahon sing ululupod ang Doktrina kag mga Kasugtanan 98:23, 39–40 para mahibal-an kon ano ang gusto sang Ginuo nga ila himuon. Pwede ninyo istoryahan sang imo kabataan ang mga panahon nga kinahanglan ninyo nga patawaron ang isa ka tawo kag kon paano kamo ginbuligan sang Manluluwas.

• Pwede ka man magpakita sa imo kabataan sang mga litrato sang malipayon kag masubo nga hitsura. Hambali ang mga sitwasyon nga sa diin may tawo nga indi mabuot, kag maghatag sang mga suhestyon kon ano ang himuon. Buligi ang imo kabataan nga magpili kon ang kada sabat makapalipay sa ila ukon makapasubo paagi sa pagtudlo sa nagakabagay nga hitsura. Ngaa gusto ni Jesus nga patawaron naton ang mga tawo, bisan ang mga tawo nga indi mabuot sa aton?

Chapter 34: God Warns the People of Zion: July–August 1833

Chapter 35: The Saints Leave Jackson County, Missouri: September–December 1833

Doktrina kag mga Kasugtanan 101:16, 23–32

Sarang ako hatagan ni Jesucristo sang kalinong.

• Pagkatapos nga basahon ang Doktrina kag mga Kasugtanan 101:16, buligi ang imo kabataan nga kilalahon ang malinong mga pamatyagan sa mga tion nga nagapahimuyong kita kag nagapamensar kay Jesus—halimbawa, kon nagapangamuyo kita ukon nagaambit sang sakramento. Pwede man kamo magkanta sing ululupod sang kanta parte sa pagtahod.. Paano naton mabatyagan ang Iya kalinong sa aton puluy-an?

• Basi interesado ang imo kabataan nga hibaluon kon daw ano ang pangabuhi kon magbalik liwat si Jesucristo. Basaha ang Doktrina kag mga Kasugtanan 101:23–32 sing dungan, kag hambali ang mga butang nga ila nakita sa sining mga bersikulo nga makadala sa aton sang kalipay kon mag-abot Sia. Ngaa makabulig nga hibaluon ining mga butang kon ginabudlayan kita?

Magadala si Jesucristo sang kalinong kag kalipay kon mag-abot Sia liwat.

Para sa dugang nga mga ideya, tan-awa sa isyu sang Abyan nga magasin sini nga bulan.

Missouri Burning [Missouri nga Nagakalayo], ni Glen S. Hopkinson