C.C.A. Christensen (1831–1912), Zion’s Camp [Guban sang Sion], c. 1878, tempera sa muslin, 78 x 114 ka pulgada. Brigham Young University Museum of Art, regalo sang mga apo ni C.C.A. Christensen, 1970.

Septyembre 15–21: “Pagkatapos sing Madamo nga Pag-antos … Magaabot ang Bugay”

Doktrina kag mga Kasugtanan 102–105

Ang mga Santos sa Kirtland nasubuan gid sang mabatian nga ang ila kauturan sa Jackson County, Missouri, ginpangtabog sa ila mga puluy-an. Siguro nakapaisog sa ila, sadto, sang gindeklarar sang Ginuo nga ang “kaluwasan sang Sion” magaabot “paagi sa gahum” (Doktrina kag mga Kasugtanan 103:15). Upod ina nga promisa sa ila mga tagipusuon, masobra 200 ka lalaki, kag mga 25 ka babayi kag kabataan, ang nag-entra sa ila ginatawag nga Guban sang Israel, nga sang ulihi nakilala bilang Guban sang Sion. Ang misyon sini amo ang magmartsa pakadto sa Missouri kag tubuson ang Sion.

Para sa mga miyembro sang grupo, ang pagtubos sang Sion nagakahulugan sang pagpabalik sang mga Santos sa ila kadutaan. Pero antes lang gid mag-abot ang grupo sa Jackson County, ginhambalan sang Ginuo si Joseph Smith nga bungkagon ang Guban sang Sion. Ang iban nga miyembro sang guban naglibog ang ulo kag nangakig; daw napaslawan ang ekspedisyon kag wala matuman ang mga promisa sang Ginuo. Ugaling, ang iban, lain ang panglantaw diri. Bisan wala mabawi sang mga Santos ang ila mga duta kag balay, ining eksperiyensya nagdala sang makabig “kaluwasan” sa Sion, kag matuod nga ini “[nag-]abot paagi sa gahum.” Ang tampad nga mga miyembro sang Guban sang Sion, nga madamo ang nangin mga lider sang Simbahan sa ulihi, nagpamatuod nga ang eksperiyensya nagpadalom sang ila pagtuo sa gahum sang Dios, sa diosnon nga tulumanon ni Joseph Smith, kag sa Sion—indi lang sa Sion nga lugar kundi sa Sion nga katawhan sang Dios. Imbes nga dudahan ang balor sining daw napaslawan nga hilikuton, natun-an nila nga ang matuodtuod nga hilikuton amo nga sundon ang Manluluwas, bisan pa nga wala naton maintiendihi ang tanan. Sa amo sini ang Sion, sa ulihi, pagatubuson.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 102:12–23

Ano ang katuyuan sang mga membership council?

Ang seksyon 102 nagaunod sang mga ginhambalan sa miting sa Kirtland, Ohio, kon diin gin-organisar ang una nga high council sang Simbahan. Sa mga bersikulo 12–23, ginalaragway sang Ginuo ang mga proseso nga ginasunod sang mga high council kon maghiwat sang mga membership council para sa mga nakahimo sang mabug-at nga mga sala.

Si Pangulong M. Russell Ballard nagtudlo: “Kon kaisa ang mga miyembro nagapamangkot kon ngaa ang Simbahan nagahiwat sang mga [membership] council. Tatlo ang katuyuan sini: para luwason ang kalag sang nakasala, para proteksyunan ang wala sing sala, kag para amligan ang katinlo, integridad, kag maayo nga ngalan sang Simbahan” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).

Doktrina kag mga Kasugtanan 103:1–12, 36; 105:1–19

Ang Sion matukod lamang sa mga prinsipyo sang pagkamatarong.

Ngaa nadula sa mga Santos ang ila duta nga ginpanaad sa Missouri? Kadamo sang mga nangin rason—kag ang isa sini, siling sang Ginuo, amo ang “mga paglapas sang akon katawhan.” Kon indi tungod sina, ang Sion “natubos na kuntani” (Doktrina kag mga Kasugtanan 105:2). Sa imo pagbasa sang Doktrina kag mga Kasugtanan 103:1–12, 36; 105:1–19, mahimo nga matalupangdan mo ang pila ka butang nga nagpugong sang pagpatukod sang Sion sa Missouri kag mga butang nga nakabulig kuntani. Ano ang imo natun-an nga makabulig sa imo nga tukuron ang Sion sa imo tagipusuon, puluy-an, kag komunidad?

Doktrina kag mga Kasugtanan 103:12–13, 36; 105:1–6, 9–19

Ang mga bugay nagaabot pagkatapos sang mga pagtilaw sang pagtuo.

Sa madamo nga paagi, ang pagpartisipar sa Guban sang Sion isa ka pagtilaw sang pagtuo. Malawig ang biyahe, mainit ang panahon, kag kon kaisa maiwat ang pagkaon kag tubig. Kag pagkatapos sang tanan nila nga ginbatas, napaslawan gihapon ang Guban sang Sion sa pagbalik sang mga Santos sa ila kadutaan. Hunahunaa nga may oportunidad ka sa pagsulat sa isa ka miyembro sang Guban sang Sion nga ang pagtuo sa Ginuo nauyog gid sang iya eksperiyensya. Ano ang ihambal mo para paisugon ini nga tawo? Ano nga mga kamatuoran ang imo nakita sa Doktrina kag mga Kasugtanan 103:5–7, 12–13, 36; 105:1–6, 9–19 nga pwede makabulig?

Dayon pwede ka mamensar sang mas moderno nga halimbawa sang pagtilaw nga pareho sa Guban sang Sion—pareho abi sang misyonero nga grabe magtrabaho, pero wala gid sang nagpamiyembro sa Simbahan tungod sang iya pagpangabudlay. Base sa imo gintun-an, paano mo buligan ina nga misyonero nga makita nga madinalag-on gihapon ang iya misyon?

Paano ka ginbugayan sang Ginuo “pagkatapos sang madamo nga pag-antos”? Doktrina kag mga Kasugtanan 103:12).

Tan-awa man sa 1 Nefi 11:16–17; Alma 7:11–12; Doktrina kag mga Kasugtanan 6:33–36; 84:88; 101:35–36.

Maghanda paagi sa pagtuon sang konteksto sa kasaysayan sang mga rebelasyon. Ang pag-intiendi sang kahimtangan sa tion nga ginhatag ang mga rebelasyon sa Doktrina kag mga Kasugtanan mahimo nga makabulig sa imo nga maintiendihan kag ipangabuhi ang mga prinsipyo nga ginatudlo sini. Ang Dali, Magsunod sa Akon nga manwal nagahatag sang mga link sa madamo sining mga balasahon.

Ang Guban sang Israel nagkampo sa mga pangpang sang Little Fishing River.

Ano ang katuyuan sang mga pagtilaw?

Pamensara nga basahon ang laygay ni Elder Orson F. Whitney parte sa katuyuan sang mga pagtilaw: “Wala sang kasakit nga aton ginaantos, wala sang pagtilaw nga aton ginaagyan nga mausik. Nagabulig ini sa aton edukasyon, sa pagpatubo sang mga kalidad pareho sang pagkapasensyoso, pagtuo, kabakod kag pagpaubos. Ang tanan naton nga ginaantos kag tanan naton nga ginalampuwasan labi na kon pasensyoso naton ini nga ginabatas, nagapatubo sang aton mga karakter, nagatinlo sang aton mga tagipusuon, nagapadako sang aton mga kalag, kag nagahimo sa aton nga mas mahinangpanon kag mapinalanggaon sa isigkatawo, mas bagay nga tawgon mga anak sang Dios … kag paagi sa kasubo kag pag-antos, pagpangabudlay kag pagtilaw, nga maagom naton ang edukasyon nga tuyo naton nga maagom diri kag magahimo sa aton nga mas pareho sa aton Amay kag Iloy sa langit” (sa Spencer W. Kimball, Faith Precedes the Miracle [1972], 98).

Doktrina kag mga Kasugtanan 104:11–18, 78–83

Ginhimo ako sang Ginuo nga “tulugyanan sa dutan-on nga mga bugay.”

Dugang pa sa mga pagtilaw sa Missouri, sang 1834 nagpangatubang ang Simbahan sang mga kabudlayan pinansyal, upod ang dalagko nga kautangan kag gasto. Sa seksyon 104 naghatag sing laygay ang Ginuo parte sa pinansyal nga sitwasyon sang Simbahan. Paano mo magamit ang mga prinsipyo sa mga bersikulo 11–18 kag 78–83 sa imo kaugalingon nga pinansyal nga mga desisyon?

Treasure in Heaven: The John Tanner Story

John Tanner freely gave all he had, giving us an example of generosity and consecration in serving the Lord.

The Labor of His Hands

Church members around the world volunteer both time and money to serve others-- members and nonmembers alike--as Christ would serve.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 103:9

Sarang ko nga “mangin kasanag sa kalibutan” paagi sa pagsunod kay Jesus.

• Pwede mo hagaron ang imo kabataan nga kaptan ang mga litrato sang suga, kandila, ukon lain pa nga ginhalinan sang kasanag samtang ginabasa mo ang Doktrina kag mga Kasugtanan 103:9. Paano kita mangin daw pareho sa kasanag sa iban kon ginasunod naton si Jesucristo.

Sarang ko mangin kasanag sa iban kon sundon ko si Jesucristo.

Doktrina kag mga Kasugtanan 104:13–18

Gusto sang Ginuo nga ipakigbahin ko ang ara sa akon, sa mga tawo nga nagakinahanglan.

• Pwede mo man hatagan sang tiyempo ang imo kabataan nga ilista ang mga bugay nga ginhatag sang Dios sa ila (pareho sang pagkaon, biste, mga talento, pagtuo, kag puluy-an). Ipasulat sa ila kutob sa ila madumduman. Dayon basaha ninyo sing ululupod ang Doktrina kag mga Kasugtanan 104:13–18, nga ginapangita ang mga sabat sa mga pamangkot nga pareho sini: Sin-o ang matuod nga tag-iya sang tanan nga butang? Ano ang gusto Niya nga himuon naton sa sining mga butang? Pwede ninyo istoryahan sang imo kabataan ang mga eksperiyensya sang may naghatag sa inyo sang bagay nga kinahanglan ninyo.

  The Coat

  The Coat is a children’s story that depicts a young boy giving selflessly to another child in need.

Doktrina kag mga Kasugtanan 104:42

Bugayan ako sang Ginuo kon tumanon ko ang Iya mga kasuguan.

• Pila ka beses sa seksyon 104 nagapromisa ang Ginuo sang “madamo nga bugay” sa mga tawo nga matutom nga nagatuman sang Iya mga kasuguan. Para buligan ang mga kabataan kon ano ang buot silingon sang “madamo” pwede ka magdrowing sang bilog kag magpabulig sa imo kabataan nga magdrowing sang dugang nga mga bilog—magdrowing sang duha, dayon apat, dayon walo, dayon disisais, kag madamo pa. Tagsa ka magdugang kamo sang bilog, buligi ang imo kabataan nga magpanumdom sang isa ka bugay nga ginhatag sang Amay nga Langitnon sa ila.

Doktrina kag mga Kasugtanan 105:38–40

Sarang ko mangin makigdaeton

• Magpondo-pondo para hambalan ang mga leksyon nga matun-an naton sa Guban sang Sion—halimbawa, nga gusto sang Ginuo nga magpakalinong kita kag magbuligay imbes nga magbinaisay kag mag-ilinaway (tan-awa man sa Russell M. Nelson, “Mga Makigdaeton Kinahanglanon,” Liahona, Mayo 2023, 98–101).

  Chapter 36: Zion’s Camp: February–June 1834

• Pwede man ninyo basahon ang Doktrina kag mga Kasugtanan 105:38–40 kag pangabaya ang mga kabataan nga magtindog tagsa nga mabatian nila ang tinaga nga “paghidaet.” Ipaathag nga gusto sang Ginuo nga ang mga Santos magmahidaeton sa mga tawo nga indi maayo. Buligi ang imo kabataan nga mamensar sang mga butang nga pwede nila himuon para mangin mga makigdaeton, kag hagara sila nga i-role play ang pila ka sitwasyon.

Para sa dugang nga mga ideya, tan-awa sa isyu sang Abyan nga magasin sini nga bulan.

Zion’s Camp (Guban sang Sion sa kilid sang Fishing River), ni Judith A. Mehr