Kirtland Temple [Templo sang Kirtland], ni Al Rounds

Septyembre 1–7: “Para sa Kaluwasan sang Sion”

Doktrina kag mga Kasugtanan 94–97

Sang una, ginsugo sang Ginuo si Moises nga magpatindog sang tabernakulo “suno sa huwaran nga ginpakita sa [iya] sa bukid” (Mga Hebreo 8:5); tan-awa man sa Exodo 25:8–9). Ang tabernakulo amo ang mangin sentro sang kampo sang Israel sa kamingawan (tan-awa sa Numeros 2:1–2

Sang 1833, ginsugo sang Ginuo si Joseph Smith nga magpatindog sang mga templo “indi suno sa pamaagi sang kalibutan” kundi “suno sa pamaagi nga ipakita ko sa inyo” (Doktrina kag mga Kasugtanan 95:13–14; tan-awa man sa 97:10). Pareho sang tabernakulo sa kamingawan, ang templo gintuyo nga mangin tampok sang Kirtland (tan-awa sa Doktrina kag mga Kasugtanan 94:1

Sa karon, makita ang mga templo sa bilog nga kalibutan. Bisan wala ini sa sentro sang aton mga siyudad, ginatudlo kita sini kay Cristo, nga amo dapat ang sentro sang aton mga kabuhi. Bisan pa nga lainlain ang hitsura sang tagsa ka templo, sa sulod sini matun-an naton ang pareho nga diosnon nga huwaran—ang langitnon nga plano nga magadala sa aton pabalik sa presensya sang Dios. Ang sagrado nga mga ordinansa kag mga kasugtanan nagaangot sa aton kay Cristo kag nagapabakod sa aton mga pamilya “indi suno sa pamaagi sang kalibutan” kundi suno sa huwaran nga ginapakita sa aton sang Dios.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 94; 97:10–17

Sarang ako mangin “lubos nga [nadedikar] sa Ginuo.”

Sa Doktrina kag mga Kasugtanan 94, naghatag ang Ginuo sang mga instruksyon sa pagpatindog sang administratibo nga mga bilding sa Kirtland—opisina kag imprintahan. Ano ang nanamian mo sa ginhambal sang Ginuo parte sining mga bilding sa Doktrina kag mga Kasugtanan 94:2–12? Paano ini makumparar sa ginahambal Niya parte sa templo sa 97:10–17?

Ano ang kahulugan sa imo sang “lubos nga idedikar sa Ginuo”?

Doktrina kag mga Kasugtanan 95

Ginapinahan sang Ginuo ang Iya mga ginapalangga.

Sang mabaton ang rebelasyon sa seksyon 95, mga lima na ka bulan ang nagligad sang ginsugo sang Ginuo ang mga Santos nga magpatindog sang balay sang Dios (tan-awa sa Doktrina kag mga Kasugtanan 88:117–19)—kag wala pa nila ini masugdan. Talupangda kon paano sila gintadlong sang Ginuo sa sining rebelasyon. Pwede mo man gani ilista ang mga prinsipyo nga imo nakita sa paghatag sang inspirado nga koreksyon. Ano ang imo natun-an parte sa pamaagi sang Ginuo sa pagsaway sang Iya mga Santos?

Tan-awa man sa Doktrina kag mga Kasugtanan 121:43–44.

God Loves His Children

Elder Wakolo testifies of God’s love and describes how He shows that love to His children.

Doktrina kag mga Kasugtanan 95:8, 11–17; 97:10–17

Ang templo balay sang Ginuo.

Pagkatapos nga mapinahan bangud sang indi pagpatukod sang balay sang Ginuo sa Kirtland, nagpili ang mga lider sang Simbahan sang lugar sa tunga sang talamnan sang trigo kon diin sila magapatindog. Si Hyrum Smith, utod sang Propeta, insigida nga nagdalagan para magkuha sang garab para sugdan ang pagpanghawan sang talamnan. “Nagahanda kami sa pagpatindog sang balay para sa Ginuo,” siling niya, “kag pursigido ako nga mangin una sa buluhaton” (sa Teachings of Presidents of the Church: Joseph Smith [2007], 271, 273). Ngaa sa banta mo nga gusto gid kaayo ni Hyrum nga magpatindog sang templo? Binagbinaga ini samtang ginabasa mo ang Doktrina kag mga Kasugtanan 95:8, 11–17; 97:10–17.

Sa aton panahon, ang Ginuo “nagapadasig sang pagpatindog naton sang mga templo” (Russell M. Nelson, “Focus on the Temple,” Liahona, Nob. 2022, 121). Kon may magpamangkot sa imo kon ngaa ang Simbahan ni Jesucristo nagapatindog sang kadamo-damo nga mga templo, ano ang imo ihambal? Pangitaa ang posible nga mga sabat sa:

• Mga mensahe ni Pangulong Russell M. Nelson nga nagaanunsyo sang bag-o nga mga templo (pareho sang “Now Is the Time,” Liahona, Mayo 2022, 126).

• temples.ChurchofJesusChrist.org

What Is a Temple?

The difference between chapels, where Latter-day Saints meet for regular Sunday worship, and temples is also explained.

Pwede mo ikumparar ang mga pagpaninguha sang mga Santos sa pagpatindog sang Templo sang Kirtland sa imo pagpaninguha nga maghanda para sa makahulugan nga mga eksperiyensya upod ang Ginuo sa templo. Paano mo ipakita ang pareho nga pagdali nga nabatyagan ni Hyrum Smith sa balaan nga balay sang Ginuo? Halimbawa, ano ang pwede mo himuon nga daw pareho sang pagpanghagbas sang kahilamunan, pareho sa ginhimo ni Hyrum? Ano nga mga sakripisyo ang pamatyag mo ginapangayo sa imo sang Ginuo? (tan-awa sa Doktrina kag mga Kasugtanan 97:12).

Si Hyrum Smith nga nagapanghagbas sang kahilamunan para sa Templo sang Kirtland.

Doktrina kag mga Kasugtanan 97:8–9

“Ginabaton ko sila.”

Panumduma ang panahon sang ginbaton ka—ukon wala ginbaton—sa isa ka grupo ukon team. Ano ang palarehas ukon kinalain sa ginatudlo sa Doktrina kag mga Kasugtanan 97:8–9 parte sa buot silingon sang ginabaton sang Ginuo? Ano sa banta mo ang gusto itudlo sa imo sang Ginuo sa paanggid sa bersikulo 9?

Magpahamtang sang espiritwal nga palibot para sa pagtuon kag pagtudlo. “Ang Balaan nga Espiritu,” ginpromisa ni Jesus, “magatudlo sa inyo sang tanan nga butang” (Juan 14:26). Gani kon nagatuon ka nga ikaw lang ukon may upod nga iban, himoa nga prayoridad nga agdahon ang Espiritu. Ang sagrado nga musika, pangamuyo, kag mapinalanggaon nga pagpakig-upod tanan makabulig pahamtang sang matawhay, espirituhanon nga palibot nga sa diin ang Balaan nga Espiritu pwede magtudlo sa imo sang kamatuoran.

Doktrina kag mga Kasugtanan 97:18–28

Ang Sion amo ang “putli sing tagipusuon.”

Para sa mga Santos sang tinuig 1830, ang Sion isa ka lugar. Sa rebelasyon sa seksyon 97, ginpalapad sang Ginuo ang kahulugan agud ilaragway ang isa ka katawhan—“ang putli sing tagipusuon” (bersikulo 21). Samtang ginabasa mo ang mga bersikulo 18–28, pwede mo buslan ini nga kahulugan kon mabasa mo ang tinaga nga Sion. Ano ang buot silingon para sa imo sang mangin putli sang tagipusuon?

Tan-awa sa Moises 7:18.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 95:8; 97:10–17

Ang templo amo ang balay sang Ginuo.

• Basi masadyahan ang imo kabataan nga kuno abi nagabulig sila sa pagpatindog sang Templo sang Kirtland (nagapanglagari sang kahoy, nagapamanday, nagapangpinta, kag madamo pa). Pwede mo man nga ipakita sa ila ang litrato sang Templo sang Kirtland, pareho sang ari sa sining outline, samtang ginabasa mo ang Doktrina kag mga Kasugtanan 95:8 para itudlo sa imo kabataan kon ngaa gusto sang Ginuo nga magpatindog kita sang mga templo.

The Kirtland Temple

• Pagkatapos nga basahon sing ululupod ang Doktrina kag mga Kasugtanan 97:15–16, pwede ninyo iistorya sa kada isa kon ngaa espesyal ang templo sa inyo. Pwede man kamo magkanta sang kanta nga makabulig sa imo kabataan nga makabatyag sang pagtahod sa balay sang Ginuo. Ngaa sagrado ang templo?

Doktrina kag mga Kasugtanan 97:1–2, 8–9, 21

Ang Sion amo ang “putli sing tagipusuon.”

• Para buligan ang imo kabataan nga maintiendihan kon ano ang buot silingon sang tinaga nga putli sa Doktrina kag mga Kasugtanan 97:21, pwede ninyo ululupod nga tan-awon ang baso sang tinlo nga tubig kag butangan ang tubig sang higko (pareho sang balas ukon paminta [pepper]). Ngaa importante nga putli ang tubig? Dayon pwede ninyo basahon sang imo kabataan ang bersikulo 21 kag itudlo ang tinaga nga putli. Ano ang buot silingon sang mangin putli ang aton mga tagipusuon? Makahatag sang mga ideya ang mga bersikulo 1–2 kag 8–9. Paano kita ginabuligan sang Manluluwas nga tinloan ang aton mga tagipusuon?

Gusto sang Amay nga Langitnon nga mangin putli ako sing tagipusuon.

Doktrina kag mga Kasugtanan 97:8–9

Ginabugayan sang Ginuo ang mga tawo nga nagatuman sang mga kasugtanan upod sa Iya.

• Kahibalo bala ang imo kabataan kon ano nga mga kasugtanan ang aton ginahimo upod sa Ginuo sang ginbunyagan kita ukon sang ara kita sa templo? Pamensara nga rebyuhon ina nga mga kasugtanan upod sa ila paagi sa pagbasa sang Mosias 18:9–10, 13 ukon Libro sang Pangkabilogan nga Pagsulundan, 27.2. Iistorya sa kada isa kon paano ninyo ginatinguhaan nga “magtuman sang [inyo] mga kasugtanan paagi sa pagsakripisyo” (Doktrina kag mga Kasugtanan 97:8).

• Pwede mo hagaron ang imo kabataan nga idrowing kon ano ang ginalaragway sa Doktrina kag mga Kasugtanan 97:9. Samtang ginapakita nila ang ila mga gindrowing, hambali kon paano ka ginbugayan sang Ginuo tungod ginatuman mo ang imo mga kasugtanan. Paano ang mga bugay nangin daw pareho sang “palabunga kaayo nga kahoy nga gintanom … sa tupad sing isa ka matin-aw nga sapa”?

Para sa dugang nga mga ideya, tan-awa sa isyu sang Abyan nga magasin sini nga bulan.

Building the Kirtland Temple [Pagpatindog sang Templo sang Kirtland], ni Walter Rane