Detalye halin sa I See the Son of Man [Nakita ko ang Anak sang Tawo], ni Walter Rane

Agosto 25–31: “Batona ang Iya Kabug-osan”

Doktrina kag mga Kasugtanan 93

“Kon magsaka ka sa hagdan,” gintudlo ni Joseph Smith, “kinahanglan mo nga magsugod sa idalom, kag magsaka sing amat-amat, tubtob makalab-ot ka sa ibabaw; kag amo man sini sa mga prinsipyo sang ebanghelyo—kinahanglan mo magsugod sa puno, kag magpadayon tubtob nga matun-an mo ang tanan nga mga prinsipyo sang pagkahitaas” (Teachings of Presidents of the Church: Joseph Smith [2007], 268).

Kon kaisa inang hagdan sang pangkahitaasan daw tama gid kataas, pero ginbata kita para magsaka sa ibabaw upod ang pirme nga bulig sang Manluluwas. Kon ano man ang limitasyon nga nakita naton sa aton kaugalingon, nakita sang Amay nga Langitnon kag sang Iya Anak ang butang nga mahimayaon sa aton, butang nga diosnon. Pareho nga si Jesucristo “sa ginsuguran kaupod sa Amay,” gani “kita man” (Doktrina kag mga Kasugtanan 93:21, 23). Pareho sa Iya nga “padayon nga nagdugang sang grasya sa grasya, tubtob nga nabaton niya ang kabug-osan,” gani kamo man “magabaton sang grasya sa grasya” (mga bersikulo 13, 20). Ang ginpanumbalik nga ebanghelyo nagatudlo parte sa matuod nga kinaiya sang Dios, kag nagatudlo man ini parte sa imo tunay nga kinaiya kag kapalaran. Literal ka nga anak sang Dios nga may potensyal nga “sa nagakaigo nga tion makabaton sang iya kabug-osan” (bersikulo 19).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 93

Pareho kay Jesucristo, sarang ko himayaon kag mabaton ang “kabug-osan” sang Dios.

Si Propetang Joseph Smith nagtudlo, “Kon indi maintiendihan sang mga tawo ang karakter sang Dios, indi man nila maintiendihan ang ila mga kaugalingon” (Teachings: Joseph Smith, 40). Samtang nagatuon ka parte sa Manluluwas paagi sa pagbasa sang Doktrina kag mga Kasugtanan 93, pangitaa man kon ano ang imo matun-an parte sa imo kaugalingon. Halimbawa, ano ang imo natun-an parte sa Iya sa mga bersikulo 3, 12–13, 21, kag 26? Ano nga pareho nga mga kamatuoran ang imo nakita parte sa imo kaugalingon sa mga bersikulo 20, 23, kag 28–29? (tan-awa man sa 1 Juan 3:2; 3 Nefi 27:27). Ang masunod nga mga pamangkot mahimo nga makabulig sa imo nga maintiendihan kag ipangabuhi ang mga kamatuoran sa sining seksyon:

• Ano sa pamatyag mo ang buot silingon sang magbaton sing “grasya sa grasya” kag magpadayon nga “nagadugang sang grasya sa grasya”? (mga bersikulo 12–13). Kon makabulig, pwede mo basahon ang “Grasya” sa Giya sa Balaan nga mga Kasulatan (Librarya sang Ebanghelyo).

• Ano ang imo nadiskubrehan sa sining rebelasyon kon paano ka ginabuligan sang Dios nga magtubo kag magtuon? Paano nakaapekto ang paghibalo sini sa paagi nga ginatrato mo ang iban—kag ang imo kaugalingon?

• Ano ang imo natun-an parte sa “kon paano magsimba, kag … kon ano ang inyo ginasimba”? (bersikulo 19; tan-awa man sa Giya sa Balaan nga mga Kasulatan, “Pagsimba,” Librarya sang Ebanghelyo).

Doktrina kag mga Kasugtanan 93:1–39

Ang himaya sang Dios kasanag kag kamatuoran.

Mahimo nga natalupangdan mo nga ang mga tinaga nga himaya, kasanag, kag kamatuoran masami nga nagagwa sa sining rebelasyon. Samtang ginatun-an mo ilabi na gid ang mga bersikulo 20–39, ilista ang mga kamatuoran nga imo natun-an parte sa sining mga konsepto. Mahimo nga makabulig ang paghimo sang tsart nga pareho sini:

Bersikulo	Ano ang akon natun-an	Mga pamangkot nga dapat binagbinagon
Bersikulo 24	Ano ang akon natun-an	Mga pamangkot nga dapat binagbinagon Kadamo sang pagpatalang sa kalibutan. Paano ko mahibal-an ang kamatuoran? (tan-awa man sa Jacob 4:13).
Bersikulo 28	Ano ang akon natun-an	Mga pamangkot nga dapat binagbinagon
Bersikulo 36	Ano ang akon natun-an Ang Dios isa ka persona sang kasanag kag kamatuoran.	Mga pamangkot nga dapat binagbinagon
Bersikulo 37	Ano ang akon natun-an	Mga pamangkot nga dapat binagbinagon Sin-o ang kilala ko nga daw makabato sa malain nga mga impluwensya? Ngaa mahimo nila ini?
Bersikulo	Ano ang akon natun-an	Mga pamangkot nga dapat binagbinagon
Bersikulo	Ano ang akon natun-an	Mga pamangkot nga dapat binagbinagon
Bersikulo Tan-awa man sa: Doktrina kag mga Kasugtanan 50:24	Ano ang akon natun-an	Mga pamangkot nga dapat binagbinagon

Ano ang imo nakita sa sining mga bersikulo nga nagainspirar sa imo nga handumon ang mas dako nga kasanag kag kamatuoran? Ngaa ang kasanag kag kamatuoran maayo nga mga titulo para kay Jesucristo? (tan-awa sa Juan 8:12; 14:6). Paano nakaapekto ining mga kamatuoran sa imo kabuhi?

Pwede mo man tandaan ang mga promisa parte sa imo wala katapusan nga kapalaran sa mga bersikulo 20, 22, 28, 33–35. Ano ang relasyon sining mga promisa kag sang pag-angkon sang kasanag?

Pamensara nga basahon ang “Maglakat sa Kasanag sang Dios” (Para sa Kusog sang mga Lamharon: Giya sa Paghimo sang mga Pagpili, 18–21) para hibaluon kon ano ang pwede mo himuon para makabaton sang kasanag kag kon paano nagapromisa ang Ginuo nga bugayan ka.

Light and Truth, Part 1

(D&C 88:6-13) This video examines God's attributes of light and truth as explained in section 88 of the Doctrine and Covenants.

Light and Truth, Part 2

(D&C 93:28,36-40) This video examines God's attributes of light and truth as explained in section 88 of the Doctrine and Covenants.

“Ang himaya sang Dios … kasanag kag kamatuoran.”

Doktrina kag mga Kasugtanan 93:40–50

“Ipahamtang mo sa kahusay ang imo panimalay.”

Ang sugo nga “ipahamtang mo sa kahusay ang imo panimalay” (bersikulo 43) indi parte sa paghipid sang mga platera kag mga kabinet kundi parte sa pagtudlo—kag pagtuon—sang “kasanag kag kamatuoran” (bersikulo 42). Pamensara kon paano mo ginatinguhaan nga sundon ini nga laygay. Ano nga mga kabudlayan ang imo ginaatubang? Ano nga mga kamatuoran sa Doktrina kag mga Kasugtanan 93 ang makabulig?

Ano nga mga ideya ang imo nabaton sa sining mga pinanudlo ni Elder David A. Bednar?

“Sa akon opisina may matahum nga larawan sang talamnan sang trigo. Ang larawan isa ka dako nga koleksyon sang indibidwal nga kurit—nga ang nagpanami amo nga wala sang nagaseparar sa kada isa. Ang matuod, kon palapitan mo ang kanbas, ang makita mo lang amo ang madamo nga daw wala sang relasyon kag malaw-ay nga lamhit sang dalag kag bulawan kag kolor-tsokolate nga pinta. Pero, kon amat-amat ka nga magdistansya sa kanbas, ang tanan nga indibidwal nga palhit nagatingob kag nagahimo sang matahum nga talan-awon sang talamnan sang trigo. Madamo nga ordinaryo, tag-isaisa nga palhit nga nagtingob para maghatag sang makalilingaw kag matahum nga larawan.

“Ang tagsa ka pangamuyo sa pamilya, ang tagsa ka tion sang pang-pamilya nga pagtuon sang balaan nga mga kasulatan, kag tagsa ka family home evening isa ka palhit sa kanbas sang aton mga kalag. Wala sing isa ka hitabo nga mangin dako kaayo ukon indi malipatan. Pero pareho sang dalag kag bulawan kag kolor-tsokolate nga mga palhit sang pinta nga nagabagay sa kada isa kag nagatuga sang matahum nga obra-maestra, gani amo man ang aton katayuyon sa paghimo sang ginakabig nga magagmay nga mga butang ang mahimo magdala sang dalagko nga espirituhanon nga mga resulta. “Karon, indi magpaluya sa paghimo sang maayo, kay nagapasad kamo sang pundasyon sing isa ka dako nga buluhaton. Kag halin sa magagmay nga mga butang nagaluntad inang mga dalagko” [Doktrina kag mga Kasugtanan 64:33]. Ang aton katayuyon sa paghimo sang ginakabig nga magagmay nga mga butang ang mahimo magdala sang dalagko nga espirituhanon nga mga resulta” (“More Diligent and Concerned at Home,” Liahona, Nob. 2009, 19–20).

Tan-awa man sa Henry B. Eyring, “Puluy-an nga sa Diin ang Espiritu sang Ginuo Nagapabilin,” Liahona, Mayo 2019, 22–25.

Ginasugo sang Ginuo ang mga ginikanan nga “padakuon ang [ila] mga anak sa kasanag kag kamatuoran.”

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 93:2–21

Si Jesucristo ang Kasanag kag Kabuhi sang Kalibutan.

• Pamensara nga magpakita sang litrato sang Manluluwas kag magpamangkot sa imo kabataan kon ngaa importante ang magtuon kag magsunod kay Jesucristo. Dayon pwede ninyo basahon sing ululupod ang Doktrina kag mga Kasugtanan 93:19 para diskubrehon ang isa ka importante nga rason.

• Basi gusto mo pilion ang pila ka kamatuoran parte kay Cristo sa seksyon 93 nga nagainspirar sa imo kag buligi ang imo kabataan nga diskubrehon kag maintiendihan ini. Sa kada kamatuoran nga imo ginpili, pwede mo hatagan ang imo kabataan sang isa ka tinaga ukon dinalan nga pamatian samtang ginabasa ninyo ang bersikulo sing ululupod. Halimbawa, Jesucristo:

  • Naghimo sang mga buluhaton sang Amay (bersikulo 5).

  • Amo ang Kasanag sang Kalibutan (bersikulo 9).

  • Ang Tagtuga sang kalibutan (bersikulo 10).

  • Nagbaton sang tanan nga gahum sa langit kag sa duta (bersikulo 17).

  • Kaupod sang Dios sa ginsuguran (bersikulo 21).

  Chapter 33: A Revelation about Jesus Christ: May 1833

Detalye halin sa Light of the World [Kasanag sang Kalibutan], ni Howard Lyon

Doktrina kag mga Kasugtanan 93:23, 29, 38

Nagpuyo ako upod sa Langitnon nga Amay antes ako magkadto sa duta.

• Tatlo ka beses nga ginklaro sang Manluluwas sa seksyon 93 nga nagpuyo kita upod sa Dios “sa ginsuguran” (mga bersikulo 23, 29, 38). Para buligan ang imo kabataan nga diskubrehon ini, pwede mo sila hagaron nga basahon ang Doktrina kag mga Kasugtanan 93:23, 29, 38 kag pangitaon ang kamatuoran parte sa ila kaugalingon nga ginsulit sa sining mga bersikulo. Ngaa gusto sang Amay nga Langitnon nga mahibal-an naton ining kamatuoran? Pwede mo man pamangkuton ang imo kabataan kon ano ang ila nahibal-an parte sa aton kabuhi upod sa aton Amay nga Langitnon antes kita ginbata. Para buligan sila nga makahibalo pa gid, basaha upod sa ila ang isa ukon masobra pa nga mga dinalan sa balaan nga mga kasulatan: Jeremias 1:5; Doktrina kag mga Kasugtanan 138:53–56; Moises 3:5; Abraham 3:22–26.

• Pwede man ninyo kantahon sing ululupod ang “I Am a Child of God [Ako Anak sang Dios]” (Children’s Songbook, 2–3, 4) kag hambali ang mga kamatuoran nga natun-an naton sa sining mga kanta parte sa aton katuyuan sa pagkadto sa duta.

Doktrina kag mga Kasugtanan 93:24–39

Makabaton ako sang kasanag kag kamatuoran kon tumanon ko ang Dios.

• Para buligan ang imo kabataan nga ipangabuhi ang mga kamatuoran parte sa pagkamatinumanon sa Doktrina kag mga Kasugtanan 93, pamensara nga isulat ang pila ka reperensya sa balaan nga kasulatan sa sini nga seksyon sa mga panid sang papel. Sa lainlain nga papel, isulat ang mga kamatuoran nga ginatudlo sang tagsa sining mga bersikulo. Pwede nga bululigan sang imo kabataan nga basahon ang mga bersikulo kag pareson ang mga kamatuoran sa mga reperensya sa balaan nga kasulatan. Pwede nga upod sa mga halimbawa ang masunod:

  • Bersikulo 24: Ang kamatuoran amo ang paghibalo sang mga butang nga matuod sang una, sa karon, kag sa palaabuton.

  • Bersikulo 28: Makabaton ako sang kasanag kag kamatuoran kon tumanon ko ang mga kasuguan.

  • Bersikulo 37: Kon ara sa akon ang kasanag kag kamatuoran, mabatuan ko ang kalainan.

  • Bersikulo 39: Madula sa akon ang kasanag kag kamatuoran kon wala ako nagatuman.

  Basi gusto mo nga iistorya ang mga halimbawa sang mga kamatuoran nga imo natun-an samtang ginatuman mo ang mga kasuguan sang Ginuo.

Ibagay sa mga edad sang imo kabataan. Nakahibalo ka sang panginahanglan kag ikasarang sang imo kabataan; ibagay ang mga ideya sa kahiwatan para masabat ang ila mga panginahanglan. Halimbawa, sa sining kahiwatan, kon nagatudlo ka sang magagmay nga kabataan, mas maayo nga magtutok sa isa ka simple nga kamatuoran sa seksyon 93.

Para sa dugang nga mga ideya, tan-awa sa isyu sang Abyan nga magasin sini nga bulan.

Light and Truth [Kasanag kag Kamatuoran], ni Simon Dewey