Ang Eskwelahan sang mga Propeta ginhiwat sa sining kuwarto.

Agosto 11–17: “Ipahamtang … ang Balay sang Dios”

Doktrina kag mga Kasugtanan 88

Sa masami, ginahatagan kita sang Ginuo sang ideya parte sa Iya wala tupong nga “pagkahari kag gahum” (Doktrina kag mga Kasugtanan 88:47) paagi sa matahum nga mga rebelasyon. Ang Doktrina kag mga Kasugtanan 88 amo sina nga klase sang rebelasyon—isa nga parte sa kasanag kag himaya kag mga ginharian nga makahimo sang aton dutan-on nga mga kabalaka nga daw magagmay lang kon ikumparar. Bisan indi pa naton matungkad ini tanan, mabatyagan na naton nga may madamo pa gid parte sa katubtuban sangsa aton naintiendihan. Siyempre, wala ginhambal sang Ginuo ining dalagko nga mga kamatuoran para mahadlok kita ukon makabatyag nga kubos. Ang matuod, nagpromisa Sia, “Magaabot ang adlaw nga mahangpan ninyo sa pagkamatuod ang Dios” (bersikulo 49; emphasis gindugang). Siguro amo sina ang mahimayaon nga katuyuan nga ginsugo sang Ginuo ang Iya mga Santos sa Kirtland nga magtukod sang Eskwelahan sang mga Propeta. “I-organisar ang inyo mga kaugalingon,” siling Niya. “Ihanda ang tagsa ka kinahanglanon nga butang; kag ipahamtang … ang balay sang Dios” (bersikulo 119). Labaw sa bisan diin pa man, sa sulod sang balaan nga balay sang Dios—kag sa sulod sang aton mga puluy-an—nga sarang Niya bayawon ang aton panulukan lapaw pa sa dutan-on nga kalibutan, “ipakita ang iya nawong sa [aton],” kag ihanda kita nga “[magbatas] sang selestiyal nga himaya” (mga bersikulo 68, 22).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 88

Si Jesucristo nagatanyag sa akon sang paghidaet.

Pila lang ka adlaw pagkatapos sang paandam nga ang giyera “igabubo sa tanan nga nasyon (Doktrina kag mga Kasugtanan 87:2), naghatag ang Ginuo sang rebelasyon nga gintawag ni Joseph Smith nga “dahon sang olivo,” … nga amo ang tradisyunal nga simbolo sang paghidaet” (Doktrina kag mga Kasugtanan 88, tig-ulo sang seksyon; tan-awa man sa Genesis 8:11). Sa bilog mo nga pagtuon sang seksyon 88 sini nga semana, pangitaa ang mga mensahe sang paghidaet sang Ginuo sa imo.

Doktrina kag mga Kasugtanan 88:6–67

Ang kasanag kag layi nagahalin kay Jesucristo.

Ang mga tinaga nga kasanag kag layi ginsulit sing madamo nga beses sa seksyon 88. Markahi ukon tandai ang mga bersikulo kon diin mo nakita ining mga tinaga sa mga bersikulo 6–67, kag isulat ang imo natun-an parte sa kasanag kag kasuguan—kag parte kay Jesucristo. Ano ang ginapabatyag sa imo nga himuon para makabaton sang kasanag kag mapangabuhi ang “layi ni Cristo”?(bersikulo 21).

Tan-awa man sa Isaias 60:19; Juan 1:1–9; 3 Nefi 15:9; Sharon Eubank, “Si Cristo: Ang Kapawa Nga Nagasiga sa Kadudulman,” Liahona, Mayo 2019, 73–76.

Ang balaan nga mga kasulatan nagaunod sang layi ni Cristo.

Doktrina kag mga Kasugtanan 88:62–64

“Magpalapit sa akon.”

Ano nga mga eksperiyensya ang nagpakita sa imo nga ang mga promisa sa sining mga bersikulo matuod? Ano ang dason mo nga obrahon para “magpalapit” kay Cristo?

Doktrina kag mga Kasugtanan 88:67–76

Sarang ako matinloan paagi sa Pagbayad-Sala ni Jesucristo.

Ang sugo sang Ginuo nga “pakabalaana ang inyo mga kaugalingon” kaduha makita sa seksyon 88 sa (mga bersikulo 68, 74). Ano sa banta mo ang kahulugan sining dinalan? Pwede mo rebyuhon ang pila ka dinalan sa idalom sang “Pagpakabalaan” sa Giya sa Balaan nga mga Kasulatan (Librarya sang Ebanghelyo). Paano kita mangin balaan? Gamita ining pamangkot bilang giya sa imo pagtuon sang Doktrina kag mga Kasugtanan 88:67–76, kag isulat ang bisan ano nga espirituhanon nga panghunahuna nga imo mabaton.

Doktrina kag mga Kasugtanan 88:77–80, 118–26

Magpangita sang kinaalam, bisan paagi sa pagtuon kag paagi man sa pagtuo.”

Ginsugo sang Ginuo ang mga Santos nga magpahamtang sang “eskwelahan sang mga propeta” sa Kirtland (Doktrina kag mga Kasugtanan 88:137). Kalabanan sa instruksyon sa seksyon 88 nagtudlo sa ila kon paano ini himuon. Ini nga instruksyon makabulig man sa inyo nga “ipahamtang … ang balay sang pagtuon” (bersikulo 119) sa imo kaugalingon nga kabuhi. Ang matuod, pwede mo kabigon ang mga bersikulo 77–80 kag 118–26 bilang mga sulundan para “tukuron liwat ang imo puluy-an [ukon imo kabuhi] nga sentro sang pagtuon sang ebanghelyo” kag “santuaryo sang pagtuo” (Russell M. Nelson, “Ang Magmangin Huwaran nga mga Santos sa Ulihing mga Adlaw,” Liahona, Nob. 2018, 113). Mangin makawiwili nga idrowing kon ano ang hitsura sang personal mo nga “pagtukod liwat”, upod ang mga dinalan sa sining mga bersikulo nga pamatyag mo kinahanglan mo ipangabuhi.

Basi makabulig man nga tun-an ining mga pamangkot: Ngaa importante ang pagtuon kag edukasyon sa Ginuo? Ano ang gusto Niya nga tun-an ko? Paano ang gusto Niya nga magtuon ako? Pangitaa ang mga sabat sa sining mga pamangkot sa mga bersikulo 77–80 kag sa “Hilwayon kamo sang kamatuoran” (Para sa Kusog sang mga Lamharon: Giya sa Paghimo sang mga Pagpili, 30–33).

Ano sa banta mo ang buot silingon sang maghibalo “paagi sa pagtuon kag paagi man sa pagtuo”? (bersikulo 118). Ano nga mga ideya ang imo nabaton sa mensahe ni Elder Mathias Held “Pagpangita sang Kaalam paagi sa Espiritu”? (Liahona, Mayo 2019, 31–33).

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 88:33

Ang Amay nga Langitnon nagahatag sang maayo nga mga regalo.

• Pwede mo sugdan ang diskusyon parte sa Doktrina kag mga Kasugtanan 88:33 paagi sa pagpangabay sa imo kabataan nga iistorya ang mga regalo nga ginhatag sa ila—ang mga nasadyahan sila sa pagbaton kag ang iban nga wala sila masadyahi. Basi pwede nila idrama-drama nga nasadyahan sa pagbaton sang regalo. Dayon pwede ninyo hambalan ang mga regalo nga ginahatag sang Amay nga Langitnon sa aton (pareho sang dulot sang Balaan nga Espiritu). Paano naton batunon ining mga regalo nga may kasadya?

Doktrina kag mga Kasugtanan 88:63

Kon pangitaon ko ang Manluluwas, makita ko Sia.

• Ang Doktrina kag mga Kasugtanan 88:63 may aksyon nga mga tinaga nga makainspirar sang masadya nga hilimuon para paisugon ang imo kabataan nga pangitaon ang presensya sang Ginuo sa ila mga kabuhi. Halimbawa, pwede kamo mamensar sang imo kabataan sang hampang para maistoryahan ang dinalan nga “pangitaa ako sing matutum kag makita ninyo ako” (emphasis gindugang) ukon “magpanuktok kag pagabuksan ini sa inyo”?

Ang kabataan nagakinahanglan sang lainlain nga pamaagi sa pagtudlo. “Kalabanan sa mga kabataan makatuon sing maayo kon ginagamit ang madamo nga igbalatyag. Magpangita sang paagi nga buligan ang kabataan nga gamiton ang ila panulukan, palamatin-an, kag pagtandog samtang nagatuon sila. Sa iban nga mga sitwasyon, pwede mo man gani pangitaan sang paagi nga magamit nila ang ila panimaho kag panabor!” (Pagtudlo sa Paagi sang Manluluwas, 32).

• Para ipaathag ang imbitasyon sang Manluluwas nga “magpalapit sa akon,” pwede mo pakaptan sa isa ka bata ang litrato ni Jesus (pareho sang litrato nga ara sa punta sining outline) sa isa ka parte sang kuwarto samtang ang iban nga kabataan nagatindog sa pihak nga parte sang kuwarto. Mientras nagapanumdom ang imo kabataan kon ano ang pwede nila himuon para mangin mas malapit sa Manluluwas, pwede sila magtikang padulong sa litrato, kag ang bata nga nagakapyot sang litrato pwede magtikang palayo. Hambali upod sa imo kabataan kon paano ka nagapalapit sa Manluluwas kag kon paano Sia nagapalapit sa imo. Pwede ka man magkanta upod sa ila sang parte sa sining topiko.

Doktrina kag mga Kasugtanan 88:77–80, 118

Gusto sang Amay nga Langitnon nga magtuon ako.

• Ipaistorya sa imo kabataan kon ano ang ila ginatun-an sa eskwelahan ukon sa Primary. Pwede mo man ipakigbahin ang mga butang nga imo ginatun-an. Dayon ipakita sa imo kabataan ang tinaga nga ano, ngaa, kag paano. Buligi sila nga pangitaon sa Doktrina kag mga Kasugtanan 88:77–79 para mahibal-an nila kon ano ang gusto sang Ginuo nga ila matun-an. Dayon ulupod nga basahon ang bersikulo 80 para mahibal-an kon ngaa gusto Niya nga magtuon kita kag ang bersikulo 118 para mahibal-an kon paano kita magtuon.

“Magpangita sang kinaalam … paagi sa pagtuon kag paagi man sa pagtuo.”

Doktrina kag mga Kasugtanan 88:119

Ang aton balay pwede mangin balaan pareho sang templo.

• Samtang ginabasa mo ang Doktrina kag mga Kasugtanan 88:119 sa imo kabataan, pwede sila maghimo sang tore sang templo (temple spire) gamit ang ila mga butkon tagsa nga mabatian nila ang tinaga nga “balay.” Ipaathag nga gusto sang Amay nga Langitnon nga magpatindog si Joseph Smith kag ang mga Santos sang templo, ukon sang “balay sang Dios.”

• Pwede mo pangabayon ang imo kabataan nga magpili sang pito ka tinaga nga nagalaragway sang ila puluy-an. Dayon buligi sila sa pagpangita, sa Doktrina kag mga Kasugtanan 88:119, sang pito ka tinaga nga gingamit sang Ginuo para ilaragway ang Iya balay. Paano naton himuon ang aton puluy-an nga “balay sang Dios”?

Para sa dugang nga mga ideya, tan-awa sa isyu sang Abyan nga magasin sini nga bulan.

Be Not Afraid [Indi Magkahadlok], ni Michael Malm