Agosto 4–10: “Magtindog Kamo sa Balaan nga mga Lugar”

Doktrina kag mga Kasugtanan 85–87

Ang Adlaw sang Paskwa masami tion sa pagbinagbinag sang mga mensahe pareho sang “paghidaet sa duta” (tan-awa sa Lucas 2:14). Pero sang Disyembre 25, 1832, okupado ang hunahuna ni Joseph Smith sa katalagman sang giyera. Bag-o lang gid nagbato ang estado sang South Carolina sa gobyerno sang Estados Unidos kag nagahanda sa giyera. Kag ginpahayag sang Ginuo nga panugod pa lamang ini: “Ang giyera,” siling Niya, “igabubo sa tanan nga nasyon” (Doktrina kag mga Kasugtanan 87:2). Dawsa ining propesiya matabo gid sa indi madugay sadto.

Pero wala man. Pila lang ka semana, ang South Carolina kag ang gobyerno sang Estados Unidos nakalab-ot sa pagsugtanay, kag nalikawan ang giyera. Pero ang rebelasyon, wala pirme nagakatuman sa tiyempo ukon sa paagi nga aton ginapaabot. Halos 30 ka tuig pagkatapos, madugay na nga ginpatay si Joseph Smith, nagrebelde ang South Carolina kag nagsunod ang inaway sibil. Sugod sadto, ang giyera sa bilog nga kalibutan nagtuga sang “duta [nga] magpangalisud” (Doktrina kag mga Kasugtanan 87:6). Ang balor sining rebelasyon wala sa pagpakot kon san-o matabo ang kalamidad kundi sa pagtudlo kon ano ang himuon kon mag-abot ini. Ang laygay pareho lang sang 1831, 1861, kag 2025: “Magtindog kamo sa balaan nga mga lugar, kag indi maisdog” (bersikulo 8).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 85:1–2

Gusto sang Ginuo nga “magtipig [ako] sang kasaysayan.”

Pat-ini kon ano ang gusto sang Ginuo nga isulat sa “kasaysayan” nga ginlaragway sa Doktrina kag mga Kasugtanan 85:1–2. Ngaa sa banta mo nga gusto Niya nga magtipig ang Iya mga Santos sang kasaysayan? Ano ang pwede mo isulat parte sa imo “pamaagi sang pagpangabuhi, pagtuo, kag mga binuhatan” nga mangin bugay sa imo kag sa palaabuton nga mga henerasyon? Paano makabulig sa imo ang pagsulat sang personal nga kasaysayan nga magpalapit kay Cristo?

ChurchofJesusChrist.org.

Turning Hearts

A Great-Grandfather's journal helps a young man gain direction in his life and appreciation for his ancestors.

Doktrina kag mga Kasugtanan 85:6

Ang Espiritu nagahambal sa “mahinay diutay nga tingug.”

Binagbinaga ang mga pulong nga gingamit ni Joseph Smith para ilaragway ang Espiritu sa Doktrina kag mga Kasugtanan 85:6. Sa ano nga punto nangin “mahinay” kag “diutay” ang tingug sang Espiritu? Pamensara ining dugang nga mga paglaragway nga ginhatag paagi kay Joseph Smith: Doktrina kag mga Kasugtanan 6:22–24; 8:2–3; 9:7–9; 11:12–13; 128:1. Paano nagapakighambal ang Espiritu sa imo?

Tan-awa man sa Lucas 24:32; Mosias 5:2; Alma 32:28; Helaman 5:30; Doktrina kag mga Kasugtanan 6:22–23; 11:12–13.

Maggamit sang object lesson (leksyon gamit ang isa ka bagay). Mas madumduman sang mga tawo ang leksyon sang ebanghelyo kon makita nila ukon makapartisipar sa isa ka object lesson nga may koneksyon sa ila ginatun-an. Halimbawa, kon magtudlo parte sa mahinay, gamay nga tingug sang Espiritu, basi pwede ka magpatukar sang ginrekord nga mahinay, sagrado nga musika, kag istoryahan sang mga nagatuon kon ano ang ginapabatyag sa ila sang musika kag kon ano kabudlay ini mabatian kon may nagasabad nga ginahod. Pwede ini magresulta sa diskusyon parte sa mga sablag sa aton kabuhi nga nagapugong sa aton nga mabatian ang mahinay, gamay nga tingug.

Ginalaragway sang balaan nga mga kasulatan ang tingug sang Espiritu nga mahinay, gamay nga tingug.

Doktrina kag mga Kasugtanan 86

Ang mga matarong tipunon kay Cristo sa ulihing mga adlaw.

Ang Doktrina kag mga Kasugtanan 86 nagaunod sang paathag sang Ginuo parte sa paanggid sang trigo kag gamhon [tares], nga makita sa Mateo 13:24–30, 37–43. Samtang ginatun-an mo ang kahulugan sining paanggid, pamensara nga maghimo sang tsart pareho sini:

Mga Simbolo	Posible nga mga kahulugan	Mga pamangkot nga dapat binagbinagon
Mga Simbolo Mga manugsabwag sang binhi	Posible nga mga kahulugan Mga propeta kag apostoles	Mga pamangkot nga dapat binagbinagon Ano nga mga klase sang “binhi” ang ginatanom sang mga propeta kag apostoles?
Mga Simbolo Ang kaaway	Posible nga mga kahulugan Satanas	Mga pamangkot nga dapat binagbinagon Paano ginatinguhaan sang kaaway nga punggan ang buluhaton sang Ginuo?
Mga Simbolo	Posible nga mga kahulugan	Mga pamangkot nga dapat binagbinagon
Mga Simbolo	Posible nga mga kahulugan	Mga pamangkot nga dapat binagbinagon

Ari ang pila ka dugang nga mga pamangkot nga dapat pamensaron:

• Pagkatapos nga ipaathag ang paanggid, naghambal ang Ginuo parte sa priesthood, pagpanumbalik, kag kaluwasan sang Iya katawhan (tan-awa sa mga bersikulo 8–11). Ano nga mga koneksyon ang nakita mo sa tunga sining mga bersikulo kag sa paanggid sang trigo kag mga gamhon?

• Ano ang imo papel para mangin “kasanag sa mga Gentil kag “manluluwas sa katawhan [sang Ginuo]”? (bersikulo 11).

Doktrina kag mga Kasugtanan 87

Ang paghidaet makita sa “balaan nga mga lugar.”

Ang propesiya sa seksyon 87 nagapaandam batok sa pisikal nga mga peligro sang giyera sa ulihing mga adlaw. Pero ang laygay sa sining rebelasyon magamit man sa espirituhanon nga mga peligro. Binagbinaga ang mga pamangkot pareho sang masunod:

• Ang propesiya isa ka rebelasyon halin sa Dios sa isa ka propeta, kasami parte sa palaabuton. Ano ang mga halimbawa sang mga propesiya nga ginhatag sang dumaan kag moderno nga mga propeta? (tan-awa sa Juan 3:14; Mosias 3:5; Helaman 14:2–6). Paano ini natuman? (tan-awa sa Lucas 23:33; Mateo 15:30–31; 3 Nefi 1:15–21).

• Ano ang mga bugay sang pagbaton sang mga propesiya sang mga propeta sang Dios?

Nga ginatandaan ina, basaha ang seksyon 87. (Para may konteksto sa kasaysayan, basi gusto mo man basahon ang introduksyon sining outline.) Ano ang imo natun-an parte sa propesiya sa sining rebelasyon kag sa paagi nga natuman ini? Ano ang imo ihambal sa tawo nga nagaduhaduha sa propesiya tungod wala ini matuman dayon?

Ano nga laygay ang ginahatag sang Ginuo sa bersikulo 8? Ano ang imo “balaan nga mga lugar” kon diin ka makakita sang kalinong kag proteksyon sa katalagman? Ano ang nagahimo sang isa ka lugar nga balaan? Dugang pa sa pisikal nga mga lokasyon, basi may balaan nga mga tion, balaan nga pangginawi, ukon balaan nga mga panghunahuna nga makahatag sang paghidaet. Halimbawa, paano mangin balaan nga lugar ang mga pulong sang mga propeta sang Dios para sa imo? Ano ang buot silingon sang “magtindog” kag “indi maisdog” sa sining mga lugar?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 85:6

Ang Espiritu nagahambal sa “mahinay diutay nga tingug.”

• Ano ang ihambal sang imo kabataan kon may mamangkot sa ila kon paano nila mahibal-an nga nagahambal ang Balaan nga Espiritu sa ila? Hagara sila nga basahon ang isa ka paagi nga ginlaragway ni Joseph Smith ang tingug sang Espiritu sa Doktrina kag mga Kasugtanan 85:6. Pwede nila dayon praktisan ang pagpamati kag paghambal sa mahinay nga tingug. Pwede mo man iistorya ang mga eksperiyensya sang naghambal sa imo ang Espiritu sa mahinay, gamay nga tingug.

• Para buligan ang imo kabataan nga maintiendihan ang dinalan nga “mahinay diutay nga tingug,” pwede ka magpatukar sang pangbata nga kanta sing mahinay.. Ipapakot sa isa sa kabataan kon ano ini nga kanta samtang ang iban nagaginahod. Dayon ipasulit ang kanta nga wala na sang nagaginahod. Ano nga mga gahod ang pwede naton kakson sa aton mga kabuhi para mas mabatyagan pirme ang Espiritu?

Doktrina kag mga Kasugtanan 86

Makabulig ako sa pagtipon sang katawhan sang Dios.

• Para buligan ang imo kabataan nga maintiendihan ang paanggid nga ginlaragway sa seksyon 86, pwede ka maghanda sang pila ka magagmay nga litrato ukon drowing sang trigo kag tagoa ini sa mga parte sang kuwarto. Ipaathag sa imo kabataan ang paanggid sang trigo kag sang mga gamhon (tares) (tan-awa sa Mateo 13:24–30), kag basaha sing dungan ang komentarto sang Ginuo sa Doktrina kag mga Kasugtanan 86:1–7. Dayon pwede ninyo tipunon ang gintago nga mga litrato sang trigo kag isulat diri ang ngalan sang tawo nga pwede nila “tipunon” kay Jesucristo. Ano ang buot silingon sang tipunon ang katawhan kay Jesucristo? Ano ang mga paagi nga mahimo naton ini?

Doktrina kag mga Kasugtanan 86:11

Pwede ako mangin kasanag sa iban.

• Ari ang pila ka pamangkot nga pwede mo ipamangkot sa imo kabataan samtang ginahambalan ninyo ang Doktrina kag mga Kasugtanan 86:11: Paano kita ginabugayan sang kasanag? Paano kon wala kita sang kasanag? Paano kita mangin kasanag sa iban nga tawo? Buligi ang imo kabataan nga manumdom sang mga paagi nga “makapadayon [kita] sa kaayo ni [Jesus]” kag ipakigbahin ini sa iban.

Doktrina kag mga Kasugtanan 87:6, 8

Pwede ako “magtindog … sa balaan nga mga lugar.”

• Basaha sing ululupod ang Doktrina kag mga Kasugtanan 87:6 para tun-an ang mga butang nga ginsiling sang Ginuo nga matabo sa ulihing mga adlaw. Dayon pwede ninyo hambalan ang mga kabudlayan nga ginaatubang ninyo sang imo kabataan. Sa bersikulo 8, ano ang ginsiling sang Ginuo nga pwede naton himuon sa mga panahon sang kabudlayan?

• Buligi ang imo kabataan nga maglista sang balaan nga mga lugar, balaan nga mga panghunahuna, kag balaan nga mga aksyon nga makabulig sa ila sa pag-atubang sang espiritwal nga peligro.

  Standing in Holy Places

  A young woman reflects on the blessings of walking the covenant path as she makes her journey to the temple.

  Stand Ye in Holy Places - Bloom Where You’re Planted

  Three hundred youth in Las Vegas come together to share their testimony of Jesus Christ.

Ang templo balaan nga lugar.

Para sa dugang nga mga ideya, tan-awa sa isyu sang Abyan nga magasin sini nga bulan.

Ginatipon sang Ginuo ang Iya katawhan nga daw trigo.