Agosto 18–24: “Isa ka Prinsipyo nga may Upod nga Promisa”

Doktrina kag mga Kasugtanan 89–92

Sa Eskwelahan sang mga Propeta, gintudloan ni Joseph Smith ang mga elder sang Israel parte sa pagpahamtang sang ginharian sang Dios sa duta. Ila ginhambalan ang parte sa espirituhanon nga mga kamatuoran, nagpangamuyo sing ululupod, nagpuasa, kag naghanda sa pagwali sang ebanghelyo. Pero may bagay sa palibot nga daw indi kinaandan sa aton karon, kag daw indi man ini husto para kay Emma Smith. Sa tion sang mga miting, nagapanigarilyo kag nagausap sang tabako ang kalalakin-an, nga indi man bag-o sa amo sadto nga panahon, pero ginamantsahan sini ang kahoy nga salog sang itom kag nagabilin sang maisog nga baho sa palibot. Ginpaambit ni Emma ang iya mga kabalaka kay Joseph, kag ginpamangkot ni Joseph ang Ginuo. Ang Iya sabat amo ang rebelasyon nga labaw kaayo sangsa aso kag mantsa sang tabako. Ginhatagan sini ang mga Santos, sa mga henerasyon nga maabot, sang “isa ka prinsipyo nga may upod nga promisa”—mga promisa sang ikaayong lawas, “kaalam,” kag “tuman nga manggad sang ihibalo” (Doktrina kag mga Kasugtanan 89:3, 19).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 89

Ginhatagan ako sang Ginuo sang Pulong sang Kaalam para buligan ako nga mangin maayo ang lawas kag espiritu.

Sang primero nga mabatian sang mga elder sa Eskwelahan sang mga Propeta si Joseph Smith nga ginbasa ang Pulong sang Kaalam, insigida nila nga “gin-itsa ang ila mga pipa kag mga mama sa kalayo” (Saints, 1:168). Gusto nila ipakita ang ila kahanda sa pagtuman sa Ginuo. Siguro “naitsa” mo na halin sa imo kabuhi ang mga elemento nga ginapaandam sa Pulong sang Kaalam, pero ano pa ang imo matun-an sa sining rebelasyon? Hunahunaa ining mga ideya:

• Kabiga ang rebelasyon bilang “isa ka prinsipyo nga may upod nga promisa” (bersikulo 3)—nagatiner nga mga kamatuoran nga nagagiya sa paghimo sang desisyon. Ano nga mga prinsipyo ang imo nakita nga makagiya sa imo mga desisyon? Ano nga mga bugay ang ginapromisa sang Ginuo? (tan-awa sa mga bersikulo 18–21). Paano Niya gintuman ina nga mga promisa sa imo kabuhi?

• Ano nga mga halimbawa ang imo nakita sa “mga kalainan kag mga plano … sa mga tagipusuon sang mga nagahimbon nga mga tawo” nga may kaangtanan sa Pulong sang Kaalam? (bersikulo 4). Dugang sa sining rebelasyon, ano pa ang ginhatag sang Ginuo para buligan ka nga malikawan ukon malampuwasan ining mga kalainan?

• Ano ang ginatudlo sining rebelasyon sa imo parte sa Ginuo? Paano maangot ang Pulong sang Kaalam sa Doktrina kag mga Kasugtanan 29:34–35?

• Ano ang ginapabatyag sa imo nga imo himuon para mas maatipan ang imo lawas?

Siguro may mga oportunidad ka sadto para ipaathag sa iban kon ngaa ginapangabuhi mo ang Pulong sang Kaalam—kag mahimo may madamo ka pa gid nga oportunidad sa palaabuton. Pamensara kon paano mo gamiton ining mga oportunidad para magpamatuod parte sa Manluluwas, sa kasagrado sang aton mga lawas, kag sa iban pa nga espiritwal nga kamatuoran. Para sa dugang nga mga ideya, tan-awa sa “Ang imo lawas sagrado,” Para sa Kusog sang mga Lamharon: Giya sa Paghimo sang mga Pagpili, 22–29.

Tan-awa man sa 1 Mga Taga-Corinto 6:19–20; Thomas S. Monson, “Mga Prinsipyo kag Mga Promisa,” Liahona, Nob. 2016, 78–79.

Principles and Promises

President Monson testifies of the blessings that come as we obey the Word of Wisdom.

Magtuon kag magtudlo paagi sa mga prinsipyo. Imbes nga maglista sang pwede kag indi pwede, mahimo naton ipangabuhi ang mga prinsipyo para gamiton ang aton kabubut-on kag pagtuo kay Cristo. Halimbawa, pamensara ang mga pamangkot nga nabase sa prinsipyo pareho sini parte sa Pulong sang Kaalam: Ano nga mga prinsipyo ang nagapaisog sa isa ka tawo nga ginabudlayan sa pagtuman sang Pulong sang Kaalam? Ano nga mga prinsipyo ang makapaumpaw sa akon kon may mga problema ako sa ikaayong-lawas bisan pa nga ginapangabuhi ko ang Pulong sang Kaalam?

Gusto sang Amay nga Langitnon nga atipanon naton ang aton mga lawas.

Doktrina kag mga Kasugtanan 90:1–17

Ang Unang Pangulohan nagakapot sang “mga yabi sang ginharian.”

Sa seksyon 90, naghatag ang Ginuo sang mga instruksyon parte sa “pag-alagad kag pangulohan” (bersikulo 12) nanday Joseph Smith, Sidney Rigdon, kag Frederick G. Williams—mga miyembro sang aton karon ginatawag nga Unang Pangulohan. Ano ang imo matun-an parte sa Unang Pangulohan sa mga bersikulo 1–17? Pamensara nga rebyuhon ang pinakaulihi nga mga mensahe sang mga miyembro sang Unang Pangulohan. Ano ang ila ginahimo para “magpahamtang sa kahusay sang tanan nga butang parte sining simbahan kag ginharian”? (bersikulo 16). Paano mo ipakita nga wala mo ini ginakabig nga “di-importante” sa imo? (bersikulo 5).

Pamensara nga kantahon ukon basahon ang mga tinaga sang “Come, Listen to a Prophet’s Voice” (Hymns, no. 21) ukon iban nga kanta parte sa mga propeta nga may koneksyon sa mga pinanudlo sa sining mga bersikulo. Paano nakabulig sa imo ang pagserbisyo sang Unang Pangulohan nga makilala ang Amay nga Langitnon kag si Jesucristo?

Doktrina kag mga Kasugtanan 90:24.

“Ang tanan nga butang magaresulta sa [akon] kaayohan.”

Binagbinaga ang bisan ano mo nga eksperiyensya nga nagasaksi sa promisa sang Ginuo sa Doktrina kag mga Kasugtanan 90:24. Pamensara nga isulat ang imo mga eksperiyensya kag ipaambit ang mga ini sa isa ka miyembro sang pamilya ukon mahal sa kabuhi—basi isa nga nagakinahanglan sang pagpasalig ukon pagpaisog. Kon may ginahulat ka nga mga bugay, binagbinaga kon ano ang pwede mo himuon para magpabilin nga tampad samtang ginahulat mo nga makita kon paano “ang tanan nga butang magaresulta sa imo kaayohan.”

Doktrina kag mga Kasugtanan 90:28–31

Sin-o si Vienna Jaques?

Si Vienna Jaques natawo sang Hunyo 10, 1787, sa Massachusetts. Isa ka babayi sang pagtuo nga may sarang-sarang sa pangabuhi, una nga nakilala ni Vienna ang mga misyonero sang 1831. Pagkatapos nga makabaton sang espirituhanon nga saksi nga matuod ang ila mensahe, nagbiyahe sia para makilala ang Propeta sa Kirtland, Ohio, kon sa diin sia ginbunyagan.

Gintuman ni Vienna ang laygay sang Ginuo sa iya sa Doktrina kag mga Kasugtanan 90:28–31. Ang iya pagkonsagrar sa Ginuo, upod ang mga donasyon nga iya ginhatag sang primero sa Kirtland, nag-abot sa importante kaayo nga tiyempo para sa Simbahan, sang nagatinguha ang mga lideres nga magbakal sang duta nga pagatindugan sang Templo sang Kirtland. Si Vienna “tampad, kag indi … matamad” sa bilog niya nga kabuhi kag sang ulihi “[nakaplastar] sing matawhay” (bersikulo 31) sa Salt Lake Valley, kon diin napatay sia sa edad nga 96.

Doktrina kag mga Kasugtanan 91

“Ang Espiritu nagapahayag sang kamatuoran.”

Tanan kita nakasugata sang mga mensahe nga nagaunod sang “madamo nga butang … nga matuod” kag “madamo nga butang … nga indi matuod” (Doktrina kag mga Kasugtanan 91:1–2). Ano nga laygay ang imo nakita sa seksyon 91 nga makabulig sa imo nga mahibal-an ang kamatuoran sa mga mensahe nga imo masugata? Paano ka ginbuligan sang Espiritu nga makilala ang kamatuoran sa indi husto?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 89

Ang Pulong sang Kaalam nagabulig sa akon nga mangin maayo ang lawas kag espiritu.

• Para sugdan ang seksyon 89, pwede kamo magtan-aw sang imo kabataan sang litrato sang templo ukon magkanta parte sa pisikal nga ikaayong-lawas, para itudlo nga ang aton mga lawas daw pareho sang mga templo para sa aton mga espiritu. Buligi ang imo kabataan nga idrama-drama kon paano nila atipanon ang ila mga lawas.

• Para tun-an ang mga kasuguan sang Ginuo sa Doktrina kag mga Kasugtanan 89:10–17, pwede ninyo idrowing sang imo kabataan ang maayo nga mga butang nga pwede naton kaunon ukon himuon para mentinaron ang aton maayo nga panglawas (tan-awa ang litrato kag pahina sang kahiwatan sa katapusan sining outline). Ano ang ginapaandam sang Ginuo sa aton nga indi paggamiton? Ngaa gusto Niya nga atipanon naton ang aton mga lawas?

• Ginlaygayan ni Elder Gary E. Stevenson ang mga lamharon nga planuhan sing temprano kon ano ang ila himuon kon tentaron sila sang makahulubog nga ilimnon ukon droga. Gintudlo niya: “Masalapoan ninyo nga indi kamo basta-basta madala sang tentasyon. Nakahimo na kamo nga daan sang desisyon kon paano ninyo atubangon kag kon ano ang inyo himuon. Indi na kamo kinahanglan pa nga magdesisyon sa kada tion nga ginatentar kamo” (“Imo Playbook sa Priesthood,” Liahona, Mayo 2019, 48). Pagkatapos nga basahon sing ululupod ang Doktrina kag mga Kasugtanan 89:4 kag ang pahayag ni Elder Stevenson, hambali upod sa imo kabataan kon paano sila magdesisyon karon—sa bilog nila nga kabuhi—nga ipangabuhi ang Pulong sang Kaalam. Pwede gani ninyo i-role play kon paano nila sabton kon may tawo, bisan abyan, nga magtanyag sa ila sang butang nga supak sa Pulong sang Kaalam. Paano kita ginabugayan sang Ginuo kon ginatuman naton ang Pulong sang Kaalam? (tan-awa sa mga bersikulo 18–21).

Ang aton mga lawas regalo halin sa Dios.

Doktrina kag mga Kasugtanan 90:5

Ginahatagan ako sang Dios sang mga propeta para giyahan kag protektahan ako.

• Pwede kamo magtan-aw sang mga litrato sang dumaan nga mga propeta ukon magkanta sang kanta pareho sang “Follow the Prophet” (Children’s Songbook, 110–11). Paano ginabugayan sang Dios ang Iya mga anak paagi sa Iya mga propeta? Ngaa dapat kita mamati sa mga propeta sang Dios? (tan-awa sa Doktrina kag mga Kasugtanan 90:5). Dayon pwede kamo magtan-aw sang imo kabataan sang litrato sang buhi nga propeta kag hambalan ang mga butang nga gintudlo ukon ginapaandam sang Ginuo sa aton paagi sa iya. Paano naton sundon ang propeta?

Doktrina kag mga Kasugtanan 91

Mabuligan ako sang Espiritu nga mahibal-an kon ano ang matuod.

• Pwede mo palip-uton ang tig-ulo sang seksyon sang Doktrina kag mga Kasugtanan 91 para buligan ang imo kabataan nga maintiendihan kon ngaa ginhatag ini nga rebelasyon. Pwede dayon sila manumdom sang mga lugar, pareho sang ara sa media, kon diin masalapoan naton ang “madamo nga butang … nga matuod” kag “madamo nga butang … nga indi matuod” (mga bersikulo 1–2). Ano ang ginatudlo sa aton sang mga bersikulo 4–6 parte sa Balaan nga Espiritu? Paano kita ginabuligan sang Balaan nga Espiritu nga mahibal-an kon ano ang husto?

Para sa dugang nga mga ideya, tan-awa sa isyu sang Abyan nga magasin sini nga bulan.

“Ang tanan nga mga uyas maayo para kalan-on sang tawo; amo man ang mga prutas sang balagon.”