Septyembre 22– 28:“Ang Paagi sang Anak sang Dios”

Doktrina kag mga Kasugtanan 106–108

Sa primero nga pagtan-aw, ang Doktrina kag mga Kasugtanan 107 daw parte lamang sa pag-organisar sang mga palangakuan sang priesthood sa istraktura sang liderato sa Simbahan sang Ginuo. Sang tiyempo nga ginbantala ining rebelasyon, ang mga miyembro sa Simbahan sobra na kadamo sangsa masarangan sang pila ka lideres nga napahamtang. Sa pagplastar sang mga tulumanon kag responsibilidad sang Unang Pangulohan, makabulig kag kinahanglanon gid ang Korum sang Dose ka Apostoles, ang Kapitoan, mga bishop, kag mga pangulohan sang korum. Pero may masobra pa sa diosnon nga panulin sa seksyon 107 sangsa kon paano organisahon ang mga lider sang Simbahan. Diri, ginatudlo sang Ginuo sa aton ang Iya gahum kag awtoridad, “ang Balaan nga Pagkapari suno sa Paagi sang Anak sang Dios” (bersikulo 3). Ang katuyuan sang priesthood amo nga buksan ang “tanan nga espirituhanon nga mga bugay sang simbahan” para ang tanan nga anak sang Dios mahimo “[mabuksan sang kalangitan]” kag “[magpangalipay] sa pagpakig-upod kag presensya sang Dios nga Amay, kag ni Jesus nga manugpatunga sang bag-o nga kasugtanan” (mga bersikulo18–19). Sa pagtudlo sa aton parte sa Iya priesthood, ginatudloan kita sang Manluluwas parte sa Iya Kaugalingon kag kon paano kita mangin pareho sa Iya.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 106; 108

Ginasuportahan ako sang Ginuo kon ginatawag Niya ako nga magserbisyo.

Sa Doktrina kag mga Kasugtanan 106 kag 108, ang Ginuo naglaygay kag nagpromisa sa duha ka mga miyembro nga gintawag para magserbisyo sa Iya Simbahan. Samtang ginatun-an mo ang Iya laygay, pwede mo hunahunaon ang imo mismo mga oportunidad para magserbisyo sa Ginuo—siguro sa ministering, sa calling sa Simbahan, sa mga responsibilidad sa imo pamilya. ukon sa espirituhanon nga mga pagpabatyag nga maghimo sang kaayohan.

Ano sa pamatyag mo ang mensahe sang Ginuo sa imo sa sining mga rebelasyon? Diin nga mga dinalan ang daw makahulugan gid para sa imo? Ari ang pila ka dinalan nga dapat pamensaron:

• San-o ka ginhatagan sang Ginuo sang “grasya [ukon diosnon nga bulig] kag pasalig” para makaserbisyo sa Iya? (Doktrina kag mga Kasugtanan 106:8).

• Ano sa banta mo ang buot silingon sang pabakuron ang iban “sa tanan mo nga ginahimo”? (Doktrina kag mga Kasugtanan 108:7).

Pamensara nga magsulat para paisugon ang imo mga kaliwat—ukon ang imo kaugalingon sa palaabuton—sa pagbaton sang mga oportunidad para magserbisyo sa Ginuo. Dalha sa imo sulat ang mga kamatuoran nga imo natun-an sa Doktrina kag mga Kasugtanan 106 kag 108, kag ang imo kaugalingon nga mga eksperiyensya.

Tan-awa man sa Henry B. Eyring, “Maglakat upod sa Akon,” Liahona, Mayo 2017, 82–85.

Doktrina kag mga Kasugtanan 107:1–4, 18–20

Ang priesthood “suno sa Paagi sang Anak sang Dios.”

Ginsugdan sang Ginuo ang Iya “rebelasyon parte sa pagkapari” (Doktrina kag mga Kasugtanan 107, tig-ulo sang seksyon) paagi sa pagtudlo sa aton sang orihinal nga ngalan sang Melchizedek Priesthood (tan-awa sa mga bersikulo 1–4). Ngaa sa banta mo nga importante nga mahibal-an ina? Paano nakaimpluwensya ang ngalan nga ini sa pagkabig mo sa priesthood?

Tandai ini nga panghunahuna samtang ginabasa mo ang parte sa priesthood, labi na gid ang mga bersikulo 18–20. Ano ang buot silingon sang “sa pagbukas sang kalangitan”? Ano ang buot silingon sang “pagpangalipay sa pagpakig-upod kag presensya sang Dios nga Amay, kag ni Jesus”? Paano ginpatigayon sang gahum kag awtoridad sang priesthood sang Manluluwas ining tanan sa imo?

Tan-awa man sa Alma 13:2, 16; Doktrina kag mga Kasugtanan 84:19–27.

Magtutok kay Jesucristo “Kadamo sang dapat itudlo parte sa ginpanumbalik nga ebanghelyo ni Jesucristo—mga prinsipyo, mga kasuguan, mga propesiya, kag mga istorya sa balaan nga mga kasulatan. Pero ini tanan mga sanga sang isa lang ka kahoy, kay ini tanan isa lang ang katuyuan: agud buligan ang tanan nga tawo nga magpalapit kay Cristo kag maperpekto sa Iya (tan-awa sa Jarom 1:11; Moroni 10:32). Gani bisan ano ang imo ginatudlo, tandai nga nagatudlo ka matuod parte kay Jesucristo kag kon paano mangin pareho sa Iya” (Pagtudlo sa Paagi sang Manluluwas, 6). Halimbawa, samtang nagatudlo ka—kag nagatuon—parte sa priesthood sa Doktrina kag mga Kasugtanan 107, magpamangkot pirme, “Ano ang aton ginatun-an parte sa Manluluwas?”

Doktrina kag mga Kasugtanan 107:22

Ang mga alagad sang Ginuo “[ginasakdag] paagi sa pagsalig, pagtuo, kag pangamuyo sang Simbahan.”

Ano sa banta mo ang buot silingon sang magsakdag sang mga alagad sang Ginuo paagi sa imo pagsalig? paagi sa imo pagtuo? paagi sa imo pangamuyo?

Doktrina kag mga Kasugtanan 107:23–24, 33–35, 38, 91–92

Ang mga Propeta kag Apostoles nagasaksi kay Jesucristo.

Ginpresentar ni Joseph Smith ang seksyon 107 sang 1835 sa bag-ong tawag nga Korum sang Dose ka Apostoles (tan-awa sa tig-ulo sang seksyon). Ano ang gintudlo sang Ginuo sa ila parte sa ila calling sa mga bersikulo 23–24, 33–35, 38? Paano ginpabakod ang imo panaksihon kay Jesucristo sang pinanudlo kag pag-alagad sang Iya buhi nga mga Apostoles?

Sa mga bersikulo 91–92, nagatudlo ang Ginuo parte sa Iya pinakadugay nga Apostoles, ang Pangulo sang Simbahan. Sa ano sia nangin “pareho kay Moises”? (tan-awa sa Giya sang Balaan nga mga Kasulatan, “Moises,” Librarya sang Ebanghelyo).

Doktrina kag mga Kasugtanan 107:27–31, 85–89

Ginatuman sang Ginuo ang Iya buluhaton paagi sa mga konseho.

Tandai kon ano ang gintudlo sang Ginuo parte sa mga konseho sa Doktrina kag mga Kasugtanan 107:27–31, 85–89. Ano ang nagahimo sa konseho nga epektibo? Paano mo gamiton ining mga prinsipyo sa imo calling sa Simbahan, sa imo balay, ukon sa iban mo nga mga responsibilidad?

Ginaagda sang Ginuo ang mga pamilya nga maghambalanay.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 107:18–20

Ginabugayan ako ni Jesucristo paagi sa Iya gahum sang priesthood.

• Samtang upod ninyo nga ginabasa sang imo kabataan ang Doktrina kag mga Kasugtanan 107:18–19, ipaathag ang dinalan nga “tanan nga espirituhanon nga mga bugay.” Basi pwede ninyo ilista sang imo kabataan ang mga bugay nga halin sa priesthood. Pwede mo man ini himuon nga hampang—kag tan-awon kon sin-o ang may pinakamadamo nga malista. Pwede man sila magdrowing ukon magpangita sang mga litrato nga nagasimbolo sining mga bugay (tan-awa sa pahina sang kahiwatan sini nga semana). Dayon pwede ninyo hambalan kon paano kita ginabuligan sang mga ordinansa sang priesthood (pareho sang bunyag ukon sang sakramento) nga mabaton ang mga bugay sang Dios.

Doktrina kag mga Kasugtanan 107:21–26, 33–35, 91–92

Ginapamunoan sang ginpili nga mga alagad sang Ginuo ang Iya Simbahan.

• Ang tagsa ka komperensya nga isyu sang Liahona may pahina sang mga litrato sang General Authorities. Pamensara nga tan-awon ining mga litrato upod sang imo kabataan samtang ginabasa mo ang parte sa ila mga responsibilidad sa Doktrina kag mga Kasugtanan 107:21–26, 33–35, 91–92. Pwede ninyo hambalan sang imo kabataan kon ngaa nagapasalamat ka nga ginhatagan sila sang Ginuo sining mga responsibilidad.

• ChurchofJesusChrist.org. Basi pwede nga tun-an sang tagsa mo ka bata ang parte sa isa sining mga lider kag itudlo sa isa kag isa ang parte sina nga lider. Iistorya sa isa kag isa kon paano ninyo nahibal-an nga ining mga lider matuod nga mga alagad ni Jesucristo.

• Pagkatapos nga basahon sing ululupod ang Doktrina kag mga Kasugtanan 107:22, pwede kamo magbulos-bulos sang imo kabataan nga kaptan ang litrato sang Unang Pangulohan kag iistorya ang mga paagi nga pwede ninyo sila sakdagon bilang mga alagad sang Ginuo.

Ang Unang Pangulohan

Doktrina kag mga Kasugtanan 108:3

Sarang ako nga mangin maid-id sa pagpangabuhi sang akon mga kasugtanan.

• Para sugdan ang diskusyon parte sining bersikulo, pwede mo hagaron ang imo kabataan nga maghimo sang butang nga nagakinahanglan sang maid-id nga pagtutok, pareho sang pagbubo sa tasa nga wala sing maula. Ano ang matabo kon indi kita maghalong? Dayon pwede ninyo basahon ang Doktrina kag mga Kasugtanan 108:3 para hibal-on kon ano ang gusto sang Ginuo nga himuon naton sing maid-id. Ano nga mga “panaad” (mga promisa ukon mga kasugtanan) ang aton ginahimo upod sa Dios? Paano kita mangin mas maid-id sa pagtuman sang mga ini? Pwede man kamo magkanta sang kanta parte sa pagtuman sang mga kasugtanan.

Ang nagahalong nga pagbubo sang tubig pwede makumparar sa maid-id nga pagtuman sang aton mga kasugtanan.

Para sa dugang nga mga ideya, tan-awa sa isyu sang Abyan nga magasin sini nga bulan.

Melchizedek Blesses Abram [Si Melquisedec nga Ginabendisyunan si Abram], ni Walter Rane