Mingongo ya Bozongisi

Mamonisi ya Molimo mpe Tempelo ya Kirtland

Na nse ezali maloba ya Basantu ba Mikolo mya Nsuka oyo bazalaki na Tempelo ya Kirtland na ntango ya bobulisi na yango mpe na makita mosusu oyo elandaki. Mingi bakokanisaki makambo bamonaki na oyo ya Basantu ya kala bamonaki ntango bazalaki “ya kolatisama na nguya uta na likolo” na mokolo ya bosopani ya molimo (Luka 24:49; tala lisusu Misala 2:1–4; Malongi mpe Mayokani 109:36–37).

Eliza R. Snow

“Milulu ya bobulisi wana ekoki kozongelama, kasi lokota moko te ya moto ya kufa ekoki kolimbola mamonisi ya lola ya mokolo wana ya esengo. Banzelu babimelaki bato basusu, ntango bato nyonso oyo bazalaki wana bayokaki ete Nzambe azalaki kati na bango wana, mpe motema moko na moko etondisamaki na ‘esengo oyo ekoki kolimbolama te mpe etondaki na nkembo.’”

Sylvia Cutler Webb

“Moko ya makambo nakundolakana ebandeli mpenza ezalaki bobulisi ya Tempelo. Tata na ngai amemaki biso na mabolongo na ye mpe alobaki na biso mpo na nini tozalaki kokende mpe nini elingaki koloba kobulisa ndako epayi ya Nzambe. Mpe atako nazalaki elenge mingi mpenza na ntango wana, nazali komikundola polele libaku yango. Nakoki kotala nsima na ntaka moke ya mibu mpe komona lokola namonaki na ntango wana Profeta Joseph, kotelemaka na maboko na ye ya kotombwama epayi na lola, elongi na ye pendoo lokola na putulu, mpinzoli kokitaka na matama na ye ntango azalaki koloba na mokolo wana ya esengo. Penepene banso bazalaki na mpinzoli na miso. Ndako yango ezalaki ya kotonda mpenza na bato ete bana bazalaki mingi mingi kofanda na mabolongo ya bamikolo; ndeko na ngai ya mwasi afandaki likolo ya oyo ya tata, ngai likolo ya mabolongo ya mama. Nakoki kutu komikundola bilamba tolataki. Mayele na ngai ezalaki ya bolenge mingi mpenza na ntango wana mpo na kososola ntina na yango nyonso mobimba, kasi lokola ntango elekaki nasosolaki yango moke moke, mpe nazali na botondi ete nazalaki na libaku ya kozala kuna.”

Oliver Cowdery

“Na mpokwa nakutanaki na bakonzi ya eklezia na ndako ya Nkolo. Molimo esopanaki—namonaki nkembo ya nzambe, lokola lipata monene, kokita mpe kotelema likolo ya ndako, mpe etondisaki yango lokola mopepe makasi mpe ya nguya. Namonaki ndembo ya kopanzana, lokola oyo ya moto kotelemaka likolo ya bato mingi, … ntango bazalaki koloba nkota mosusu mpe kosakola.”

Benjamin Brown

“Mamoni mingi [ezalaki] komonana. Moko amonaki likonzi ya moto to lipata kotelema likolo ya ndako, ya kongenga lokola ntango moyi engengaka na lipata lokola wolo. Basusu mibale bamonaki bato misato kotambolaka malembe na ndako na bafungola ya kongenga na maboko na bango, mpe lisusu moniololo moko ya kongenga na maboko na bango.”

Orson Pratt

“Nzambe azalaki wana, banzelu na ye bazalaki wana, Molimo Mosantu azalaki na katikati ya bato … mpe batondisamaki uta na motole ya mito na bango tii na nse ya makolo na bango na nguya mpe bofuli ya Molimo Mosantu.”

Nancy Naomi Alexander Tracy

“[Ntango] Tempelo esilaki mpe ebulisamaki … ezalaki mikolo na ngai mibale ya esengo mingi mpenza. Loyembo ekokaki oyo esalamaki mpo na libaku yango ezalaki ‘Molimo ya Nzambe ezali Kopela Lokola Moto.’ Ezalaki mpenza solo ete Nguya ya Lola efandaki likolo ya ndako wana. … Nayokaki ete ezalaki lola likolo ya mabele.”

Matangi

1. Na Edward W. Tullidge, The Women of Mormondom (1877), 95.

2. Na Karl Ricks Anderson, Joseph Smith’s Kirtland: Eyewitness Accounts (1996), 182–83.

3. Zulunale ya mokolo na mokolo ya Oliver Cowdery, Sanza ya misato 27, 1836, Ebombelo mikanda ya Mambi ya kala ya Eklezia, Salt Lake City.

4. Mokanda ya Benjamin Brown epayi ya mwasi na ye, Sarah, ezanga mokolo sanza ya minei 1836, lisanga ya babuku ya libota ya Benjamin Brown, Ebombelo mikanda ya Mambi ya kala ya Eklezia, Salt Lake City; maloba mpe baletele minene ebongisamaki.

5. Orson Pratt, “Remarks,” Deseret News, Jan. 12, 1876, 788.

6. Na Richard E. Turley Jr. and Brittany A. Chapman, eds., Basi ya Bondimi na Mikolo mya Nsuka (2011), 1:442.