Oktubre 6–12: “Ipahanabo Ko ang Tanan nga Butang para sa Inyo Kaayohan”

Doktrina kag mga Kasugtanan 111–114

May espiritwal nga eksperiyensya ka na bala nga nakabatyag ka sang pagsalig kag kasigurado sa imo pagtuo kay Cristo—pero gintilawan sang mga kasakit sa kabuhi ang imo pagtuo, kag nakita mo ang imo kaugalingon nga ginbudlayan nga mabawi ang kalinong nga imo nabatyagan sadto? Daw pareho sini ang natabo sa mga Santos sa Kirtland. Wala matuigi pagkatapos sang espiritwal nga pagbubo nga konektado sa pagdedikar sang Templo sang Kirtland, nag-abot ang mga problema. Pinansyal nga krisis, gamo sa Korum sang Dose, kag iban pa nga mga pagtilaw nga nangin rason nga mauyog ang mga Santos sa ila pagtuo wala sapayan sa ila nauna nga mga naeksperiyensyahan.

Indi naton malikawan ang mga pagtilaw, gani paano naton punggan nga tay-ugon sini ang aton pagtuo kag testimonya? Basi ang parte sang sabat makita sa laygay sang Ginuo sa Doktrina kag mga Kasugtanan 112, nga ginhatag samtang nagadako ang kabudlayan sa Kirtland. Siling sang Ginuo, “Tinloi ang inyo mga tagipusuon sa akon atubang” (bersikulo 28), “Indi magrebelde” (bersikulo 15), “Wagkosi ang imo balikawang para sa buluhaton” (bersikulo 7), kag “Mangin mapainubuson” (bersikulo 10) Kon sundon naton ining laygay, ang Ginuo “magatuytuy sa [aton] sa kamot” sa tunga sang mga kabudlayan padulong sa pag-ayo kag paghidaet (tan-awa sa mga bersikulo 10, 13).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 111

Ang Ginuo sarang “magpahanabo sang tanan nga butang para sa [akon] kaayohan.”

Sang 1836, nakaangkon ang Simbahan sang dalagko nga kautangan sa paghimo sang buluhaton sang Ginuo. Si Joseph Smith kag ang iban pa nagakabalaka sining kautangan kag nagapamensar sang mga paagi nga mabayaran ini (tan-awa sa tig-ulo sang seksyon sang Doktrina kag mga Kasugtanan 111).

Samtang ginabasa mo ang seksyon 111, pamensara kon paano magamit sa imo ang mga pulong sang Ginuo kay Joseph—kag sa mga bagay nga imo ginakabalak-an. Halimbawa, san-o mo nabatyagan ang pagpalangga sang Dios “sa pihak sang [imo] mga kabuangan” (bersikulo 1)? Paano ka ginbuligan sang Ginuo nga makakita sang wala ginapaabot nga “manggad”? (bersikulo 10)? Ano ang Iya ginhimo para “ipahanabo ang tanan nga butang para sa imo kaayohan” (bersikulo 11)? Ano ang ginatudlo sa imo sang dinalan nga “pareho kadasig sang inyo pagbaton sang mga ini” parte sa Amay nga Langitnon?

Tan-awa man sa Mateo 6:19–21, 33.

Doktrina kag mga Kasugtanan 112:3–15, 22

Giyahan ako sang Ginuo kon mapainubuson ko nga pangitaon ang Iya pagbuot.

Si Thomas B. Marsh, Pangulo sang Korum sang Dose ka Apostoles, nangakig kay si Joseph Smith, nga wala nagkonsulta sa iya, nagtawag sang duha ka miyembro sang iya korum para magwali sang ebanghelyo sa England. Nakigkita sia sa Propeta, nga nakabaton sang rebelasyon nga nakabulig kay Thomas nga ipaiway ang iya kalain sang buot. Ina nga rebelasyon nasulat sa Doktrina kag mga Kasugtanan 112.

Tandai ining konteksto samtang ginatun-an mo ang Doktrina kag mga Kasugtanan 112. Ano ang nakita mo nga posible nagpaayo sang nasakit nga buot ni Thomas? Sa mga bersikulo 3–15 kag 22, pwede mo pangitaon ang mga sabat sa pamangkot pareho sini: Ano ang pagpaubos? Ano ang buot silingon sang ang Ginuo magatuytuy sa imo “sa kamot”? Ngaa sa banta mo nga nagabulig ang pagpaubos sa imo nga mabaton ang giya sang Ginuo? Makakita ka sang dugang nga mga sabat sa “Pattern of Humility” sa mensahe ni Elder Joseph W. Sitati nga “Patterns of Discipleship” (Liahona, Nob. 2022, 87–88).

Hunahunaa ang kilala mo nga mapainubuson. Ano ang ginahimo sining tawo para magpakita sang pagpaubos? Ano ang natun-an mo sa Manluluwas parte sa pagpaubos? Pwede ka magpangita sang mga litrato sang mga tiyempo sang Iya kabuhi nga nagpakita Sia sang pagpaubos.

Sang san-o ka nakabatyag nga gingiyahan sang Ginuo sang ginpaubos mo ang imo kaugalingon?

Tan-awa man sa Ulisses Soares, “Mangin Mapainubuson kag Mapailubon sa Tagipusuon,” Liahona, Nob. 2013, 9–11.

Paentraha ang mga nagatuon. Hunahunaa kon paano mo mabuligan ang imo mga ginatudloan nga magpartisipar gid sa pagtuon sang mga kamatuoran sa balaan nga mga kasulatan. Halimbawa, para buligan sila nga maintiendihan kon ano ang ginsiling sang Ginuo sa Doktrina kag mga Kasugtanan 112:10, pwede mo tabunan ang mata sang isa ka tawo kag uyatan sia sa kamot kag giyahan nga maglibot sa nagasablag nga mga bangko ukon iban pa nga mga butang. Ano ang aton matun-an parte sa pagpaubos sa sining halimbawa?

Doktrina kag mga Kasugtanan 112:12–26, 28, 33–34

Ang tuod-tuod gid nga nagbag-o makakilala kay Jesucristo.

Ang hitabo nga may pila ka Apostoles sang 1837 nga nagkontra sa Propeta isa ka maayo nga pahanumdom nga bisan ano pa ang aton calling sa Simbahan ukon bisan ano pa kadako sang aton nahibal-an sa ebanghelyo, bilang indibidwal kinahanglan naton nga saguron ang aton pagbag-o kay Jesucristo. Pwede mo basahon ang Doktrina kag mga Kasugtanan 112:12–26, 28, 33–34 kag pangitaon ang mga kamatuoran nga makabulig sa imo nga malampuwasan ang pagtilaw sa imo pagtuo ukon mas lubos nga magbag-o sa Ginuo. Mahimo nga mainspirar ka nga iistorya ang imo nakita para buligan ang iban nga pabakuron ang ila pagbag-o kay Cristo.

Doktrina kag mga Kasugtanan 113

Si Joseph Smith “alagad sa mga kamot ni Cristo.”

Gintumod ni propeta Isaias ang isa ka kaliwat ni Jesse bilang “tuod” kag “gamot” (Isaias 11:1, 10). Sa seksyon 113, ginpaathag sang Ginuo nga ining kaliwat, nga alagad ni Cristo, ang mangin instrumento sa pagtipon sang katawhan sang Ginuo sa ulihing mga adlaw (tan-awa sa Doktrina kag mga Kasugtanan 113:4, 6). Ini nga propesiya nagalarawan sing maayo kay Propetang Joseph Smith. Paano ayhan ini kag ang iban pa nga mga kamatuoran sa seksyon 113 nakapapagsik sa mga Santos sa tunga sang kinagamo nga ila naeksperiyensyahan sa Kirtland? Ano ang imo nakita sa sining rebelasyon nga nagainspirar sa imo nga magpakabakod kag magpadayon sa pagpartisipar sa buluhaton sang Ginuo karon?

Tan-awa man sa Giya sa Balaan nga mga Kasulatan, “Jesse,” Librarya sang Ebanghelyo; 2 Nefi 21:10–12; Joseph Smith—Kasaysayan 1:40.

Si Isaias nagsulat parte sa “tuod” kag “mga gamot” nga naghalin sa “kaliwat ni Jesse” (Isaias 11:1).

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 111:2, 10–11

Ang mga butang sang Dios pwede nga mangin manggad para sa akon.

• Pwede ninyo idrowing sang imo kabataan ang inyo mapensaran kon makabati kamo sang tinaga nga manggad. Dayon pwede ninyo basahon ang Doktrina kag mga Kasugtanan 111:2, 10–11 kag ikumparar ang dutan-on nga manggad sa mga butang nga ginahatagan sang Ginuo sang bili. (Tan-awa sa pahina sang kahiwatan sining semana.) Paano naton mas hatagan bili ang mga butang sang Dios?

Doktrina kag mga Kasugtanan 112:10

Giyahan ako sang Ginuo sa kamot kag sabton ang akon mga pangamuyo.

• Pagkatapos nga basahon ang Doktrina kag mga Kasugtanan 112:10 sing ululupod, pwede man kamo maghampang nga nagabulos-bulos sa paggiya sa isa kag isa “sa kamot” (pareho sang obstacle course). Paano kita ginagiyahan sang Ginuo “sa kamot,” bisan indi naton Sia upod sa personal? Ngaa kinahanglan naton nga magiyahan sang Ginuo? Sang san-o naton nabatyagan ang Ginuo nga nagagiya sa aton?

• Pwede ninyo isulat sang imo kabataan ang mga tinaga sa Doktrina kag mga Kasugtanan 112:10 kag kuritan sa idalom ang mga bugay nga ginahatag sang Ginuo kon mapainubuson kita nga nagaliso sa Iya. Paisoga ang imo kabataan nga iistorya ang mga panahon sang mapainubuson sila nga nangayo sang bulig sa Ginuo kag nakabaton sang sabat sa ila mga pangamuyo ukon gingiyahan sa paghimo sang maayo nga butang (tan-awa sa Moroni 7:13, 16).

Detalye sang Arise and Walk, ni Simon Dewey

Doktrina kag mga Kasugtanan 112:11

Gusto ni Jesus nga palanggaon ko ang tanan.

• Pwede kamo magbulos-bulos sang imo kabataan sa pagbasa sang “Chapter 41: Trouble in Kirtland” (sa Doctrine and Covenants Stories, 158–60). Sa istorya, sin-o ang nagpalala sang mga problema sa Kirtland? Sin-o ang nagatinguha nga pahagan-haganon ini? Dayon pwede ninyo basahon ang Doktrina kag mga Kasugtanan 112:11 kag hambalan kon ngaa gusto sang Manluluwas nga palanggaon naton ang tanan. San-o Niya ginpakita ang Iya pagpalangga sa mga tawo nga nangin mapintas sa Iya? (halimbawa, tan-awa sa Lucas 23:34). Pwede man kamo magkanta sang kanta parte sa pagpalangga sa iban.

Chapter 41: Trouble in Kirtland: 1837–1838

Doktrina kag mga Kasugtanan 112:11–14, 24–26

Ang tuod-tuod gid nga nagbag-o makakilala kay Jesucristo.

• Pagkatapos nga basahon ang Doktrina kag mga Kasugtanan 112:24–26, hambali upod sang imo kabataan ang kinalain sang pagkahibalo sang ngalan sang tawo kag pagkilala sa ila. Ano ang mga pinanudlo sa mga bersikulo 11–14 nga nagabulig sa aton nga maintiendihan kon ano ang buot silingon sang kilalahon ang Ginuo?

Para sa dugang nga mga ideya, tan-awa sa isyu sang Abyan nga magasin sini nga bulan.

Be Thou Humble [Mangin Mapainubuson], ni Julie Rogers.