Mga Tingug sang Pagpanumbalik

Bilanggoan sang Liberty

Samtang napriso sa Liberty, Missouri, nakabaton si Joseph Smith sang mga sulat nga nagapahibalo sa iya parte sa delikado nga sitwasyon sang mga Santos sa Ulihing mga Adlaw nga ginapanabog halin sa estado bangud sa sugo sang gobernador. Isa ka emosyunal nga sulat ang naghalin sa iya asawa nga si Emma. Ang iya mga pulong, kag ang sabat nga mga sulat ni Joseph, nagapautwas sang pareho nila nga mga pag-antos kag sang ila pagtuo sa sining mabudlay nga panahon sa kasaysayan sang Simbahan.

Si Joseph Smith kag ang iban ginpriso diri sang tigtulugnaw sang 1838–39.

Sulat ni Emma Smith kay Joseph Smith, Marso 7, 1839

Pinalangga ko nga Bana

Kay nakaangkon sang oportunidad nga magpadala paagi sa isa ka abyan, ginatinguhaan ko nga magsulat, pero indi ko na pag-isulat ang tanan ko nga nabatyagan, kay indi ko malaragway ang akon balatyagon, tungod sa imo sitwasyon karon, sa mga pader, mga rehas, kag kandado, sa mga suba, sapa, kabukiran, mga nalupyakan kag wayang nga nagapatunga sa aton, kag sa masakit nga kawala-sing-hustisya nga nagbutang kag nagahunong gihapon sa imo sa prisuhan, upod ang iban pa nga mga kabudlayan.

Kon indi tungod nga inosente kita, kag kon indi tungod sa bulig sang diosnon nga kaluoy, sigurado ako nga indi ko gid maagwantahan ang pag-antos nga akon ginaagyan…; pero buhi gihapon ako kag handa nga mag-antos pa gid kon amo ini ang pagbuot sang Langit nga antuson ko para sa imo.

Maayo pa kami sa karon, magluwas kay Fredrick nga nagamasakit.

Ang Diutay nga si Alexander nga akon ginakugos karon isa sa pinakamabuot nga bata nga imo makilala sa kabuhi. Kabaskog sa iya nga sa bulig sang bangko nagadalagan sia libot-libot sa bilog nga kuwarto. …

Ang Dios lang gid ang nakahibalo sang mga panumduman sang akon hunahuna kag mga balatyagon sang akon tagipusuon sang ginbayaan ko ang aton balay kag puluy-an, kag ang halos tanan naton nga ginapanag-iyahan magluwas sa aton magagmay nga kabataan, kag nagbiyahe pa-gwa sa estado sang Missouri, nga nagbilin sa imo nga nahunong gihapon sa sinang masubo nga prisuhan. Pero ang pagpanumdom nga bayaan ka mas masakit pa sangsa masarangan sang tawo. …

…Kabay pa nga may malipayon pa nga mga inadlaw nga magaabot sa aton sa palaabuton. … [Ako] nga padayon nga nagapalanga sa imo.

Emma Smith

Sulat ni Joseph Smith kay Emma Smith, Abril 4, 1839

Mahal ko—kag mapinalanggaon—nga Asawa.

Huwebes sang gab-i nagpungko ako sang nagatunod ang adlaw, samtang nagalili kami sa rehas sining masubo nga prisuhan, para magsulat sa imo, agud mahibal-an mo ang akon sitwasyon. Nagapati ako nga lima na ka bulan kag anum ka adlaw halin sang ginpaidalom ako sa pagbantay sang nagakurisong nga gwardya gab-i kag adlaw, kag sa sulod sang mga pader, rehas, kag nagaigot nga salsalon nga pwertahan sang masubo, madulom, mahigko nga prisuhan. Upod ang mga emosyon nga ang Dios lang ang nakahibalo ginahimo ko ining sulat. Ang mga panghunahuna ko sa sining mga sirkumstansya mabudlay isulat ukon ihambal, ukon para ilaragway sang mga Anghel sa tawo nga wala nakaagi sang amon ginaagyan. … Nagasalig kami sa kusog ni Jehova, kag wala na sing iban pa, para sa amon kaluwasan, kag kon indi niya paghimuon, indi ini matabo, makasalig ka, kay may dako nga kauhaw para sa amon dugo sa sining estado; indi tungod kay may sala kami. … Pinalangga ko nga Emma, pirme ko ikaw kag ang aton kabataan ginapanumdom. … Gusto ko makita ang diutay nga si Frederick, si Joseph, Julia, Alexander, Joana, kag ang tigulang nga si major [ang ido sang pamilya]. … Malipayon ako nga maglakat halin diri pakadto dira sa imo nga nagatiniil, kag wala sing tabon ang ulo, kag halos hublas, agud makita ka kag kabigon ko ini nga dako nga kalipayan, kag indi kabudlayan. … Ginaantos ko nga may kabakod ang tanan nga pagpamigos sa akon, amo man ang mga kaupod ko; wala pa sing isa sa amon nga nag-ampo. Gusto ko [nga] indi mo pagtugtan nga malimtan ako [sang aton kabataan]. Silinga sila nga palangga sila ni Tatay nga may perpekto nga gugma, kag ginahimo niya ang tanan agud makapalagyo sa malain nga mga tawo kag magpauli sa ila. … Hambala sila nga siling ni Tatay magpakabuot sila, kag magpamati sa ila nanay. …

Imo,

Joseph Smith Jr.

Mga Tanda

1. “Letter from Emma Smith, 7 March 1839,” Letterbook 2, 37, josephsmithpapers.org; tigbato, punctuation, kag grammar gin-standardize.

2. “Letter to Emma Smith, 4 April 1839,” 1–3, josephsmithpapers.org; tigbato, punctuation, kag grammar gin-standardize.

3. Si Joseph kag ang iya mga kaupod gindakop sang Oktubre 31, 1838, kag gingwardyahan adlaw kag gab-i. Pagkatapos sang primero nga bista sa Richmond, Missouri, gindala sila sa Bilanggoan sang Liberty sang Disyembre 1.