Liberty Jail [Bilanggoan sang Liberty], ni Welden Andersen

Oktobre 20–26:“O Dios, Diin Bala Ikaw?”

Doktrina kag mga Kasugtanan 121–123

Ang pinakaidalom nga bahin sang prisuhan sa Liberty, Missouri, nakilal-an bilang “bartolina.” Madamol ang mga pader, mayami kag mahigko ang salog, ang pagkaon diutay kag pan-os, kag ang duha ka makitid, de-rehas nga mga bintana malapit sa kisame nagapasulod sang tama kagamay nga kasanag. Diri nagtiner si Joseph Smith kag ang iban pa sa sulod sang apat ka matugnaw kaayo nga binulan sang tigtulugnaw sang 1838–39. Sa sining panahon, padayon nga nagabaton si Joseph sang balita parte sa pag-antos sang mga Santos. Ang kalinong kag paglaum nga nabatyagan sa Far West naglawig sing pila lamang ka bulan, kag karon ang mga Santos wala naman sang maistaran, ginpanabog sa kamingawan sa pagpangita liwat sang lain nga lugar nga pagapuy-an—sa sini nga tion nga ang ila Propeta ara sa prisuhan.

Kag bisan pa sa sinang miserable nga prisuhan, ang “ihibalo halin sa langit” indi mapunggan sa “pagbubo” (Doktrina kag mga Kasugtanan 121:33). Ang pamangkot ni Joseph nga “O Dios, diin bala ikaw?” nasabat sing klaro kag mabaskog: “Indi magkahadlok … , kay makaupod mo ang Dios tubtob sa wala’y katapusan” (Doktrina kag mga Kasugtanan 121:1; 122:9).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 121:1–10, 23–33; 122

Upod ang Dios, ang kabudlayan mangin “para sa [akon] kaayohan.”

Kon kita ukon ang aton mga pinalangga nagaantos, normal lang nga magpamangkot kon bala ang Dios nakatalupangod sa aton. Samtang ginabasa mo ang Doktrina kag mga Kasugtanan 121:1–6, hunahunaa ang mga panahon nga namangkot ka ukon nakabatyag sang pareho kay Joseph Smith. Ano ang nakita mo sa sabat sang Ginuo nga makabulig sa imo kon may amo ka nga mga pagduda ukon balatyagon? Halimbawa, sa mga bersikulo 7–10, 26–33, tandai ang mga bugay nga Iya ginapromisa. Ano sa banta mo ang buot silingon sang “mabatas … sing maayo”? Paano ka ginabuligan sang Manluluwas nga himuon ini?

Samtang ginabasa mo ang seksyon 122, pamensara kon ano ang gusto sang Ginuo nga pagkabig mo sa imo mga kabudlayan. Binagbinaga ang mga eksperiyensya halin sa imo mga pagtilaw kag kon paano ayhan ini “mangin para sa [imo] kaayohan” (bersikulo 7).

Doktrina kag mga Kasugtanan 121:34–46

Ang matuod nga gahum kag impluwensya nabase sa “mga prinsipyo sang pagkamatarong”.

Ginpwersa sang kalibutanon nga gahum ang mga Santos pa-gwa sa Missouri kag si Joseph Smith pasulod sa prisuhan. Pero sang ato didto si Joseph, gintudloan sia sang Ginuo parte sa lain nga klase sang gahum: ang Iya gahum, “ang mga gahum sang langit.” Ang pagbasa parte sinang gahum sa Doktrina kag mga Kasugtanan 121:34–46 makabulig sa imo nga matun-an kon paano magbaton sinang gahum—kag kon paano ini gamiton para bugayan ang iban. Basi pwede mo isulat ang imo natun-an sa isa ka tsart nga nangalanan Mga Gahum sang Langit kag Kalibutanon nga Gahum. Ano ang kinalain sining duha ka mga gahum? Ano ang ginatudlo sa imo sining mga paglaragway sang gahum sang Ginuo parte sa Iya?

Pwede mo man binagbinagon ang tinaga nga impluwensya sa bersikulo 41. Sa ano nga mga sitwasyon nga gusto mo mangin maayo nga impluwensya—sa relasyon sa pamilya, sa eskwelahan, sa trabaho, ukon sa tulumanon sa Simbahan? Ano ang imo natun-an sa mga bersikulo 41–46 kon paano ginaimpluwensyahan sang Dios ang Iya mga anak? Pwede mo palip-uton ang imo natun-an paagi sa paghimo sang pahayag pareho sini: “Para mangin impluwensya para sa kaayohan, ako mangin .”

Tan-awa man sa Jeffrey R. Holland, “Indi Subong sang Paghatag sang Kalibutan,” Liahona, Mayo 2021, 35–38.

"The Powers of Heaven"

(D&C 121:34-46) The components and processes involved in providing electricity to a home are compared to the principles the Lord outlined in section 121 for those who would exercise His priesthood in power.

Magpili sang dinalan kag tun-i ini sing maayo. Para tun-an pa gid ang matahum nga mga bugay nga ginalaragway sa mga bersikulo 45–46, pwede ka magpili sang dinalan nga nanamian mo kag tun-i ini sing maayo. Halimbawa, ano ang buot silingon sang tinaga nga adornohi, kag paano maadornohan sang pagkamatarong ang imo mga panghunahuna? Ukon pwede ka magpangita sang litrato sang humog kag tun-an kon paano nagaporma ang humog sa mga tanom. Paano ini nangin parehas sa pamaagi nga ginatudlo sang Ginuo ang Iya doktrina? Ipakigbahin ang imo nadiskubrehan sa imo pamilya ukon mga abyan, pati sa imo mga abyan sa simbahan.

Doktrina kag mga Kasugtanan 122:8

Si Jesucristo nagpanaog sa idalom sang tanan nga butang para mapataas Niya ako.

Ano sa banta mo ang buot silingon sang si Jesucristo “nagpanaog sa … tanan [nga butang]”? Ari pa ang mga bersikulo nga mahimo makabulig sa imo nga maintiendihan ining dinalan: Isaias 53:3–4; Mga Hebreo 2:17–18; 1 Nefi 11:16–33; Alma 7:11–13. Base sa imo natun-an, pamensara nga ihambal ang Doktrina kag mga Kasugtanan 122:8 sa imo kaugalingon nga mga pulong. Paano mo ipakita ang imo pagpasalamat kay Jesucristo sa pagpaidalom Niya sa tanan nga butang?

Paano nakaapekto ining ginhambal ni Pangulong Dallin H. Oaks sa imo pag-intiendi? “Sarang gani kita magsiling nga kay nagdulhog [Sia] sa idalom sang tanan, ara si [Jesucristo] sa husto nga posisyon agud magtib-ong sa aton kag maghatag sang kabakod agud antuson ang aton mga kapipit-an” (“Ginpabakod sang Pagpasag-uli ni Jesucristo,” Liahona, Nob. 2015, 64).

Detalye halin sa Not My Will But Thine [Indi Akon Pagbuot Kundi Imo], ni Walter Rane

Doktrina kag mga Kasugtanan 123

“Malipayon naton nga himuon ang tanan nga aton masarangan.”

Sa Doktrina kag mga Kasugtanan 123:7–8, gintumod ni Joseph Smith ang sala nga mga pagpati nga nagadala sang pag-antos, pati na ang pagpamigos sa mga Santos. Sang Marso 1839, daw wala na sing mahimo ang mga Santos sa sina nga kahimtangan. Pero sa iya mga sulat halin sa Bilanggoan sang Liberty, ginhambal ni Joseph sa ila ang pwede nila himuon: “[magtipon] sang ihibalo sang tanan gid nga nagkalatabo” kag “maghulat, nga may lubos nga pagsalig nga makita ang kaluwasan sang Dios” (Doktrina kag mga Kasugtanan 123:1, 17). Samtang ginapamensar mo ang mga problema sa kalibutan sa karon nga panahon, hunahunaa ang mga paagi nga maaksyonan mo ang mga ini “[sa] tanan nga [imo] masarangan” (mga bersikulo 12, 17). Kag indi pagkalimti ang daw “kubos nga mga butang” (bersikulo 15). Ngaa importante nga himuon ining mga butang nga “malipayon”? (bersikulo 17).

Madamo sa mga panaysayon nga ginpangayo ni Joseph sa sining sulat ang ginsumite sa gobyerno kag ginpublikar bilang bahin sang 11-ka-serye sa peryodiko sa Nauvoo, nga Times and Seasons (tan-awa sa “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 121:1–9; 122:7–9

Upod ang Dios, ang akon mga pagtilaw mangin para sa akon kaayohan.

• Para buligan ang imo kabataan nga mahunahuna kon daw ano ang natabo kay Joseph Smith kag sa iya mga abyan sa Bilanggoan sang Liberty, pwede ninyo basahon sing ululupod ang “Mga Tingug sang Pagpanumbalik: Bilanggoan sang Liberty”. Dayon, samtang ginabasa ninyo sing ululupod ang Doktrina kag mga Kasugtanan 121:1–9, pwede ninyo hambalan kon paano ginbuligan sang Manluluwas si Joseph nga makabatyag sang kalinong. Paano kita makakita sang kalinong sa Manluluwas, bisan sa tiyempo sang kabudlayan?

  Chapter 46: Joseph Smith in Liberty Jail: November 1838–April 1839

  Joseph Smith: The Prophet of the Restoration

  A motion picture about the life and legacy of Joseph Smith, the founding prophet of The Church of Jesus Christ of Latter-day Saints.

• Para buligan ang imo kabataan nga makilala nga ang aton mga pagtilaw “mangin para sa [aton] kaayohan” (Doktrina kag mga Kasugtanan 122:7), pwede ninyo hambalan kon paano nagadako ang aton mga maskulo kon magkarga kita sang mabug-at. Pwede mo man sila hagaron nga mag-alsa sang mabug-at nga butang. Dayon pwede ninyo hambalan kon paano ang pag-eksperiyensya sang kabudlayan makabulig sa aton mga espiritu nga magtubo—kon magdangop kita sa Ginuo para sa bulig. Mag-istorya sang mga halimbawa halin sa imo kabuhi.

Doktrina kag mga Kasugtanan 121:34–46

Ang pagkamatarong nagadala sang “mga gahum sang langit.”

• Basi makabulig ang paanggid sa imo kabataan nga maintiendihan “ang mga gahum sang langit.” Halimbawa, pwede mo ikumparar ang gahum sang Dios sa kuryente. Ano ang makapugong sa de-kuryente nga gamit sa pagbaton sang kuryente? Ano ang nagapanubo sa aton espiritwal nga gahum? Ano ang nagapadako sini? (Magpangita sang mga tinaga kag mga dinalan sa Doktrina kag mga Kasugtanan 121:34–46; tan-awa man sa Libro sang Pangkabilogan nga Pagsulundan, 3.5, 3.6, Librarya sang Ebanghelyo.)

Doktrina kag mga Kasugtanan 122:7–9

Kahibalo si Jesucristo kon ano ang nagakatabo sa akon.

• Pagkatapos nga basahon ang Doktrina kag mga Kasugtanan 122:7–9 upod sa imo kabataan, pwede ka mag-istorya sang [imo] eksperiyensya sang nabatyagan mo nga upod mo ang Manluluwas sa isa ka mabudlay nga pagtilaw. Pwede man kamo magkanta sang parte kay Jesucristo kag magpamatuod nga mabuligan kita ni Jesucristo tungod kahibalo Sia sang aton nabatyagan.

Doktrina kag mga Kasugtanan 123:15–17

Bisan ang magagmay nga mga butang makahimo sang dako nga kinalain sa pagserbisyo sa Dios.

• Para buligan ang imo kabataan nga maintiendihan ang Doktrina kag mga Kasugtanan 123:15–17, pwede ka magpakita sa ila sang litrato sang dako nga barko kag sang gamay nga timon, ukon iistorya sa ila ang paathag ni Elder David A. Bednar sa “The Principles of My Gospel” (Liahona, Mayo 2021, 125–26). Dayon pwede ninyo hambalan ang ginagmay nga butang nga pwede naton serbisyohan sang malipayon ang aton mga pamilya kag mga abyan.

“The Principles of My Gospel”

Elder Bednar teaches that correct gospel principles help us make wise choices and stay on the covenant path.

Pareho sang gamay nga timon sang dako nga barko, ang magagmay naton nga pagpaninguha makahimo sang dako nga kinalain.

Para sa dugang nga mga ideya, tan-awa sa isyu sang Abyan nga magasin sini nga bulan.

Joseph Smith in Liberty Jail [Si Joseph Smith sa Bilanggoan sang Liberty], ni Greg Olsen