Far West, Missouri, ni Al Rounds

Oktubre 13–19: “Ang Iya Sakripisyo Mangin Mas Sagrado sa Akon Sangsa Iya mga Kadalag-an”

Doktrina kag mga Kasugtanan 115–120

May rason nga mangin positibo ang panan-aw sang mga Santos sa pinakabag-o nila nga tilipunan, ang Far West, Missouri. Madasig nga nagadako ang siyudad, ang duta daw matambok man, kag lapit lang sa Adam-ondi-Ahman, ang lugar nga dako ang espirituhanon nga importansya sang una kag sa palaabuton (tan-awa sa Doktrina kag mga Kasugtanan 107:53–56; 116). Sa gihapon, mabudlay siguro sa mga Santos nga kalimtan ang nadula sa ila. Wala labot nga gintabog sila pa-gwa sa Independence, ang sentro sang Sion, kinahanglan man sang mga Santos nga maghalin sa Kirtland, nga ginbayaan ang ila pinalangga nga templo pagkatapos lang sang duha ka tuig. Kag sa sini nga tion indi lang mga kaaway sa gwa sang Simbahan ang nagapanggamo—madamo nga prominente nga mga miyembro ang nagrebelde kay Joseph Smith, upod ang apat ka miyembro sang Dose ka Apostoles.

Imbes nga tutokan ang nadula sa ila, ang mga matinuohon padayon lang sa pagtukod sang Sion, sa sini nga tion, sa Far West. Naghimo sila sang mga plano para sa bag-o nga templo. Nagtawag sang apat ka bag-o nga Apostoles. Naintiendihan nila nga ang pag-obra sang buluhaton sang Dios wala nagakahulugan nga indi ka gid matumba; nagakahulugan ini nga “magbangon [ka] liwat.” Kag bisan pa nga kinahanglan mo magsakripisyo, ina nga mga sakripisyo sagrado sa Dios, “mas sagrado … sangsa [imo] mga kadalag-an” (Doktrina kag mga Kasugtanan 117:13).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 115:3–6

Ang ngalan sang Simbahan importante sa Ginuo.

Siling ni Pangulong Russell M. Nelson nga ang ngalan sang Simbahan “isa ka importante gid nga topiko” (“Ang Husto nga Ngalan sang Simbahan,” Liahona, Nob. 2018, 87). Panumduma kon ngaa matuod ini samtang imo ginabasa ang Doktrina kag mga Kasugtanan 115:4–6. Ano ang relasyon sang ngalan sang Simbahan sa iya buluhaton kag misyon?

Tan-awa man sa 3 Nefi 27:1–11.

Doktrina kag mga Kasugtanan 115:5–6

Ang Sion kag ang iya mga stake nagahatag sang “dalangpan sa unos.”

Samtang ginatun-an mo ang mabaskog nga imahe sa Doktrina kag mga Kasugtanan 115:5–6, pamensara ang buluhaton nga gusto sang Ginuo, obrahon mo bilang miyembro sang Iya Simbahan. Halimbawa, ano ang pwede mo himuon para “magtindog kag magsilak” ukon “mangin pagsulundan sang tanan nga nasyon”? (bersikulo 5). Ano nga espiritwal nga mga bagyo ang nakita mo sa imo palibot? Paano ka nakakita sang “dalangpan” paagi sa pagtililipon? (bersikulo 6).

Ang Simbahan sang Manluluwas sarang nga mangin kasanag kag dalangpan sa unos.

Doktrina kag mga Kasugtanan 117

Sagrado sa Ginuo ang akon mga sakpripisyo.

Hunahunaa nga ikaw si Newel K. Whitney ukon ang iya asawa nga si Elizabeth, nga manggaranon ang pangabuhi sa Kirtland tapos ginhambalan nga maghalin. Ano ang imo mabasahan sa Doktrina kag mga Kasugtanan 117:1–11 nga makabulig sa imo nga himuon ini nga sakripisyo? Ano nga mga sakripisyo ang imo ginahimo para sa Dios? Ano ang ginatudlo sining mga bersikulo sa imo parte sa Dios kag kon ano ang Iya ginahimo?

Ang sakripisyo nga ginpangayo kay Oliver Granger lain sangsa pamilya Whitney: ginhambalan sia sang Ginuo nga magpabilin sa Kirtland kag solbaron ang kautangan sang Simbahan. Bisan ginrepresentar niya ang Simbahan nga may integridad, sang ulihi gamay lang ang iya kadalag-an. Pamensara kon paano magamit ang mga pulong sang Ginuo sa Doktrina kag mga Kasugtanan 117:12–15 sa mga butang nga ginapangayo Niya sa imo.

Doktrina kag mga Kasugtanan 119–20

Ang akon ikapulo nagabulig sa pagpatindog sang ginharian sang Dios.

Ang mga instruksyon sa seksyon 119 kag 120 nagaklaro kon ano ang ikapulo: ginaamot naton ang “ika-napulo” sang aton ganansya (ukon kita) kada tuig (tan-awa sa Doktrina kag mga Kasugtanan 119:4). Pero ining mga rebelasyon nagahatag sang masobra pa sangsa kahulugan. Ginhambalan sang Ginuo ang mga Santos nga ang ikapulo “[magapakabalaan sang] duta sang Sion. Kag kon wala sini nga layi, siling Niya, “indi ini mangin … Sion sa inyo” (bersikulo 6). Nahunahuna mo bala nga amo sini ang ikapulo? Paano ka mabuligan sang pagbayad sang ikapulo nga mangin mas balaan, mas handa para sa Sion?

Ano ang natun-an mo sa sining mga rebelasyon kon paano ginagamit sang mga alagad sang Ginuo ang pondo sang ikapulo? Ano ang kahulugan sa imo sang dinalan nga “sang akon kaugalingon nga tingug sa ila” sa Doktrina kag mga Kasugtanan 120?

Naghatag si Elder David A. Bednar sang makabulig nga paglarawan kon paano ginagamit ang ikapulo kag ang mga bugay nga nagaabot tungod sa pagtuman sining layi sa “Ang mga Bentana sang Langit” (Liahona, Nob. 2013, 19–20). Basi makabulig sa imo ang masunod nga mga pamangkot samtang ginatun-an mo ang iya mensahe:

The Windows of Heaven

Spiritual and temporal blessings come into our lives as we live the law of tithing.

• Sin-o ang nagadesisyon kon paano gamiton ang ikapulo pagkatapos nga ihatag ini sa Simbahan?

• Ano ang ginagamitan sang ikapulo?

• Ano nga mga bugay ang nagaabot bilang resulta sang pagbayad sang ika-pulo? Halimbawa, sa ano nga pamaagi ginapabakod sang pagbayad sang ikapulo ang imo relasyon sa Amay nga Langitnon kag kay Jesucristo?

• Ano ang imo natun-an sa imbitasyon ni Elder Bednar?

• Paano mo buligan ang iban nga magtubo ang ila pagtuo sa layi sang ikapulo sang Ginuo?

Tan-awa man sa Malaquias 3:8–12.

Buligi ang iban nga ipangabuhi ang ila ginatun-an. Bisan nga gusto sang iban nga magbayad sang ikapulo, kon kaisa indi sila kahibalo kon paano. Kon nagatudlo ka sa imo pamilya ukon sa klase, hatagi sang oras nga ipaathag kon paano magbayad sang ikapulo, sa online ukon paagi sa Tithing and Other Offerings slip. (Tan-awa sa Pagtudlo sa Paagi sang Manluluwas, 27.)

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 115:4–5

Miyembro ako sang Ang Simbahan ni Jesucristo sang mga Santos sa Ulihing mga Adlaw.

• Para buligan ang imo kabataan nga tun-an ang ngalan sang Simbahan kag maintiendihan kon ngaa importante ini, pamangkuta kon may ara sa ila nga makahambal sang kompleto nga ngalan sang Simbahan. Dayon ipakita sa ila ang ngalan halin sa Doktrina kag mga Kasugtanan 115:4 kag ipasunod sa ila. Samtang ginahimo mo ini, itudlo ang importante nga mga tinaga kag kon ngaa importante ini.

Chapter 43: Jesus Christ Names His Church: April 1838

Doktrina kag mga Kasugtanan 115:4–6

Ang akon ehemplo makabulig sa iban nga magpalapit kay Cristo kag mapalayo sa katalagman.

• Basi may kilala ang imo kabataan nga ginabudlayan kag kinahanglan sang “dalangpan” sa mga “unos sang kabuhi” (bersikulo 6). Paano sila makabulig sa sining mga tawo? Pamensara nga hagaron ang imo kabataan nga magtindog kon mabatian nila ang tinaga nga magtindog sa Doktrina kag mga Kasugtanan 115:5. Pwede nila hitaron ang ila mga tudlo nga daw pareho sang silak sang adlaw kon mabasahan mo ang magsilak. Padumduma ang imo kabataan nga ang aton kasanag halin kay Jesucristo, kag buligi sila nga manumdom sang mga paagi nga pwede sila “magsilak” pareho sa Iya.

• Pwede nga idrowing sang imo kabataan ang Doktrina kag mga Kasugtanan 115: 6. Halimbawa, pwede sila magdrowing nga may bagyo kag ang mga tawo nagapasilong sa bilding sang Simbahan. Ano ang ginarepresentar sang bagyo? Paano nagahatag sang bulig ang Simbahan sang Manluluwas? Buligi ang imo kabataan nga manumdom sang abyan, miyembro sang pamilya, ukon kaingod nga nagakinahanglan sang bulig. Paano naton sila hagaron nga magpangita sang bulig sa Simbahan ni Jesucristo?

Doktrina kag mga Kasugtanan 117

Sagrado sa Ginuo ang akon mga sakpripisyo.

• Hagara ang imo kabataan nga mag-akto nga kuno-abi sila si Newel K. Whitney. Ano ang ila mabatyagan kon ginhambalan sila sang Ginuo nga bayaan ang manami nila nga trabaho kag magsaylo sa lain nga lugar? Samtang ululupod ninyo nga ginabasa ang Doktrina kag mga Kasugtanan 117:1–11, hambala ang imo kabataan nga papundohon ka kon makabati sila sang bagay nga makabulig sa ila nga mag-angkon sang pagtuo para tumanon ang Dios. Ano ang aton mga ginasakripisyo para sundon ang Ginuo? Paano Niya kita ginabugayan?

Chapter 41: Trouble in Kirtland: 1837–1838

Doktrina kag mga Kasugtanan 119–20

Ginagamit sang Amay nga Langitnon ang ikapulo para bugayan ang Iya mga anak.

• Mahimo nga kalabanan sang kabataan nga imo ginatudloan bata pa kaayo para magganar sang kuwarta kag magbayad sang ikapulo, pero maayo nga maintiendihan nila kon paano nagabulig ang ikapulo sa buluhaton sang Ginuo sa bilog nga kalibutan. Pamensara nga gamiton ang mga litrato kag ang pahina sang kahiwatan sa katapusan sining outline para buligan sila nga maintiendihan kon ano ang ikapulo. Paano ginagamit sang Amay nga Langitnon ang ikapulo para bugayan ang Iya mga anak? Iistorya ang imo nabatyagan parte sa layi sang ikapulo kag kon paano ka sini ginbugayan.

Chapter 44: Tithing: July 1838

Kon nagabayad kita sang ikapulo, ginapakita naton ang aton pagtuo kay Jesucristo.

Para sa dugang nga mga ideya, tan-awa sa isyu sang Abyan nga magasin sini nga bulan.