Nauvoo the Beautiful [Nauvoo nga Matahum], ni Larry Winborg Copyright 2023

Oktubre 27–Nobyembre 2: “Isa ka Balay sa Akon Ngalan”

Doktrina kag mga Kasugtanan 124

Bisan pa nga nangin mabudlay ang nagligad nga anum ka tuig sa mga Santos, amat-amat nga daw nagamaayo na sang tigpamulak sang 1839: Ang bakwit nga mga Santos ginkaluy-an sang mga pumuluyo sang Quincy, Illinois. Ginpasugtan sang mga guwardya si Propetang Joseph Smith kag ang iban nga mga lider sang Simbahan nga makapalagyo sa prisuhan sang Missouri. Kag ang Simbahan bag-o lang gid nakabakal sang duta sa Illinois kon sa diin magatipon liwat ang mga Santos. Huo, daw punong ini, lamukon nga lugar, pero kon ikumparar sa mga kabudlayan nga gin-atubang sadto sang mga Santos, daw masarangan na ini. Gani ginpahubsan nila ang punong kag naghimo sang konstitusyon para sa bag-o nga siyudad, nga ila ginngalanan Nauvoo. Buot silingon sini “matahum” sa Hebreo, bisan pa nga daw mas pagpahayag ini sang pagtuo sangsa eksakto nga paglaragway, sang primero. Samtang, ginahatagan sang Ginuo ang Iya Propeta sang pamatyagon sang pagdali. Madamo pa Sia sang kamatuoran kag mga ordinansa nga ipanumbalik, kag kinahanglan Niya sang balaan nga templo kon diin Iya “pagakoronahan [ang Iya mga Santos] sang dungog, kawala’y kamatayon, kag kabuhi nga wala’y katapusan” (Doktrina kag mga Kasugtanan 124:55). Sa madamo nga paagi, ining pareho nga mga balatyagon sang pagtuo kag pagdali makita sa buluhaton sang Ginuo sa karon.

Magtuon pa gid parte sa makasaysayan nga mga lugar sang Simbahan sa Illinois.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 124:2–11

Pwede ko hagaron ang iban nga magpalapit kay Cristo.

Ginsugo sang Ginuo si Propetang Joseph Smith sa “paghimo sing matutum nga pagbantala sang [Iya] ebanghelyo” sa “tanan nga hari sang kalibutan” (tan-awa sa Doktrina kag mga Kasugtanan 124:2–11). Kon mabaton mo ini nga buluhaton, ano ang ihambal sang imo proklamasyon parte kay Jesucristo kag sa Iya ginpanumbalik nga ebanghelyo? Binagbinaga man kon paano mo ipakigbahin ang imo pagpamatuod sing normal kag natural sa mga tawo nga imo makaupod adlaw-adlaw.

Tan-awa man sa “Ang Pagpanumbalik sang Kabug-osan sang Ebanghelyo ni Jesucristo: Ika-duha ka Gatos ka Tuig nga Anibersaryo nga Proklamasyon sa Kalibutan,” Library sang Ebanghelyo.

Doktrina kag mga Kasugtanan 124:12–21

Sarang ako mangin disipulo nga masaligan sang Ginuo.

Pamensara nga ihambal sa iban, pareho sang ginhimo sang Manluluwas sa Doktrina kag mga Kasugtanan 124:12–21, ang Cristohanon nga mga kinaiya nga nakita mo sa ila. Paano Niya ginpahayag ang Iya pagpalangga kag pagsalig sa imo?

Tan-awa man sa Richard J. Maynes, “Earning the Trust of the Lord and Your Family,” Liahona, Nob. 2017, 75–77.

Doktrina kag mga Kasugtanan 124:22–24, 60–61

Gusto sang Ginuo nga abiabihon kag batunon ko ang iban.

Samtang ginabinagbinag mo ang sugo sang Ginuo sa Doktrina kag mga Kasugtanan 124:22–24, 60–61, panumduma kon paano mo himuon ang imo balay kag ward nga lugar pareho sa ginapanan-aw sang Ginuo para sa Nauvoo.

ChurchofJesusChrist.org.

A Friend to All

Elder Ulisses Soares talks of the need for kindness and acceptance.

Detalye halin sa Joseph Smith at the Nauvoo Temple [Si Joseph Smith sa Templo sang Nauvoo], ni Gary E. Smith

Doktrina kag mga Kasugtanan 124:25–45, 55

Nagapatindog kita sang mga templo sa Ginuo sa pagbaton sang sagrado nga mga ordinansa.

Ngaa sa banta mo nga ang Ginuo “pirme nagasugo” sang Iya katawhan “nga magtukod [sang mga templo] para sa [Iya] balaan nga ngalan”? Ilista ang mga rason nga imo makita sa Doktrina kag mga Kasugtanan 124:25–45, 55. Paano nangin tanda sang pagpalangga sang Ginuo sa imo ang buluhaton sang pagpatindog sang mga templo ?

What Is a Temple?

The difference between chapels, where Latter-day Saints meet for regular Sunday worship, and temples is also explained.

Sugod sang ginpatindog ang Templo sang Nauvoo, masobra 300 na ka mga templo ang natukod ukon gin-anunsyo. Gintudlo ni Pangulong Russell M. Nelson: “Nakahibalo kita nga ang aton oras sa templo importante kaayo sa aton kaluwasan kag pagkahitaas kag sang aton mga panimalay. … Ang mga pag-atake sang kaaway madasig nga nagadugang sa kabaskugon kag klase. Ang aton kakinahanglan nga magkadto sa templo sing regular mas nagdako pa gid karon” (“Ang Magmangin Huwaran nga mga Santos sa Ulihing mga Adlaw,” Liahona, Nob. 2018, 114). Paano ka nabuligan sang templo nga mapakigbatuan ang “mga pag-atake sang kaaway”? Ano ang nabatyagan mo nga himuon para sundon ang laygay ni Pangulong Nelson?

temples.ChurchofJesusChrist.org.

Doktrina kag mga Kasugtanan 124:45–55

Ginabugayan sang Ginuo ang mga tawo nga nagatinguha nga tumanon ang Iya mga kasuguan.

Ginsugo ang mga Santos nga magpatindog sang templo sa Jackson County, Missouri, pero “ginpunggan sang ila mga kaaway” (Doktrina kag mga Kasugtanan 124:51). Ang mga bersikulo 49–55 may nagapasalig nga mensahe sa mga tawo nga gusto magtuman sang mga kasuguan sang Dios pero ginapunggan tungod sang pamilya ukon sang iban pa nga mga sirkumstansya. Ano nga laygay ang imo nakita sa sining mga bersikulo nga makabulig sa iban nga ara sa sining sitwasyon?

Doktrina kag mga Kasugtanan 124:91–92

Ang Ginuo magagiya sa akon paagi sa akon patriarchal blessing.

Wala madugayi sang napatay ang tatay sang Propeta nga si Joseph Smith Sr., gintawag sang Ginuo si Hyrum Smith sa calling nga ginkaptan sang una sang iya tatay—ang Patriarka sang Simbahan. Mabasa mo ini sa Doktrina kag mga Kasugtanan 124:91–92.

Para magtuon pa gid parte sa kasaysayan sang mga patriarka kag mga patriarchal blessing, i-klik ini.

Paano mo ilaragway ang patriarchal blessing sa tawo nga wala pa makabati parte sini? Ano ang ihambal mo para paisugon ang isa ka tawo nga magkuha sini? Pangitaa ang mga sabat sa sining mga pamangkot sa mensahe ni Elder Randall K. Bennett nga “Ang Imo Patriarchal Blessing—Inspirado nga Pagtuytoy halin sa Amay nga Langitnon” (Liahona, Mayo 2023, 42–43).

Base sa imo gintun-an kag naeksperiyensyahan, paano mo kumpletuhon ini nga pahayag: “Ang patriarchal blessing daw pareho sa .” Ngaa gusto sang Amay nga Langitnon nga makabaton ang Iya mga anak sang patriarchal blessing?

Kon wala mo pa mabaton ang imo patriarchal blessing, ano ang pwede mo himuon para maghanda sa pagbaton sini? Kon nakabaton ka na sang patriarchal blessing, paano mo ipakita sa Dios nga ginahalungan mo ining regalo?

Tan-awa man sa Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 18.17, Librarya sang Ebanghelyo.

Magtudlo halin sa tagipusuon. Ang pagtudlo pinakamakahulugan kon may upod ini nga personal nga mga eksperiyensya kag testimonya. Halimbawa, kon nakabaton ka na sang patriarchal blessing, rebyuha ini mientras nagahanda ka sa pagtudlo parte sining espesyal nga mga bendisyon. Ngaa nagapasalamat ka sa imo bendisyon? Paano mo papagsikon ang iban nga maghanda sa pagbaton ukon tun-an pirme ang ila mga patriarchal blessing?

Mga Ideya para sa Pagtudlo sang mga Kabataan

Doktrina kag mga Kasugtanan 124:15, 20

Nanamian si Jesucristo sang integridad.

• Para buligan ang imo kabataan nga madumduman ang ila natun-an sa Doktrina kag mga Kasugtanan 124:15, 20, pwede mo sila buligan nga drowingon ukon guntingon ang mga papel nga korte-tagipusuon. Sa mga tagipusuon, pwede mo sila buligan nga isulat ang importante nga mga dinalan sa sining mga bersikulo. Ang kanta parte sa pagtindog sa insakto makabulig papag-on sang mga pulong sang Ginuo.

• Pagkatapos nga basahon sing ululupod ang Doktrina kag mga Kasugtanan 124:15, 20, pwede mo buligan ang imo kabataan nga hibaluon kon ano ang buot silingon sang magpangabuhi nga may integridad sa pahina 31 sang Para sa Kusog sang mga Lamharon: Giya sa Paghimo sang mga Pagpili. Ano ang ginhambal sang Ginuo para gid kay George Miller sa bersikulo 20 “bangod sang integridad sang tagipusuon ni [George]”? Pwede ka man mag-istorya sang ehemplo sang mga kabataan nga nagapakita sang integridad sa imo mismo eksperiyensya ukon halin sa Abyan nga magasin. Hagara ang imo kabataan nga magbutang sang lalab-uton nga magpakita sang integridad sini nga semana kag ihambal sa imo kon ano ang ila nabatyagan kon ginahimo nila ini.

Doktrina kag mga Kasugtanan 124:28–29, 39

Ginasugo ni Jesus ang Iya katawhan nga magpatindog sang mga templo.

• Basi masadyahan ang imo kabataan sa pagtan-aw sang mga litrato sang templo, upod ang dumaan nga templo kag templo nga malapit sa ila ginaestaran (see ChurchofJesusChrist.org/temples/list). Pwede mo gamiton ining mga litrato kag ang Doktrina kag mga Kasugtanan 124:39 para ipaathag nga si Jesucristo pirme gid nagasugo sa Iya katawhan nga magpatindog sang mga templo—sang una nga panahon kag sa aton panahon (tan-awa man sa pahina sang kahiwatan sini nga semana).

• Kon malapit lang ang inyo balay sa templo, pamensara nga dalhon didto ang imo kabataan kag malinong nga maglakatlakat sa palibot sang templo. Hagara sila nga pangitaon ang mga tinaga nga “Holiness to the Lord—The House of the Lord” sa gwa sang templo. Hambali upod sang imo kabataan kon ano ang buot silingon sining mga tinaga.

• Pamensara nga gamiton ang mga ideya sa “Ang Magpabunyag kag Magpakumpirma para sa mga Katigulangan” sa appendix A para buligan ang imo kabataan nga magpaabot sa panahon nga makasulod na sila sa templo (tan-awa man sa “The Temple and the Plan of Happiness [Ang Templo kag ang Plano sang Kalipayan” sa appendix B).

Solomon’s Temple [Templo ni Salomon, ni Sam Lawlor

Doktrina kag mga Kasugtanan 124:91–92

Bugayan ako sang Ginuo paagi sa patriarchal blessing.

• Samtang ginabasa ninyo sang ululupod ang Doktrina kag mga Kasugtanan 124:91–92, buligi ang imo kabataan nga pangitaon kon ano ang ginapahimo sang Ginuo kay Hyrum Smith. Hambali kon ano ang patriarchal blessing: isa ka espesyal nga bugay kon diin ginatudloan kita sang Ginuo parte sa aton mga kaugalingon kag kon ano ang gusto Niya nga himuon naton kag mangin. Pamensara nga gamiton ang seksyon “Receiving a Patriarchal Blessing” sa appendix A para buligan ang imo kabataan nga maghanda para magbaton sang patriarchal blessing.

Para sa dugang nga mga ideya, tan-awa sa isyu sang Abyan nga magasin sini nga bulan.

The Nauvoo Temple [Ang Templo sang Nauvoo], ni George D. Durrant