“Mga Tingug sang Pagpanumbalik: Ang Relief Society,” Dali, Magsunod sa Akon—Para sa Puluy-an kag Simbahan: Doktrina kag mga Kasugtanan 2025 (2025)
“Ang Relief Society,” Dali, Magsunod sa Akon—Para sa Puluy-an kag Simbahan: 2025
Mga Tingug sang Pagpanumbalik
Ang Relief Society
Sang 1842, pagkatapos nga maorganisar ang Relief Society sa Nauvoo, Illinois, nagsiling si Propetang Joseph Smith, “Indi perpekto ang pagkaorganisar sang Simbahan kon wala maorganisar ang kababayin-an sing amo sina.” Sa amo man, ang pagtuon sang Pagpanumbalik sang Simbahan sang Ginuo kag sang Iya priesthood indi kompleto kon wala sini nadala ang pagtuon sang Relief Society, nga mismo amo ang “pagpanumbalik sang dumaan nga sulundan” sang babayi nga mga disipulo ni Jesucristo.
Si Eliza R. Snow may importante nga papel sa sinang pagpanumbalik. Ara sia sang gin-organisar ang Relief Society kag, bilang sekretarya sang grupo, nagrekord sang nagkalatabo sa mga miting sini. Nakita niya mismo nga ang Relief Society gin-organisar “suno sa sulundan sang priesthood.” Sa idalom amo ang iya mga pulong, nga ginsulat samtang nagaalagad sia bilang ikaduha nga Pangkabilogan nga Pangulo sang Relief Society, para buligan ang iya mga kauturan nga babayi nga maintiendihan ang diosnon nga hilikuton nga ginsalig sa mga anak nga babayi sang Dios sa kasugtanan.
Larawan sang pag-organisar sang Relief Society ni Paul Mann
Eliza R. Snow
“Bisan pa nga ang ngalan nga [Relief Society] moderno, ang institusyon dumaan ang ginhalinan. Ginhambal ni [Joseph Smith] sa amon, nga ang pareho nga organisasyon ara na sa simbahan sang una, ang mga pagtumod sa sini makita sa pila ka mga sulat nga narekord sa Bag-ong Katipan, nga nagagamit sang bansag nga, ‘pinili nga babayi’ [tan-awa sa 2 Juan 1:1; Doktrina kag mga Kasugtanan 25:3].
“Isa ini ka organisasyon nga indi magluntad nga wala ang Priesthood, bangud sang kamatuoran nga ginakuha sini ang tanan sini nga awtoridad kag impluwensya sa sina nga ginhalinan. Sang ang Priesthood ginkuha sa kalibutan, ining institusyon upod ang tanan nga mga sanga sang matuod nga paagi sang simbahan ni Jesucristo sa kalibutan, nadula man. …
“Tungod ara ako sa pag-organisar sang ‘Relief Society sang Kababayin-an sa Nauvoo,’ … kag bangud man may igo ako nga eksperiyensya sa sinang asosasyon, siguro mapabutyag ko ang pila ka mga panghunahuna nga makabulig sa mga anak nga babayi sang Sion sa pag-entra sa sining importante kaayo nga organisasyon, nga puno sang bag-o kag madamo nga mga responsibilidad. Kon ang bisan sin-o sa mga anak nga babayi kag mga iloy sa Israel nagabatyag nga medyo limitado sa ila karon nga ikasarang sa pagbuhat, ila na karon masalapuan ang supisyente nga ikasarang para sa tagsa ka gahum kag kapasidad sa paghimo sang maayo sa diin sila labi gid nga nadulotan. …
Ang Relief Society gin-organisar sa ibabaw nga kuwarto sang Tindahan nga Red Brick.
“Kon may magpamangkot gid man, Ano ang tuyo sang Relief Society sang Kababayin-an? Isabat ko—ang maghimo sang maayo—para gamiton ang tanan nga kapasidad nga ara sa aton sa paghimo sang kaayohan, indi lamang sa pagpaumpaw sang mga imol kundi sa pagluwas sang mga kalag. Ang gintingob nga pagpanikasog makahimo sang sobra katama sangsa malab-otan sang pinakamaayo nga indibidwal nga mga pagpaninguha. …
“Sa pagbulig sa mga imol, ang Relief Society sang Kababayin-an may iban pa nga mga tulumanon nga masobra pa sangsa pagpaumpaw lang sang pisikal nga mga kinahanglan. Ang kaimulon sang kaisipan kag balatian sang tagipusuon, nagapangayo man sang atensyon; kag sa masami sang malulo nga hambalanon—ang pila ka tinaga sang laygay, ukon bisan pa gani mainit kag mainabyanon nga pagkamusta mas makadulot sang kaayohan kag mas ginapasalamatan sangsa isa ka putos nga bulawan. …
“Kon ang mga Santos nagatipon halin sa malayo, nga mga estranghero sa kada isa, kag madali mapatalang sang mga nagahulat nga magpang-ilad, ang [Relief] Society dapat mangin maabtik sa pag-atipan [sa ila], kag ipakilala sila sa grupo nga magapauswag kag magapasanag, kag labi sa tanan magapabakod sa ila sa pagtuo sang Ebanghelyo, kag sa paghimo sini, mangin instrumento sa pagluwas sang madamo.
“Kinahanglan sang madamo nga libro para ipahayag ang mga tulumanon, pribelihiyo kag mga responsibilidad sa sulod sang Society. … Himoa ini (sa idalom sang direksyon sang inyo bishop) sing matawhay, hungod, mapagsik, tingob kag mainampuon, kag bugayan sang Dios ang inyo mga pagpaninguha sang kadalag-an.”