Detalye halin sa Joseph Smith in Nauvoo, 1840 [Si Joseph Smith sa Nauvoo, 1840], ni Theodore Gorka

Nobyembre 10–16: “Nakita Ko ang Imo mga Sakripisyo sa Pagtuman”

Doktrina kag mga Kasugtanan 129–132

Paagi kay Joseph Smith, gindula sang Ginuo ang iban nga misteryo sang wala katubtuban. Ang kahalangdon sang Dios, ang himaya sang langit, kag ang kasangkaron sang wala katubtuban daw halos pamilyar na kon tan-awon paagi sa ginpanumbalik nga ebanghelyo, bisan pa sa limitado nga panghunahuna pareho sa aton. Ang mga rebelasyon sa Doktrina kag mga Kasugtanan 129–32 maayo nga mga halimbawa. Daw ano ang Dios? Sia “may lawas … nga matandog pareho sang iya sang tawo.” Daw ano ang langit? “Inang amo man nga pag-inupdanay nga nagapatunga sa aton diri magapatunga sa aton didto” (Doktrina kag mga Kasugtanan 130: 22 2). Ang matuod, isa sa makapalipay gid nga mga kamatuoran parte sa langit amo nga pwede sini maupod ang aton ginapakamahal nga relasyon sa pamilya, kon naselyohan sa husto nga awtoridad. Ang mga kamatuoran nga pareho sini nagahimo sang langit nga daw indi gawa malayo—mahimayaon pero malab-ot.

Ugaling, kon kaisa pwede kita pangabayon sang Dios sa paghimo sang mga butang nga daw indi komportable kag indi malab-ot. Para sa nauna nga mga Santos, ang pagpangasawa sing madamo isa sa amo sina nga mga kasuguan. Isa ato ka grabe nga pagtilaw sang pagtuo para kay Joseph Smith, sa iya asawa nga si Emma, kag sa halos tanan nga nagbaton sini. Para malampuwasan ining pagtilaw, kinahanglan nila sang sobra pa sangsa paborable nga mga balatyagon para sa ginpanumbalik nga ebanghelyo; kinahanglan nila sing pagtuo sa Dios nga mas madalom pa dira. Wala na ining kasuguan sa karon, pero ang tampad nga ehemplo sang mga nagpangabuhi sini ara sa gihapon. Kag ining ehemplo nagainspirar sa aton kon ginapangabay kita sa paghimo sang aton kaugalingon nga “mga sakripisyo sa pagtuman” (Doktrina kag mga Kasugtanan 132:50).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 130–132

Gusto sang Dios nga ipahitaas ang Iya mga kabataan.

Kadamo pa sang mga butang nga wala naton mahibal-i parte sa pangkahitaasan ukon sa kabuhi sa pinakamataas nga lebel sa selestiyal nga ginharian—ang klase sang pangabuhi sang Dios. Laban sini siguro indi pa naton masarangan nga maintiendihan. Pero ang Dios nagpahayag na sang pila ka malahalon nga mga tanda, kag madamo sini sa ila makita sa Doktrina kag mga Kasugtanan 130–32. Mahimo mo ini basahon upod ining mga pamangkot sa imo hunahuna: Ano ang akon matun-an parte sa Dios? Ano ang matun-an ko parte sa kabuhi pagkatapos sang kabuhi sa duta? Paano mabugayan sining impormasyon parte sa kabuhi nga wala katapusan ang akon kabuhi sa karon?

Doktrina kag mga Kasugtanan 130:20–21; 132:5

Ginabugayan sang Dios ang mga nagatuman sang Iya mga layi.

Paano mo ihambal sa imo kaugalingon nga tinaga, ang ginatudlo sang Ginuo sa Doktrina kag mga Kasugtanan 130:20–21 kag 132:5? Binagbinaga kon paano ginpakita ining prinsipyo sa imo kabuhi.

Kon kaisa, bisan pa nga nagatuman kita sa Dios, ang mga bugay nga ginapaabot naton wala dayon nagaabot. Paano mo ginapadayon ang imo pagtuo kag paglaum kon matabo ini?

Tan-awa man sa 1 Nefi 17:35; Doktrina kag mga Kasugtanan 82:10.

Doktrina kag mga Kasugtanan 132:13–21

Ginpatigayon sang Amay nga Langitnon nga mangin posible para sa mga pamilya nga mangin wala katapusan.

Paagi kay Propetang Joseph Smith, ginpanumbalik sang Ginuo ang kamatuoran nga ang pag-asawahay kag mga relasyon sa pamilya sarang mangin wala katapusan: Samtang ginabasa mo ang Doktrina kag mga Kasugtanan 132:13–21, pangitaa ang mga dinalan nga makabulig sa imo nga maintiendihan ang kinalain sang “magapabilin” sa wala katapusan kag ang indi. Ano sa banta mo ang buot silingon sang relasyon sang pag-asawahay nga “paagi [sa Ginuo]”? (bersikulo 14).

Ginpakigbahin ni Pangulong Henry B. Eyring ini nga laygay nga iya nabaton sang nagakabalaka sia sa sitwasyon sang iya pamilya: “Kinahanglan ninyo nga magpangabuhi nga nagakaangay sa selestiyal nga ginharian, kag ang mga kahimtangan sa pamilya mangin mas manami sangsa imo ginahunahuna” (sa “A Home Where the Spirit of the Lord Dwells [Puluy-an Nga sa Diin ang Espiritu sang Ginuo Nagapabilin],” Liahona, Mayo 2019, 25). Paano makabulig ining laygay sa imo ukon sa kilala mo?

Tan-awa man sa “I Am a Child of God [Ako Anak sang Dios],” Hymns, no. 301.

Ang pag-asawahay sarang nga maselyohan sa wala katubtuban sa balay sang Ginuo.

Doktrina kag mga Kasugtanan 132:1–2, 29–40

Ang pagpangasawa sang madamo ginabaton lamang sang Dios kon Sia ang nagsugo sini.

Kadamo sang mga nagabasa sang Daan nga Katipan nga nagapamangkot parte kay Abraham, Jacob, Moises, kag iban pa nga nagapangasawa sang madamo. Ini bala nga mga alagad sang Ginuo nagapanginbabayi? Gintugtan bala sang Dios ang ila mga pagpangasawa sang madamo? Pareho man sini ang mga pamangkot ni Joseph Smith. Pangitaa ang mga sabat nga ginhatag sang Dios sa Doktrina kag mga Kasugtanan 132:1–2, 29–40.

Ang pag-asawahay sang isa ka lalaki kag isa ka babayi amo ang pagsulundan sang Dios sa pag-asawahay (tan-awa sa tig-ulo sang seksyon sang Opisyal nga Pahayag 1; Jacob 2:27, 30). Ugaling, may mga tiyempo nga ginsugo sang Dios ang Iya mga anak nga himuon ang pagpangasawa sing madamo.

Ang una nga tinuig sang ginpanumbalik nga Simbahan isa sining pinasahi nga mga panahon. ChurchofJesusChrist.org.

Why was it necessary for Joseph Smith and others to practice polygamy?

A question from the Worldwide Devotional: A Face to Face Event with Elder Cook on September 9, 2018

Mga Ideya para sa Pagtudlo sang mga Kabataan

Doktrina kag mga Kasugtanan 130:2, 18–19; 132:13, 19

Gusto sang Amay nga Langitnon nga magtutok ako sa mga butang nga wala katapusan.

• Ano ang ginatudlo sa aton sang Doktrina kag mga Kasugtanan 132:13 parte sa mga butang sang kalibutan? Pwede kamo mag-empake sang imo kabataan sang bagahe ukon bag sang mga bagay nga nagarepresentar sang mga butang nga, ginhambal sa Doktrina kag mga Kasugtanan 130:2, 18–19; 132:19, madala naton sa dason nga kinabuhi.

Doktrina kag mga Kasugtanan 130:20–21; 132:5, 21–23

Ginabugayan ako sang Dios kon ginatuman ko ang Iya mga layi.

• Basi makatudlo sa imo kabataan ang simple nga pagkumparar parte sa pagtuman sang mga kasuguan sang Dios. Halimbawa, pwede mo sila pahatagon sa imo sang direksyon sa pagkadto sa isa ka lugar, pareho sang eskwelahan ukon bilding sang Simbahan. Ano ang matabo kon indi naton pagsundon ang direksyon? Dayon pwede ninyo basahon ang Doktrina kag mga Kasugtanan 130:21 kag ikumparar ining mga direksyon sa mga kasuguan nga ginhatag sang Dios sa aton.

• Pwede man kamo magkanta sang kanta parte sa pagtuman, kag pangitaon ang mga tinaga sa Doktrina kag mga Kasugtanan 130:20–21 kag 132:5 nga pareho sang mga ara sa kanta. Paano kita ginabugayan sang Dios kon ginatinguhaan naton nga tumanon ang Iya mga kasuguan?

Doktrina kag mga Kasugtanan 130:22

Ang Amay nga Langitnon kag si Jesucristo may imortal nga pisikal nga mga lawas.

• Pagkatapos nga basahon ang Doktrina kag mga Kasugtanan 130:22 sing ululupod, pwede kamo magtan-aw sang imo kabataan sang litrato ni Jesucristo kag itudlo ang Iya mga mata, ang Iya baba, kag iban pa nga parte sang Iya lawas. Pwede man itudlo sang imo kabataan ina nga mga parte sa ila mismo nga mga lawas. Sugiri sila kon ngaa importante sa imo nga mahibal-an nga ang aton mga lawas pareho tulukon sa mga lawas sang Amay nga Langitnon kag ni Jesus.

Tungod sa mga ordinansa sa balay sang Ginuo, ang pamilya sarang nga mangin wala katapusan.

Doktrina kag mga Kasugtanan 132:19

Ginpatigayon sang Amay nga Langitnon nga mangin posible para sa mga pamilya nga mag-ululupod sa wala katubtuban.

• Buligi ang imo kabataan nga makakita sang mga halimbawa sang mga butang nga wala nagadugay—pagkaon nga nagakapan-os, mga bulak nga nagakalaya, kag madamo pa. Dayon tan-awa ang Doktrina kag mga Kasugtanan 132:19 sing ululupod kag pangitaa ang mga dinalan pareho sang “wala’y katubtuban nga kasugtanan,” “ginselyohan,” “sa bug-os nga wala’y katapusan,” kag “tubtob sa wala’y katapusan.” Pwede man kamo magtan-aw sang mga litrato sang inyo pamilya kag magpamatuod nga ginpatigayon sang Ginuo, paagi sa mga ordinansa kag kasugtanan sa templo, nga maglab-ot ang mga pamilya sa wala katubtuban.

Chapter 55: A Revelation about Marriage: July 1843

Mangin sensitibo sa mga sitwasyon sang pamilya. “Ang mga kabataan sa karon nga panahon ara sa lainlain kag komplikado nga mga sitwasyon sa pamilya. … Kinahanglan [naton] nga lab-uton [ang mga] daw nagaisahanon, nabayaan, ukon ara sa gwa sang kudal” (Neil L. Andersen, “Whoso Receiveth Them, Receiveth Me,” Liahona, Mayo 2016, 49, 52).

Para sa dugang nga mga ideya, tan-awa sa isyu sang Abyan nga magasin sini nga bulan.

Isa ka sealing room sa Templo sang Paris France