Ten Virgins [Napulo ka Dalaga], ni Jorge Cocco

Nobyembre 17–23: “Maghanda Kamo sa Pagkari sang Nobyo”

Doktrina kag mga Kasugtanan 133–134

Sang 1833, gin-atake kag ginguba sang malain nga mga tawo ang imprintahan sang Simbahan. Upod sa mga ginaimprinta sang amo sadto nga tiyempo ang Libro sang mga Kasugoan—ang primero nga pagtinguha sang Simbahan nga tingbon ang mga rebelasyon sa ulihing-adlaw sa isa ka libro. Ginpangwas-ag sang malain nga mga tawo ang wala pa mahigtan nga mga pahina, kag bisan pa nga gintago sang maisog nga mga Santos ang iban sini, pila lang ka indi kompleto nga mga kopya sang Libro sang mga Kasugoan ang nahibal-an nga nabilin.

Ang kilala naton karon nga seksyon 133 sang Doktrina kag mga Kasugtanan amo dapat ang appendix sang Libro sang mga Kasugoan, nga daw pareho sang mabaskog nga konklusyon sa punta sang ginpublikar nga mga rebelasyon sang Ginuo. Nagapaandam ini sang manug-abot nga adlaw sang paghukom kag ginasulit ang panawagan nga makita sa bilog nga moderno nga rebelasyon: Magpalayo sa pagkadutan-on, nga ginasimbolo sang Babilonia. Magpatindog sang Sion. Maghanda para sa Ika-duhang Pagkari. Kag ipalapta ining mensahe “tagsa ka nasyon, kag kaliwat, kag lengguahe, kag katawhan” (bersikulo 37). Ang orihinal nga mga plano para sa Libro sang mga Kasugoan wala natuman, pero ining rebelasyon isa ka pahanumdom kag saksi nga ang buluhaton sang Ginuo indi mapunggan, “kay pagahublasan niya ang iya balaan nga butkon … , kag ang tanan nga yara sa mga punta sang kalibutan makakita sang kaluwasan sang ila Dios” (bersikulo 3).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 133:4–14

Ginatawag ako ni Jesucristo nga sikwayon ang Babilonia kag magkadto sa Sion.

Ang espiritwal nga kabaliskaran sang Sion amo ang Babilonia—ang dumaan nga siyudad nga sa bilog nga balaan nga kasulatan nagasimbolo sang kalainan kag espiritwal nga pagkaulipon. Samtang ginabasa mo ang Doktrina kag mga Kasugtanan 133:4–14, binagbinaga kon paano ka ginatawag sang Manluluwas para “maggwa … sa Babilonia” (bersikulo 5) kag “maglakat … [ka] … sa Sion” (bersikulo 9). Paano mo ginasabat ang Iya panawagan?

Doktrina kag mga Kasugtanan 133:1–19, 37–39

Sarang ko na maghanda karon para sa Ika-duhang Pagkari sang Manluluwas.

Ang seksyon 1, ang pauna sang Ginuo sa Doktrina kag mga Kasugtanan, kag ang seksyon 133, ang orihinal nga appendix sang Libro sang mga Kasugoan, nagasugod sa pareho nga pangabay halin sa Ginuo: “Dungga ninyo, O mga katawhan sang akon simbahan” (Doktrina kag mga Kasugtanan 1:1; 133:1). Pwede mo tun-an ang Doktrina kag mga Kasugtanan 133:1–19, 37–39 kag ilista ang mga mensahe nga siling sang Ginuo imo “dunggon” (pamatian kag tumanon) samtang nagahanda ka para sa Iya Ikaduhang Pagkari. Labi na gid, pwede mo ilista ang mga butang nga gusto Niya nga imo himuon para (1) ihanda ang imo kaugalingon kag (2) buligan ang kalibutan nga maghanda para sa Iya pagbalik. Ano ang imo natun-an sa sining mga listahan?

(“Tema sang Aaronic Priesthood Quorum,” Librarya sang Ebanghelyo).

Doktrina kag mga Kasugtanan 133:19–56

Ang Ikaduha nga Pagkari ni Jesucristo mangin masadya para sa matarong.

Samtang ginabasa mo ang paglaragway sa pagbalik sang Manluluwas sa mga bersikulo 19–56, ano ang nakita mo nga ginapaabot mo? Ano nga mga tinaga ukon mga dinalan ang nagalaragway sang pagpalangga sang Ginuo sa Iya katawhan? Pamensara nga isulat ang imo personal nga mga eksperiyensya sa “mapinalanggaon nga kaayo sang [imo] Ginuo, kag ang tanan nga iya ginhatag sa [imo] suno sa iya kaluoy” (bersikulo 52).

Detalye halin sa Healer [Manugpaayo], ni Kelsy kag Jesse Lightweave

Doktrina kag mga Kasugtanan 134

“Ginpahamtang sang Dios ang mga gobyerno para sa benepisyo sang tawo.”

Ang relasyon sang nauna nga mga Santos sa gobyerno komplikado. Sang gintabog ang mga Santos pa-gwa sa Jackson County, Missouri, sang 1833, nangayo sila sang bulig sa lokal kag nasyunal nga gobyerno kag wala sila sang nabaton nga bulig. Sa pareho nga tiyempo, gin-interpretar sang iban nga indi mga miyembro sang Simbahan nga ang mga ginatudlo parte sa Sion nagakahulugan nga ginasikway sang mga Santos ang awtoridad sang dutan-on nga mga gobyerno. Ang Doktrina kag mga Kasugtanan 134 ginsulat, sa isa ka bahin, para athagon ang tindog sang Simbahan parte sa gobyerno. Ano ang ginapaintiendi sining seksyon kon ano dapat ang mabatyagan sang mga Santos sang Ginuo parte sa gobyerno?

Samtang ginatun-an mo ang seksyon 134, pangitaa ang mga prinsipyo sang gobyerno kag ang mga responsibilidad sang mga pumuluyo. Paano ayhan ining mga ideya nakabulig sa nauna nga mga Santos? Paano ini magamit sa mga lugar nga imo ginaistaran?

Tan-awa man sa Mga Artikulo sang Pagtuo 1:11–12.

Mga Ideya para sa Pagtudlo sang mga Kabataan

Doktrina kag mga Kasugtanan 133:4–5, 14

Gusto sang Ginuo nga magpalayo ako sa kalainan sang kalibutan.

• Pwede ninyo ilista sang imo kabataan ang mga lugar kag mga sitwasyon nga gusto sang Ginuo nga palayuan naton. Dayon pwede ninyo ikumparar ato nga mga lugar kag sitwasyon sa kahulugan sang “Babel, Babilonia” sa Giya sa Balaan nga mga Kasulatan (Librarya sang Ebanghelyo). Dayon pwede ninyo basahon ang Doktrina kag mga Kasugtanan 133:4–5, 14. Ano ang buot silingon sang “maggwa … sa Babilonia”? (bersikulo 5). Pwede ka man maghimo sang pareho nga listahan sang mga lugar kag mga sitwasyon nga ginahagad kita sang Ginuo nga kadtoan kag ikumparar ina nga listahan sa buot silingon sang “Sion” sa Giya sa Balaan nga mga Kasulatan.

Doktrina kag mga Kasugtanan 133:19–21, 25

Mabalik liwat si Jesucristo.

• Basi masadyahan ang imo kabataan sa pagdrama-drama kon daw ano ang maghanda para sa isa ka butang, pareho sang sports tournament, importante nga bisita, ukon paborito nga bakasyon. Ngaa importante ang paghanda? Dayon pwede ninyo basahon sing ululupod ang Doktrina kag mga Kasugtanan 133:17–19, 21 kag hagara ang imo kabataan nga pangitaon kon ano ang ginahagad sang Ginuo nga aton handaan. Pwede mo ipakita ang litrato sa outline sining semana kag pamangkuton ang imo kabataan kon ano ang nahibal-an nila parte sa Ika-duhang Pagkari ni Jesucristo. Ano pa ang aton matun-an sa bersikulo 19–25, 46–52? Ano ang pwede naton himuon para maghanda para sa sining malipayon nga okasyon?

• Pwede ka magtago sang pila ka mga litrato ukon mga bagay nga nagapakita kon ano ang pwede naton himuon agud maghanda para sa Ikaduhang Pagkari ni Jesucristo (pareho sang pagbasa sang balaan nga mga kasulatan, pagpakigbahin sang ebanghelyo, ukon pagserbisyo sa aton mga pamilya). Ipapangita sa imo kabataan ang mga litrato ukon mga bagay kag hambali kon paano makabulig sa aton ining mga butang para maghanda sa pagsugata sa Manluluwas sa Iya pagbalik.

• Iistorya sa kada isa ang inyo ang pagpalangga para sa Manluluwas kag ang inyo mga nabatyagan parte sa Iya pagbalik.

Doktrina kag mga Kasugtanan 133:52–53

Si Jesucristo mapinalanggaon kag maayo.

• Pwede kamo magtan-aw sang imo kabataan sang mga litrato nga nagapakita kay Jesus nga mapinalanggaon kag mabuot. (Halimbawa, tan-awa sa Libro sang mga Larawan nga Pang-Ebanghelyo, num. 42, 47.) Ano pa ang ginhimo ni Jesus para ipakita ang Iya pagpalangga kag kaayo? Basaha sing ululupod ang Doktrina kag mga Kasugtanan 133:52, kag buligi ang imo kabataan nga magpamensar sang mga paagi nga “pagasambiton nila ang mapinalanggaon nga kaayo sang ila Ginuo” sa iban.

  

Detalye halin sa In His Light [Sa Iya Kasanag], ni Greg Olsen

Magtudlo sang maathag kag simple nga doktrina. Ginatudlo sang Ginuo ang Iya ebanghelyo nga “maathag kag simple” (Doktrina kag mga Kasugtanan 133:57). Ano ang ginapahangop sining mga tinaga sa imo parte sa pagtudlo sang ebanghelyo sa imo pamilya ukon klase?

Doktrina kag mga Kasugtanan 134: 1–2

Gusto sang Ginuo nga tumanon ko ang layi.

• Pwede nga ilista sang imo kabataan ang mga pagsulundan ukon mga layi nga ila ginasunod. Daw ano ayhan ang pangabuhi kon wala sang nagatuman sining mga layi? Dayon pwede ninyo basahon ang Doktrina kag mga Kasugtanan 134:1–2 upod sa ila, nga ginabuligan sila nga maintiendihan ang bisan ano nga tinaga ukon dinalan nga indi nila maintiendihan. Ngaa nga gusto sang Ginuo nga tumanon naton ang layi? (tan-awa man sa Mga Artikulo sang Pagtuo 1:12).

Para sa dugang nga mga ideya, tan-awa sa isyu sang Abyan nga magasin sini nga bulan.

Christ in His Red Robe [Si Cristo sa Iya Pula nga Kunop], ni Minerva Teichert