“Mga Tingug sang Pagpanumbalik: Mga Bunyag sang Aton mga Katigulangan, ‘isa ka Mahimayaon nga Doktrina,’” Dali, Magsunod sa Akon—Para sa Puluy-an kag Simbahan: Doktrina kag mga Kasugtanan 2025 (2025)

“Bunyag para sa Aton mga Katigulangan, ‘isa ka Mahimayaon nga Doktrina,’” Dali, Magsunod sa Akon—Para sa Puluy-an kag Simbahan: 2025

Mga Tingug sang Pagpanumbalik

Bunyag para sa Aton mga Katigulangan, “isa ka Mahimayaon nga Doktrina”

drowing sang tulugmawan sa Templo sang Nauvoo — Ining drowing nagapakita sang tulugmawan sa Templo sang Nauvoo nga nagatungtong sa dose ka baka.

Phebe kag Wilford Woodruff

Si Phebe Woodruff nagaistar malapit sa Nauvoo sang nagsugod tudlo si Joseph Smith parte sa posibilidad nga mabunyagan para sadtong mga nagkabuhi sang una. Ginsulat niya ini sa iya bana, nga si Wilford, nga nagaalagad sa misyon sa England:

“Natun-an ni Brother Joseph … paagi sa rebelasyon nga atong mga miyembro sining simbahan mahimo bunyagan para sa ila mga paryente nga napatay na kag wala nakaangkon sing pribelihiyo nga mabatian ining ebanghelyo, bisan para sa ila mga kabataan, mga ginikanan, mga utod nga lalaki, mga utod nga babayi, kalolohan, mga tiyo, kag mga tiya. … Sa oras nga mabunyagan na sila para sa ila mga abyan buy-an ini sila sa prisuhan kag makuha na nila sila sa pagkabanhaw kag madala sila sa selestiyal nga ginharian—ining doktrina masadya nga ginbaton sang simbahan kag nagpalapit sila nga guban-guban, ang iban pagabunyagan bisan tubtob 16 ka beses … sa isa ka adlaw.”

Si Wilford Woodruff sang ulihi nagkomento parte sining prinsipyo: “Sang tion nga mabatian ko ini naglukso ang akon kalag sa kalipay. … Nagpalapit ako kag ginbunyagan para sa tanan ko nga paryente nga patay na nga akon madumduman. … Gusto ko maghambal Aleluia sang nag-abot ang rebelasyon nga nagapahayag sa amon sang bunyag para sa patay. Nabatyagan ko nga sarang kami magkalipay sa mga bugay sang Langit.”

Vilate Kimball

Pareho kay Sister Woodruff, si Vilate Kimball nakabati parte sa bunyag paagi sa proxy samtang ang iya bana, nga si Heber, ato sa malayo nga nagawali sang ebanghelyo. Ginsulatan niya sia:

“Si Pangulong Smith nagbukas sang bag-o kag mahimayaon nga topiko … nga nagtuga sang pagpagsik liwat sang pagtuo sang mga miyembro sa simbahan. Ina, amo ang pagpabunyag para sa patay. Ginahambal ini ni Pablo, sa una nga Mga Taga-Corinto ika-15 nga kapitulo ika-29 nga bersikulo. Si Joseph nakabaton sang mas kumpleto nga paathag parte sini paagi sa Rebelasyon. … Pribelihiyo sining simbahan nga mabunyagan para sa tanan nila nga himata nga nagkalamatay na antes mag-abot ining Ebanghelyo; bisan tubtob pa sa ila Lolo kag Lola-sa-tuhod. … Sa paghimo sini, kita nagaakto bilang mga tiglawas para sa ila, kag maghatag sa ila sang pribelihiyo nga magbangon sa unang pagkabanhaw. Siling niya nga igawali ang Ebanghelyo sa ila … pero wala sang espiritu nga ginabunyagan. … Sugod sang ginwali ining pamaagi diri, wala na magpahuway ang mga tubig. Sa tion sang komperensya may ara kon kaisa walo tubtob napulo ka mga Elder sa suba sa tagsa ka tion nga nagapangbunyag. … Gusto ko nga mabunyagan para sa akon Nanay. Nahunahuna ko nga maghulat nga makapauli ka, pero sang katapusan nga naghambal si Joseph parte sa sining topiko, ginlaygayan niya ang kada isa nga indi na magpadugay-dugay, kag hilwayon na ang ila mga abyan halin sa pagkabihag sa labing madali nga panahon. Gani nahunahuna ko nga maglinya sini nga semana, kay may pila ka mga kaingod nga makadto man didto. Ang iban gani kapila na mabunyagan. … Gani makita mo nga may kahigayunan para sa tanan. Indi bala ini mahimayaon nga doktrina?”

Phebe Chase

Sang nahuman na ang tulugmawan sa Templo sang Nauvoo, ang mga bunyag para sa iban ginhikot na didto imbes nga sa suba. Si Phebe Chase, isa ka pumuluyo sang Nauvoo, nagsulat sa iya iloy parte sa templo, nga ginalaragway ang tulugmawan bilang ang lugar kon diin “sarang kita mabunyagan para sa aton mga patay kag mangin mga manluluwas sa Bukid nga Sion.” Padayon niya nga ginpaathag nga sa sining tulugmawan, “Ginbunyagan na ako para sa akon pinalangga nga amay kag sa tanan nga kaabyanan ko nga patay na. … Karon gusto ko mahibal-an kon ano ang mga ngalan sang imo amay kag imo Iloy para mahilway ko na sila, kay handum ko nga paumpawan ang mga Patay na. … Naghambal na liwat ang Ginuo kag ginpanumbalik ang dumaan nga pamaagi.”

Sally Randall

Sa pagsulat sa iya mga abyan kag pamilya parte sa bunyag para sa mga miyembro sang pamilya nga buhi sang una, ginsaysay ni Sally Randall ang pagtaliwan sang iya anak nga si George:

“O daw ano kabudlay sadto sa akon kag daw tubtob karon indi ko pa gid ini mabaton, pero … ang iya amay nabunyagan na para sa iya kag daw ano kamahimayaon nga butang nga nagpati kami kag nagbaton sang kabug-osan sang ebanghelyo suno sa pagwali sini sa karon kag mabunyagan para sa tanan naton nga patay na nga kaabyanan kag luwason sila tubtob sa malab-utan sang aton ihibalo parte sa ila.

“Luyag ko nga isulat mo sa akon ang mga ngalan sang tanan nga may kaangtanan sa aton nga patay na tubtob sa kalolohan kag kalolahan nga malab-utan. Handum ko nga himuon ang kutob sa masarangan ko para luwason ang akon mga abyan kag mangin malipayon gid ako kon makakadto ka kag buligan ako kay kadako sining buluhaton para sa isa lang ka tawo. … Ginapaabot ko na nga maghunahuna ka nga isa ini ka pinasahi nga doktrina pero mahibal-an mo nga ini matuod.”