Us with Them and Them with Us [Kita upod sa Ila kag Sila upod Kita], ni Caitlin Connolly

Nobyembre 3–9: “Tingug sang Kalipay para sa mga Buhi kag sa mga Patay”

Doktrina kag mga Kasugtanan 125–128

Sang Agosto 1840, ang nagakalisud nga si Jane Neyman namati kay Propetang Joseph nga naghambal sa lubong sang iya abyan nga si Seymour Brunson. Ang tin-edyer nga anak ni Jane nga si Cyrus wala man lang dugay napatay. Nagdugang sa iya kalisud amo nga si Cyrus wala pa mabunyagi, kag nabalaka si Jane kon ano ang madangtan sang iya wala katapusan nga kalag. Amo man sina ang ginpamensar ni Joseph parte sa iya pinalangga nga utod nga si Alvin, nga napatay man antes mabunyagan. Gani nagdesisyon ang Propeta nga iistorya sa tanan nga ara sa lubong kon ano ang ginpahayag sang Ginuo sa iya parte sa mga nagkalamatay nga wala makabaton sang mga ordinansa sang ebanghelyo—kag kon ano ang pwede naton himuon para buligan sila.

Ang doktrina sang bunyag para sa patay nagpalipay sa mga Santos; ang ila mga hunahuna nagliso dayon sa patay na nga mga miyembro sang pamilya. Karon may paglaum na para sa ila! Nakigbahin si Joseph sa ila kalipay, kag sa isa ka sulat nga nagatudlo sining doktrina, naggamit sia sing malipayon, mapagsik nga lenggwahe para ipabutyag ang kon ano nga gintudlo sang Ginuo sa iya parte sa kaluwasan sang mga patay: “Pahugyawa sa kalipay ang kabukiran, kag kamo tanan nga kapatagan magsinggit sing mabaskog; kag kamo tanan nga kadagatan kag mga mala nga duta isugid ang katilingalahan sang inyo Wala’y Katapusan nga Hari!” (Doktrina kag mga Kasugtanan 128:23).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 126

Luyag sang Ginuo nga atipanon ko ang akon pamilya.

Pagbalik halin sa misyon sa England—isa sa madamo nga misyon nga iya ginserbisyohan—nakabaton si Brigham Young sang isa pa ka importante nga hilimuon halin sa Ginuo. Ginsugo sia nga “hatagan sing maayo gid nga pagtatap ang [iya] pamilya” (bersikulo 3), nga nag-antos sang wala sia. Samtang ginatun-an mo ini nga seksyon, pamensara kon ngaa ginapangayo kon kis-a sang Ginuo ang sakripisyo sa aton pagserbisyo. Ano ang pwede mo himuon para atipanon ang imo pamilya?

Doktrina kag mga Kasugtanan 127:2–4

Makasalig ako sa Ginuo sa tiyempo sang kabudlayan.

Ang sala nga mga akusasyon kag ang pamahog nga dakpon liwat nagpwersa kay Joseph Smith nga magpanago sang Agosto 1842. Pero ang mga pulong nga iya ginsulat sa mga Santos sining tion (nga karon Doktrina kag mga Kasugtanan 127) puno sang paglaum kag kalipay. Ano ang ginatudlo sa imo sang mga bersikulo 2–4 parte sa Dios? parte sa pag-atubang sang pagyaguta ukon oposisyon? Ano nga mga dinalan sa sining mga bersikulo ang makabulig sa imo kon pamatyag mo ginapigos ka? Pamensara nga isulat kon paano ka ginasakdag sang Ginuo sa “madalom nga tubig” sa imo kabuhi.

Doktrina kag mga Kasugtanan 127:5–8; 128:1–8

“Kon ano man ang inyo nasulat sa duta igasulat sa langit.”

Samtang ginabasa mo ang Doktrina kag mga Kasugtanan 127:5–8; 128:1–8, magpangita sang mga rason kon ngaa ginhatag sang Ginuo kay Joseph Smith ang amo kaid-id nga mga instruksyon parte sa paglista sang mga bunyag para sa patay. Ano ang ginatudlo sini sa imo parte sa Ginuo kag sa Iya buluhaton? Paano sa banta mo magamit ining instruksyon sa kaugalingon mo nga mga rekord sa pamilya, pareho sang personal nga mga journal?

Ang pag-alagad sa templo para sa aton mga katigulangan nagabugkos sang aton mga tagipusuon sa ila.

Doktrina kag mga Kasugtanan 128:5–25

Ang kaluwasan sang akon mga katigulangan importante sa akon kaluwasan.

Klaro sa ginpahayag sang Dios kay Joseph Smith kon ngaa ang aton mga katigulangan nga wala pa mabunyagi sa sining kabuhi nagakinahanglan sa aton: ginabunyagan kita sa ila lugar para makapili sila kon batunon ukon sikwayon ini nga ordinansa. Pero gintudlo man sang Propeta nga ang kaluwasan sang aton mga katigulangan “kinahanglanon kag importante sa aton kaluwasan.” Samtang ginabasa mo ang Doktrina kag mga Kasugtanan 128:15–18, hunahunaa kon ngaa amo sina.

Ang bersikulo 5 nagatudlo nga ang ordinansa sang bunyag para sa patay “ginhanda antes pa gintuga ang kalibutan.” Ano ang ginatudlo sining kamatuoran sa imo parte sa Ginuo kag sa Iya plano? Ano ang ginadugang sang mensahe ni Elder Dale G. Renlund nga “Family History kag Buluhaton sa Templo: Paghugpong kag Pagpaayo” sa imo pag-intiendi? (Liahona, Mayo 2018, 46–49).

Gingamit ni Joseph Smith ang mga dinalan pareho sang “gahum sang paghugpong,” “kaw-id nga nagaangot,” kag “perpekto nga pag-isa” kon magtudlo parte sa mga ordinansa sang priesthood kag bunyag para sa patay. Pangitaa ini kag ang pareho nga mga dinalan samtang ginabasa mo ang Doktrina kag mga Kasugtanan 128:5–25. May madumduman ka bala nga mga bagay nga pwede mo gamiton para ilaragway ining mga dinalan, pareho sang kadena ukon lubid? Ngaa maayo ini nga mga dinalan para ilaragway ini nga doktrina?

Ang pagpamensar sang masunod nga mga pamangkot mahimo nga makabulig sa imo pagtuon sining mga bersikulo:

• Sa imo opinyon, ngaa ang bunyag para sa mga patay makabig nga “labing mahimayaon sang tanan nga topiko nga kabahin sang wala’y katubtuban nga ebanghelyo”? (bersikulo 17). Ano nga mga eksperiyensya ang nakabulig sa imo nga mabatyagan ang amo sini?

• Sa ano makabig ang duta nga ginsumpa kon wala sang “kaw-id nga magaangot sang mga amay sa mga anak”? (bersikulo 18).

• Ano ang nanamian mo sa mga pulong ni Joseph Smith sa mga bersikulo 19–25? Sa ano nakaapekto ining mga bersikulo sa imo nabatyagan parte kay Jesucristo? sa pag-alagad sa templo para sa imo mga katigulangan?

Pagkatapos nga tun-an ining mga bersikulo, mahimo nga nabatyagan mo nga may dapat ka himuon para sa imo mga katigulangan. Ang mga ideya sa FamilySearch.org makabulig.

Maggamit sang kaanggid nga mga balasahon sang Simbahan. Ang mga link sa mga outline sa Dali, Magsunod sa Akon nagahatag sang mahapos nga access sa mga balasahon nga makabulig sa imo nga maintiendihan kag ipangabuhi ang mga kamatuoran sang ebanghelyo ukon aksyonan ang mga pagpabatyag sa imo. Halimbawa, ang link sang FamilySearch sa ibabaw nagadala sa imo sa mga hilimuon pareho sang pagsugod himo sang imo family tree, pagpangita sang mga katigulangan nga nagakinahanglan sang mga ordinansa sa templo, pagpangita kon diin naghalin ang imo mga katigulangan, ukon pag-upload sang istorya sang pamilya.

“Isa ka Mahimayaon kag Matahum nga Panigana.”

Siling ni Pangulong Gordon B. Hinckley:

Ang Pagbayad-Sala ni Jesus para sa tanan nagarepresentar sang dako nga sakripisyo para sa iban. Ginpakita Niya ang sulundan kon diin Sia nangin proxy para sa tanan nga katawhan. Ini nga sulundan kon diin ang isa ka tawo pwede mag-akto para sa iban ginahimo sa mga ordinansa sa balay sang Ginuo. Diri nagaserbisyo kita para sa mga napatay nga wala sang ihibalo parte sa ebanghelyo. Ara sa ila ang opsyon nga batunon ukon sikwayon ang ordinansa nga ginhimo. Ginapahamtang sila nga patas sa mga nagakabuhi sa duta. Ang mga patay ginahatagan sang pareho nga oportunidad sa mga buhi. Sa liwat, daw ano kamahimayaon kag katahum nga panigana sang Makaako paagi sa Iya rebelasyon sa Iya Propeta” (“The Great Things Which God Has Revealed,” Liahona, Mayo 2005, 82–83).

Mga Ideya para sa Pagtudlo sang mga Kabataan

Doktrina kag mga Kasugtanan 126:3

Makabulig ako atipan sang akon pamilya.

• Pwede mo ipaathag ang dinalan nga “hatagan sing maayo gid nga pagtatap ang imo pamilya” (bersikulo 3) kag istoryahan upod sa imo kabataan kon ano ang buot silingon sang hatagan sang maayo gid nga pagtatap ang aton mga pamilya.

  Chapter 50: The Saints in Nauvoo: January–July 1841

• Basi mangin masadya sa inyo sang imo kabataan nga magtan-aw sang mga litrato sang pamilya (ukon drowingon ang inyo pamilya) samtang ginahambalan ninyo ang mga paagi nga makabulig kita “tatap” sa mga miyembro sang pamilya.

Doktrina kag mga Kasugtanan 128:5, 12

Ang tanan nga anak sang Dios kinahanglan sang tsansa nga mabunyagan.

• Hagara ang imo kabataan nga hibal-on sa Doktrina kag mga Kasugtanan 128:1 kon ano nga topiko ang ginapaligban ni Joseph Smith. Pwede man nila pangitaon sa bersikulo 17 kon ano nga topiko ang ginakabig niya nga “labing mahimayaon.” Ipaistorya sa ila ang ila makita kag hambali kon ngaa makalilipay kaayo ini nga topiko.

• Dugang pa sa pagbulig handa sang imo kabataan para sa (kag pagpangabuhi sang) ila kaugalingon nga mga kasugtanan sa bunyag, pwede mo sila buligan nga mahibal-an kon paano buligan ang mga tawo nga wala makabaton sini nga mga kasugtanan sang buhi pa sila. Pamensara nga iistorya sa imo kabataan ang parte sa kilala mo nga napatay na nga wala pa mabunyagi. Dayon pwede ninyo basahon sing ululupod ang Doktrina kag mga Kasugtanan 128:5 kag magtan-aw sang litrato sang tulugmawan sa templo (pareho sang ara sa katapusan sining outline). Sugiri ang imo kabataan kon ano ang imo nabatyagan sang ginbunyagan ka sa mga templo para sa mga tawo nga napatay na para ang tanan may tsansa nga makahimo sang mga kasugtanan upod sa Amay nga Langitnon.

Doktrina kag mga Kasugtanan 128:18

Gusto sang Amay nga Langitnon nga tun-an ko ang parte sa akon family history.

• Basi mangin masadya para sa inyo sang imo kabataan nga maghimo sang papel nga kadena nga may ngalan sang mga ginikanan, mga lolo/lola, mga lolo/lola sa tuhod, paidalom (tan-awa sa pahina sang kahiwatan sining semana.) Dayon pwede ninyo iistorya sa kada isa kon ano ang inyo nabal-an parte sining mga katigulangan. Basaha sing ululupod ang Doktrina kag mga Kasugtanan 128:18 para mahibal-an kon ano ang “kaw-id” nga nagahimo sa aton family history nga “bug-os kag kompleto.”

  Courage: I Think I Get It From Him

  Learn about your ancestors strengths to discover your own strengths.

• Ang dugang nga aktibidades nga makabulig sa imo kabataan nga magpartisipar sa family history makita sa “Ang Templo kag ang Plano sang Kalipayan” sa appendix B ukon sa FamilySearch.org.

Ang mga ordinansa sang templo nagabulig sa aton nga mag-isa ang mga pamilya pareho sang mga kaw-id sa kadena.

Para sa dugang nga mga ideya, tan-awa sa isyu sang Abyan nga magasin sini nga bulan.

Ang tulugmawan sang Templo sang Ogden Utah